Kananet 42
42
Ovvo logoz cik Ya̱ko̱bo̱ uuta labi Masire
1Baling izik Ya̱ko̱bo̱ ming aavtte labina Masire, izek zin logoz waginnek ne, “Nya ming egelmonu niko ko̱?” 2Kar bo̱do̱k kize ne, “Kiziya anna azi ol ne aavtte labina Masire. U̱lu̱cce̱ oot nginati kar atalteutu labi u̱gge̱, kar naga kuruget ci iróng ka̱da̱i̱ magiz.”
3Itingta zin gotonoggi Yosevo cik een omoto oot atalta labi Masire. 4Ma̱i̱je̱ Ya̱ko̱bo̱ iróng i̱tto̱n Benjamin gotoni Yosevo wa yaatinne bu̱k ki logoz ne̱ke̱, ma̱rri̱t enne o̱ngo̱o̱le̱ gerza ming i̱i̱na̱k nonno zoz ci gerze. 5Orkorrit zin logoz cik Israilo ki ol u̱gge̱ bu̱k kar koot katalta labi Masire, ma̱rri̱t magiz adak lo̱o̱c ci Kanaani.
6I̱yo̱ko̱ een da̱ Yosevo ddi̱ki̱ryo̱i̱t ci a̱gga̱m lo̱o̱c ci Masiro, nonno ci atalek ol labi. Baling uzuca gotonoggja Masir, u̱lu̱ltte̱ ngatinne kicinnet ngu̱mti̱ cigge̱k lo̱o̱c. 7Baling icin Yosevo gotonoggi, a̱gga̱ enne nogo, ma̱i̱je̱ ngatu enne u̱tu̱gu̱ ele ki ci een enne i̱do̱ngo̱je̱ni̱t kar kozozik nogo gerzet. I̱jji̱n zin enne gotonoggi, “A̱vvu̱nnu̱ nga?”
O̱bo̱dde̱k nege nonno, “Ka̱vvu̱nna̱ lo̱o̱ce̱ ci Kanaani, kovvo kutana da̱i̱ne̱t.”
8Ming a̱gga̱ Yosevo gotonoggi nu̱nu̱n, iróng zin nege a̱gga̱ nonno bu̱k. 9A̱a̱da̱ zin Yosevo o̱no̱zzo̱k balik onoze enne ke̱ zo̱ze̱ cinne̱ng, kar zin kizek nogo ne, “E̱e̱ggi̱nnu̱ niga ro̱tto̱k! Ovvo orootu lo̱o̱c cinna̱ng ngintik iróng ol ebek ko̱.”
10Abarizet zin nege, a̱nne̱k nonno ne, “Iróng een niko, manyi. A̱vvu̱ du̱cca̱ha̱ cigunnek ovvo uuta da̱i̱ne̱t. 11Ke̱e̱ggi̱nna̱ naga do̱o̱k logoz cik e̱e̱t co̱de̱. E̱e̱ggi̱n du̱cca̱ha̱ cigunnek ol cik abunna, iróng e̱e̱ggi̱n ro̱tto̱k.”
12Izek zin Yosevo nogo ne, “I̱llo̱i̱! A̱vvu̱nnu̱ niga orootu lo̱o̱c cinna̱ng ngintik iróng ol ebek ko̱.”
13Ma̱i̱je̱ nege abarizek nonno, “Ke̱e̱ggi̱nna̱ naga ba̱li̱ye̱ logoz omoto ki rama, logoz cik e̱e̱t co̱de̱, abak enne lo̱o̱ce̱ ci Kanaani. Aave gotoneti wa dici ko̱ i̱yo̱ko̱ ki be̱e̱ti̱nna̱ng, kar co̱de̱ ki̱zzi̱ ba̱li̱ye̱.”
14Izek zin Yosevo nogo ne, “Ki ming ku̱du̱wa̱u̱ng anna i̱ge̱t ko̱: E̱e̱ggi̱nnu̱ niga ro̱tto̱k! 15Katimannung atidic anna i̱ge̱t go̱o̱le̱ cu: Ki̱tto̱ni̱k alaan ci Masiro ming ngen aruge, iróng atin niga ungneku ngintu lo̱o̱c zee ki̱ki̱ya̱ gotonnu cunno̱ng wa dici ko̱ rok ngintu. 16I̱tto̱ni̱t gotonoggu u̱gge̱ koot kanyakta gotonnu wa dici ko̱; ovvo uggak ngatinno̱ng irahek lagama, kar kitiman zoz cunno̱ng ming a̱du̱wa̱nnu̱ zoz ci een de̱de̱. Ming iróng niga a̱du̱wa̱nnu̱ zoz ci een de̱de̱, ki ming aruge alaani ko̱ e̱e̱ggi̱nnu̱ niga de̱de̱ ro̱tto̱k!” 17Kar enne kaarik nogo lagam ka̱vvu̱to̱ nginati gwo̱o̱nya̱ i̱i̱yo̱.
18Kar i̱i̱te̱n ci een i̱i̱yo̱, a̱nne̱k zin Yosevo nogo ne, “U̱tu̱gu̱z zoz cu kar uruget, eci ke̱e̱ni̱ anna e̱e̱t ci ko̱ngo̱o̱le̱ Ta̱mu̱ta̱dde̱n: 19Ming e̱e̱ggi̱nnu̱ niga ol cik abunnanu de̱de̱, anyik gotonnu cinno̱ng co̱de̱ ka̱vvu̱ ngatu lagama, ma̱i̱je̱ niga do̱o̱k o̱o̱tte̱ labi ngati ol cuggo̱k apirna magiz ce̱e̱zi̱nne̱ ko̱. 20Ma̱i̱je̱ ngatu ming ovvo obodanu, anyaktang la̱du̱n gotonnu wa dici ko̱, kar atin zoz cunno̱ng kidimane kubunna ci iróng atin e̱e̱ti̱ imma ngatinno̱ng a̱da̱i̱.” Elemtta zin nege zoz neci.
21Ozozit zin nege e̱le̱tti̱ne̱ cigge̱k do̱, “De̱de̱ ke̱de̱zze̱ naga zo̱ze̱ ci gotonet bali kabure naga ke̱. Kicinnet ba̱li̱ye̱ naga matiz cinne baling ilaleket agit zo̱ze̱ ci ruget cinne, ma̱i̱je̱ naga iróng kaziye zoz cinne; zoz zin ci a̱kku̱na̱ke̱t matizi cu agit ko̱ nenen necu.”
22Abariz zin Reubeni zoz neci, “Ngen ba̱li̱ye̱ anna ku̱du̱wa̱u̱ng ka̱nne̱kku̱ng ne ma ogonnu mu̱nye̱n zo̱ze̱ ci do̱le̱co̱? Ma̱i̱je̱ niga iróng aziknnu! I̱yo̱ko̱ zin adakket bi̱ye̱ta̱ ciginnek.” 23Iróng nege a̱gga̱ ming aziye Yosevo zoz ci ozoz nege ko̱, eci enne anyak e̱e̱t ci bali a̱gga̱me̱k nonno zoz.
24Utuhuwe Yosevo ngatinne̱ng kicin tu̱ kar ku̱tu̱lu̱ lo̱mu̱k, kar bo̱do̱k kutuhuwezik nogo kar kozozik nogo bo̱do̱k. A̱gga̱m Yosevo ngatinne̱ng Si̱mo̱ne̱ kecebe kicinnet nege do̱o̱k eberene.
I̱mi̱rrte̱ gotonoggi Yosevo oot olo
25Erecanek zin Yosevo ol wak a̱li̱ngli̱ng bu̱k ke̱ ke̱le̱ze̱k labi lodet cigge̱k, kar bo̱do̱k kobodehe ngenngene o̱ro̱bi̱ya̱ ciginnek lo̱do̱ cinne, kar kanycik nogo da̱i̱ne̱t cik goolu. Baling u̱tu̱gu̱zze̱ kaala ne̱ko̱ do̱o̱k ngatinne̱ng, 26odongttek zin labi cigge̱k zi̱gi̱re̱ kar zin koot.
27Imma ngati bali ovvo nege adungne goola ba̱a̱li̱n neci, oo zin e̱e̱ti̱ co̱de̱ ngatinne̱ng lo̱do̱ cinne kar kidimak zi̱gi̱r cinne labi u̱gge̱, abarik enne icin o̱ro̱bi̱ya̱ ciginnek lo̱do̱ utuga. 28A̱nne̱k zin enne gotonoggi ne, “O̱bo̱dda̱ annit o̱ro̱bi̱ya̱na̱ do̱o̱k, o̱ro̱bi̱ya̱ ne̱ke̱ cik aavtte lo̱do̱ cinanni ecito ko̱.”
Ovoco zi̱nze̱tti̱ cigge̱k kar kegelemit e̱le̱tti̱ dalanzeta kar kizeto ne, “Nya ci ogonet Ta̱mu̱ta̱dde̱n ucca niko ko̱?”
29Baling u̱zu̱cca̱ nege be̱e̱ti̱nne̱ng Ya̱ko̱bo̱ lo̱o̱ce̱ ci Kanaani, u̱du̱ktta̱k zin nege nonno zo̱zzo̱k do̱o̱k cik i̱i̱na̱k nogo lo̱o̱ce̱ ci Masiro. Izettek ne, 30“Ozozikket manyi lo̱o̱c neci agit gerzet abarik ogonet ki ci ke̱e̱ggi̱nna̱ naga ro̱tto̱k cik kovvo koroota lo̱o̱c cinne̱ng. 31Ma̱i̱je̱ naga ka̱nne̱ka̱ nonno ne, ‘Ke̱e̱ggi̱nna̱ naga ol cik kabunanna; iróng naga ke̱e̱ggi̱nna̱ ro̱tto̱k. 32Ke̱e̱ggi̱nna̱ naga ba̱li̱ye̱ logoz cik e̱e̱t co̱de̱ do̱o̱k omoto ki ram. A̱da̱k gotoneti co̱de̱, kar wa dici ko̱ aavtte ki be̱e̱ti̱nna̱ng lo̱o̱ce̱ ci een Kanaan.’
33“Okko zin e̱e̱ti̱ ci een manyi lo̱o̱c ke̱ a̱nne̱kke̱t ne, ‘Icu zoz ci kokko anna ka̱gga̱yyu̱ng ming e̱e̱ggi̱nnu̱ niga ol cik abunnanu: Utungtek gotonnu cunno̱ng co̱de̱ ki annit ngatu, kar o̱o̱tte̱ da̱i̱ne̱t ngati ol cuggo̱k wak edeca magiz ke̱. 34Abarik oot anyaktta gotonnu wa dici rok annit ngatu kar atin anna ka̱gga̱ iróng niga e̱e̱ggi̱nnu̱ ro̱tto̱k, abarik e̱e̱ggi̱nnu̱ ol cik abunnanu. Kar atin anna ka̱a̱nyu̱ng gotonnu labak, kar wo̱ye̱ niga i̱ri̱yo̱c lo̱o̱c ci Masiro labak.’”
35Imma baling ovvo nege oog lodet cigge̱k, amuda ngenngene o̱bo̱n wainne o̱ro̱bi̱ya̱u̱. Baling icinnet nege ki be̱e̱ti̱nne̱ng obet cik o̱ro̱bi̱ya̱u̱, o̱to̱ngo̱o̱ltte̱ zin nege lo̱o̱c oroot. 36Izek zin be̱e̱ti̱nne̱ng Ya̱ko̱bo̱ nogo ne, “Amikzenang niga annit dooli wagannik. I̱zzi̱ Yosevo to, kar bo̱do̱k Si̱mo̱ne̱ ki̱zzi̱ to, kar zin i̱yo̱ko̱ orongnyu o̱o̱tte̱ Benjamin bu̱k. Amartoya annit kaala do̱o̱k!”
37Izek zin Reubeni baatinne ne, “Ming iróng kobodane Benjamin rok ngintu, ru̱k logoz wagannik e̱e̱ggi̱n ram ko̱ ka̱da̱i̱to̱. Inya annit kuzute nonno, kar atin anna kobodai nonno.”
38Ma̱i̱je̱ Ya̱ko̱bo̱ ize ne, “Iróng ngeranni okko orkoryyu alucenu ki i̱ge̱ta̱; a̱da̱k ba̱li̱ye̱ gotoniya, ize nonno do̱ niko ci aruge. Ming i̱ki̱ya̱k nonno gi̱i̱ ci gerze go̱o̱le̱ necu ovvoyyu niga nonno ko̱, anyahakang matiz, ovvo atin adawekang niga annit ilomi.”
Избрани в момента:
Kananet 42: tex
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018, Wycliffe Bible Translators, Inc. All rights reserved.