TEALIAN 4
4
Kain tukon Habel
1Doibundu Adam ponikai tukon Hawa, naboloki, maka tianan boinedoo. Yana suunge komeeng kopau malane tukon bantile, “Tukon Temeneno natulung yaku malaato meeng kopau malane.” Maka yana sombuikene donapaudoo Kain. 2Maka Hawa mosuung koidan meeng kopau malane, kosambuno Habel. Habel teali pototooli domba, bai Kain teali polimang asi. 3Bubula kotempo doibundu Kain mangala soobos kona asi hasilodoo maka sosubakene doi Temeneno. 4#Ibr. 11:4 Maka Habel mangala nadomba pauno langgongo luwedoi meeng kona domba koidan, maka yana kelete, maka yana sosubakene kosoobos momonondok tuuno doi Temeneno. Ko Temeneno sanaang doi Habel tukon nasosubakon, 5bai aki natalimayo Kain tukon nasosubakon. Kain teali nggimal tuuno, tukon koduduso lokiso. 6Maka ko Temeneno bantile doi Kain, “Bulaando ikoo monggimal? Bulaando molokisoo kodudusomu? 7Kalu komu kokubai monondok, tantu ikoo boit; bai kalu ikoo kubaiyo komo lokis, maka kolalim totiili sulano nausok doi noamu lalomo. Kolalim naikon kuasaiyomo kobutomu, bai ikoo sio mulungguiyo.”
8 #
Mat. 23:35; Luk. 11:51; 1Yoh. 3:12 Maka Kain bantile doi Habel, utuso pioto, “Mai ndataus doi asi.” Salataa yanila polong idoo, Kain lobosio tukon akateo Habel utusodoo pioto.
9 Temeneno masadai doi Kain, “Inaando Habel, utusomu pioto?”
Kain timbiliyo, “Aki kutoiyo. Kai sio kudagaiyo koutusonggu pioto?”
10 #
Ibr. 12:24
Maka ko Temeneno bantile, “Bulaando ikoo mokubaiyo kolangge mominatakuton? Utusomu pioto sauno luwedoi buta lubato doiya-Ku buno lalo monggeleamon kabiyo kobalasano. 11Ikoo katualoon mapolong akimo namoola limange kobuta. Butadoo lapamo sesepe koutusomu pioto sauno, kabaikon bukayomo kobabano sulano natalimayo utusomu pioto saunodoo salataa ikoo akateo yana. 12Kalu ikoo masakakon lobo doi buta, butadoo aki naikon natubokene kooioila; ikoo naikon teali lausala moakiyo konalipu dungolan doi dunia.”
13Maka Kain bantile doi Temeneno, “Doukumanoo todudulo babalat, akimo kutendenge tanggunge. 14Ikoo siikayo yaku luwedoi buta nia, mododoon doi Mudanoan. Yaku naikon teali lausala moakiyo daku lipu dungolan doi dunia tukon yaku naikon inakate doi indee komiano komo pososuungganaku.”
15Bai ko Temeneno bantile, “Aki. Kalu ikoo inakate, maka kopabalaso, pitu komian tongusokon domoakatekonoo naikon koidan inakate.” Doibundu Temeneno obosiyo paloosan doi Kain sulano inde-indee komo pososuunggene yana inai naakateyo. 16Maka Kain tauso doi Temeneno salaano tukon dungol doi lipu kosambuno “Lausalaan” taalikon tolopot doi Eden.
Kain nakatulunan
17Kain tukon naboloki malaat pau malaneno, kosambuno Henokh. Lapa doimbaa Kain mokokondong meeng kokota tukon yana sombuikene dokotadoo loloikene konapaudoo sambuno. 18Irad kotamano Henokh. Mehuyael kotamano Irad. Metusael kotamano Mehuyael, tukon Lamekh kotamano Metusael. 19Lamekh lua kona boloki, Ada tukon Zila. 20Ada suunge Yabal, tukon Yabal nakatulunan doiyamo bangsa mopialayo koiyayon tukon dungol doi sandung lalomo. 21Koutuso pioto kosambuno Yubal, tukon Yubal nakatulunan doiyamo tukang musiik kasapi tukon suling. 22Zila suunge Tubal-Kain, tukon konakatulunan kubaiyo sasaibino kopakakas kaliangano doi tambaga tukon besi. Tubal-Kain utuso boine kosambuno Naama.
23Lamekh bantile doi naboloki molua,
“Ada tukon Zila, ndongoliiyo!
Meeng kotabo yaku akateo sabab lapamo bobokiiyaku.
24Kalu pitu komian inakate tuuk posobolino Kain,
maka pitu kolono pitu komian naikon inakate kalu yaku inakate.”
Set tukon Enos
25Adam tukon naboloki malaat koidan meeng kopau malaneno. Hawa bantile, “Ko Mian Bisa lapamo beenggu pau malaneno posoboli Habel, molapamo Kain akateo.” Tobikon doiya Hawa sombuikene paudoo Set. 26Set daano konapau malaneno mobinee sambu Enos. Doi lolukoo doiyamo kona tambuunan komian bantile ko Temeneno sambuno kalu sosuba.
Избрани в момента:
TEALIAN 4: LAIBGZ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте