Emiighom 2
2
1 Ịduon kụ ẹdi ọlhem aḅirini phọ aru amuneen. 1Ịduon kụ ẹdi ọlhem aḅirini phọ aru amuneen. 2#Ẹḍua 20.11#Hib 4.4, 10Omuneniom oḍual aḍio phọ kụ ẹdi Ẹnaan ekureri iiḍighi phọ ọdi. 3Ẹnaan ịseph ni ḍio phọ ạḍiphe kụ ẹsaḅar eseere mọ aḍio iigbia, ịdi eḍighi bọ aḍio phọ ạḍiphe kụ ẹdi odi akureri bọ ọlhem mọ. 4Kụ ịpe kụ ịdi ọlhem bọ aḅirini phọ.
Oghoony phọ Iden
Mem mọ Ọmoogh-we Ẹnaan phọ ạlhem bọ aḅirini phọ, 5ịizupha ị́tol de phọ, kụ ikpo iimuma ísi ịdi eḍighi bọ Ọmoogh-we Ẹnaan phọ kőruom ọlophia, oye ọ́rol dị kaḅeph ozo. 6Kụ ọlo ạmuum ạḍua ghan ni ọlha-ude ạḅore ghan oomo ade phọ.
7 #
1 Kọr 15.45
Kụ Ọmoogh-we Ẹnaan phọ ạsighe ọposo sịphe ade phọ ạlhemom oye, kụ aphooghu ḍiphooghu aghuḍum ạlhogh ropogh izon ọdi; kụ oye phọ amiigh ọmoogh aghuḍum.
8Kụ Ọmoogh-we Ẹnaan phọ amitiom oghoony ẹpe Iden ẹpe erumuḍio phọ remite ghan bọ, kụ aseere sịphe oye phọ ọpo ọdi mạlhem bọ. 9#Ogon 2.7; 22.2, 14Ọdi aḍighi ni ịdi ịdo kịrokiro ịma ireeny kesi sịphe phọ kụ emuum ịma iimuma. Sịphe ogbo oghoony phọ oreeny ạrol li dị aḍighi oreeny ọngo aghuḍum, rꞌọnon oreeny ọlo olegheri igey rꞌịkaraph.
10Okol ạmuum akiil ghan ni sịphe Iden dị aleenye mụum sịphe oghoony phọ; otenom Iden okol phọ adia aḍighi inya ạriphiiny. 11Kụ ḍien ọḅel ọphiiny phọ ughol mọ aPison; ọphiiny phọ ọphon rakil ghan kaaghironom eelhe phọ aHavila. 12(Ẹpe phọ ogey agol rꞌelho eeḅi eḍu rꞌịbekulari kụ edi ghan.) 13Ḍien ọphiiny phọ amuneniom bọ ịyal phọ ughol mọ aGihon. Ọphiiny phọ ọphon rakil ghan kaaghironom eelhe phọ aKus. 14Ḍien ọphiiny phọ amuneniom bọ ịraar phọ ughol mọ ạTaigris. Ọphiiny phọ ọphon rakil ghan kasi eelhe Asiria ạga emitenom erumuḍio phọ; kụ ọphiiny phọ amuneniom bọ inya phọ ughol mọ aYufratis.
15Kụ Ọmoogh-we Ẹnaan phọ aseere oye phọ sịphe oghoony phọ Iden, mọ aphogh ghan aselemi. 16Kụ ạḅeni nyọdi mọ, “Le ghan tọrobo eemuma ạtorotoro oreeny sịen oghoony phọ, 17epel oreeny olegheri igey rꞌịkaraph phọ. Kále eemuma oreeny phọ ọpo; eḍighi ịyaar dị nạ alhe, nạ ramugh ni mem mem mọ.”
18Kụ Ọmoogh-we Ẹnaan phọ ạḅem mọ, “Ị́nighe dị oye phọ kạtol dọl igini. Mị kạlem ọḅarama dị kạloghonaan ghan nyọdi ḍịghaagh.” 19Kụ Ẹnaan ẹsighe ọposo sịphe ade phọ ẹlemom oomo ịnam eḍum rꞌịnun okuaḍio phọ, kụ ẹsighe eruom oye phọ mọ ọdi aaghologh siḍien; kụ ịpe kụ ịdi bịdi ọmoogh bọ siḍien phọ ạbidi. 20Kụ oye phọ aaghologh siḍien oomo ịnun phọ rꞌịnam mọ, kụ rꞌoniin ọnyo ạbidi ọ́rol dị ạkpe oḍighi ọḅarama oye phọ.
21Kụ Ọmoogh-we Ẹnaan phọ aḍighi ịdi oye phọ ameel tugbogh ạralha kụ sịphe ọdi rạnaani bọ, kụ Ọmoogh-we Ẹnaan phọ ạsighe oniin ọkala oku oye phọ kụ ạḅile aḍueghiom esi phọ ḍizu. 22Ọkala oku phọ ọpo Ọmoogh-we Ẹnaan phọ ạsighe bọ loor oye phọ kụ edi ọdi ạlhemom ạnir-ephoph, kụ ạḅogh nyọdi ạngo oye phọ. 23Kụ oye phọ ạḅem mọ,
“Mị mamuzaan! Ọphon ọdo ạmi — ọḅarara dị ọsighe esi ọḅarara ạmi, rꞌiphulupul dị ọsighe esi iphulupul ạmi. Kokol nyọdi mọ ạnir-ephoph, ịdi eḍighi bọ ụsighe nyọdi loor olephiri ọony.” 24#Mat 19.5; Mạk 10.7, 8; 1 Kọr 6.16; Ẹfe 5.31Ịduon kụ iḍighi bọ kụ oye rạbile ghan bọ ọde rꞌonhiin ọdi kạḅophoghan rꞌạnir ọdi; bịn bịdi oḍighi iniin iphulupul.
25Oye phọ rꞌạnir phọ ọdi ụrologhu ẹdaḅa; kụ ọlo bịdi úkiil umugholoor.
Избрани в момента:
Emiighom 2: ẠḌI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS