Mataayo 16
16
Abhakangati bha Bhayahuuti ˆbhakamwanga Yesu
(Maariko 8:11–13; Ruuka 12:54–56)
1Niho Amabharisaayo na Amasatukaayo nyarebhe bhakamutambana Yesu, bhakamusaki kubha, ntokwënda ukörë ekiraghe kwërëki kubha noruure kwo Waryobha. 2Yesu akabhagharokeri akabhugha, “[Hano bhokwira, mosiikëra mobhugha, ‘Tabhoori mbooghuke bhoheene gho kubha eriighoro n‑ndyero.’ 3Amare hano bhooghuke mosiikëra mobhugha, ‘Reero ambura neghutëëka e bhukama gho kubha eriighoro ndirabhwire wiiki amashaaro ngaariri.’ Inyu n‑chaghughuuti moonyi, mokumënya ebhyërëkërëri bhe mwishaaro, amare motaaghotora kumënya ekyërëkërëri ke mabhagha ghano.] 4Orwibhoro ro bhaato abhabhe bhano bhataanyi abhahëënë mbakwënda ekyërëkërëri. Ntëëköbhëërëki ekyërëkërëri ghyokyose nanyinga kiire ke murööti Yoona.” Niho Yesu akabhatigha, aghatanura.
Ameeghi gha bhuröngö gha Mabharisaayo na Amasatukaayo
(Maariko 8:14–21)
5Mbe, abhaanabheegha bha Yesu bhaghatëënya anyancha, amare mbaare bheebhuru kwimoki emighaate. 6Yesu akabhabhoorera akabhugha, “Mubhe amiisho no obhotondoru bho Mabharisaayo na Amasatukaayo.”
7Abhaanabheegha bhayo bhaghasëëma kobhoorani abheene kwo bheene bharabhugha, “Naghosiikëra hangʼu gho kubha totiimokiri emighaate.”
8Yesu ꞉naamënyiri ghoose ghano ꞉bhaare bharabhoorani akabhugha, “Inyu abhaato bha bhokumi bhosuuhu! Ngwake mokobhoorani inyu bheene kwo bheene kubha motiichiri ne emighaate? 9Kana, motaamara mumënya? Mokeebhu kebhuno abhaato bhaare ebheku bhitaano (5,000) ꞉bhiighotiri kwo mighaate etaano? Na ꞉mookomiri ebhetonga bhirenge bhe bhiinyakurë bhino bhisaaghiri? 10Hamu emighaate ghiire mohungate kwo bhaato bhaare ebheku bhine (4,000), kana, ꞉mookomiri ebhetonga bhirenge? 11Neke motamënyiri kubha nteere nerasiikërëra emighaate? Mbe, mwikabhaahe no bhotondoru bho Amabharisaayo na Amasatukaayo.” 12Niho abhaanabheegha bhaache bhamënyiri kubha taare arasiikëra ighoro e bhotondoru bho kobhimbi emighaate, amare n‑kubha miisho ighoro e meeghi gha bhuröngö gha Amabharisaayo na Amasatukaayo.
Bheetero ˆaghiishereri kubha Yesu niwe Kirisito
(Maariko 8:27–30; Ruuka 9:18–21)
13Eriibhagha Yesu ꞉ahikiri ahaghiro hano haare harabherekeru Kayisaariya‑Bhiribhi, akabhabhoori abhaanabheegha bhaache akabhugha, “Abhaato mbakobhugha kubha, eni uno neenyi Omoona o Mooto, neeni we?”
14Bhaghagharokeri bhakabhugha, “Abhamu mbaghoghughamba kubha iye niiye Yohana Omubhatisaachi, abhande iye niiye Eriya, na abhande iye niiye Yeremiya, hamu n‑umu ghate e bharööti abhande bha Ryobha.”
15Yesu akabhabhoori wiiki akabhugha, “Amare inyu kana, mokobhugha eni neeni we?”
16Simiyooni Bheetero akamugharokeri akabhugha, “Iye niiye Kirisito, Omoona o Ryobha rino reenyi ihöru.”
17Yesu akamobhoorera akabhugha, “Oo Simiyooni mwërëëti o Yoona, witabhiiru gho kubha taanyi‑ho omooto uno akohunyuriire rino, amare n‑Taata waane uno anyi Mwishaaro. 18Eni ˆneghakobhoorera kubha iye Bheetero#16:18 Bheetero. Egheteemoro keeche n‑Eriitare. n‑eriitare, ni ighoro e riitare rino, niho nekwabhëka eriikanisa reene, na changuru che nyaari chetaakorekinda. 19Eni neghokuha iye chahunguru che bhutëmi bho Mwishaaro. Gho ghayo, ghoose ghano oghwishereri abhaato bhakörë mo‑se ino, Eryobha ryose ndeghoghiishereri. Wiiki, ghoose ghano otaaghoghiishereri, Eryobha ryose retaaghoghiishereri.”#16:19 Mööhi Mataayo 18:18. 20Niho Yesu akabhashaangʼi abhaanabheegha kubha, bhataacha kobhoorera omooto wowoose kubha iwe niwe Kirisito.
Yesu ˆakarööta ghoku na koryoka kooche
(Maariko 8:31—9:1; Ruuka 9:22–27)
21Korwera eriibhagha riyo, Yesu aghasëëma kobhabhoorera abhaanabheegha bhaache haheero kubha nakwëndëru aghi Yerusareemu, na kubhöna anyaako yaaru. ꞉Naabhabhooriire kubha, nakunyaakibhu na abhagharuka bha Bhayahuuti, na abhakoro bha bhachaama bha Ryobha na abheeghi bha meghiro, na ghwitu. Amare orosiko ro ghatato, nakoryoka. 22Niho Bheetero akamobherekera rubhareka, aghasëëma komoshaangʼi, arabhugha, “Oo Omutëmi, Eryobha reghaheteri ghayo kurë! Ghataacha ghayo ghotubhöna!”
23Amare Yesu akamwishororeri Bheetero, akamobhoorera akabhugha, “Nooru ambërë yaane ugharuke anyuma, iye Erishambu! Noghusaki kundëki ghuköra amënda gha Ryobha! Nokwihëëbha ghano ghataanyi gha Ryobha, amare n‑gha bhaato okwihëëbha.”
24Niho Yesu akabhabhoorera abhaanabheegha bhaache akabhugha, “Omooto wowoose uno akwënda ghuntambana, nakwëndëru iyange omwene, aghëghë omusarabha waache, antambane. 25Omooto uno akwënda kobhuhöni obhuhöru bhooche omwene, nakobhobhori. Amare omooto uno akobhobhori obhuhöru bhooche gho ghiri yaane, nakobhubhöna obhuhöru bho miishe ghyose. 26Kana omooto nakubhöna ke, aribha abhwine ebheghiro bhyose bhe mo‑se ino, amare abhori obhuhöru bho miishe ghyose? Hamu omooto naghotora koruusi egheghiro ke kibhatere obhuhöru bhooche? 27Eni uno neenyi Omoona o Mooto nekuucha haghirohamu na bhamarayika bhaane mo‑bhokumi obhokoro bho Taata waane. Niho nekomoreha omooto wowoose kurëngʼaana ne emeremo gheeche. 28Mahëënë ˆnekabhabhoorera, mbaanyi‑ho abhamu bhiimeeriire hano, bhano bhataaghoku bhakeere kondighi eni Omoona o Mooto neraacha mo‑bhutëmi bhoone.”
Избрани в момента:
Mataayo 16: ntk
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2022 Wycliffe Bible Translators, Inc. All rights reserved