LUKAS 18
18
Salah atakam basakamtiw ipic baposomtew atakam
1Yesus masirin, baposomtew atakam, e ow aotawefen. E atakam, e ow janim Allah manimawar, wunam jak basakayem arapok, inim bajomtamas ara. 2E atawef atakam ara, “Ow asalah atakam basakamtiw ipic, kota cowok aemapefen. E ipic, Allah omar opok ipic arawen. Aram asmat ow omar opok ipic arawen. 3E kotaam fwisma cowoc aemapefen. E cowok e aramat ipic aenawoma aeefen. Aram atakam aotawa aeefen. ‘Jipic cowokcin aamoworomamom. Or e perkara atakam basakamtiwey.’ Inim aeefen. 4Bar arke e salah atakam basakamtiw ipic, e atakam basakamtiw pwicaken. Asep ara masirin, ar bi binip aceceremefen. ‘Dor Allah omar opok. Doram asmat ow omar opok. 5E nat, a fwisma cowoc ajurusuma aeman. Inimas ara, dor e aperkara atakam asakamtiwmin. Ar oromin oromin bwenaw, wunam dor namjipi baperemtiwasin.’ Inim bi binip aceceremefen.” Yesus inim aeefen. 6Bare, e Tuhan atakam aootawefen. “Ca nat, e salah atakam basakamtiw fasi ipic aratakam jen pajiey. 7E Allah aereremtawef ow, jokam iramam, janim fak, e Allah aanimcemes. Allaham, ‘E ow, ow tarowat ara,’ inim atakam aotawcemar araman. Aram e ow asan akat bom, bafafay opok araman. 8Jakaperey. Allah, e ow, ow tarowat atakam asarimotawcema. E nat, e Asmat Anakat Ajaworemef Ipic, awames capinmi aofasicow, ar abasicim ow aporcemarnew?” Yesus inim aeefen.
Parisi ipicam, pemerintah uang batawanimtam kerja ipicam, baposomtew atakam
9Barewen. Yesus wun baposomtew atakam wun ow aotawefen. E ow ara, “Dar ow tarowat araman,” inim bi binip aceceremfesen. Inimas e ow wun ow bifan afayomfesen. 10E baposomtew atakam ara: “Jipic jamnuk, janim Allah manim, e Allah cem afiwfesen. E wun ipic Parisi ipic arawen. E wun ipic masirin, pemerintah uang batawanimtam kerja ipic arawen. 11E Parisi ipic emtow asitef, wunam e ajak aman janim Allah aanimefen. ‘Allah. Dor e wun ow cimin arapok. Doram ewamec pemerintah uang batawanimtam kerja ipic cimin arapok. Inimas dor terima kasih atakam or aotawmin. E wun ow bare, osom ow ara. Aram ow fasi ara. Aram cen cemen osom ow ara. 12Do nat, e mingguin mingguin, bar jamnuk amos pok amasea ajimop. Doram pok sepuluh ajiwar atewa ajimop, e wun ok cowok Allah atetama ajimop.’ Inim aeefen. 13E pemerintah uang batawanimtam kerja ipic nat, damasan opok aememefen. Aram e manmok op bapemtometem opok cowok arawen. Aram jak pwicaknakut aememefen. Aram atakam aotawefen. ‘Allah. Dor dosa ipic awamcey ara. Saw akat oworporcan!’ Inim aeefen. 14Jakaperey. Allah e ipic jipic tarowat ara, inim atakam atawefen. E ipic masirin, cem ajisosefen. Allah nat, e wun ipic, jipic tarowat atakam bataw opoken. Bare, Allah e arma batawsicim ow takas namke akamemcema. E nat, ar e arma batawsicim opok ow asicimcema.” Yesus inim aeefen.
Yesus, jiwi kanim asan akat aomef
(Mat. 19:13-15; Mrk. 10:13-16)
15Wun ow e ajiwi kanim Yesuspu atowocenfesen. Ar Yesus e jiwi ban bosompor akat arawen. E Yesus mamkawi ow inimas aporfes, wunam acuw aatfesen. 16Yesus nat, e jiwi ajateefen. “A jiwi, e dodampu inim baenawces. Acuw bat arapok. A jiwi inim awcawor ow, e Allah Pemerintah Asan aemapcemes. 17Atakamnak ara, e jiwi inim awcawor memem opok ow, e Allah Pemerintah Asan bwemfiw asan opok.” Yesus inim aeefen.
Pok awut ow
(Mat. 19:16-30; Mrk. 10:17-31)
18Barewen. Kepala ipic cowokam jonow Yesus atowporefen. “Guru akatenem. Dor jiwnenak batamemawar akat ara. Dor inimas ucim pok emcey?” Inim aeefen. 19Yesus masirin, “Dor ow akat atakam atawmenem nat, ucimaram? Ow akat, bare Allah cowok ara. Wun ow opok. 20Bare, oram Allah jirmec omsom. ‘Cen osom ecem. Daw catiwcem. Osom ecem. Suw atakam atawcem. Oricipicam, orosowocam mamsicimawarey.’ Allah inim jirmec ajirimama.” Yesus inim aeefen. 21E ipic masirin, “Bare, jiwi ewememof, dor eras takas aeawiru.” Inim aeefen. 22Yesus inim atakam jen ajief ara, ar atakam aramat ipic aotawefen. “Or pok cowoknakap bwem opok aemem. E opok takas uang mamuwumtatey. E uang, e pok opok ow sey mamseyamtamey. Inimas aemcem, asep jofay or e onam op capinmi, pok anakat atowomatcemem. Oram mamofasiey. Do jamkawican.” Inim aeefen. 23E ipic nat, opok awutut aomomef. Inimas ar inim atakam jen ajief, ar jak pwicaknakut aememefen. 24Yesusam e ipic jak pwicak aporefen. Ar masirin, atakam aotawefen. “Pok awut epcom ow, e Allah Pemerintah Asan bafiw, bare susah awutnakut ara. 25Unta, jarum jof bafiw, bare susah kanim pwiciri ara. Pok awut epcom ow nat, e Allah Pemerintah Asan bafiw, bare susah awutnakut ara.” Inim aeefen. 26E inim atakam jen ajifes ow masirin, atakam aotawfesen. “Inimas ara, e ajoremces ow, ucim owaram?” Inim aefesen. 27E Yesus masirin, “E asmat ow bwemem asan opokas, bare Allah eras aemcemar araman.” Inim aeefen. 28Petrus masirin, “Bare, dar e daras takas bakan ajifom, wunam ajamkawifenom.” Inim aeefen. 29Yesus masirin, atakam e ow aotawefen. “Atakamnak ara, wun ow e acemnew, e acepesnew, e arewcewesnew, e arisarownew, bakan ajifes. Ar eras, e Allah Pemerintah kerja bwemtam, bakan ajifes. 30E bakan ajifesas, bare kanim ara. E ow nat, awames capinmi ememames, bare eras awutnakut aotowopcemes. Wunam e aenawcow jofay, jiwnenak aatamemawarcemes.” Inim aeefen.
Yesus e adamir aafcowas, atakam aotawef
(Mat. 20:17-19; Mrk. 10:32-34)
31Barewen. Yesus e amamkawi ow dua belas ajiwar ajateef, wunam atakam e ow aotawefen. “Jakaperey. Dar Yerusalem ajisosmom. Ametnak ara, e Allah atakam botaw ow, e Asmat Anakat Ajaworemef Ipic aemcowas, surat emcaeapomfes. Bare, e Yerusalem ara, ow eras takas, e surat jipu aemcemes. 32Ow, aramat ipic, e Yahudi opok samat ow aotasimemtamcemes. E ow masirin, aramat ipic uc aomoccemes. Aram aramat ipic bifan afaycemes. Aram bese e aramat ipic dampu ajicemes. 33Aram aramat ipic omop aafcemes, wunam acatiwcemes. Bar mamincop ara masirin, aramat ipic aojaworsitcema.” Inim aeefen. 34E ow nat, inim atakam biyof bacomom opok arawen. E atakam umuton opok arawen. Bare, ar e Yesus atawef atakam amsom opoken.
Yesus manmok kapi ipic e manmok ateremef
(Mat. 20:29-34; Mrk. 10:46-52)
35Barewen. Yesus kota Yeriko sotop inim ajarsisiemef ara, manmok kapi ipic e bokotpuak aemapefen. Ar uang janim manim arawen. 36E ipic, e ow arke erasan bokorfe jen ajief, wunam jonow atowporefen. “A ucimasam?” Inim aeefen. 37Ow masirin, atakam, e ipic aotawfesen. “E Nasaret ipic juwas Yesus aokorfema.” Inim aefesen. 38E ipic masirin, “Yesus! Daud urpis! Saw akat oworporcan!” Inim aeefen. 39E bap ajarfes ow masirin, e ipic jiman aaffesen. “Jokona!” Inim aefesen. E ipic nat, atakam awutut aotawefen. “Daud urpis! Saw akat oworporcan!” Inim aeefen. 40Yesus masirin, akutemef, wunam ow e ipic e abipu batowocen jirmec ajirimefen. E ipic sotop aenawef masirin, Yesus jonow e ipic atowporefen. 41“Dor or ucim pok emtamcen?” Inim aeefen. E ipic masirin, “Tuhan. E domanmok bateremtamcan.” Inim aeefen. 42Yesus masirin, atakam e ipic aotawefen. “E omanmok batereycow. Or asicimamenem. Inimas e omanmok atereyemamem.” Inim aeefen. 43Bare, e ipic manmok asarimtereyefen. Ar masirin, Yesus akac ajarfesen. Aram Allah asicimefen. E ow takasam eras aporfes, aram Allah asicimfesen.
Избрани в момента:
LUKAS 18: LAICNS
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
LAI 1985