Mata 6
6
Ki gwim dukw ana ŋgwal ŋa ya, nda zlapa tsa
1I dəba ŋa ya, Yesuw a gwaɗa a tar asa: «Na a sàs a kurum mege ŋgwal ŋa a mburma ka, gwim iɗəm metsehe ya lele. Aɗaba gà mìsle ŋgiɗ a riŋ, ta ge a dukw ana ŋgwal ŋa ya ka, ŋgakŋgakəkka ika miɗ mburma pəra, dite ka, tə̀ zlə̀b à tar ɗekɗek. Na ki gwim a kataya ka, ki ta ŋgetwim a dukw maya ba kurum i təv Mbulum Tsir kurum ana i gər ŋa ya asa tsa. 2Aɗaba taŋa, na bəla a sàsak mazlàkà mala matawak ka, ka ta vəlar dukuməŋa ndərzayya ika miɗ mburma, dite ta fə̀r ahər nda mazlə̀bà à kər tsa. Ama asa ka, ka ta gwim kamala biy gà ɓəzla mimbèhè are ana ta gewa dər kataya i gà ga mahàmà a Mbulum, nda gà ika magər gà vatwa ya tsa asa. Aɗaba tar ta gewa kataya ka, dite gà mburma tə̀ zlə̀b à tar lele pəra. Ama iye ihər i gweɗe a kurum a nda ndzer: Tar ka, tàa ŋgat dukw maya ba tar aka ndəv. 3Aɗaba taŋa na bəla a sàsak ki vile a duwa a mala matawak ka, ku mege masla yak meme tekeɗe, ma tə sər ahər tsidze. 4Ki viler a ka, dəɓ nda akəl. Na a sir a aà dukw yak ata ki ge makàhà ŋa nda akəl aà mburma ya ka, Mbulum Tsir yak ana i gər ŋa ya ilik, dite ŋgat asa na a ta vilek aɗəm a dukw maya ba yak a.»
Mahàmà a Mbulum
Markus 11:25-26; Luka 11:2-4
5I dəba ŋa ya, Yesuw a gwaɗa a tar asa: «Na ki hemwim a a Mbulum ka, ka ti nwim kamala gà ɓəzla mimbèhè are ana ta mbeher a ya tsa. Aɗaba tar ta hamawa ka, ta hitsewa dər aà mbulum aka miɗ mburma parakkà i gà ga mahàmà a Mbulum, kige tsa, ika makə̀zlàkə̀zla gà vatwa tekeɗe ya. A sàs a tar ka, gà mburma ta fə̀r aà tar, ta gwa aà tar ka, gà ŋgwal ŋa. Aɗaba taŋa, kinehe ka, iye ihər i gweɗe a kurum a nda ndzer: Tar ka, tàa ŋgat dukw maya ba tar aka ndəv. 6Ama na aka sàsak mahàmà a Mbulum ka, pəts a ga a ma yak, hə̀ndə̀k aaba, dite ka hama a Mbulum Tsir yak ana mandza ŋa i təv makàhà ŋa ya. Aɗaba Mbulum Tsir yak na a ŋget a a dukw ana ki ge a i təv makàhà ŋa ya, dite ŋgat na a vilek a dukw maya ba yak a mbaŋa asa.
7Ama na ki hemwim a a Mbulum ka, ka ta bwimaha à bazlam hinne vìrìɗìɗɗe kamala gà na tə sər Mbulum tsiye tsa. Aɗaba tar tə dzala i gər tar ka, waytsà na maa ndəv kuɗa hinne kataya ka, Mbulum à gis a meheme mər lele, tsaatsa pàrsa. 8Aɗaba taŋa kurum ka, ka ta gwim kamala tar a tsa. Aɗaba ələk ki ti dzwìm a ba aà meheme ka, Mbulum Tsir kurum aka mbər mesire dukw ana a sle aà kurum, kà wayum a. 9Na ki dzwìm a ba aà mahàmà a Mbulum ka, araha na dukw ana ki gweɗwim a ya:
<Tsir mər ana mandza ŋa i mbulum i gər ŋa ya.
Kər ka, tsəɗaŋŋa,
bakal i təv yak tsa.
Gà mburma tserdze tə̀ zlə̀b dər à kər.
10Mekwere yak ana ki kwere a ya ka,
ma ge ba i təv mər mbaŋa.
Dukw ana kà waya ya, ma ge ba ka,
i mbulum ɗekɗek tsa.
Ma ge ɗa ba ika magər mər
ika gər ahəɗ mbaŋa asa.
11Vəl a mər dukw mezime ana
a sle a mər a lele kəla pat a.
12Pəl a mər à bakal mər,
kamala ana mì pə̀lawa dər
a gà na ta gewa a mər bakal a mbaŋa.
13Kasla mər lele ika vatwa yak a,
aɗaba Əbay sitene ma dzik a mər,
ma ta bana mər a bakal tsa.>
{Aɗaba kər ka, Əbay,
mala ndzəɗa ana a kwere a gà duwa,
mburma tì zlibe à kər a tserdze
aà biybiy a. *Amin.»}
14A gwaɗa a tar asa: «Na kàa pə̀lum à bakal a gà mburma ana ta gewa a kurum bakal a ka, Mbulum Tsir kurum ana i gər ŋa ya tekeɗe, à pìl a a kurum a dər mbaŋa. 15Ama na ki pìlwim a dər a gà na ta gewa a kurum bakal ata ya tsəka, Tsir kurum ata tekeɗe, à pìl a kurum a dər ɓav tsa mbaŋa.»
Yesuw a tsik bazlam mege ndəra
16I dəba ŋa ya, a gwaɗa a tar asa: «Na ki gwim a ndəra ka, ka ta gwim kamala gà ɓəzla mimbèhè are ana ta mbehe a are a Mbulum a tsa. Aɗaba tar ta gewa ndəra ka, ɓìrìzl ɓìrìzl ta mbìɗ a à are tar kamala ana tar ka, gà məməta ŋa ya, dite gà mburma ta fə̀r aà tar, ta gwa aà tar ka, gà ɓəzla mege ndəra nda ndzer kaɗəŋ. Iye ihər i gweɗe a kurum a nda ndzer: Tar ka, tàa ŋgat dukw mayaba tar aka ndəv. 17Ama na a sàsak mege ndəra ka, bara are yak, kà zliɗe ambəz lele. 18Aɗaba mburma tə sər dər ka, kər ihər ki ge a ndəra tsa. Say Mbulum Tsir yak ana mandza ŋa i təv makàhà ŋa ya ilik, na a sir a dər a. Dite Tsir yak ata na a ŋget a a dukw ana makàhà ŋa ya. Ŋgat asa na a vilek a dukw maya ba yak ana ki ge ya asa mbaŋa.»
Limana ana duwa a ger a tsa i mbulum a
Luka 12:33-34
19A gwaɗa a tar asa: «Ka ta kàhum limana kurum ka, kìtsek kìtsek ɗa ika gər ahəɗ tsa. Aɗaba bəla maŋgəz à gìsiŋa, nda gà bəla metinwe a nis a dər a, kige tsa, gà ɓəzla akəl tekeɗe, ti timiŋa, tifeɗ tì dzik a à kurum a asa mbaŋa. 20Ama ki kèhwim a gà limana kurum ka, i təv Mbulum ivaɗ. Aɗaba i fata ka, a ndze a sìlèɗìɗe, maŋgəz à gis a tsa. Metinwe a nis a dər tsa, gà ɓəzla akəl tekeɗe ibam, ti tim a, dite ti ndzeke a tsa asa mbaŋa. 21Aɗaba təv ana limana yak iɗəm a ka, madzala gà gər yak tekeɗe, tseŋgikkè i fata asa mbaŋa.»
Madzala gà gər ana ŋgwal ŋa ya, kamala are ana a da aba ya
ndzihndzih lele ya
Luka 11:34-36
22Ama a gwaɗa a tar asa: «Are yak ka, a ne kamala lalampa ba yak a. Aɗaba taŋa na are yak a da aba ya ndzihndzih lele ka, ba yak ana tserdze i bəɗ a tekeɗe, i təv dzaydzay ŋa mbaŋa. 23Ama na are yak a da aba ya tsəka, ba yak tekeɗe, ar ka, kamala ana i luvuŋ a mbaŋa. Aɗaba taŋa, dukw ana i təv yak, a ɗek a à vatwa dzaydzay a, aka mbete ka, tùtùrkùmma kər mandza ŋa ka, i luvuŋ ana ziŋziŋ a mbaŋa asa, kamala megweɗe ya, madzala gà gər ana ŋgwala tsa ika gər ahəɗ a.»
Mege megemir gà Mbulum nda limana
Luka 16:13
24Aləka, i dəba ŋa ya, a gwaɗa a tar asa: «Wura a sle aà megewe akaba a megemir gà mburma sula tsa. Aɗaba pat ŋgiɗ ka, a ge a swalwa a mìsle ŋgiɗ, a weye a biy ŋgiɗ lele. Kige tsa, à gis a ahəm aà biy ŋgiɗ aaha lele, i ŋgiɗ ka, à gis ahər a tsa, kùrtìtìk a niw a bazlam ŋgar. Kamala taŋa ya, kurum tekeɗe, ki slwim a aà megemir a Mbulum, dite ka, a siŋgwe asa sula sula tsa.»
Madzala gà gər a təv Mbulum
Luka 12:22-31
25A gwaɗa a tar asa: «Aɗaba taŋa na iye ihər i gweɗe a kurum a kinehe ka: Arəv ma da aà kurum a, ka dzalum dukw mezime ana mìi zim ana là, nda gà mìi se a ana là, kige tsa mìi tiye akaba a ana, là tsa. Aɗaba mesife kurum ana, a za gà dukw mezime ata tsiye, dite ba kurum ana, a za petek tsiye? 26Fə̀rum aà gà ɗiyeŋ ana ta beye a ndaà gəza mbulum a kwaŋ. Kwets ti slige a daw, kige tsa tì ses a, dite tì dze a duwa a awura tsa. Ama Mbulum Tsir kurum ana i gər ŋa ya, na a riŋ ihər a vile a ter a dukw mezime ya. Dite kurum dze ana, kà zùm dər gà ɗiyeŋ fit kweleŋ tsiye? 27Kinehe ana, weke na ika magər kurum a dzele a kataya, dite ka, a sle aà mesikehe a à mandza aà bəra ŋgar pat ilik a?
28Dite aɗaba la dze ya, na ki wiswim ba a à gər nda bazlam petek a? Fə̀rum aà gà mibìzè gà kwizir ana i dala ya kwaŋ, meme na a slil a ka, dite a bize a ya? Ta ge a mege megemir ŋa, ta ŋger a petek ŋa akaba ɓav tsa. 29Ama iye ihər i gweɗe a kurum ŋa: Ku mege Əbay Salumun ana akahər ata limana ŋgar a riŋ hinne ya tekeɗe ka, aka dza akaba gà ŋgwal gà petek ana gà matsahəna ŋa kamala gà mibìzè gà kwizir ata ya tsa. 30Aɗaba taŋa, na Mbulum a riŋ ihər à dìweye a gà gər gà kwizir ana i dala ya lele, a biziŋa, ama ndidwe ŋana ka, ta wene a tsara dze seyiŋ ana, sakwàn kurum a. A dìweye a kurum ana, à zè a taŋa tsiye, na kurum ana kə̀ gəsum iye nda gəzləŋ kwizikw a.
31Aɗaba taŋa, ka tə dzalum, kù gwaɗum ka, dukùla na mìi zim a ya, kige tsa, mìi se a ana, là tsa. Kige tsa bəla mìi dze akaba a ana, dukùla tsa asa. 32Aɗaba gà dukw ata tserdze ya, tsəŋgawwa na a dzele a ka, gà na tə sər Mbulum tsiye. Ama kurum ka, Mbulum Tsir kurum ana i gər ŋa ya, a sər gà dukw ata a sle aà kurum, kà wayum a fit dze. 33Ama malahalah ŋa ka, dzalum aka mekwere ŋgar, dite ki gwim a ka, dukw ana a waya ya ivaɗ. Na kàa gwim kamala taŋa ya ka, a vile a kurum a gà asiŋ gà dukw ŋgiɗ ana ti sle aà kurum a ya tserdze mbaŋa. 34Aɗaba taŋa, ka tə dzalum gà gər aka dukw ana a ta ge a ba ndidwe ya tsa. Aɗaba ndidwe ka, ki ta ŋgetwim a madzala gà gər ŋgiɗ pam asa. Madzala gà gər ana a vile a kurum a mesewere are a pat ata ya ka, aka sle ide.»
Избрани в момента:
Mata 6: gnd
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Wycliffe Bible Translators, Inc. All rights reserved.