Лука 4
4
О Шэйтани зумавэл э Исусес ки ливади
1О Исус, пхэрдо о Шужо Духос, ало палэ катар Иордани, тай о Духос гелдяс Лэс ки ливади. 2Отхэ Лэс саранда дес зумавэлас о Шэйтани. Алаи адава вахыти о Исус ништо на халас, ай дэчи бокхалило. 3Озаман о Шэйтани пхэнляс Лэски:
— Тэ сан Ту о Чяво э Дэвлэско, пхэн акалэ барэски тэ овэл манро.
4О Исус пхэнляс лэски:
— Яздимэ си: «На екхе хамаса бэшэл мануш».
5Андяс Лэс опэр учё тхан, о Шэйтани сикавдяс Лэски бут чяльти алаи о патишайлыки э пхуяко. 6Тай пхэнляс Лэски:
— Мэ кан дав Тут алаи лэнго барипэ тай о нами. Он динэ си мандэ, тай мэ дав лэн, кас мангав. 7Акана, тэ бангёса ангал мандэ, алаи адава кан овэл Тинро.
8О Исус пхэнляс:
— Яздимэ си: «Бангё ангал Сагбус, ангал Дэл тинрэстэ, тай кер иргатлыки Лэски екхески!»
9Пал атхэ о Шэйтани андяс Лэс ко Иерусалими тай тхэдяс Лэс опэр сами учё тхан ки храмеско.
— Тэ сан Ту о Чяво э Дэвлэско, — пхэнляс ов, — читут атхар тэлэ. 10Вай яздимэ си: «Пэ миляикенги зораса кан пхэнэл тэ агорадиен Тут», 11тай «он кан гелэн Тут опэр вастэндэ, Ту тэ на чялавэс То пинро андэ бар».
12О Исус пхэнляс лэски:
— Пхэнлило: «Ма зумав э Сагбус, э Дэвлэс тинрэс».
13Кана о Шэйтани бытэрды тэ зумавэл, ов ачявдяс Лэс вахытески.
О Исус лиляс тэ керэл иргатлыки э Дэвлэски
14О Исус ало палэ андэ Галилея, пхэрдо зор э Духоски. Лэстар шунлэ алаи одолэ пхуятэ. 15Ов сиклярэлас андэ синагогя, тай алаи махтадиенас Лэс.
О Назарет на пакял э Исусески
16Екхвар о Исус ало ко Назарет, андэ диз, катэ Ов барило, тай андэ суббота, сар екхараи Ов керэлас, гело андэ синагога. Отхэ о Исус ущино, тэ драпкерэл. 17Лэс динэ книжка прароки Исаия. Ов пхутэрдяс ла тай аракхляс о тхан, катэ сас яздимэ:
18«О Духос э Сагбуско опэр Мандэ,
вай Ов макхляс Ман тэ пхукавав э чёрэнги о Лошано Габэри.
Ов бичялдяс Ман тэ пхэнав э пханлэнги, кай лэн кан мукен,
э корэнги, кай лэн кан дэн дикхипэ,
тэ мукав э кхинэн,
19тэ пхэнав, кай ало вахыти э Сагбуски милако».
20О Исус пханляс э книжка, диняс ла ко иргати андэ синагога тай бэшло. О якха алаенги андэ синагога сас колимэна Лэстэ. 21Ов лиляс тэ пхэнэл:
— Авдес, кана тумэ шунэнас, улэ адала зборэс э Яздимаски.
22Алаи махтадиенас Лэс тай шаштиенас Лэски лаче зборэнги, савэ никлёнас андар Лэски мостэ.
— Та со, Ов нанай о чяво э Иосифеско? — пхученас он.
23О Исус пхэнляс лэнги:
— Тумэ Манги, гэлбэтэм, кан дэн мэ годятэ, сар пхэнлёлпэс: «Врачина! Аиндэрдие ту тут!» Тай кан пхэнэн Манги: «Амэ шунлям, кай Ту кердян бут чюдэс андэ Капернаум, кер ли атхэ, катэ Ту барилян, асавко». 24Ай пхэнав тумэнги о чячипэ, били екхе прарокес на гинэн андэ лэски дизатэ. 25Пхэнав тумэнги чячипэ, андэ вахытя ки Илияски, кана трин тай екхпаш брэш на сас брышым тай опэр алаи ки пху сас бари бокх, андэ Израиль сас бут пхивля, 26ай о Илия на сас бичялдо били екхатэ андар лэндэ, ами екх ки пхивли андэ Сарепта паш ко Сидон. 27Бут сас андэ Израиль гералэ о вахытя кана сас о прароки Елисей, ай били екх андар лэндэ на сас шужардо, ами екх о сирийцы Нааман.
28Алаи андэ синагога холясаилэ, кана шунлэ адава. 29Он ущинэ, никалдэ э Исусес пал диз тай андэ Лэс ко чети ки гораско, опэр савэстэ сас тхэди э диз, тэ чен Лэс тэлэ. 30Ай о Исус накхло андар дюняс тай гело.
О Исус кувдиел э бишужэ духос
31Ов гело андэ галилейски диз ко Капернаум, тай андэ субботаки деса сиклярэлас отхэ дюняс. 32О мануша шаштиенас Лэски сикляримаски, вай андэ Лэски зборэндэ шунлёлас барипэ. 33Андэ синагога сас мануш, андэ савэстэ сас о духос э бишужэ шэйтанеско, тай бирдэн ов диняс бэбэря:
34— А-а-а! Со Ту мангес амэндар, Исус андар Назарет? Ту алян, тэ мударэс амэн? Мэ джянав, Кон Ту! Ту — о Шужо э Дэвлэско!
35— Тэныкизэ! — холяса тхэдяс лэс о Исус. — Никлё андар лэстэ!
Читяс э манушэс ангал алаендэ ки пху, о шэйтани никлисто андар лэстэ тай на дукхавдяс лэс. 36Алаи шаштиенас тай пхэнэнас екх аврэски:
— Со си адава? Асавке баримаса тай зораса Ов пхэнэл бишужэ духенги, тай он никлён!
37О зборэс катар Исус шунлёнас алаи ко тхана агорял.
О Исус аиндэрдиел аврэн
38Никлисто андар синагога, о Исус гело андэ кхер ко Симон. Ки сасуй ки Симонэски адава вахыти сас баро тхарипэ, э Исусес манглэ, тэ керэл лаки ярдыми. 39Бангило опэр латэ, о Исус пхэнляс э тхаримаски тэ мукел э манушня, тай ов мукляс ла. Ой бирдэн ущини тай лиляс тэ тхэл лэнги конас.
40Кана о кхам бэшло, алаи, кастэ сас насвалэ алаи э дукхенца, лилэ тэ анэн лэн ко Исус, тай Ов тхэлас опэр кажнестэ Пэ васта тай аиндэрдиелас лэн. 41Аякхажэ ли о шэйтаня никлёнас андар бут мануша бэбэряса:
— Ту — о Чяво э Дэвлэско!
Ай о Исус на мукелас лэн тэ пхэнэн, вай он джянэнас, кай Ов — Христос.
О Исус сиклярэл андэ Иудея
42Кана уло дес, о Исус никлисто андар диз тай гело андэ биманушэнго тхан. О мануша лилэ тэ родэн Лэс, тай кана аракхлэ, мангенас тэ ачёл лэндэ. 43Ай о Исус пхэнляс лэнги:
— Мэ камэл тэ пхукавав Лошано Габэри катар Патишайлыки ки Дэвлэско ли аврэ дизэндэ, вай адалэски Мэ сом бичялдо.
44Тай Ов сиклярэлас андэ синагогя ки Иудеяки.
Избрани в момента:
Лука 4: КРБ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/