Matìyò 11
11
Dzwan wə ù nyə̀ mwi m-à-zə̀ mìy kə twum yə̀ àghù awò Yesù
(Lukâs 7.18-35)
1Abù Yesù dzày mà tsə nəniy ayiə yə tsə̀təndii tə ìvəm nə̀ ghe tiy ibè kwu ani zəŋi, u ŋwò zù ani zù tyi dè àyiə anə tə nàʼà.
2Dzwan ə də̀ a ndàw ntsaʼ zuw tsə ndzòʼò àyiə yə̀ Kə̀litò zəŋə nəniy, u twum yə̀ tsə̀təndii tə we tə̀ liy tiy, dzày yə̀ a ghu nə, 3bəb yə̀ nə a we nə “À də̀ wô wù wə̀ Dzwan kə dzây zìì na nəniy nə̀ ù bè ŋwò, moo ghè kwu ani nam ləmə wù ù ŋwò wìy ə?”
4Yesù ə bə̀lì kə a ghu nə, “Ghà dzwoŋi zû dzây yə̂ â Dzwan ayiə yə ghà zuw nəniy, kòʼ sòʼò nə̀ àsə ghi yiy. 5Aghê à fɛbə nyiə̀ kòʼò tə̀ loʼo, aghû yə̀ ghu zəmə̀ bwîy ghu nyiə̀ bwìy dzwàbə̀ ŋwò, aghee ùŋkə̀m yìy mə taw dòʼò bə̀, à yuu ghu kə kwôʼ doʼò nəniy, ghu nyiə̀ zuw ŋwò, à yuu ghu kə pfə doʼò nəniy, ghu mə zɛ̀mə̀ dzwoŋi bə̀. Aghê à la yiy mə kəli ntwùm ìdzòŋə̀ yìy yəə ghu niʼà yə̂ awò ghu. 6Zə̀kìy dyoʼo nə̀ wù wə̀ ù də byemə kə dzə̀ wày miə kàmə̀ twe tsə anə nsòŋə mə̀ lìy mìy.”
7Abù tsə̀təndii tə Dzwan tiy ŋwô yə̂ nəniy, Yesù ə̀ kaʼ tsə ani dzày àyiə kwùmə̀ yə̀ nə̀, Dzwan, dzìy tsə nə, “Ghà kə zù a mbvə̀n ə̀ kə̀sisi, ghà kə mòʼò nə̀ gha kî kòʼò kìə̀ awote? Ghà kə zù ani zù kòʼ ghè kə̀dabə kiy ŋkwùŋì kìy təŋə tsə̂ ə̀? 8Ghà kə zù ani zù kòʼ kìə̀? Ghà kə zè ani zù kòʼ wù lìy wìy ù dzə̀ŋì kəli nəniy ndzwu tə̀ dzoŋə̀ tìy ə̀? Aghû yə̀ ghu dzəŋə̀ nəniy ndzòʼò ndzwu tə ghà tə̀ taw mùə̀ anə ntoʼ. 9Ghà dzây bə̂ â mìə̀, ghà kə ŋwò fyi zù ani zù kòʼ kìə̀? Ghà kə kòʼ wè ntwùm ə̀ Kə̀zə̀ ə̀? Ndzə̀m ndzə̀m, a kə tsəb də̌ wè ntwùm ə̀ Kə̀zə̀. Mə ndzəmə̀ dzìy bə̀ ŋwò â ghà nə̀ ù maa tsìy fyi wè ntwùm ə̀ Kə̀zə̀. 10Dzwan də wù wə̀ ŋwàʼà k-a-zə̀kìy kə myiŋə̀ nəniy anə lòʼo kə kə dzîy nəniy nə̀, ‘Zəkìy kə dzày tsə nə̀, mə kî twumə bə̀ wè ntwum wam anə sə kiə̀ tə̀ ù kì byay na tsə dzəd yiə̀.’ 11Mə ndzəmə̀ dzìy ŋwò â ghà nə̀, anə ghù yə̀ ghu byi kôʼ dzə̂ nəniy fə an-a-mbvə̀dintsə, wù lìy wìy wày dzə ù tsìy fyi nəniy Dzwan wə ù kə nyiə̀ nəniy mwi m-à-zə̀ mìy. Yəə i bôʼ də kə ghi, wù wə̀ ù tɛb tsîy fyi nəniy a lòʼo kə Zə̀kìy saʼa nəniy ate, u mə tsìy fyi Dzwan. 12Ani nìy ŋwò tsə a soŋə fə Dzwan wə ù kə nyiə̀ nəniy mwi m-à-zə̀ mìy ù kə kaʼ tsə ntwùm ə̀ we, bù fyi bə̀ zii aghû yə̀ ghu na tsə nəniy muə̀ tə ghu tiy nə̀ Zə̀kìy saʼ ghu mə fii awò ùŋgə̀d wìy, aghù yə̀ ghu kwu nəniy u daʼa wiy. 13Awò Dzwan ani bù, ùŋwàʼà u aghee ntwùm ə̀ Kə̀zə̀ ùdzə̀m nə̀ ùŋwàʼà u làŋ u Musîs wìy maa dzây zì na ayiə yə a kwu nəniy ani bù fyi anə sòŋə fə nyiə. 14Abu ghà liə nəniy ghà bɛmə kə ayiə ghu yə ghu kə dzîy, ghà kəli tsə nə̀ ghu kə ghî dzìy Dzwan soŋə fə ghu kə dzîy nə̀ Èlaydzà kì bè ŋwò. 15Wù wə̀ ù kwu nəniy utswuŋi wiy, u zuw ayiə yə mə dzây.”
16Mə də ani tyi tsə nə̀ aghû yə̀ nyiə nə̀ ŋə̀mə̀ tə̀ də̌ mə̀yə? Ghu də yəə à də̀ anîsə̂, ghu də nəniy anə bekivən màŋə̀ bvoʼə tsə̀ mə̀mbòŋ dzìy yə â àwizə̂ àliy yiy a ghu nə, 17“Ghè kə tuŋə tə̀mbwələ, ghǎ kə̀ bən nəway, ghě zɛm ndzàŋə tə ipfə, ghǎ kə̀ dîy nəway!” 18Soŋə fə Dzwan kə bû nəniy, u də bày nyiə way, muə sòʼò way nlwù mìy. Aghee kaʼ ani dzày nə̀, ù kwu usîy ùbɛbə wiy anə uwè! 19Abù Wà Wù kwuni bû nəniy, nyiə, muə sòʼò mə̀nlwù, aghee dzìy nə̀, Ù ŋge nyiə ŋwò də sòʼo wù ù kê wìy, ù bwìy sòʼò ùfwu nə̀ àghè àkhi ŋwàʼà kə̀ tsuw kiy, nə̀ àghè àbɛbə yiy soʼo. Ayiə yə a kî kwu nəniy ani bù fyi a dê bè nə̀ utwab wə Zəkìy kwu nəniy u də tsitsi.
Naʼà tə̀ tə kə twee maʼà nəniy Yesù
(Lukâs 10.13-15)
20Aghee nàʼà tə̀ Yesù kə ŋge fâʼ nəniy mali tə yiə tiy awo, ghu kə twe ŋwô ani kyèmì ŋwò bə̀ anə bɛb tə ghu. Yəə i kə də nəniy ghii, Yesù ə ŋə̀m kə fòŋ nə̀ ghu dzày yə̀ a ghu nə, 21“Ndzòʼò ŋgoʼ yə ì lyimə nəniy gha aghě Kòlàzin, nə̀ ghà aghee Bètsaydà ì nì ŋge fyà ŋwò! Mali tə yiə tə mə kə zəŋi anə nàʼà təli, bəə mə kə fə̀ zəŋə anə inaʼ i Taylè nə̀ ìnaʼ i Sidòn yìy, təə aghee ghà yə̀ kə dzǐy kyemə̀ ŋwò fyiə bə̀ ŋwò anə bɛb tə ghu kwu kwu nə̀ ghu mə dzə̀ŋì kə usâʼ u tə ndzwu wiy anə iwè, nə̀ ùdzə̀m wìy ghu mə kyili anə iwè, ani dè tsə nə̀ ghu ndzəmə̀ mwe ŋwò. 22Mə ndzəmə̀ dzìy bə̀ ŋwò ani bu a tsuk fə isaʼ Zə̀kìy nî dè mwuli kə̀ kwoʼo kiy awò àghě Taylì nə̀ àghě inaʼ i Sidòn yìy tsìy fyi gha. 23Gha soʼo aghee inaʼ i Kàpanùm! Ghà moʼò nə̀ Zə̀kìy nî nìy kwoʼo ŋwò gha an-a-vələ ə̀? Hǎy! Zə̀kìy nî myìʼà ghà anə uvə̀lə̀ anə lòʼo kə aghê pfə zê dyòʼò nəniy ate. Mali tə yiə tə mə kə zəŋi nəniy anə nàʼà tii, bəə mə kə fə̀ mali tə yiə tə̀ zəŋə anə inaʼ i Sodòm, inaʼ Sodòm yǐy mə nam də zii. 24Mə ndzəmə̀ dzìy bə̀ ŋwò â ghà nə̀, ani bu a ntsuk fə isaʼ Zə̀kìy nî ŋge dè mwuli kə̀ kwoʼo kiy awò àghě Sodòm yìy tsìy fyi gha.”
Bù nənìy a kə̀lə̀ mìə̀ tə̀ ghà kəli izwây
(Lukâs 10.21,22)
25Anə sòŋə fə ghà fə̀ Yesù ə dyaŋi dzày tsə nə̀, “A Təli wam, Mwe ə̀ kə̀vələ nə̀ mbvə̀dintsə kiy, mə nyiə̀ zòŋə̀ kiə̀ yəə wò nù na nəniy ayiə àsoŋə̀ awò àghù yə̀ ghu dziy ghu ŋge twabə ŋwò, dzìy sòʼò nə̀ ghu mə ŋge zwiʼi ayiə yiy. Wò fə̀d dè yə̂ awò àghù yə̀ ghu na tsə iwee i ghu yiy yəə à də anîsə̂. 26A təli, à tsə̀m tsə wô ani zəŋi ghii.”
27Təli wam mə nyə̀ mà ayiə adzə̀m anə awo yam. Wù lìy kwu dzwàb dzə̀ way Wa, à mày kə Təli. Wù lìy kwu dzwàb dzə̀ way Təli, à mày kə Wa, nə̀ àghù yə̀ Wa sây kə ani dè nyə̀ fyi we awò ghu.
28“Ghà bû a kə̀lə̀ mìə̀, gha yə ghà boʼò kəli nəniy ufyiə ù dələ wiy tə̀ mə ki dê bə̂ ghà nə̀ loʼo kə̀ zwaa kiy. 29Ghà bɛmə kə ani dzwùmì bə̀ miə, ghà zwiʼi tsə soʼò àyiə yam, aŋwòə mə zoŋə zəŋə ŋwò, nìy tswi tsə sòʼò ùwee nam anə fôŋ yam, ghà ki kəli soʼò ìzwə̀ày. 30Ayiə yə mə kî tyi dê bə̂ â ghà a taw dzə̀ wày, ufyiə wam ù byoʼo wiy zəaŋə̀ ŋwò.”
Избрани в момента:
Matìyò 11: isu
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© CABTAL 2023