यूहन्ना 10
10
येसु बेधाराए चाव यार्गे गावला
1नकिन येसुए फरी, “ङा जेलाई साचो है ङादाचिज़्या, बेधा खोरल य़ामनी मापसिद तँनी पसिज़्याव ते चोर दाँका ज़ ताज़्या। 2य़ामनी पसिज़्याव ते साचो बेधाराए यागावला ज़। 3य़ाम गुज़्यावए नोलाई य़ाम फैदिज़्याव। नो गावलाए फरी ओबेधारालाई यामिन हाइए हाइए ओराक़िक नोर ओर्गा थैद ओल्योदा याहुवत खोरनी याहाइज़्याव। 4प़ाइँ पाखात यापुलुसोत फरी ओल याङ़ा याङ़ा बाज़्या। बेधार फरी ओर्गा सरेस्द उछीं उछीं हुज़्यार। 5नो बेधार यामासरेसो मिँए उछींत ते माबार। ओर्गा यामासरेसोए झन छे·द धोंःज़्यार,” है लिद यासथैक्यो।
6येसुए आव बेधा गावलाए घर्ती झाःद ओरासथैव पाँ नो थैज़्यावराए ओअर्थ मातीधुकेर। 7है जैद येसुए फरी है यादोक्यो, “ङा जेलाई साचो है ङादाचिज़्या, नो बेधाराए याखोरलाव य़ाम ङा ज़। 8ङाकिन ङ़ादा हुव भरी जाँकोसै चोरर दाँकार वाज़ याल्यो। है जैद बेधाराए नोराए यार्गा माथैकेर। 9साचो य़ाम ते ङा ज़। ङाल्योनी पसिज़्यावर प़ाइँ बाँचिन्या लेर। आदा होदा लिद चाव चरनल लाव ब दैन्या लेर। 10चोरए ओय़ेन ते कुन्या, सैःन्या, खेम्न्या वाज़ लिज़्या। ङा ते ङाबगालराए बनै धोल पोगोल जुनी ओदैरक लिद ङाहुव ची।
11“ङा ज़ बेधाराए चाव यार्गे गावला। चाव गावलाए ओबेधाराए जूँनी उजिउ झाःद्यान्या ब तयार ज़ ताज़्या। 12बाहोर्या गावला ते, बेधार ओल उमींर यामातावए प़रर याहुज़्याव रँःद बेधार ऱास्द धोंःद बाज़्या। है जैद प़रर हुद बेधारालाई छुपिद चितराँ पुतराँ याराजैज़्यार। 13नो बाहोर्या वाज़ ओतावए बेधाराए ल्योदा उयुँ ज़ माले। 14ङा फरी चाव यार्गे गावला ज़। किताव ङा ङाबेधारालाई ङारासरेस्ज़्या, स़ोनो या ङालाई सरेस्नाज़्यार, 15हिताव ज़ ङाबाबुए ङालाई सरेस्नाज़्याव, स़ोनो ङा मनी ओललाई ङासरेस्ज़्या। है जैद नो ङाबेधाराए जूँनी तछा ङाजिउ ब ङाझाःरिज़्या। 16आव खोरल माल्यो छुत ङाबेधार ब लिज़्यार। नोरालाई मनी तछा ङारारैरिज़्या। नोराए मनी ङार्गा याथैवत, बगाल ब तोबो वाज़ तान्या ले, गावला मनी तोबो वाज़ तान्या ले। 17ङाबाबुए ङालाई मया दाँज़्याव, काराव ल्यो ताकिन ङा ङाबेधाराए जूँनी ङाजिउ झाःद, नो ङापोहोन फरी रैन्या ङाले। 18नो ङापोहोन ङानी सुए ज़ मालाँधुर, ङा ङायुँ स्यानी ज़ ङाझाःरिज़्या। झाःन्या, सोवोल्न्या ङा ङाकुइत ज़ लिज़्या। निताव य़ेन दान्या परमेस्वर ङाबाबुए ज़ ङालाई याद नैनाव।”
19आव पाँत यहूदीर या याल माखैनाकेर। 20ख्वाराए, “आवलाई माचाव पुरूसए क्योःद बो·लैद नैव। काराव नितावए ओपाँ जेथैज़्याव?” है लिकेर। 21ख्वाराए फरी, “इताव पाँ कै जैद बूलिउ मिँए ओपाँ ओताज़्याव? माचाव पुरूसए सुलाई ज़ रँःधुन्या माराजैव,” है लिकेर।
येसुलाई सरेस्ज़्यावर
22हाः बेलाक यरूसलेमलाव ध्यान झ़िमलाई चोखोइन्या पर्ब हुद उलिज़्याव। नो पर्ब सालकाव तखेप य़ुँदाक ओताज़्याव। 23नो बेलाक येसु ध्यान झ़िम जींलाव सोलोमन मैराल उलिज़्याक, 24यहूदीर ओल्योक गुरिगाँ हुद, “नँ साचो ख्रीस ताकिन गेलाई छर्लङ्ग ज़ है दासिके। खा पै गेलाई आदा तान्यानी होदा तान्याल ननैसिरिज़्याव?” है यादोक ते, 25येसुए, “जेलाई ङ़ादाकिन ज़ है दाव ज़ ङानैचिज़्या, हितावत ब जेयुँ ज़ माहुबे। ङाबाबुए उमिननी ङादोज़्याव य़ेनराए ज़ ‘ङा हो ज़’ लिद सतैंज़्यार। 26खाली जे ङाबगाललावर जेमातावए ज़ ङालाई जेयुँ माहुबे। 27ङाबगाललाव बेधाराए ते ङार्गा थैज़्यार। ङा नोरालाई ङारासरेस्ज़्या, नोर मनी ङाछींत हुज़्यार। 28ङा नोरालाई अजम्बरी जुनी ङाराएज़्या। है जैद नोर खर्क ज़ कै मै तान्या मालेर। ङाल्योनी सुए मनी नैंद लाँधुन्या मालेर। 29नोरालाई ङाकुइत याज़्याव परमेस्वर ङाबाबु बनै ओसक्ती ल्यो प़ाइँरानी घेप्पा लिज़्या। है जैद नोए ओल्योनी ब सुए ज़ नैंद लाँधुन्या मालेर। 30ङाबाबुस गिन तोबो ज़ गिन्लिज़्या।”
यहूदीराए येसुलाई झेःव यापैंव
31यहूदीराए आव पाँ थैद यारिसए लुँर तीद येसुलाई झेःव यापैंज़्याक, 32येसुए, “ङाबाबुए ल्योनी चाव य़ेनर जेङ़ाक कुधु ज़ सतैंद ङायाचिके, नो भरिनी काताकाव य़ेनए उजूँनी लुँए झेःव जेपैंज़्याव?” है ओरादोक ते, 33यहूदीराए, “नँलाई चाव य़ेनए जूँनी झेःव गेपैंज़्याव माःक, परमेस्वरए उमिन नबले·ज़्यावए जूँनी ची। नँ मिँ ताद कै जैद परमेस्वरस सम सम नजैसिज़्याव?” है यादोक ते,#लेबी २४:१६ 34येसुए, “जेधर्मसास्त्रल परमेस्वरए है लिज़्या — ‘जे मिँर ईस्वर मितावर ज़।’#भज ८२:६ 35धर्मसास्त्रलाव सर्सिउ पाँ अऩाकलाव माले लिन्या जे मनी जेसैंज़्या। है जैद परमेस्वरए ओल ओपाँ दैवरालाई ईस्वर मितावर ज़ है ओरादोकिन, 36ङाबाबुए ङालाई खतैद आव मानुवात उपरींनावए, ‘ङा परमेस्वरए ओज़ा ज़’ है ङादाचिक, जे कै जैद ‘परमेस्वरए उमिन नबले·ज़्या’ है जेदाँज़्याव? 37ङा ङाबाबुए ओय़ेन ङामादोज़्याव ताकिन जे ङालाई जेमापतिनादी ब ताए। 38फरी नो य़ेन ङादोज़्याव ताकिन ङालाई जेमापतिनादी ब, ङादोज़्याव य़ेनत ते जेयुँ हुबो ज़ परिके। हो ताकिन ची परमेस्वर ङाबाबु ङास लिद तोबो ज़ गिन्लिज़्याव सैंद थ·रैन्या जेले,” है यादोक्यो। 39नोर झन नो पाँ थैद फरी ब येसुलाई क्योःव पैंकेर। येसुए फरी नोराए ल्योनी छाँसिद याखार्नी ज़ पुलुस्द बाके।
40नकिन येसु ननी पुलुस्द यर्दन भै होफताव यूहन्नाए ङ़ादा ऱीनी ओरासछैंज़्याव पोङ ज़ लिनाके। 41नक मिँर येसुए ल्योक बनै माहोल्या हुद, “यूहन्नाए ते अचम्बलाव य़ेनर काता ज़ मादोव। हैदी ब आव मिँए उजूँनी ओपाँव पाँ भरी साचो ज़ ओल्यो,” है लिद, 42नलावर कुधु ज़ येसुलाई यायुँ हुप्के।
Избрани в момента:
यूहन्ना 10: NKham
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2015, Wycliffe Bible Translators, Inc. All rights reserved.