ಯೋಹಾನ 9
9
ಪುಟ್ಟ್‌ವಕಿಂಜಿಲೇ ಕುರ್‌ಡನಾಯಿತ್ಂಜ ಒಬ್ಬನ ಯೇಸು ವಾಸಿ ಮಾಡ್‍ನದ್
1ಯೇಸು ನಡ್‌ದಂಡ್ ಪೋಯಂಡಿಪ್ಪಕ, ಪುಟ್ಟ್‌ವಕಾಪಲೇ ಕುರ್‌ಡನಾಯಿತ್ಂಜ ಒರ್ ಮನುಷ್ಯನ ಕಂಡತ್.
2ಅಕ್ಕ ಅಂವೊಂಡ ಶಿಷ್ಯಂಗ: ಉಪಾದ್ಯನೇ, ಈ ಮನುಷ್ಯ ಕುರ್‌ಡನಾಯಿತ್ ಪುಟ್ಟ್‌ನದ್ ದಾರ್ ಮಾಡ್‍ನ ಪಾಪ? ಇಂವೊ ಮಾಡ್‍ನ ಪಾಪವಾ ಅಥವ ಇಂವೊಂಡ ಅಪ್ಪವ್ವ ಮಾಡ್‍ನ ಪಾಪವಾಂದ್ ಯೇಸುನ ಕ್‍ೕಟತ್.
3ಯೇಸು ಅಯಿಂಗಕ್: ಇಂವೊ ಮಾಡ್‍ನ ಪಾಪವು ಅಲ್ಲ, ಇಂವೊಂಡ ಅಪ್ಪವ್ವ ಮಾಡ್‍ನ ಪಾಪವು ಅಲ್ಲ, ದೇವಡ ಶಕ್ತಿ ಇಂವೊಂಡಲ್ಲಿ ಕಾಂಬಕಾಯಿತ್ ಇನ್ನನೆ ಪುಟ್ಟ್‌ಚೀಂದ್ ಎಣ್ಣ್‌ಚಿ. 4ಸಮಯ ಇಪ್ಪಕತ್ತನೆ, ನನ್ನ ಅಯಿಚಂವೊ ನಾನ್ ಮಾಡಂಡೂಂದ್ ಬೆಚ್ಚಿತುಳ್ಳ ಕ್ರಿಯೇನ ಮಾಡಂಡು; ಬಯಿಟ್ ಬಂದಂಡುಂಡ್, ಅಕ್ಕ ಒಬ್ಬಂಗು ಕ್ರಿಯೆ ಮಾಡ್‌ವಕ್ ಕಯ್ಯುಲೆ. 5ನಾನ್ ಈ ಲೋಕತ್‍ಲ್ ಇಪ್ಪಕತ್ತನೆ, ನಾನ್ ಲೋಕಕ್ ಬೊಳಿಯಾಯಿತುಳ್ಳ್.
6ಯೇಸು ಇದ್‍ನ ಎಣ್ಣ್‌ನ ಪಿಂಞ, ನೆಲಕ್ ತುಪ್ಪ್‌ವಂಜಿ, ಆ ತುಪ್ಪ್ ನೀರಿಂಜ ಕೆತ್ತೆ ಮಾಡಿತ್ ಅದ್‍ನ ಕುರ್‌ಡಂಡ ಕಣ್ಣ್‌ಕ್ ತ್‍ೕಟ್‍ಚಿ. 7ಪಿಂಞ ಯೇಸು ಅಂವೊಂಗ್: ನೀನ್ ಪೋಯಿತ್ ಸಿಲೋವ ಎಣ್ಣುವ ಗುಂಡಿಲ್ ಕತ್ತ್‍ೕಂದ್ ಎಣ್ಣ್‌ಚಿ. (ಸಿಲೋವ ಎಣ್ಣ್‌ಚೇಂಗಿ ಅಯಿಚಂವೋಂದ್ ಅರ್ಥ). ಅನ್ನನೆ ಆ ಮನುಷ್ಯ ಅಲ್ಲಿಕ್ ಪೋಯಿತ್ ಕತ್ತಿತ್, ಕಣ್ಣ್ ಕಾಂಬಂವೊನಾಯಿತ್ ವಾಪಸ್ ಬಾತ್. 8ಅಕ್ಕ, ಅಂವೊಂಡ ನೆರೆಮನೆಕಾರಳು, ಇಂವೊ ಬಿಕ್ಷೆ ಬೋಡಿಯಂಡ್ ಇಂಜಾನ ಕಂಡಿತ್ಂಜ ಬೋರೆ ಜನಳು: ಇಂವೊ ಅಳ್‌ತಂಡ್ ಬಿಕ್ಷೆ ಬೋಡಿಯಂಡ್ ಇಂಜಂವೊನಲ್ಲಾಂದ್ ಕ್‍ೕಟತ್.
9ಚೆನ್ನ ಜನ: ಅಂವೊನೇಂದ್ ಎಣ್ಣ್‌ಚಿ.
ಬೋರೆ ಚೆನ್ನ ಜನ: ಅಂವೊನಲ್ಲಾ! ಆಚೇಂಗಿ ಅಂವೊಂಡನೆಕೆ ಕಾಂಬಾಂದ್ ಎಣ್ಣ್‌ಚಿ.
ಆ ಕುರ್‌ಡ: ಕುರ್‌ಡನಾಯಿತಿಂಜಂವೊ ನಾನೇಂದ್ ಎಣ್ಣ್‌ಚಿ.
10ಅಯಿಂಗೆಲ್ಲಾರು ಅಂವೊನ ನೋಟಿತ್: ಇಕ್ಕ ಎನ್ನನೆ ನೀಕ್ ಕಣ್ಣ್ ಕಾಂಬಕ್ ಆಚೀಂದ್ ಕ್‍ೕಟತ್.
11ಅಯಿಂಗಕ್ ಅಂವೊ: ಯೇಸು ಎಣ್ಣುವ ಒರ್ ಮನುಷ್ಯ ಕೆತ್ತೆ ಮಾಡಿತ್, ನಾಡ ಕಣ್ಣ್‌ಕ್ ತ್‍ೕಟಿತ್, ಸಿಲೋವ ಗುಂಡಿಲ್ ಕತ್ತ್‍ೕಂದ್ ಎಣ್ಣ್‌ಚಿ. ನಾನ್ ಪೋಯಿತ್ ಕತ್ತ್‌ನ ಪಿಂಞ, ನಾಕ್ ಕಾಂಬಕ್ ಆಚೀಂದ್ ಎಣ್ಣ್‌ಚಿ.
12ಅಕ್ಕ ಅಯಿಂಗ: ಇಕ್ಕ ಅಂವೊ ಎಲ್ಲಿ ಉಂಡ್‍ೕಂದ್ ಕ್‍ೕಟತ್.
ಅಂವೊ: ನಾಕ್ ಗೊತ್ತಿಲ್ಲೇಂದ್ ಎಣ್ಣ್‌ಚಿ.
13ಅಯಿಂಗ, ಕುರ್‌ಡನಾಯಿತ್ಂಜ ಅಂವೊನ ಫರಿಸಾಯಂಗಡ ಪಕ್ಕ ಕಾಕಿಯಂಡ್ ಪೋಚಿ. 14ಯೇಸು ಮಣ್ಣ್‌ಲ್ ಕೆತ್ತೆ ಮಾಡಿತ್ ವಾಸಿ ಮಾಡ್‍ನ ದಿವಸ ಸಬ್ಬತ್ ದಿವಸವಾಯಿತ್ಂಜತ್.
15ಆನಗುಂಡ್, ಫರಿಸಾಯಂಗಳು ಅಂವೊನ ನೋಟಿತ್: ನೀಕ್ ಎನ್ನನೆ ಕಣ್ಣ್ ಕಾಂಬನೆಕೆ ಆಚೀಂದ್ ಕ್‍ೕಟತ್.
ಅದ್ಂಗ್ ಅಂವೊ: ಅಂವೊ ನಾಡ ಕಣ್ಣ್‌ರ ಮೇಲೆ ಕೆತ್ತೆನ ತ್‍ೕಟ್‍ಚಿ. ನಾನ್ ಕತ್ತ್‌ನ, ಇಕ್ಕ ನಾಕ್ ಕಣ್ಣ್ ಕಾಂಬಾಂದ್ ಎಣ್ಣ್‌ಚಿ.
16ಅಕ್ಕ ಚೆನ್ನ ಫರಿಸಾಯಂಗ: ಆ ಮನುಷ್ಯ ಸಬ್ಬತ್ ದಿವಸತ್‍ರ ಆಜ್ಞೆನ ಪಾ‌ಲನೆ ಮಾಡತೆಗುಂಡ್ ಅಂವೊ ದೇವಡಯಿಂಜ ಬಂದಂವೊನಲ್ಲಾಂದ್ ಎಣ್ಣ್‌ಚಿ.
ಇಂಞು ಚೆನ್ನ ಜನ: ಪಾಪಿಯಾಯಿತುಳ್ಳ ಒಬ್ಬ ಈ ತರ ಅದ್ಬುತ ಕಾರ್ಯತ್‍ನ ಎನ್ನನೆ ಮಾಡ್‌ವಾಂದ್ ಕ್‍ೕಟತ್. ಇನ್ನನೆ ಅಯಿಂಗ ದಂಡ್ ಗುಂಪಾಯಿತ್ ಆಚಿ.
17ಇಂಞೊಮ್ಮ ಫರಿಸಾಯಂಗ ಅಂವೊನ ನೋಟಿತ್: ಅಂವೊ ನಿನ್ನ ವಾಸಿ ಮಾಡ್‍ಚೀಂದ್ ಎಣ್ಣುವಿಯ ಅಲ್ಲಾ, ಅಂವೊಂಡ ವಿಷಯತ್ ನೀನ್ ಎಂತ ಎಣ್ಣುವಿಯಾಂದ್ ಕ್‍ೕಟತ್.
ಅದ್ಂಗ್ ಆ ಕುರ್‌ಡನಾಯಿತಿಂಜಂವೊ: ಅಂವೊ ಒರ್ ಪ್ರವಾದೀಂದ್ ಎಣ್ಣ್‌ಚಿ.
18ಇಂವೊ ಕುರ್‌ಡನಾಯಿತ್ ಇಂಜತ್‍ೕಂದು, ಇಕ್ಕ ಕಾಂಬನೆಕೆ ಆಚೀಂದು ಯೆಹೂದ್ಯಂಗಡ ಅದಿಕಾರಿಯಂಗಕ್ ಇಂಞು ನಂಬಿಕೆ ಬಂದಿತ್‌ಲ್ಲೆ. ಅಯಿಂಗ ಅಂವೊಂಡ ಅಪ್ಪವ್ವನ ಕಾಕುವಂಜಿ: 19ಕುರ್‌ಡನಾಯಿತ್ ಪುಟ್ಟ್‌ನಂವೋಂದ್ ನಿಂಗ ಎಣ್ಣುವ ನಿಂಗಡ ಮೋಂವೊ ಇಂವೊನಾ? ಅನ್ನನಾಚೇಂಗಿ ಇಕ್ಕ ಅಂವೊಂಗ್ ಎನ್ನನೆ ಕಾಂಬಕಾಚೀಂದ್ ಕ್‍ೕಟತ್.
20ಅಂವೊಂಡ ಅಪ್ಪವ್ವ: ಇಂವೊ ನಂಗಡ ಮೋಂವೊನೇ, ಇಂವೊ ಪುಟ್ಟ್‌ವಕಾಪಕಲೆ ಕುರ್‌ಡನಾಯಿತ್ ಪುಟ್ಟ್‌ಚಿ. 21ಆಚೇಂಗಿ ಇಂವೊಂಗ್ ಇಕ್ಕ ಎನ್ನನೆ ಕಣ್ಣ್ ಕಾಂಬಕಾಚೀಂದು, ಇಂವೊನ ದಾರ್ ವಾಸಿ ಮಾಡ್‌ಚೀಂದು ನಂಗಕ್ ಗೊತ್ತ್‌ಲ್ಲೆ. ಇಂವೊ ಬಲ್ಯಂವೊನಾಯಿತುಂಡ್, ಇಂವೊನ ಕ್‍ೕಳಿ, ಇಂವೊನೇ ಎಣ್ಣುವಾಂದ್ ಎಣ್ಣ್‌ಚಿ. 22ಅಂವೊಂಡ ಅಪ್ಪವ್ವ ಯೆಹೂದ್ಯಂಗಡ ಅದಿಕಾರಿಯಂಗಕ್ ದುಂಬ ಬೊತ್ತ್‌ಚಿಟ್ಟಗುಂಡ್ ಇನ್ನನೆ ಎಣ್ಣ್‌ಚಿ. ಎನ್ನಂಗೆಣ್ಣ್‌ಚೇಂಗಿ, ದಾರೇಂಗಿ ಯೇಸುನ ಕ್ರಿಸ್ತಾಂದ್ ಅರಿಕೆ ಮಾಡ್‍ಚೇಂಗಿ, ಅಂವೊನ ಸಬಾಮಂದಿರಕ್ ಪೊರಮೆ ಇಡಂಡೂಂದ್ ಯೆಹೂದ್ಯಂಗ ಅಕ್ಕಲೆ ಎಣ್ಣಿತ್ಂಜತ್. 23ಅದ್ಂಗಾಯಿತೇ ಅಂವೊಂಡ ಅಪ್ಪವ್ವ ಅಂವೊಂಗ್ ವಯಸ್ ಉಂಡ್, ನಿಂಗಳೇ ಅಂವೊನ ಕ್‍ೕಳೀಂದ್ ಎಣ್ಣ್‌ಚಿ.
24ಆನಗುಂಡ್ ಕುರ್‌ಡನಾಯಿತ್ಂಜ ಆ ಮನುಷ್ಯನ ದಂಡನೆ ಕುರಿ ಕಾಕುವಂಜಿ: ನೀನ್ ದೇವಕ್ ಮಹಿಮೆ ಕೊಡ್; ನಿನ್ನ ವಾಸಿ ಮಾಡ್‍ನ ಆ ಮನುಷ್ಯ ಪಾಪೀಂದ್ ನಂಗಕ್ ಗೊತ್ತುಂಡ್‍ೕಂದ್ ಎಣ್ಣ್‌ಚಿ.
25ಅಕ್ಕ ಅಂವೊ ಅಯಿಂಗಕ್: ನನ್ನ ವಾಸಿ ಮಾಡ್‍ನಂವೊ ಪಾಪೀಂದ್ ನಾಕ್ ಗೊತ್ತ್‌ಲ್ಲೆ; ಒಂದ್ ಮಾತ್ರ ಗೊತ್ತುಂಡ್, ನಾನ್ ಕುರ್‌ಡನಾಯಿತ್ಂಜ ಇಕ್ಕ ನಾಕ್ ಕಣ್ಣ್ ಕಾಂಬಾಂದ್ ಎಣ್ಣ್‌ಚಿ.
26ಅಯಿಂಗ ಪುನಃ ಅಂವೊನ ನೋಟಿತ್: ನೀಕ್ ಅಂವೊ ಎಂತ ಮಾಡ್‍ಚಿ, ನೀಡ ಕಣ್ಣ್‌ನ ಎನ್ನನೆ ತೊರಂದತ್‍ೕಂದ್ ಕ್‍ೕಟತ್
27ಅಂವೊ ಅಯಿಂಗಕ್: ನಾನ್ ನಿಂಗಕ್ ಮಿಂಞಲೇ ಎಣ್ಣಿಯೆ, ನಿಂಗ ಕೆಮಿ ಕೊಡ್‍ತಿತ್‌ಲ್ಲೆ; ನಿಂಗ ಎನ್ನಂಗ್ ಪುನಃ ಪುನಃ ಅದ್‍ನ ಕ್‍ೕಕಂಡು? ಅಂವೊಂಡ ಶಿಷ್ಯಂಗಳಾಪಕ್ ನಿಂಗಕು ಮನಸ್ಸ್ ಉಂಡಾಂದ್ ಕ್‍ೕಟತ್.
28ಅಕ್ಕ ಅಯಿಂಗ: ಅಂವೊಂಗ್ ಜೋರ್ ಮಾಡಿತ್, ನೀನ್ ಅಂವೊಂಡ ಶಿಷ್ಯ, ಆಚೇಂಗಿ ನಂಗ ಮೋಶೇರ ಶಿಷ್ಯಂಗ. 29ಮೋಶೇರ ಕೂಡೆ ದೇವ ತಕ್ಕ್ ಪರ್ಂದತ್‍ೕಂದ್ ನಂಗಕ್ ಗೊತ್ತುಂಡ್. ಆಚೇಂಗಿ ಇಂವೊ ಎಲ್ಲಿಂಜ ಬಂದಂವೋಂದ್ ನಂಗಕ್ ಗೊತ್ತಿಲ್ಲೇಂದ್ ಎಣ್ಣ್‌ಚಿ.
30ಅದ್ಂಗ್ ಆ ಮನುಷ್ಯ: ಅಂವೊ ನಾಡ ಕಣ್ಣ್‌ನ ತೊರ್‌ಂದಿತ್ಂಜತೇಂಗಿಯು, ಅಂವೊ ಎಲ್ಲಿಂಜ ಬಂದಂವೋಂದ್ ನಿಂಗಕ್ ಗೊತ್ತಿಲ್ಲತೆ ಇಪ್ಪದ್ ಆಶ್ಚರ್ಯವಾನ ವಿಷಯಾಂದ್ ಎಣ್ಣ್‌ಚಿ 31ಪಾಪಿಯಂಗಕ್ ದೇವ ಕೆಮಿ ಕೊಡ್‍ಪ್‍ಲೇಂದ್ ನಂಗಕ್ ಗೊತ್ತುಂಡ್, ಆಚೇಂಗಿ ದಾರ್ ದೇವಡ ತಕ್ಕ್ ಕ್‍ೕಟಿತ್, ಅಂವೊಂಡ ಚಿತ್ತತ್‍ರನೆಕೆ ನಡ್‍ಪ, ಅಯಿಂಗಕ್ ದೇವ ಕೆಮಿ ಕೊಡ್‍ಪ. 32ಪುಟ್ಟ್‌ವಕಿಂಜ್‌ಲೆ ಕುರ್‌ಡನಾಯಿತ್ಂಜಂವೊಂಡ ಕಣ್ಣ್‌ನ ಒಬ್ಬ ತೊರಂದತ್‍ೕಂದ್ ಈ ಲೋಕ ಸೃಷ್ಟಿಯಾನ ಕಾಲತ್ಂಜ ಇಲ್ಲಿಕತ್ತನೆ ನಂಗ ಕ್‍ೕಟಿತ್‌ಲ್ಲೆಲ್ಲಾ? 33ಇಂವೊ ದೇವಡಯಿಂಜ ಬರತೆ ಪೋಯಿತ್ಂಜತೇಂಗಿ, ಇನ್ನನೆ ಏದು ಮಾಡ್‌ವಕ್ ಕಯ್ಯುಲೆಲ್ಲಾಂದ್ ಕ್‍ೕಟತ್.
34ಅಕ್ಕ ಅಯಿಂಗ ಅಂವೊಂಗ್: ನೀನ್ ಬರಿ ಪಾಪತ್‍ಲ್ ಪುಟ್‌ನಂವೊ, ನೀನ್ ನಂಗಕ್ ಉಪದೇಶ ಮಾಡ್‌ವಿಯಾಂದ್ ಎಣ್ಣಿತ್, ಅಂವೊನ ಪೊರಂಬಡಿ ಮಾಡ್‍ಚಿ.
35ಅಂವೊನ ಸಬಾಮಂದಿರಕ್ ಪೊರಮೆ ಇಟ್ಟದ್‍ನ ಯೇಸು ಕ್‍ೕಟಿತ್, ಅಂವೊನ ಕಾಂಬಕ: ನೀನ್ ಮನುಷ್ಯಕುಮಾರನ ನಂಬುವಿಯಾಂದ್ ಕ್‍ೕಟತ್.
36ಅಂವೊಂಗ್ ಅಂವೊ: ಅಂವೊ ದಾರ್ ಒಡೆಯನೇ? ನಾಕ್ ಎಣ್ಣಿತಾ, ಅಕ್ಕ ಅಂವೊನ ನಾನ್ ನಂಬುವೀಂದ್ ಎಣ್ಣ್‌ಚಿ.
37ಯೇಸು ಅಂವೊಂಗ್: ನೀನ್ ಅಂವೊನ ಮಿಂಞಲೇ ಕಂಡಿತ್ ಉಳ್ಳಿಯ, ನೀಡ ಕೂಡೆ ತಕ್ಕ್ ಪರ್‌ದಂಡ್ ಉಳ್ಳಂವೊ ಅಂವೊನೇಂದ್ ಎಣ್ಣ್‌ಚಿ.
38ಅಕ್ಕಲೆ ಅಂವೊ: ಒಡೆಯನೇ, ನಾನ್ ನಂಬ್‍ವೀಂದ್ ಎಣ್ಣಿತ್, ಅಂವೊನ ಆರಾದನೆ ಮಾಡ್‍ಚಿ.
39ಅಕ್ಕ ಯೇಸು: ಕುರ್‌ಡಂಗ ಕಣ್ಣ್ ಕಂಬಕಾಯಿತು, ಕಣ್ಣ್ ಕಾಂಬಯಿಂಗ ಕುರ್‌ಡಂಗಳಾಪಕು ನ್ಯಾಯತೀರ್ಪ್ ಮಾಡ್‌ವಕಾಯಿತ್ ನಾನ್ ಈ ಲೋಕಕ್ ಬಂದಿಯೇಂದ್ ಎಣ್ಣ್‌ಚಿ.
40ಅಕ್ಕ ಅಲ್ಲಿ ಯೇಸುರ ಕೂಡೆ ನಿಂದಂಡಿಂಜ ಚೆನ್ನ ಫರಿಸಾಯಂಗ ಅಂವೊ ಎಣ್ಣುವಾನ ಕ್‍ೕಟಿತ್: ನಂಗ ಸಹ ಕುರ್‌ಡಂಗಳಾಂದ್ ಕ್‍ೕಟತ್.
41ಯೇಸು ಅಯಿಂಗಕ್: ನಿಂಗ ಕುರ್‌ಡಂಗಳಾಯಿತ್ ಇಂಜತೇಂಗಿ ನಿಂಗಡಲ್ಲಿ ಪಾಪ ಇಪ್ಪುಲೆ; ಆಚೇಂಗಿ, ನಿಂಗಕ್ ಕಣ್ಣ್ ಕಾಂಬಾಂದ್ ನಿಂಗ ಎಣ್ಣಿಯಂಡುಳ್ಳಗುಂಡ್, ನಿಂಗಡ ಪಾಪ ಎಕ್ಕಾಲು ಇಪ್ಪ.
Избрани в момента:
ಯೋಹಾನ 9: ಕೊಡವ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2017, New Life Literature (NLL)