Luqas 24
24
Yesus Kitun Kabi
(Mat. 28:1-10; Mar. 16:1-8; Yoha. 20:1-10)
1Guddani wono wonsa waassiise mashka meya hoossisete shittooson ephere ek moogaaski hamete. 2Moogaasta uktera kuni shu'aas bukalera kunfeen danete. 3Sinuntano moogaassi mogire biyeten Yesusni dugnooson aane danoto. 4Han bar aambanso iyaat diinqesefeen akamanon palpalu chaaret yere maya mayo hep asu baasso tesha yere. 5Mashka meya digsefaat daassi biyefeen asusakito baassok ekka yi: «Hayew sina barin awuniron kituni meeni ganeyaassin sholedifetirin? 6Bar kabi! Hantak aafe. Galiilaki feena kabaasik awu makenamato yaadatoti. 7‹Asuni Naa boor'ni meeni kushuussi aattere imtonak, suuttonaknawa keessinari wono kitun kabunakna sholsu› yire makenar faar.»
8Mashka meya dey Yesus makena kaamaason yaadatesete. 9Moogaasi estan wolsere biyete baron zuutire asire isse nawobaasiknawa oom meyakna maksete. 10Es baron wosini meyak maksees megdelawitki Maarami, Yohannanewa Yaqobna asi into Maarami, dey ooma mashka meya feeseter. 11Sinuntano baasso mashka meya maksete bar miitone faar sinna bestena boor'a aane amantosoto. 12Sinuntano Phexiros kabi moogaaski eeli. Esta kar'faat sir mogire biin sesa kinoni maamaas bar bar kunfeen biyaat diinqet wolle keer ye.
Yesus Hep Nawoni Meyak Uphe
(Mar. 16:12-13)
13Es wono nawoni meyaassin hep asu kabire Yerusalemun asire heppe kiilo meetiri wokba faana Hemawos yiste ke'esi hamedifer. 14Baasso dey sina chowaason zuuttambaase kabgire wolumsedifer. 15Es chowaason safaretnawa wolletna feeseten Yesus tai'sere baassoneen hamdifer. 16Sinuntano aafbesiisik biyefet bar oo sinnamato aane arsoto. 17Yesus dey: «Ugunne hamfaat nittotna nittotna wollefeti wuzaas aambanso?» yi. Baasso dey suumere shaakkire yessete. 18Baassossin isa Keleyopha yistefe asus ekka yi: «Hangnettaki wonaassi han Yerusalemuk sina chowaason arunoy asu nenenetu irbawa.»
19Bar dey: «Sina chowaas aambanso?» yi. Baasso dey ekka yisete: «Naaziretki Yesusniista zagte barwa. Bar Ha'onewa asu zuuttambaase asi sinana wostoknawa kaamakna chim raajjuwa. 20Barin maagni gaanynyanawa innotin ha'sife baassotna kituni mangsu kar'e aatire imere suutete. 21Sinuntano inno Israelnon furonirwa yira abdi zaginiis baringwa. Es bar sinnanneen hawung keez wonawa. 22-23Inno ganeyaassin isa isa mashka meya innotin diinqisisetewa. Baasso wonsa waasi ek moogaaski hamere dugnobaason turuksete. Wolsere bar hayew sinbaason make Ha'oni wosini kaama odesenamato innok maksete. 24Inno ganeyaassin isa isa meya ek moogaaski hamme es mashka meya makseteesimato sinin biyete. Sinuntano Yesusnin aane biyoto.»
25Yesus dey baassok: «Nitto yaadatonoornawa raajjuni meya maksete baron amanok nibnitiis taptonor. 26Kiristoos han shanaason ephphetoonaknawa den ulfinbaaski girunak aane sholsifano?» yi. 27Estan Museni tumaassinnawa raajjuni meeni tichaassinna kabgire barik tichche baron korto ticha zuuttambaase asiissin kisaafe assi.
28Baasso hamefe ke'eessi tai'sesefe kabaasik Yesus aatte hamninne feer sinne baassok beste. 29Sinuntano baasso: «Gerok waali, awaas dey giridifar sinna boor'a innoneen ha'uwa» yit chinire shiiphsete. Bar dey baassoneen ha'uk keer giri. 30Baassoneen ane muuk di. Tushaason dey ephphe galattefaat batte imi. 31Es kabaasik aaffesiis gachchen Yesus sinbaason arsete. Sinuntano bar baasso sinan tishi. 32Baassotna baassotna dey: «Ugnaasta faani innotin wolumsit kayma tichaassin kisaafe maken nibniison geenimato matanoso?» yisesete.
33Es kabaasik kabsere Yerusalem wolle hamete. Estak asire isse nawobaasnawa baassoneen feese baassotna asin isarik zuuttere feeseten danete. 34Baasso dey: «Daamiis futok kabiwa! Simoonniknu bestewa» yisete. 35Es hep nawoni meya ugnaasta sina barewa Yesus tushaason batfena kabaasik aakkak arsetematona maksete.
Yesus Nawobaasakitonik Beste
(Mat. 28:16-20; Mar. 16:14-18; Yoha. 20:19-23; Wos. 1:6-8)
36Es baron wolumsefeen Yesus bar ganebesiissi yerefaat: «Naga nittok sinfawung!» yi.
37Sinuntano baasso nayere kita biyetenne faar sinfaan digak tuumete. 38Yesus dey ekka yi: «Awuniron nayedifetirinso? Awagan nibnitiissi mamefaso? 39Kushunaasewa wochonaase asin biiti. Taptira ta sinnaason aruti. Taan biifetiisimato kitaas ashnewa megane barki aafawa.»
40Es baron makefaat kushubaasewa wochobaase asin baassok besi. 41Baasso dey giraknawa diinqokna tuumefaat bar sinbaason aane amanosoto. Yesus dey ekka yi: «Isa maastoni wuza faaroso?» yire mamsi. 42Baasso dey kiichcho kurxummi imete. 43Bar dey ephphe baasso sinak me.
44Yesus ekka dey yi: «Nittoneen ane faana kabaasik Museni tumaassi raajjuni meeni tichaassinawa gaamni tichaassina taak tichche bar zuuttera ko'unak sholsu yira nittok makenaas haniiswa» yi.
45Es kabaasik korto tichaason yaadatsonek nibbesiison gachi. 46Ekka dey yi: «Kiristoos shana ephphetoonamatonawa keezsinari wono dey kitun kabunamatona zeemma tichchera faar. 47Esiisimato dey Yerusalemun kabira dara zuuttambaase asik harminewa boor'ni fakine basa sunaasik awastonir yistera tichche. 48Es barik nitto zaalwa. 49Ta abataas nittok imna abdiison nittok wosuna. Nitto dey denun hugna imtona kabaneen Yerusalem katamaassi footi.»
Yesus Den Sama Hami
(Mar. 16:19-20; Wos. 1:9-11)
50Esseen orfo nawobaasakitonin ephphe Bitaniya hami. Kushubaason kabgire baassotin suusi. 51Suusfet baassostan oor kesse den sama hami. 52Baasso dey barik kaa'nere akama girak Yerusalem wolle hamete. 53Ha'ooson galattet wonna wonna betemeqdesiissi aane tishisefe.
Избрани в момента:
Luqas 24: YemsaNTL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
The Word for the World Northern Africa