Matayɔ 8
8
Yeso uhiiso mombi ʉ keɓu‑keɓu
(Mak 1:40-45; Luk 5:12-16)
1Ati ngia Yeso a꞉ijo‑ɔɔ akʉ ɨkpangba, ungbutu wʉ ɓombi wɔɔ ʉja wi꞉nye nayɔ kʉkpata mbise ɓʉ ngboo.
2Mombi ʉ keɓu‑keɓu mʉngana ɓɔ, ambʉka kʉ ananɨ. Ambʉgbʉkʉmɨa nʉ muwuu apɛɛ angɔ, gʉ ɛyɔ nayɔ ɓɔ: « Huu Makʉʉɓɨɨ! Ndʉ wabaya, najaɓaka jaɓakanɨ. »#8:2 Jaɓaka: Inyi yɛngɔ ya ɓɔ mombi ʉ꞉hɨeni jɛnɛ kweso yɨ keɓu‑keɓu, ɓi꞉nye mʉpɨa tiga ɓʉɓɨɓɨ ngiɓangɔ kʉ pɨanɨ.
3Yeso ambuyumo ɨkɔndɔ ambumuɓoto. Ambumusigio ɓɔ: « Oo! Mʉ꞉kʉnda ɓɔ, jaɓanakɨa jaɓanakɨa! » Kʉ nɨma ngiinanɨ, ambʉjaɓanakɨa keɓu‑keɓu tʉkʉ ɓʉ ngwa.
4Yeso ambusigio mombi ngiinanɨ ɓɔ: « Kpɔ kpɔ kpɔ, wɔɔɓɨa mombi gʉkʉ mʉngana moni ngikʉnanɨ! Ɨkyɛmɨngana, sa kʉmaa apɛɛ ʉ kumu‑kumu ambʉnana. Kija wamunzo 'ʉtʉmbɨa kʉkpatanakɨa nʉ mapanʉ ngika Mʉsa a꞉tɨndakɨa, kʉpananiso ɓombi ɓɔ wʉhɨa hɨaa. »#8:4 Ɓɔ ndʉ mombi i꞉nye hɨa jɛnɛ keɓu‑keɓu inye sa tiga kʉmaa apɛɛ ʉ ɓakumu‑kumu kʉpana ɓɔ ʉhɨa hɨaa, ambʉ ɓʉmʉsɨa ɓata tiga kujunikio nʉ ɓangɛ kʉtɔ. Popoko Ɓal 13:45-46; 14:1-31.
Baya ngia yɨ ngama ʉ ɓasʉda
(Luk 7:1-10)
5Ati ngia Yeso a꞉kumunio‑ɔɔ amati ʉ gʉlʉ ʉ Kapelenaumu, ngama ʉ ɓasʉda mʉngana ʉ Ɓalɔma ambʉka anambamba angɔ. Kija a꞉mukikilikio ɓɔ ʉmʉsalɨa ɓaka. 6Gʉ ɛyɔ nʉ Yeso ɓɔ: « Makʉʉɓɨɨ! Mombi ʉ kuu ngiasɛmɛ anʉ kweso ɓʉkaɨ, ndʉtʉ ya꞉muwo pongo tʉkʉ ɓʉ kpɔjɔ, a tʉkʉ ambɛnɨ 'ʉkwaɨ ɓu kpruu, amati ʉ dyanɨa nadɨndɨ. » 7Yeso ambumutisio ɓɔ: « Makʉka nayɔ kuhiiso. »
8Ɨkyɛmɨngana, ɛyɔ ngama ngiinanɨ, ambumusigio ɓɔ: « Chʉkɔɔ, Makʉʉɓɨɨ! Mambʉkɔmʉ 'ʉkwananakɛ ikanzi ngia wakumunio‑ɔɔ andɛmɛ ambɛnɨ. Sigo tʉkʉ ɨngbaa yɨ moni mɨngana, ambʉ mombi ʉ kuu ngiasɛmɛ ʉhɨa tʉkʉ hɨaa. 9Jʉ ɛmɛ ma kʉ ɛsɨ ʉ ʉpanʉ wʉ ɓombi ngiɓa ɓa ekoo asɛmɛ. Nʉ ma kʉ nʉ ɓasʉda ngiɓa ɓa ɛsɨ ʉ ʉpanʉ nguʉsɛmɛ. Ndʉ masigio mʉngana ɓɔ: ‹ Sa! › Kʉ nɨma ngiinanɨ ambʉsa. Musigieni wɔmɔ ɓɔ: ‹ Ɨka aka! › Kʉ nɨma ngiinanɨ ambʉka. Nʉ, kʉndʉ musigieni mombi ʉ kuu ngiasɛmɛ ɓɔ: ‹ Kyɨa ɓɔ! › Akyɨa tʉkʉ ndʉ ananɨ. » 10Iya Yeso a꞉kɔ moni ngikʉnanɨ, yambʉmʉmbangɨa nadɨndɨ. Gʉ ɛyɔ nʉ ɓombi ngiɓa ɓi꞉nye nayɔ kʉkpata ɓɔ: « Maninu kusigio tʉkʉ kingono ɓɔ, ati ʉ ɓana ɓʉ Ɨsalaɛlɛ kʉ ɓuɓomu, mambʉnakɔmʉ sina mombi ʉ baya yɛɛ ɨja ngbanga ndʉ iya! 11Tʉkʉ kingono maninu kusigio ɓɔ, ɓombi ɓaja ɓa꞊ʉgwa sinani akʉ ɨpá yaaɓʉa‑ɛɛ nʉ akʉ yaakwa‑ɛɛ, kʉdyakaka ɨzɔ nʉ ɔɔ Abalama, nʉ Ɨsaka, nʉ Yakɔbɔ amati ʉ Ɓʉngama ngiɓa ɓa ekoo ɓisi. 12Ɨkyɛmɨngana, ɓombi ngiɓa ɓa꞉kwanana jɛnɛ kukumunio akʉ Ɓʉngama ngiɓʉnanɨ, ɛɓɔ ɓa꞊ɓugiso sina tiga aɓei amati umomo wɔɔ ʉja nadɨndɨ. Nani, ɓaɓio amati ʉ ndɨa nʉ dyana menu. »
13Mbise ɔngɔ, Yeso ambusigio ngama ngiinanɨ ɓɔ: « Sa! Yɨkyananakɨa, ngbanga ngbanga nʉ baya ngiisɔɔ. » Tʉkʉ kʉ ati ngiinanɨ, mombi ʉ kuu ngiinanɨ angɔ ambʉhɨa.
Yeso uhiiso ɓombi ɓʉ ɓakwisikiso ɓaja
(Mak 1:29-34; Luk 4:38-41)
14Iya Yeso a꞉kumunio amati ɨkáa ngia yɨ Pɛtɛlɔ, ambʉgbʉka inye ʉ moi angɔ ɓʉkwaɨ, ndʉtʉ nayɔ ɨzɛ ɓʉ kasu. 15Kija a꞉muɓoto ɨkɔndɔ, tʉkʉ nɨma ngiinanɨ ndʉtʉ ngiangɔ yambʉkataka. Kija moi ngiinanɨ a꞉ʉngwa ɨkʉʉ, ambufaniso nayɔ kyananakɨa.
16Tiga nɨpasɨ, ɓambʉka nʉ ɓombi ɓu mɨtʉma yɨ ɓabɨa ɓaja apɛɛ ʉ Yeso. Kija a꞉iso mɨtʉma yɨ ɓabɨa ngiinanɨ, tʉkʉ nʉ moni kɔɔ musige ɨsʉkʉɓwanɨ. Kija a꞉hiiso ɓombi ɓʉ ɓakwisikiso nga ɓɔmɔ kʉ ɓuɓomu. 17Moni ngikʉnanɨ ka꞉kyananakɨa tʉkʉ ndʉ aka ɨgbɛ Ɨsaya a꞉sigo jɛnɛ‑ɔɔ ɓɔ: « Ɛyɔ a꞉chɨka jʉnganaka ngiindɛsʉ, ambʉndanda ɓakwisikiso ngiɓʉndɛsʉ. »#Popoko Ɨsa 53:4
Yeso akʉyakanaka nʉ ɓombi ngiɓa ɓakʉnda nayɔ kʉkpata
(Luk 9:57-62)
18Ati ngia Yeso a꞉na‑ɔɔ ɓɔ ɓombi ɓaja ɓumukunguo ɓʉ kuu, ambutitio ɓakpataka ngiɓangɔ ɓɔ ɓʉtapʉa amondu ʉ yapuu yɛɛ ɨja. 19Tiga nani, mʉpananakɨa wʉ mapanʉ mungono wambʉka anambamba ʉ Yeso. Kija a꞉musigio ɓɔ: « Mʉpananakɨa, ma꞊nakpata mʉa kʉ uɓomu akʉ wabi‑ɛɛ. »
20Kija Yeso a꞉mutisio ɓɔ: « Ɓakakaa ɓa tʉkʉ nʉ mɨfɔkɔɓɔ, abana ɓunoi ngiɓa ɓaabʉmbʉa akʉ maba kʉ ɓisi ɓa tʉkʉ nʉ lɨkáa. Ɨkyɛmɨngana, ɛmɛ Mwana ngia ʉ Mombi mambʉkɔmʉ nʉ izi ngia mahumuo‑ɔɔ! »
21Mbise ɔngɔ, gʉ 'ʉkpataka nga wɔmɔ nayɔ ɓɔ: « Makʉʉɓɨɨ, ambʉ́ wʉnasɨa‑zʉ kʉsa kʉhʉna tidoo. »
22Yeso ambumusigio ɓɔ: « Sɨa mɨnda kʉhʉna mɨnda ngiindaɓʉ. Ɔwɛ, nakpata! »
Yeso ʉgbʉma mahuo wɔɔ ɓʉmʉ
(Mak 4:35-41; Luk 8:22-25)
23Mbise ngiinanɨ, Yeso ambuɗito akʉ ɨngbɔɔ. Ɓakpataka ngiɓangɔ ɓambʉsa ɨzɔ nayɔ.
24Ati ngia ɓi꞉nye‑ɔɔ kʉsa amati ʉ yapuu yɛɛ ɨja, ndʉ aka masigo‑ɔɔ aka, mahuo wɔɔ ɓʉmʉ nadɨndɨ wambufaniso pɨka. Mepo kambufaniso huo amati ʉ ɨngbɔɔ. Ɨkyɛmɨngana, Yeso tʉkʉ amati ʉ tɔɔ ɓʉ kpɛ.
25Kija ɓakpataka ɓa꞉ka nayɔ kʉjʉkaniso ɓambumusigio ɓɔ: « Huu, Makʉʉɓɨɨ! Tihiiso hiisoo, kakuwo! »
26Gʉ ɛyɔ naɓɔ ɓɔ: « Ʉɓa wʉ ɨmanɨ uwa wunihuo ɓwanɨ? Huu, inu ɓombi ɓʉ baya yɛɛ ɗɛkɛkɛ! » Mbise ɔngɔ, ambʉʉngwa ɨkʉʉ, ambʉngbaa nʉ mahuo nʉ yapuu kʉtaa. Gʉ mʉa tʉkʉ ɓʉ nyɛ.
27Moni ngikʉnanɨ kambʉmbangɨa ɓakpataka ngiɓʉnanɨ nadɨndɨ. Gʉ ɛɓɔ ɓɔ: « Ikanzi yɨ mombi tɨmanɨ iyakɛ ɓɔ abana tʉkʉ mahuo nʉ yapuu yamʉkɔ tʉkʉ kɔnɨ? »
Yeso uhiiso ɓombi ɓapɨnɨ ɓʉ mɨtʉma yɨ ɓabɨa
(Mak 5:1-20; Luk 8:26-39)
28Ati ngia Yeso a꞉tapʉa‑ɔɔ amondu ʉ yapuu yɛɛ ɨja, akʉ ɨkʉmbʉ yɨ Ɓagɛlasɛnɛ, ɓombi ɓapɨnɨ ngiɓa ɓi꞉nye ɓuhue nʉ mɨtʉma yɨ ɓabɨa ɓambʉka apɛɛ angɔ. Ɓombi ngiɓʉnanɨ ɓa꞉ʉngwa akʉ manzaʉ#8:28 Nanɨ, ɓi꞉nye hʉna mɨnda amati ʉ lihoo lʉ mukopi, ɓʉ꞉lɨtambanakeni liɗo. nʉ ɓi꞉nye ɓʉka‑ɓʉkaɨ nadɨndɨ, ikanzi ngia ɓɔ mombi ambikinye kanyo tii ɓata kʉɓaa ɨngbaa nani gʉkʉ ɓʉ kye.
29Ɓombi ɓʉ mɨtʉma yɨ ɓabɨa ngiɓʉnanɨ ɓambufaniso natɨa nʉ iyo yɛɛ ɓʉmʉ ɓɔ: « Mwana ʉ Asʉɓɨɨ! Iindɛsʉ ninu yɨkwa‑zʉ tanɨ? Ajʉ wʉka nisu kʉkyananaka tiga pɛɛ ʉ ɓisi ɓɔɔ ɓʉtɨnɛ 'ʉkɔmbɔ ɓiɛ? »
30Ʉna tɔ, imbi yɨ ɓanɛmbʉ yɛɛ ɨja, yi꞉nye kʉdyakanaka tine tine kʉ ananɨ. 31Kʉ ɓwanɨ, mɨtʉma yɨ ɓabɨa ngiinanɨ ya꞉kikilikio Yeso kusigo ɓɔ: « Kikiliki, winyeni nisu kiso, tɨtʉma ɓaka tʉkʉ amati ʉ imbi yɨ ɓanɛmbʉ ngiɓa. »
32Gʉ ɛyɔ naɓɔ ɓɔ: « Seni tɔ! » Kʉ ɓwanɨ, mɨtʉma yɨ ɓabɨa ngiinanɨ yambʉɓʉa amati ʉ ɓombi ngiɓʉnanɨ, yambʉsa kukumunio amati ʉ imbi yɨ ɓanɛmbʉ. Tʉkʉ nɨma ngiinanɨ, imbi yɨ ɓanɛmbʉ kʉ iɓomu, yambʉʉngwa nani yi꞉nyɛ‑ɔɔ ekoo ʉ mwanʉ ɨkpangba, yambʉsa kʉdʉka akʉ mepo kʉ yapuu ɓʉ ɗee.
33Iya ɓapɨmakɨa ɓʉ ɓanɛmbʉ ɓa꞉na moni ngikʉnanɨ, ɓambʉsa bangʉ kʉɓɨakɨa ɓombi kʉ ɓuɓomu akʉ gʉlʉ moni ngika Yeso a꞉kyɨa ɓombi ɓʉ mɨtʉma yɨ ɓabɨa.
34Kija ɓombi ɓʉ gʉlʉ kʉ ɓuɓomu ɓa꞉sa kʉgbʉka Yeso. Iya ɓa꞉mʉna nayɔ, ɓambʉmʉta ɓɔ ʉɓʉa akʉ gʉlʉ ngiʉndaɓʉ tʉkʉ kya.
Избрани в момента:
Matayɔ 8: BudKoya
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2021, Wycliffe Bible Translators, Inc.