S. Juan 17
17
Jesús ku t'ʌnik K'uj ti' u kʌ'sa winik
1Pachi kaj ts'o'k u yei'k a je' a ba': Jesús tu chʌ'ta a kʌ' y tu ya'a: «Tet k'uchi u k'ini: Jach e'se ti' a winik a ti'a jach ne chich in muk', ti' u ye'sik bexi' ti'a winik ne k'ux tsoyech y ne chich a muk'. 2Chen tech ta ts'ati' u muk' a ti'a yok'o tu woro a winik yok'o a je' lu'm, ti' u ts'ek u kuxta a mu yʌ kimi a tu woro u winik a ta ts'ati'. 3A je' lʌji' a kuxta a mu ya kimi winik: ka' u k'oo'tech, lʌjiech a tech jach K'uj y mʌnʌ' tu jer y ka' u k'o'ota' a Jesucristo a mok tech ta tuchi'ta.
4»Ten tin we'sa yok'o a lu'm a tech a jach nukech y ne chich a muk', tuj laj ts'oki in metik a ba' ta ts'aten in metik. 5Y beje' Tet ts'aten in muk' y ka' meten jach nuken a bex bexen tuk'in ti' yʌnen yete tech ta xax ka'chik a to'o toj mo' metak a lu'm.
6»A mok ta tejta yok'o a lu'm ti' a ts'ek u t'urken, ti' jach ts'a u yetik mokech. Tech yʌni ka'chik y ta ts'aten, y tu jach meto' a t'ʌn. 7A beje' toj u yeo' tu woro a ba' ta ts'aten, ti u tar ti' tech. 8Tu tin ts'ati' u t'ʌn a ta ts'aten, y a tio' tu jach ch'ao' y tu yiro' a ten jach ti' in tar yok'o tech, y tu ch'ao' in t'ʌn jach tech ta tuchi'ten.
9»A ten kin p'iskinbʌ in k'atik ti tech yok'o tio', mij p'iskinbʌ in k'atik tech ti' a winik a muj ch'eik a t'ʌn, toj jari kin k'atik ti' a mok ta ts'aten, tu toj tech yʌni. 10Y tu woro a ten yʌni toj bexi' tech yʌni y a tech yʌni bexi' ten yʌni; y yete tu woro a je' ku ye'sik a ten jach nuken u ne chich in muk'.
11»A ten ya mʌnʌ' in p'ata way yok'o lu'm, chen a tio' ti ku bin p'ato' yok'o lu'm, y a ten ti kin bin tu ti'ech tech. Jach tsoyech Tet, a to' ta ts'aten, ki kʌnʌnteo' yete u muk' a k'aba', ti' u kʌjto' jach ket u yoro' bex to' ne ket oj kor. 12A tuk'in ten ti'en yete tio' yok'o a lu'm, tin kʌnʌnto' yete u muk' a k'aba', a k'aba' a tech ta ts'aten, y mix k'ʌs junturi' tu sʌtubʌj, toj jari a to'o u toj sʌtmu u bʌj, ti' u metchʌ a ba' toj ts'ibʌ' yok'o u ju'ni u t'ʌn K'uj.
13»A beje' kin bin tu ti'ech tech; chen kin wei'k a je' ba' a ti'tʌ ti'en way yok'o a lu'm, ti' u ki' tsoyta u yoro' a bex ten kin wui'k. 14Ten tin mʌsa a t'ʌn tin in kʌ'sa winiko', chen a winiko' tu p'akto' in kʌ'sa winiko', tu mo' lʌjio' u winikio' a lu'm, bex Ten mo' u winikien a lu'm. 15Mʌnʌ' in k'atik tech ka laj jariko' wai yok'o lu'm, toj jari in k'at a kʌnʌntik ti' a mo' tsoy a ba' ku tar tio'. 16Bex a tio' mo' lʌjio' winikio' a lu'm, bexi' Ten mo' u winikien a lu'm. 17A t'ʌn jach taj y yete a t'ʌn toj ki' k'uye ti tech. 18A bex ta tuchi'ten wai yete u winikio' a lu'm, bexi' ten kin tuchi'tiko' yok'o tu tio' u winikio' a lu'm. 19Yok'o tio', ten ki jach ts'ek tu woro in kuxta ti' tech ti' u ts'eko' tu woro u kuxto' bexi' tio' ti tech.
20»Mo' jari kin katik tech yok'o a layo', bexi' ti' a mok ku bin u ch'ae a t'ʌn tuk'in ku yui'k a tsikbo' a layo'. 21Kin k'atik tech a ts'ek kʌjto' jach ket u yoro'; bex bix tech Tet ti'ech yete ten y ten ti'en yete tech, bexi' tio' u ki katik u yoro' yete to', ti' u jach ch'ei'ko' u winikio' a lu'm jach tech ta tuchi'ten. 22A muk' a ta ts'aten, ten tin ts'atio', ti' u metik u bʌjo' jump'eri' a bex a to' junturio': 23Ten ti'en yete tio' y tech yete ten, ti' u jach ki katik u yoro' jumuch', y bex a winik yok'o lu'm ku jach bin u yire jach tech ta tuchi'ten y jach otsi a wirik bix ten otsi a wiriken. 24»Tet, a to'o tech ta ts'aten, jach in k'at ket tio' yete ten tu kin bin, ti' u yirik tu woro in muk', a in muk' a ts'amʌ ten, tu jach ne otsi a wiriken toj lik' mo' yʌ metak a lu'm. 25Tet a tech jach tsoy a tuku, a winik yok'o a je' a lu'm mu' k'o'muech, a ten jach in k'o'muech, y a jeo' bexi' u yeo' tech ta tuchi'ten. 26Tin jach ts'a a wira' mokech y xuy más kin bin u ts'a a wira' mokech, ti u jach yakuntik u bojo' bex to' ne kak yakuntik aj bʌj.»
Избрани в момента:
S. Juan 17: PLacNaha
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Sociedad Biblica de México AC