Eleabwa 2

Aŋu Azhwɛɛrɛ Ngwe à zeʼ ngɛ

1Anji Antara Pɛntɛkɔst à bwɛn, bɔ bɛɛrɛ abwa me shunu àmɔ̀ afwɔbi.#2:1 Antara fɔɔ ekere à ne de fɔɔ enji fɔɔ èsama fyee tɛʼ wum antara Pɛntɛkɔst shi nu afwɔ. À ne efwɔ anji zɔnɔ yɛ bɔ Israel â ma le antara dza ela. 2E sa klikɔ̀ʼ, angɔ zo ega deʼ wɛ â kla zeʼe ekere ngɛ, akwâ kumu ne efùu kamakam nɔ, è shwèere ndɔ yɛ angɔ à me tsɔmɔ efwɔ ngɛ. 3Éngɛ angɔ zɔ éwu deʼ ma bɛ̀rɛ mwɔ na enɛmɛrɛwù nɔ. Enɛmɛrɛ chɛ sɛʼrɛ àmɔ̀, tɛ̀ʼrɛ àmɔ̀ edɔm ato gho ŋwàʼaŋwàʼ wɛ à mwɔ aŋu ngɛ. 4Azhwɛɛrɛ Ngwe shwe efwɔ akwa angɔ bɔ gimkpaʼ. Angɔ klada sa gà atsoʼ ebɛbɔ aŋu azhwɛɛrɛ Ngwe à gbee angɔ ngɛ. 5Bɔ Juu deʼ byɛ â me nɛɛ Ngwe ngɛ â ne nyɛrɛ zeʼe efwɔ akwâ akɛkɛ ma mwɔ a Jerusalɛm èndzobo chɛ. 6Èndzobo chɛ angɔ à zo akwâ kumu ne efùu fɔnɔ ngɛ, bɔ shunu afwɔbi, angyɛ angɔ zɔm, mbɔʼnga angɔ à zo bɔ bɛɛrɛ abwa ma ga atsoʼ angɔ. 7Angɔ à kɔn, sa biiri kpe, “Abɔ bɔnɔ e ma ga atsoʼ ebɛbɔ nɔ ke ma bɔ Galilii bo? 8Ayɛ le gho ŋwàʼaŋwàʼ abwaʼ bɔ sa zo e sa ga atsoʼ ngɔ? 9Abɔ deʼ abwaʼ bɔ me zeʼe a Partya, bɔ Medya, bɔ Elam, bɔ deʼ me zeʼe a Mesopotamya, Judeya, Kapadosya, Pontus mane Esya. 10Bɔ Frigya, Pamfilya, Ejip, abɛɛ abɛ Libya ebara Sɛrɛn. Abɔ deʼ abwaʼ bɔ gɛrɛ me zeʼe a Rom. 11Bɔ Juu mane ebɛbɔ ba abwaʼ bɔ, byɛ e me bɛrɛ ene Ngwe ngɛ. Abɔ deʼ â na bɔ Kret mane bɔ Arabya. Mbyɛɛ bɔ gimkpaʼ a zo aŋu angɔ à ma ga atsoʼ abɛ njɛɛ ma sɛ̀ɛrɛ̀ abwa zodo zodo yɛ Ngwe shi fwɛʼɛ ebe bɔ ngɛ. 12Angɔ à na gɛnɛ àmɔ̀ ma di à kɔ̀n sa biiri àmɔ̀ àmɔ̀ kpe ‘Ewunɔ ne ewe?’ ” 13Bɛʼngɛ abɔ deʼ à sa sèrè angɔ gà kpe, “Abɔ bɔnɔ be mɛʼrɛ mɔm.”

Petoro gâ ebe ebaŋabɔ

14Éngɛ Petoro tam ekere nè abɔ bɛɛrɛ abwa abê wum ǹchwɔ̀ ŋwaʼ, è gà ekama ebe ebaŋabɔ wɛ kpe, “Asɔrɔ ndza, bɔ Juu mane mbɔn byɛ mbɔn ma tsɔmɔ a Jerusalɛm ngɛ, shi mmɛ pɛɛrɛ eto mbɔn ene ebwa wunɔ. Mbɔn zhuru ebwa mmɛ ma gà ngɛ anchwɔnchwɔ. 15Abɔ bɔnɔ ke ŋwɔ mɔm aŋu mbɔn ma zhùŋù ngɛ bo. Endzobo bli enyɔ̀m kɔɔ! 16Mbɔn kɔʼɔ anɔ, ne ebwa wɛ Juwɛl, àmɛnɛkɔn Ngwe à ga ngɛ, kpe

17Ene enji ngùdu Ngwe gâ kpe

‘Mmɛ yà sàa azhwɛɛrɛ ndza edɔm gho ŋwàʼaŋwàʼ,

bwɔaye mane bwɔanɔm mbɔn yà sa sɛ̀ɛrɛ̀ ekɔn ngu,

àghobo ndzɔn yà sa le nklamara nchi,

enuru bɔ mbɔn yà sa le ntsamara.

18Ɔ̧̀ɔɔ, Ka de mwɔ bɔ afwɛʼ mbu, anɔm mane aye,

mmɛ yà sàa azhwɛɛrɛ ndza edɔm angɔ efwɔ enji byɛ

angɔ yà sɛ̀ɛrɛ̀ abwa yɛ a me zeʼe ena bli shi gli bo ngɛ.

19Mmɛ yà le abwa zodo zodo ezob,

è le anɛ̂ abwa a chwâ,

na anɔm, éwu mane enjiʼewu diridid nɔ.

20Etaranchwe yà di̧iri,

eta firi sa fàn na anɔm

nɔ dye anji nɛŋɛrɛ kɛ́ yɛ Ngwe Masakɛ ma ngo sɛʼ bɔ ngɛ sa zeʼe.

21Éngɛ egho wɛ ma bɛ̀rɛ kpe Yeso na

Masakɛ kɛ̀ ngɛ yà pwèerè amɔ.’ ”

22Mbɔn bɔ Israel, mbɔn tɛŋɛ zhùŋù aga zɔnɔ. Ngwe à le Yeso gho Nazarɛd fwɛʼ abwa zodo zodo kɛ́ é tee kpe na mbè à saa engɔ. Abwa zodo zodo mane anɛ̂ abwa yɛ engɔ à le ngɛ ne tee ekama yɛ Ngwe à me ndɛʼ ebe engɔ ngɛ. Mbɔn mbwo be nɛɛ ewunɔ mbɔʼnga abwa zɔnɔ â gli abwaʼ ndzɔn anɔ. 23Ene eshi mɔ, Ngwe à shi tsɛrɛ gɛ̀rɛ̀ nɛɛ kpe mbɔn ba ngo ndɛ̀ʼ Yeso ebe bɔ abwa bɔɔbɔɔ, e ma ngo kɔmmɔ engɔ. 24Bɛʼngɛ Ngwe à zhwɛɛmɛ engɔ ene ewu, pwèerè engɔ chi eblabwo ewu mbɔʼnga ewu à ke le ekama é shi engɔ ne èdzob nɔ bo! 25Devid à ga mbɔʼ engɔ bli endzobo sam kpe

“Mmɛ zɔ Ngwe efàarà ndza akyɛ gimkpaʼ,

engɔ we ebara mfu, tsɛʼ ala deʼ a me né le mmɛ sa bumu bo.

26Éngɛ etaa mfu fe shwe ene egɛnɛ.

Mmɛ wa kwɔrɔ atsa ene egɛnɛ ma ghɔ awɛ.

Mmɛ, ka mmɛ de mwɔ ma gho wɛ è ma ku ngɛ, mmɛ wa sa tsɔmɔ à zhuŋu à kɔʼ

27mbɔʼnga ngwo wa ka angu abwaʼ bɔ kudu bɛʼrɛ.

Ngwo ke bɛrɛ kpe gho afwɛʼ nchwɔnchwɔ ngwɛ fwe efwɔ eshe bo.

28Ngwo shi tee aghɛʼnji etyê ena aŋu ngwo mwɔ nè mmɛ ngɛ, etaa mfu fe shwe ene egɛnɛ mbɔʼnga ngwo mwɔ nè mmɛ.”

29Bɔ Israel mbu, mmɛ na gà endɔn apɛpɛ mbɔʼ m̀fɔ̀ Devid àtɛ sam bɔ. Engɔ à ku, e kpa engɔ, atoshe ngɔ ya aŋu abwaʼ bɔ bwɛn ànchwɔ̀. 30Engɔ à na àmɛnɛkɔn Ngwe, me nɛɛ ebwa wɛ Ngwe à shi kanna ebe engɔ ngɛ. Ngwe à tɔ̧ɔrɔ engɔ kpe mbè wa ngo le gho ekla Devid ebi mwɔ m̀fɔ̀ na Devid à mwɔ ngɛ. 31Devid à zɔ bli egha tsɛrɛ, ebwa wɛ Ngwe à ma ngo le ngɛ. Éngɛ engɔ gâ mbɔʼ Ǹtɔmzhwaʼa kpe engɔ wa ngo zhwɛm ene ewu aŋu a ga kpe, “Â ke waʼa engɔ abɛ bɔ kudu bo, ekwa ngɔ â ke fwe efwɔ eshe bo.” 32Ngwe shi zhwɛɛmɛ Yeso ŋwaʼ wunɔ ene ewu. Ntsɔ bɔ gimkpaʼ gɛrɛ mwɔ entsɛ anyi. 33Ngwe shi beʼre engɔ shi abɛɛ abwa anɔm mɔ. Àtɛ mɔ Ngwe shi ndɛʼ azhwɛɛrɛ pɛ ebe engɔ aŋu engɔ à shi tɔ̧ɔrɔ ngɛ. Ala mbɔn ma zɔ gɛ̀rɛ̀ ma zo enjitsɔ ngɛ na azhwɛɛrɛ yɛ engɔ à ndɛʼ ngɛ a ma le. 34Mbɔn nɛɛ kpe à ke ma Devid wɛ à ngɔ̀ɔ ezob ngɛ bo. Devid à ba gà mɔ kpe, “Ngwe à ga ebe Masakɛ ngu kpe tsɔmɔ anɔ abwo nde ndza, 35bwɛn èndzobo chɛ mmɛ ma le ngwo fɔɔ bɔ m̀pɛ̀ʼ mbyɛ ngɛ. 36Éngɛ bɔ Israel gimkpaʼ nɛɛ kpe Yeso wɛ mbɔɔ a kɔmmɔ ngɛ ne eŋwàʼ wɛ Ngwe shi le è mwɔ Masakɛ gɛrɛ mwɔ Ǹtɔmzhwaʼa ngɛ.” 37Aŋu abɔ byɛ â zo ebwa wɛ Petoro à ga ngɛ, ńtara angɔ sa sɛ̀ʼɛ angɔ ghɛʼ, e ga ebe Petoro mane bèmpwɔnɔntɔm bê kpe, “Bwɔngwa, mbyɛɛ le ene?” 38Petoro gâ ebe angɔ kpe, “Gho ŋwàʼaŋwàʼ abwaʼ ndzɔn waʼ abwa bɔɔbɔɔ mɔ, nu ndim ene ekumu Yeso Kristo, mbɔʼtye Ngwe dzɛd abwa bɔɔbɔɔ ndzɔn, enyɛrɛ ngɛ, mbɔn yà le etɔ̧ɔrɔ yɛ ma azhwɛɛrɛ pɛ ngɛ. 39Enga etɔ̧ɔrɔ Ngwe ne endɔn mane bwɔ mbɔn, ka de mwɔ abɔ byɛ e mwɔ ezhin dɔɔdɔɔ ngɛ, bɔ gimkpaʼ byɛ Masakɛ Ngwe bɔ me zɔʼɔ é mwɔ bɔ ngɔ ngɛ.” 40Petoro gbeʼre ato angɔ ene abwa tsɛrɛ akɛkɛ gɛ̀rɛ̀ bii kpe, “Mbɔn le Ngwe pweere angɔn chi efwɔ enyii yɛ engɔ ma ndɛ̀ʼ ebe ekyɛ bɔ ǹchù zɔnɔ ngɛ.” 41Bɔ akɛkɛ abwaʼ angɔ à bɛrɛ ekɔn wunɔ è nu ndim. Bɔ fe e bwɛrɛ ètɔɔshin tɛd â buumu angɔ anji yɛ. 42Abɔ fe bɔnɔ à na nde azhii ma bɛ̀ɛrɛ abwa ebe bèmpwɔnɔntɔm gɛrɛ ma ghɔ Ngwe nè angɔ. Angɔ à na nde gɛ̀rɛ̀ ma tsàʼrà Ngwe afwɔbi.

Aŋu bɔ Ngwe â ma tsɔmɔ ngɛ

43Bèmpwɔnɔntɔm byɛ â na le enɛ̂ abwa mane abwa zodo zodo akɛkɛ, éngɛ gho ŋwàʼaŋwàʼ kɔ̂n ene èklɔ̀. 44Bɔ gimkpaʼ byɛ â me bɛrɛ ngɛ fɔɔ embè é tsɔmɔ afwɔbi gɛ̀rɛ̀ ma gɛ̀bbɛ̀ ela àmɔ̀ gimkpaʼ. 45Angɔ à na fɛ̀nnɛ eku mane ela àmɔ̀ è gɛ̀bbɛ̀ ekɛb gimkpaʼ àmɔ̀ àmɔ̀. Gho à na nu aŋu engɔ à ma ke ngɛ. 46Anji na anji, angɔ à na sɔ̀ŋɔ̀ emwɔ ndɔngwe kɛ̀ na ǹtìmi nɔ ma zhiri à nde efwɔ ndɔrɔ àmɔ̀ afwɔbi ene ńtara ǹchwɔ̀ mane egɛnɛ. 47Angɔ à gɛrɛ na ghɔ Ngwe ene enarataa ǹchwɔ̀, bɔ gimkpaʼ me doʼo ebwa wɛ angɔ à ma le ngɛ, angɔ ma gɛnɛ àmɔ̀. Efwɔ enji gimkpaʼ, Ngwe ma zhiiri ǹtìmi angɔ ene abɔ byɛ â ma bɛ̀rɛ ene Ngwe ngɛ.

Избрани в момента:

Eleabwa 2: nbt

Маркирай стих

Споделяне

Копиране

Искате ли вашите акценти да бъдат запазени на всички ваши устройства? Регистрирайте се или влезте

Научете повече за Aŋwɛʼrɛ Ebuumu Fe Nè Ngwe

Eleabwa 2

Популярни библейски стихове от
Eleabwa 2

Библия:

Ngwo

Версия: Aŋwɛʼrɛ Ebuumu Fe Nè Ngwe - nbt

Eleabwa 2

Eleabwa 2

Популярни библейски стихове от Eleabwa 2

Библия:

Ngwo

Версия: Aŋwɛʼrɛ Ebuumu Fe Nè Ngwe - nbt

Eleabwa 2

Популярни библейски стихове от
Eleabwa 2