MATEYO 5
5
1PAKAMONAYI lolo bimbukuma, akabanda pa lupongo, yi pakadi amaxikama, beyi banci bakalwa kudiyi ; 2yi akadipula musuku ănci yi akabeyesa ene,
3Balwangwasanibwi ndo bakombi ku micima, bwalo budi bufumu bwa diulu bwabo. 4Balwangwasanibwi ndo bobo badila, bwalo bunabondebwabo. 5Balwangwasanibwi ndo bena diedya, bwalo bunakitabo loboko. 6Balwangwasanibwi ndo bobo batani yi ncala yi nyota ya nkwami, bwalo bunakwokutabo. 7Balwangwasanibwi ndo bena mwengo, bwalo bunasambaninibwabo. 8Balwangwasanibwi bobo badi yi babala ku micima, bwalo bunamonabo Ncembi. 9Balwangwasanibwi ndo basungwi, bwalo bunatambibwabo ene, bana ba Ncembi. 10Balwanngwasanibwi ndo bobo bamafinibwa ku mucwe ă nkwami ; bwalo budi bufumu bwa diulu bwabo. 11Balwangwasanibwi nonu, oka bamanutangola yi bamanufina, yi bamanudimbidila bwalo bwoso bubi butena sôsôlwo ku mucwe ămene. 12Nuxekyeleli yi nwakali yi kiango kingi, bwalo budi sayi yenu minene mu diulu ; bwalo bwakafinabo badimuxi nako bakadi ku buxi bwenu.
13Nonu nudi mukyeli ă loboko ; kaningă mukyeli ndo ămasaluka, unacudibwa yi kai ? Kausolelekyela kunyuma yi mudimo mwoso, kaninga unakwelebwa mutu yi unanyacibwa kudi bantu, muxi mwa makasa.
14Nonu nudi obo a loboko ; bula bwatekabo kulu kwa lupongo kabubiyi kusokokyebwa. 15Bantu lolo kabasonamika mwinda ndo kuuteka muxi mwa dikumbu, kate kulu kwa muci ă mwinda, yi unatekyela bantu boso obo badi mu ncibo. 16Obo enu akali mo nako ku meso a bantu, bixemonabo makisa enu anengela, bixetumbisabo Tetenu utani mu diulu.
17Kanukixi ene, meme napulwa kulwa xipa bwadi ndo meyi a badimuxi ; kiluli kuxipa pô, kate kufikisa. 18Bwalo bunwatôyela sôsôlwo ene, Pôi dituku dinancuka diulu yi loboko, kapanadika kantobo kamokamwe pô ndo kaxidi kamokamwe ka bwadi, pôi kikondo kinafikixibwa bintu bioso. 19Mbwôso muntu mwoso unaxipa mulangu umoumwe ă milangu yei mibende yi unakweyesa bantu noku unatambibwa mubende mu bufumu bwa diulu ; kaninga muntu mwoso unakwenca, yi unakweyesa milangu yei, unatambibwa munene mu bufumu bwa diulu. 20Bwalo bunwatôyela ene, kutena nkwami yenu yamadika nkwami ya bafundi ba mikanda yi baFalixi, kanunabwela mu bufumu bwa diulu pô.
21Nwamakwombwa mwakakwai mbidibwa bena kalikali ene, Kuxipi ; Mo muntu mwoso axipa unalelekyela yi lopelo. 22Meme pako nwatôyela ene, muntu mwoso alemowela muna kwanci kanana unalelekyela yi lopelo ; mo muntu mwoso unatôyela muna kwanci, ene, Laka (diyi dia lupolo), unakala yi bwalo kudi kikokye kia babakulu ; kaninga muntu mwoso unatôya ene, Mubolu, unalelekyela yi dilundu dia mudilu. 23Aka lolo owe walonga dilongi diebe ku kilongolelu, yi welela muna kwebe lukanyi koku utani yinebe bwalo, 24xiya dilongi diebe koku ku buxi bwa kilongolelu, yaka ya bondanani yi muna kwebe buxi, kunyuma pako unalwa longa dilongi diebe.
25Bondañana yi muntu mangwoso udi yinebe bwalo, pakala ukidi yinanci mu ncila, ximbi muna bwalo yinebe uxekulongola kudi musambodi a malo, yi musambodi uxekulongola kudi munami a misungi, yi owe uxekwelebwa mu ncibo a lukanu. 26Nkwatôyela sôsôlwo ene, kunabatuka momu pô binakala wamafuta mpalata nya.
27Nwamakwombwa mwakakwambidibwa ene, Kwendedi mukaxiabene. 28Kaninga meme nwatôyela, ene, muntu mwoso elela mwamukaxi meso ndo kumukyeba ku bwefi, amamwendela isanga nkyekyu mu mucima ănci.
29Aka lolo diso diebe dia kidyo dikwakumisa ndebwe, udipokoli, udiecikisi kudi ; bwalo budi yinebe loko ndo kiebe kicini kimokimwe kinafwa, kumoni mumbidi ěbe muncimancima kwelebwa ku dilundu. 30Aka lolo kianca kiebe kia kidyo kikwakumisa ndebwe, ukikali, ukiecikisi kudi ; bwalo budi yinebe loko ndo kiebe kicini kimokimwe kinafwa, kumoni mumbidi ebe muncimancima kwelebwa ku dilundu.
31Kwakakwambidibwa kabidi ene, Muntu mwoso unancula mukasanci, amupi mukanda ă dibakwa diamafwa. 32Kaninga meme nwatôyela ene, muntu mwoso ancula mukasanci kutena ku mucwe ă budibi, amamuteka kidibi ; yi muntu mwoso unangata you muncudibwi dibakwa udi yi budibi.
33Nwamakwombwa kabidi mwakakwambidibwa bena kalikali ene, Kudimbi pa kuteya ; encela Fumu biteyi biaputeya. 34Kaninga meme nwatôyela ene, Kanuteyi kiteyi pô ; kumoni kia diulu, bwalo budidio lukwasa lwa Ncembi ; 35kumoni kia loboko, bwalo budilu katanda ka makasa anci ; kumoni kia Yelusaleme, bwalo budibu bula bwa Fumu munene. 36Kuteyi kabidi kiteyi kia mucwe ěbe, bwalo butabiyi kukulumuna lunyonyi lumolumwe ndo ku susu ndo ku tululu. 37Kaninga diyi dienu diakali ene, ya, ya ; kanana, kanana ; diyi dioso diamadika dedi noku didi dia you a bubi.
38Nwamakwombwa mwakakwambidibwa ene, Diso ku diso, yi dinu ku dinu. 39Kaninga meme nwatôyela ene, kanutandi yi bubi kitumba ; kate muntu mwoso ukwakuma lupi ku ditama dia kidyo umukulumunini dinga kabidi ; 40you lolo akyeba kuya yinebe ku bwalo, kuya ncula mucwala ebe, umuxiyili kifunda kiebe kabidi. 41Muntu mwoso unakubamba dibambu dia kuya yinanci kilometa kimokimwe, yaka yinanci bibidi. 42You ukwalomba kintu, umupi ; you akyeba kukusombwa kintu, kumwedi nyuma.
43Nwamakwombwa mwakakwambidibwa ene, unananga muna kwebe, unanyañana you atanda yinebe. 44Kaninga meme nwatôyela ene, Nubanangi batanda yinenu, nubalwangwasani banwafinga, nubenceli kunengela banwanyañana, nubalombeli banwatangola, banwakolomona, 45binuxeakala bana ba Tetenu utani mu diulu ; bwalo bwabandisayi diba dienci kulu kwa bantu babi yi banengela, yi atuma mbula kudi bena nkwami yi bena kwona. 46Nonu ndo nwamananga bantu banwananga, nudi yi sayi kai ? Basangi ba milambu ka bencenca noku ? 47Aka lolo nwelela bena kwenu môyo batupu nwamadika banga bantu beci ? Basenci kabidi ka bakisa nako ? 48Mbwôso nonu nwakali bwokokya bea bidi Tetenu bwokokya udi mu diulu.
Избрани в момента:
MATEYO 5: Luna_NT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© La Société biblique de Genève