Yohannis 6
6
Yesus Uuch Kum Arqasunin Muu Maasi
1Esseen orfo Yesus Tiberiyados yistefa Galiilani baarisi yesalo hami. 2Mettanni meyanon fatuk zagina biistera artonoy wuza biisete boor'a showo dara barki hamete. 3Yesus nawoni meyaneen ane aamaasta kesse di. 4Ayhudni faasikani heeboos tai'sera faar. 5Yesus showo dara barki yeesefeen kaanne biyaat Filiphosnin: «Han baasso muusonek tusha Ayin waagonirinso?» yi. 6Bar zaguna baron arifet Filiphosnin fattanok es baron mamsi. 7Filiphoos: «Garo garonon isa isarbesiis muusonek hep tiya wona wosuste wostoni waagni#6:7 Hep tiya diinari. birrik waagte tusha aafawa hoorona wuza» yire wolgi. 8Nawobaasakitonisin isaas Simon Phexirosni ay sina Andriyas Yesusnik ekka yi: 9«Uuch muuma tushnewa hep kurxummine epho naa hanta feerwa. Sinuntano effetena daranik Awagira kar'ni?» 10Yesus: «Asuni meya duusonek zagutiwa» yi. Estak akama kuwa faar. Es diise baassossin arqasus uuch kum sinnir. 11Yesus uuch tushaason ephphe galattefaat diise baassok hooroniison haa'osonek nawoni meyak imi. Kurxummiison dey esiisimato. 12Meesere gawsetenneen orfo Yesus nawoni meyanon: «Isanne zigunoynamato fu'tana battooson zuututiwa» yi. 13Baasso dey maaste uuch hagewni tushaastan fu'te batto zuutire asire heppe masa tuumi. 14Estan kabi chowa asuni meya Yesus zagina biistera artonoy wuzason biyeteese: «Han bar futok han daasta yoonak fe raajjuuswa» yisete. 15Es bari boor'a Yesus yeesere barin ephere taato zaguk sholsetemato arifaat hepsa wolle bar bar den aamaasta hami.
Yesus Akaasta Taarire Kuti
16Waalfana kabaasik nawoni meya yeet baariiski kersete. 17Goonuussi diisere baarisi yesalo Kifirnahom finak kabsete. Es kaba talmera faar. Yesus dey baassoki aane yowe. 18Akama hugnabare yere siru sirit faar sinna boor'a baariis shorke. 19Uuch wedey issun kilometrine#6:1910,000 hamma 12,000 woriya sinana. faaron hametenneen orfo Yesus akaasta taarire kutit goonuuski tai'sefena kabaasik baasso biyaat digsete. 20Sinuntano bar: «Tawa! Digotiita!» yi. 21Bar goonuussi girire duunak sholsete; geregerenu goonuus hamme kar'one dimaasta kar'i.
Yesus Kaani Tusha
22Wonotirik baarisi yesalo yere daraas isa goonu tano estak ooma goonu aafa sinnamatonawa nawoni meya baasso baassotu hamerteno Yesus baassoneen aane giruwe sinbaason arsete. 23Sinuntano ooma goonuusikito Tiberiyadosni katamaassin Yesus suusna tushaason meesete dimaasi tesha yeesete. 24Asuni meya dey Yesus wedey nawoni meya estak aafsato sinbesiison araat goonuusikitosi diisere Yesusnin sholset Kifirnahom wolsete. 25Es baarisi teshan danere: «Assinynyano! Hanta aagenso yaatari?» yisete.
26Yesus wolgire: «Futo nittok makefawungwa, taan sholetiis tusha maara gawseti boor'atano biistera artonoy wuza biiti boor'atawa. 27Tishuni tushaasik wostotiitawa. Sinuntano Asuni Naa nittok imana koi'ba foonto kaak sinni tushaasik wostoti. Aba Ha'oos artoni maatama basaasta ichi.»
28Baasso dey: «Eekin Ha'oosi wostonon wostonik awu zagunik sholsifaso?» yisete.
29Yesus wolgire: «Es Ha'oosi wostoos bar wosina barik amanotikwa» yi.
30Es bari boor'a baasso dey ekka yisete: «Ese, inno biira amanonik ne aro biistera artonoy wuza zagutasso? Awunu wostotasso? 31‹Muusonek den saman tusha baassok imiwa› yistera tichchenaasimato abaniisakito ichma daassi Manna#6:31 Israelni meya ichma daassi Manna saman keren meesete. meesetewa.»
32Yesus ekka yi: «Futo nittok makefawungwa, saman tusha imaas Musetewa. Futoni tusha saman imniis Abataaswa. 33Ha'oosi tusha barnu saman kerera han daastaki fe asunik dey kaa imnirwa.» 34Baasso dey: «Daamniiso! Es tushaason wonna wonnatu imatawa» yisete. 35Yesus baassok ekka yi: «Kaa imni tusha tawa. Taaki yooni bar [kaa] isanne aafa maktona wuza. Taak amanefe bar wonna wonna isanne aafa iktona [kaa] wuza. 36Sinuntano taan biira amano beynitiisik han baron nittok makengwa. 37Abataas imna baasso zuuttere taaki yoosone. Taaki yoosoni baassotin dey isanne gerakalo aafa kisuna wuza. 38Ta sholena baron zagunaktawa, taan wosi basa safaranon zagunaktu saman kerengwa. 39Taan wosi basa safara taak imna baassotin zuutira isanne tishkunoynamato mangsuni kar'ni wono kitun kabgunakwa. 40Abataasa safara Naasin biire barik amanefe baasso zuuttesere koi'ba foonto kaa danonekwa. Es baassotinnu ta mangsuni kar'ni wono kitun kabgunawa.» 41Ayhudni meya dey: «Saman kere kaani tusha tawa» ubaasik unyisete. 42Ekka dey yisete: «Haniis ababaasinnawa intobaasona arifeni Yosefni naa Yesustenoso? Eekin aakkak: ‹Samantu kerengwa› yifeso?» 43Yesus wolgire ekka yi: «Nittotna nittotna unyutiitawa. 44Taan wosi abataas zataananetano oonu taaki yook aafawa chimanawuza. Ta mangsuni kar'ni wono barin kitun kabgunawa. 45Raajjuni tichaassi: ‹Zuuttambesiise Ha'okin arir sinonewa› yistera tichche. Esenu Abaaskin odere ari bar zuuttere taaki yoona. 46Ha'ooskin sina shakaanane Abaasinnu biyar oonu aafewa. Abataaskin sina bar bartu biyarwa. 47Futo nittok makefawungwa; Taak amanefe bar koi'ba foonto kaaba faarwa. 48Kaani tusha tawa. 49Abantiisakito ichma daassi Manna meesete. Sinuntano kitisete. 50Saman kere tushaas haniiswa, Es tushaason muuni bar aafa kituna wuza. 51Saman kere kaa imni tusha tawa. Asu han tushaason meefaanane koi'ba foonto kaaktu foona. Han daasi asunik kaa sinanak ta imana tushaas ashnaaswa.» 52Ayhudni meya dey: «Han asus ashbaason innok aakkak imak chimnirinso?» yit baassotna baassotna mai'sire karakkarsete. 53Yesus baassok ekka yi: «Futo nittok makefawungwa; Asusa Naani ashaason muu shakaatine harinbaason dey usha shakaatine [Es maa'a sina ashnaason] nitto kaanti aafawa. 54Ashnaason meefe barnawa harinnaason ushfe barna koi'ba foonto kaaba faarwa. Ta koi'baasi wono barin kitun kabgunawa. 55Ashnaas futoni muu, harinnaas dey futoni ushawa. 56Ashnaason meefe barnawa harinnaason dey ushfe barna taneentu foona. Ta dey barneentu foona. 57Hayew abataas taan wosinamato ta dey barkin kabi chowa hayew sinnamato ta ashaason meefe bar dey taakin kabi chowa hayew sinana. 58Saman kere tushaas haniiswa. Abantiisakito saman kere tushaason meesere kitiseteysimatotawa. Han tushaason meefe bar koi'ba foonto kaaktu foona.» 59Yesus Kifirnahomuk assifena kabaasik han baron Ayhudni shiiphoni keyaassik make.
Koi'ba Foonto Kaani Kaama
60Nawoni meyaassin showobesiis odesefaat: «Han bar chima wollawa. Oonso ephphetook chimniri?» yisete. 61Sinuntano Yesus nawoni meya es kaamaasik unyisetemato nibbaassi arifaat ekka yi: «Han bar tuusa'suniroso? 62Eeka Asuni Naa zeemme den feenaasta hamfeen biifeti kabaasik awu utisso? 63Kaa imfaas Ha'oosi Ayyanawa; asuni hugnaas isanne aane ke'fawa. Ta makena kaamaas kaa imfa Ayyananewa kaanewa. 64Sinuntano nittoossin amanonor isa isar feeseter» Yesus baassossin amanonor oo sinnamatonawa barin aatire imniis oo sinnamatona zeemmenu arire feer sinna boor'a es baron make. 65Tusire dey: «Abaaskin imtonoynaron oonu taaki yook chimnir aafe sinna boor'atu es baron makengwa» yi. 66Esseen orfo nawoni meyaassin showobesiis orfo wolsere barneen ane aane hamoto. 67Yesus asire heppe nawobaasakitonin: «Nitto dey wolla hamatik sholefetiyoso?» yi. 68Simon Phexiros: «Daamtaaso, ooki wolla hamanirinso? Neeki koi'ba foonto kaa imfa kaama faar. 69Ne Korto Ha'oosi Naa sintamato amaneni dey ariniwa» yi. 70Yesus wolgire: «Nitto asire heppeesin koriis tatenoso? Nittoossin isaas Dabuloswa» yi. 71Es yina bar dey Simonni naa sina Asqorotki Yuudaningwa. Asire heppe nawoosasin isaas sinfenaknu aatire imniis bar sinna boor'atu make.
Избрани в момента:
Yohannis 6: YemsaNTL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
The Word for the World Northern Africa