Kitaaba Seera Dadaa 26
26
Yisihaq Qachaa Geraarii Keessa Le'e
1Beela bara Abrahaamii biyyatti buute malee, beelti dhibiin biyyatti buute. Yisihaqille gara Abiimelekii mootii Filisxeemotaa, qachaa Geraarii dhaqe. 2Mootiin Waan Maraa Yisihaqitti mudhatee, «Lafa ani akka ati keessa leetu sitti himu keessa le'i malee, gara biyya Gibxi'ii gad hin bu'in. 3Lafuma tana keessa turi! Anille si woliin hin jiraadha; si'ille hin eebbisa. Ani lafa tana mara si'ii fi sanyii teetii kennee, kakuu abbaa keeti Abrahaamiif kakadhe hin muummessa. 4Ani sanyii teeti akka urjoota gubba'aa baceessee, lafa tana maralle isaanii hin kenna; gosi adda addaa ta lafa irraa martinuu karaa sanyii teetiitiin hin eebbifanti. 5Sababa Abrahaam naaf ajajamee, ajaja kiyya, seerata kiyyaa fi seera kiyya eegateef, ani si hin eebbisa» jedhe.
6Maarre Yisihaq Geraar keessa le'e. 7Namooti addee sanii marroo niitii isaa yennaa isa gaafatane, «Isiin obboleettii tiyya» jedhe; isiin dansittii waan teeteef, namooti addee sanii Ribqa'aaf jedhanee na ijjeesan jedhee, «Isiin niitii tiyya» jedhuu sodaate. 8Yisihaq yennaa hedduu achi tureen duuba, gaafa tokko mootiin Filisxeemotaa Abiimelek foddaa manaatiin gad ilaalee, Yisihaq niitii ifii Ribqa'atti riiqatuun#26:8 Riiqatuun: Yookiin rirrigatuu. dhagge. 9Tanaaf Abiimelek isa waansisee, «Dhugumaan isiin niitii teeti! Ati maaf, ‹Isiin obboleettii tiyya› jette ree?» jedhee isa gaafate.
Inni deebisee, «Sababa isi'iitiif na ijjeesan jedhee yaadee ti» jedhe.
10Abiimelekille, «Wonni ati nu irratti hujje kun maan? Namoota keessaa tokko niitii teeti woliin silaa diqquma hin rafin hafe; nu'ulle yakkaameyyii gootee dhadde» jedhe 11Achiin duuba Abiimelek, ajaja baasee, «Eennulle namicha kana yookiin niitii isaalle yoo tuqe ijjeefamuu ti» jedhee namoota mara ifi eeggachiise.
12Yisihaq lafa sanitti midhaan facaasee, wogguma san dachaa dhibba galfate; Mootiin Waan Maraa waan isa eebbiseef, 13inni dureessa te'ee, haga guddoo tujaara te'utti tujaarummaan isaa ittuma guddataa ideente. 14Inni loon, hoolota, re'ootaa fi tajaajiltoota hedduu waan qabuuf, worri Filisxeemotaa isa hinaafe. 15Tanaaf isaan boolla bisaanii ta adoo abbaan Yisihaqii Abrahaam jiruu, tajaajiltooti Abrahaamii qotane mara biyyee itti guutanee duuchane. 16Achiin duuba Abiimelek, Yisihaqiin, «Ati nu caalaa guddoo hunnaamessa teeteerta, nu irraa deem» jedheen. 17Maarre Yisihaq achii deemee, dhooqa Geraarii keessa qubatee, achi le'e. 18Yisihaq boolla bisaanii ta tajaajiltooti Abrahaamii abbaa isaa qotaneeranu, ta worri Filisxeemotaa Abrahaam du'een duuba duuchane, deebisee qochisiisee, maquma abbaan isaa dur baase innille itti baase.
19Tajaajiltooti Yisihaqii dhooqa san keessa qotanee madda bisaanii dhaggatane. 20Tissitooti worra Geraarii, «Bisaan kun keenna» jedhanee, tissitoota Yisihaqii woliin wol falmane. Waan isaan bisaan wol falmaneef, Yisihaq maqaa boolla bisaanii san, «Eseeq»#26:20 Eseeq: Afaan Ibrootaatiin Falmuu jechu'u. jedhee baase.
21Achiin duuba tissitooti Yisihaqii boolla bisaanii dhibii qotanee, isii irralle'etti falmii kaasane; maarre Yisihaq boolla bisaanii san, «Sixinaa#26:21 Sixinaa: Afaan Ibrootaatiin Diinummaa jechu'u.» jedhee, maqaa baase. 22Inni achi irra dabaree boolla bisaanii dhibii qochisiise; isii irratti isaan wol falmii hin kaanne. Maarre inni boolla bisaanii san, «Amma Mootiin Waan Maraa addee badhoo nuu kenneera; nuutille lafa tana keessatti hin horra» jedhee, maqaa boolla bisaanii san, «Rehobot»#26:22 Rehobot: Afaan Ibrootaatiin: Addee Badhoo jechu'u. jedhee baase.
23Yisihaq achii ka'ee, gara qachaa Bersheeba'aatitti ol baye. 24Mootiin Waan Maraa gaafuma san halkan, isatti mudhatee, «Ani Waaqa abbaa keeti Abrahaamii ti; ani si woliin waan jiruuf, hin sodaatin. Tajaajilaa kiyya Abrahaamiif jedhee si hin eebbisa; sanyii teetille hin baceessa» jedhe. 25Maarre Yisihaq achitti addee ciinca'aa ijaaree, maqaa Mootii Waan Maraa waammate; inni achitti qubatee, tajaajiltooti isaalle boolla bisaanii achitti qotane.
Wolii Galtee Yisihaqii Fi Abiimelekii
26Achiin duuba Abiimelek, gorsaa ifii Ahuzaatii fi ajajaa loltoota ifii Fikool woliin qachaa Geraariitii bayee gara Yisihaqii dhufe. 27Yisihaq isaaniin, «Ana jibbitanee eega na ariitane, isin maaf gara kiyya dhuttane ree?» jedhe.
28Isaan deebisanee, «Mootiin Waan Maraa akka si woliin jiru qulleeffannee dhaggineerra; tanaaf kaku'uun wolii galtee godhatuu barbaanna. Gondooroon si woliin nuuti godhuu barbaannu 29akkuma nuuti adoo si hin tuqin, waan dansaa sii goonee, nageyaan si lakkinne, akka atille nu hin miine. Amma Mootiin Waan Maraa si eebbiseera» jedhane. 30Achiin duuba Yisihaq sagalee isaaniif qopheessee, isaanille nyaatanee unane. 31Boruyyaa bari'iin ganama ka'anee, woliif kakatane; Yisihaqille isaan geegessee, nageyaan isa biraa deemane.
32Guyyuma san tajaajiltooti Yisihaqii dhufanee, marroo boolla bisaanii ta qotane sanii isatti himanee, «Bisaan dhaggineerra» jedhane. 33Inni boolla bisaanii san, «Sheebaa#26:33 Sheebaa: Afaan Ibrootaatiin Kakuu Yookiin Torba jechu'u.» jedhee maqaa baase. Maqaan qachaa sanii tanaaf haga adhaa, «Bersheebaa» jedhamee waamama.
Esaawu Durra Ormaa Fuudhe
34Esaawu yennaa woggaa afurtama geye, Yoditii intala Berii nama gosa Heetiitii fi Basmaatii intala Eloonii nama gosa Heetii fuudhe. 35Dubartooti tun Yisihaqii fi Ribqa'atti gadda guddaa fidane.
Избрани в момента:
Kitaaba Seera Dadaa 26: guj
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
The Word for the World International and Bible Society of Ethiopia