S. Juan 10
10
A pastor y u yʌrʌk' me'
1«Jach toj tu jay kin toj ki ei'k teche'x: A mok mo' ti ku yoko yok'o u jor tu mʌkʌ' aj meo', a lay lʌji' a mok ku yakra ba'. 2Chen a mok ku yoko yok'o u jor a lay jach lʌji' u pastor aj me'. 3A mok ku kʌnʌntik u jor, ku jei'k u jor ti' a winki aj me', y u pastor aj me' ku t'ʌnik u yʌrʌk' me' yete u k'aba' y aj me' ku k'oo'tik u t'ʌn u winki y u winki ku laj jarik tu mʌkʌ' uj me'. 4Y tuk'in kaj laj jok'ok tu woro' uj me' a lʌji' yʌni, u winki ku bin pʌti y aj me' ku t'urik u winki tuku bin, tu u k'o'mʌ u t'ʌn u winki. 5Chen a juntu a mu o k'o'mʌ mʌnʌ' u t'urko', to jay ku bin puts'o' ti' tu mu' u k'omʌ u t'ʌn.»
6Jesús tu kata u kʌ'sa bex a je', chen tio' mo' tu ki' uo' baiki u k'at u ye'sik Jesús.
Jesús lʌji' jach ne tsoy a pastor
7Jesús tu ka' a'a tio': «Jach taj kin wei'k teche'x: Ten Lʌjien u jor tuku yoko tu woro aj me'. 8Tu woro a mok a laj taro' pʌti, a layo' woro lʌjio' a mok ku yakra bao', chen a meo' mo' tu yuo' u t'ʌno'. 9A Ten Lʌjien u jor ti'a woko ix tu ku wesintik K'uj a tiʌ kʌ': A mok ku yoko yok'o ten, jeu bin ix kʌ'. Jeu yoko y jeu jok'o y je'e u yirik u yo'ch su'k.
10»A mok ku yakra ba', to jay ku tar u yakre ba', tu kinsa y ts'oksik ba', chen a ten taren ti wike'x a kuxta y ti' jach ki kuxte'x. 11A Ten Lʌjien a mok ne tsoy a pastor. A mok jach tsoy a pastor, a ti ku jach ts'ek u kuxta ti' u takik uj me'. 12Chen a mok jay yok'o u bo'ri ku kʌnʌntik aj me', a lay tuk'in ku yirik tʌn u tichi u pek'i k'ax, toj jay ku puts'u, tu mo lʌji' a jach u pastori aj me' y mo lʌji' yʌni aj me', y a u pek'i k'ax ku yoko u chi'e aj me' y tu woro ku laj puts'o' y ku laj ch'ikibino'. 13A mok ku meaj jari yok'o u bo'ri, a lay ku puts'u tu mo' lʌji' ku tukrik aj me'.
14»A Ten Lʌjien a mok ne tsoy a pastor, a ten in k'o'mʌ to' lʌji' ij me' y bexi' tio' o k'o'muen. 15A bex u k'o'muen in Tet bex ten in k'o'mʌ in Tet. Ten kin ts'ek in kuxta ti' aj me'. 16Bexi' yʌnten u jer ij me' a mo' tiʌ way a je' tu mʌkʌ', a layo' bexi' yʌnti' in tasik, a tio' jeu u yui'ko' in t'ʌn y jay to jump'ei' p'ujtik ku bin u much'e u bʌj aj me' y bexi' jari junturi' u pastor.
17»In Tet ne ku yakuntiken, tu ku yirik a ten ki k'ubik in bʌj ka kinsa'ken chen pachi jei ka ch'eik in kuxta in bʌji'. 18Mix mok ku takik in kuxta, to in bʌji' kin k'ubik. Yʌn in muk' ti in ts'ek in kuxta y bexi' ti' in ka' ch'eik. A je' a t'ʌn lʌji' tu li'sa ten in Tet.»
19Ka tu yuo' bex a judíos ka' chu'mpʌjo' u jʌtsik u bʌjo'. 20Ne pim tʌn u yei'ko':
—A lay a xi'ra yʌn kisin tu yok'o y chok ¿Biken ka wui'ke'x u t'ʌn?
21Chen u jer tʌn u yei'ko':
—Mʌnʌ' u tsikba bex wa yʌn kisin tu yok'o. ¿Yʌn wa a kisin jeu jei'k u wich a mok muj yiriko' ba'?
A judíos mu' k'at u yui'ko' u tsikba a Jesús
22Lʌji' u k'ini sisi, yok'o Jerusalén tʌn u jʌno' u yo'chi ti' u yatoch K'uj. 23Jesús tiʌ ix u yatoch K'uj y tʌn u mʌn xok'o tuku ya'bati' u pórtico a Salomón. 24Y lʌji' kaj taro' a judíos y tu sutbʌkto' a Jesús y tu k'ato' ti':
—¿Hasta tuk'in ka bin a ki' a'to'? Wa tech jach lʌjiech a Cristo, toj a'to' beje'. 25Jesús tu nuka tio':
—Ya ti wa'a teche'x chen mo' ta ch'ae in t'ʌn. Tu woro a ba' ki metik, ki laj metik yete u muk' in Tet y lʌji' ku ye'sik moken. 26Chen a teche'x maj ch'eike'x in t'ʌn, tu mo' lʌjie'x ij me' a bex ti wa'a teche'x. 27A to'o ten ij me' ku k'oo'tik in t'ʌn y ten in k'o'mo' y tio' ku t'urken, 28Ten kin ts'ek tio' u kuxta y ya mʌnʌ' u yʌ kimi, y mix mok ku takik tin k'ʌ'. 29A ba' tu ts'aten in Tet, lʌji' más nuk y mo' bex a yʌno', y mix mok jeu k'uchu muk' u takik ti'. 30Ten y in Tet toj jari junturen.
31Lʌji' a judíos ka tu ka' ch'ao' tunich ti' u ch'inko' a Jesús, 32Chen Jesús tu ya'tio':
—Yete u muk' in Tet tin meta ne ya'p ba' tsoy ¿to' bay a ba' ti meta tu poch a ch'inkene'x yete tunich?
33A judíos tu nuko':
—Mʌnʌ' in ch'inkech a teno' yok'o a tsoy ba' ta meta, a tu ki bino' in ch'inech lʌji' yok'o a tu' ne mo' tsoy ba' ka wei'k ti' K'uj, a tech ka metik a bʌj p'is K'ujech chen toj jari winkech.
34Jesús tu nuka tio':
—¿Yok'o u ju'ni u t'ʌn K'uj mo' ti ts'ibʌ' a ku yei'k: “Ten ki wei'k a teche'x woro k'uje'x?” 35Si K'uj tu t'ʌno' k'ujo' a mok tu ts'a u t'ʌn ti', (u juni' tu ts'ibʌ' u t'ʌn K'uj mo' bik u ya'a mo' taj), 36¿wa K'uj tu tejten ti' y tu tuchi'ten way yok'o a lu'm, biken ka wei'ke'x: Tech ne mo' tsoy ba' ta wati' K'uj, a tu ti wa'a: A ten lʌjien u Ti'en K'uj? 37Wa ten mij metik a baij u k'at in Tet, tak ma' ch'eik in t'ʌn. 38Chen wa ki metik a baij u k'at in Tet, tak ma' ch'eik in t'ʌn ten, jay ch'ae'x a ba' ka wirke'x in metik, ti' a k'o'otke'x y ti' a wetke'x a in Tet tiʌ yok'o ten y ten ti'en yok'o ti'.
39Poch u ka' chujko' a Jesús, chen Jesús puts'i tio'.
40Ij ka' bini tu pach a uk'un au k'aba' Jordán y tita p'ati, tuba tu tu but'a ja' a winik a Juan.
41Y ne pim winik taro' u yiro' tu tiʌ a Jesús y tʌn u yei'ko':
—Tak a Juan mo' tu ye'sa u metik ba' yete u muk' K'uj, chen jach taj a tu ya'a yok'o a je' a xi'ra.
42Y tita ne pim winik tu yakso' tu yoro' ti' Jesús.
Избрани в момента:
S. Juan 10: PLacNaha
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Sociedad Biblica de México AC