S. Juan 3
3
A Jesús y a Nicodemo
1Tiʌ junturi' xi'ra a lʌji' a u winiko' a judíos a ku ya'batio' fariseos u k'aba' Nicodemo, lʌji' bexi' u ts'urio' a judíos. 2A lay tari ti' Jesús ak'bi y tu ya'ti':
—Rabí, in weo' a tech jach K'uj tu tuchi'tech tia' kʌ'sko', mix mok ku metik a bex tech ka metik wa mʌnʌ' K'uj ti'.
3Jesús tu nuka ti':
—Jach taj kin toj ki ei'k tech, a mok muj ka siji, mʌnʌ' u yirik tu ku wesintik K'uj a tiʌ kʌ'.
4A Nicodemo tu k'ata ti':
—¿Bij ku ka' siji junturi' xi'ra wa ya ch'ijʌ'? ¿Yʌn wa je'e u ka' oko tu jʌ'mne u nʌ' y ku ka siji?
5Jesús tu nuka ti':
—Jach to jai' ki wei'k tech, a mok muj siji ix ja' y ti' u Pixʌn K'uj, mʌnʌ' u yirik tu ku wesintik K'uj a tiʌ kʌ'. 6A to'o ti siji ti u teto' winik, bexi' ti' winik, a to'o tij siji yok'o u Pixʌn K'uj, tiʌ ti' u Pixʌn K'uj. 7Ma' pesik a wor a tu tin wa'tech: “Tu woro winik yʌnti' u ka' siji.” 8A ik' ku yustik tuba u k'at y ka wui'k u jum, chen ma' we tuba u tar y tuku bin, bex a moko' ku siji yok'o u Pixʌn K'uj.
9Y a Nicodemo tu ka k'ata:
—¿Bik jeu jach metchʌ a je' ka wei'k?
10Jesús tu nuka ti':
—¿Tech lʌjiech a ku kʌ'sik u winik a Israel y ma' we a je' a ba' kin wei'k tech? 11Jach to jai' kin wei'k tech, toj in weo' a baiki kin tsikbʌtiko', bexi' in wirbo' tu woro a ba' ki wei'ko', chen teche'x maj ch'eike'x a ba' kin wei'ko' teche'x. 12Wo maj ch'eike'x a ba' kin wei'k teche'x a yʌn yok'o a lu'm, ¿Bij ka bin a ch'ae'x wa ki wei'k teche'x a ba' a ti yʌn ix kʌ'?
13»Mix mok nʌj nʌ'kʌk ix kʌ', to jari aj emi ix kʌ' a lʌji' u Ti'a Xi'ra a toj tiʌ ix kʌ'. 14A bex tu li'sa' a kʌn ix u lu'mi tu mʌnʌ' nukuch che' woro tikin lu'm yʌn a Moisés, bexi' yʌnti' u li'sa' u Ti'a Xi'ra, 15Ti' tu woro a mok ku yaksik tu yor ti', mʌnʌ' u sa'ta, y binukaj ts'aba ti' u ne ya'p u kuxta y mʌnʌ' u yʌ kimi.
K'uj ne otsi u yirik tu woro a winik yok'o a lu'm
16»K'uj ne tu yakunta a winik yok'o a lu'm, ka tu k'uba' u Ti'a a lʌji' ja'ri' junturi' y tu woro a mok ku yaksik tu yor ti', mʌnʌ' u sa'ta y binukaj ts'aba u ne ya'p u kuxta y mʌnʌ' u yʌ kimi. 17K'uj muj tuchi'ta u Ti'a ti' ts'ek u bo'tik u si'po' a winiko', a tij tuchi'ta' ti' u yʌntik a winik ti' muj bin ix k'ak'.
18»A mok ku yaksik tu yor ti' u Ti'a K'uj, ya mʌnʌ' u bo'tik u si'pi, chen a mok muj yaksik tu yor ti', bi u bo'te u si'pi, tu muj ch'a u t'ʌn u Ti'a K'uj a lʌji' jari junturi'. 19A je' lʌji' tuku bin u bo'to' u k'ebo': A bex u sasi tari tia' winiko', chen a winiko' más otsi tu yira a ts'uak'ʌ, tu' ne ya'p mo' tsoy ba' ku metko'. 20Tu woro a mok ne ya'p mo' tsoy ba' ku metik, p'ek u yirik a bex u sasi y muj xok'o ti' a bex u sasi, ti mu' u ya'ba tio' mo' tsoy ba' ku metko'. 21Chen a mok ku metik u jach u taji a ba', lʌji' ku xok'o ti' u sasi, y bex jechka' u yira tu woro a ba' ku metik a bex u k'at K'uj.»
U bojo' a xi'ra a u ch'amʌ u lak'
22Pachi chen ts'o'ki u tsikba a Jesús, bini yete u kʌ'sa winiko' ix u lu'mi Judea y tita p'atij mo' ne ya'p k'in y u yet mʌn yete u kʌ'sa winiko' u but'e ja' a winik. 23Bexi' a Juan tʌn u but'ik ja' a winik ix u kʌjta a Enón a xok'o yok'o u kʌjta a Salim, tu ne ya'p ja' tita y a winik ku bin tu yʌn a Juan y ku but'a ja' tio'. 24A je' mʌni tuk'in a Juan mo'tey chuka'k mʌka'k.
25Chen u kʌ'sa winik a Juan chu'mpʌjo' u ts'iko' yete a judíos yok'o a tu ku p'o'iko' a ba' ti u ki' k'uba' ti K'uj. 26Y kʌ'sa winik a Juan bino' u yao' ti' a Juan:
—Rabí, a mok tiʌ ka'chik yete tech ix u pach a uk'un u k'aba' Jordán, a mok ta tsikbʌta yok'o ti', beje' tʌn u but'ik ja' a winik y tu woro ku bino' yete.
27A Juan tu nuka tio':
—Mix k'ʌs ba' ku tar ti a xi'ra wa muj ts'aba ti' K'uj. 28A teche'x toj tie'x ka ta wue'x in wei'k: “A ten mo' lʌjien a Cristo, to jari pʌten tuchi'ten ti' yʌ tar.” 29A mok u k'atmʌ u k'ʌ' a ch'upra lʌji' ku ch'eik, chen tuk'in u bojo' au ne yet mʌn tuk'in ku yik u tar u bojo' a ku bin u ch'ae u lak', ti' ne ku tsoy ta u yor, bexi' bex beje' ne tsoy in wor. 30Ti yʌnti' u más ira' más tsoy y t'o'o y ten u ka sut kin p'ata chichanen.
A mok ti' u tar ix kʌ'
31»A mok ti' u tar ix kʌ' lʌji' u t'oji tu woro a ba', a mok u tiʌ ix lu'm, lʌji' u tar ix lu'm y u tsikba lʌji' a ba' yʌn yok'o a lu'm, chen a ku tar ix kʌ' lʌji' u t'oji tu woro a ba'. 32Lʌji' ku tsikbʌtik a bay tu yua y tu yira, chen mix mok ku ch'eik u t'ʌn. 33Chen a mok ku ch'eik u t'ʌn, lʌji' ku bin u ya'e jach taj ba' ku yei'k K'uj. 34A to'o K'uj tu jach tuchi'ta, u t'ʌn K'uj ku tsikbʌtik, ka wirik K'uj ku ts'ek jach k'ux ya'p u muk' u Pixʌn ti'. 35K'uj otsi u yirik u Ti'a y tu woro a ba' tu laj ts'ati' tu k'ʌ'. 36A mok ku ch'eik u t'ʌn u Ti'a K'uj binukaj ts'aba ti' u kuxta y ya mʌnʌ' u yʌ kimi, chen a mok muj ch'eik u t'ʌn u Ti'a K'uj mʌnʌ' u ts'aba a lay u kuxta, to jari bi u bo'te u si'pi ti K'uj.
Избрани в момента:
S. Juan 3: PLacNaha
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Sociedad Biblica de México AC