GÉNESIS 16
16
Agarmantapish, Ismaelmantapish
1Abrampaj huarmi Saraica mana huachajmi carca. Paica Egiptomanta caj Agar huarmitami paipajta ruraj cachun charirca. 2Saraica Abramtaca:
–Mandaj Dios ñucata mana huachaj cachun rurashcataca canllataj yachanguimi. Cunanca ñucapajta ruraj Agar huarmipi chayaripai, paimanta huahuacunayuj tucushapishchari– nijpimi, Abramca paipaj huarmi Sarai nishcata uyarca. 3Canaanpi chashna ña chunga huatata causacushpami, Saraica Egiptomanta caj paipajta ruraj Agar huarmitaca paipaj cusa Abramman, paipaj huarmi cachun curca. 4Abram chayarijpica Agar huarmica chichurcami. Ashtahuanpish pai ña chichu cashpaca paipaj ama Saraitaca p'iñanatami callarirca. 5Chaimi Saraica paipaj cusa Abramtaca:
–Canmantami Agarca ñucata p'iñan. Ñucapajta ruraj huarmitaca ñucamari cambaj huarmi cachun curcani. Ashtahuanpish cunan pai ña chichu cashpaca, ñucata yalli cashcatami yuyan. Cunanca cantapish, ñucatapish Mandaj Dios imatapish nichun– nircami.
6Shina nijpimi Abramca, Saraitaca:
–Riqui, cambajta ruraj huarmica cambaj maquillapitajmi. Can imata rurasha nishcatapish rurailla– nijpimi Saraica, paipajta ruraj Agartaca sinchita llaquichinata callarijpi Agarca miticushpa rirca. 7Chaipimi Mandaj Diospaj angelca, Shur shuti shitashca pamba ñanpi tiyaj pugyu c'uchupi tupashpaca:
8–Saraipajta ruraj Agar, ¿maimantataj shamucungui? ¿maimantaj ricungui?– nijpi Agarca:
–Ñuca ama Saraita miticushpami ricuni– nirca.
9Chaimi Mandaj Diospaj angelca:
–Cambaj ama Saraipajllamantaj tigrailla, pai imata mandashcata tucuita cazuilla– nirca.
10Mandaj Diospaj angelca cashnapishmi nirca:
“Cambaj huahua huahuacunataca achcatami mirachisha.
Achca cashcamanta pipish mana yupai tucungachu.
11Mandaj Diospaj angelca cashnapish nircarajmi:
Canca chichumi cangui.
Shuj c'ari huahuatami huachangui.
Can llaquihuan cashpa mañashcataca Mandaj Diosca uyarcami.
Chaimanta cambaj huijsapi caj huahuataca Ismaelta shutichingui.
12Paica sacha animal shinami p'iña canga.
Paica maquita alzashpami tucuicunahuan macanacunga.
Tucuicunami paihuanpish macanacusha ningacuna.
Paipaj huauquicunapaj ch'imbapurapimi causanga” nircami.
13Chaimi Agarca paihuan rimaj Mandaj Diostaca: “Ñucata ricuj Taita Diosmi” nishpa shutichirca. Paica: “Taita Diosta ricushpapish mana huañushpa causacunirajmi” nircami. 14Chaimi chai pugyutaca: “Ñucata Ricuj Causacujpaj Pugyumi” nishpa shutichirca. Chai pugyuca Cades pueblohuan Bered pueblohuan chaupipimi.
15Agarca Abrampajtaca, shuj c'ari huahuatami huacharca. Chai huahuatami Abramca Ismaelta shutichirca. 16Abram pusaj chunga sujta huatayuj cajpimi, Agarca Ismaeltaca huacharca.
Избрани в момента:
GÉNESIS 16: QCHI04
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Quichua Chimborazo Bible Revision 2010 © United Bible Societies, 2010.