ಯೋಹಾನ 3
3
ಯೇಸು ಪಿಂಞ ನಿಕೊದೇಮ
1ಅಲ್ಲಿಯತ್‍ರ ಫರಿಸಾಯಂಗಡ ಕೂಟ್‌ಲ್, ನಿಕೊದೇಮ ಎಣ್ಣುವ ಒರ್ ಯೆಹೂದ್ಯ ಅದಿಕಾರಿ ಇಂಜತ್.
2ಅಂವೊ, ಒರ್ ಬಯಿಟ್ ಯೇಸುರ ಪಕ್ಕ ಪೋಯಿತ್: ಉಪಾದ್ಯನೇ, ನೀನ್ ದೇವ ಅಯಿಚಿತುಳ್ಳ ಉಪಾದ್ಯಾಂದ್ ನಂಗಕ್ ಗೊತ್ತುಂಡ್. ಎನ್ನಂಗೆಣ್ಣ್‌ಚೇಂಗಿ, ದಾರ್ ಒಬ್ಬಂಡ ಕೂಡೆ ದೇವ ಉಂಡೋ ಅಂವೊಂಗ್ ಮಾತ್ರ ನೀನ್ ಮಾಡ್‌ವನೆಕೆ ಇನ್ನತಾನ ಅದ್ಬುತ ಕಾರ್ಯತ್‍ನ ಮಾಡ್‌ವಕ್ ಕಯ್ಯೂಂದ್ ಎಣ್ಣ್‌ಚಿ.
3ಅಂವೊಂಗ್ ಯೇಸು: ಒಬ್ಬ ಪುನಃ ಪುಟ್ಟತೆ ಪೋನಕ ಅಂವೊ ದೇವಡ ರಾಜ್ಯತ್‍ನ ಕಾಂಬಕ್ ಕಯ್ಯುಲೇಂದ್ ನೇರಾಯಿತು ನೇರಾಯಿತು ನಾನ್ ನೀಕ್ ಎಣ್ಣುವೀಂದ್ ಉತ್ತರ ಕೊಡ್‍ತತ್.
4ಅದ್ಂಗ್ ನಿಕೊದೇಮ: ವಯಸ್ಸಾನ ಒರ್ ಮನುಷ್ಯ ಎನ್ನನೆ ಪುನಃ ಪುಟ್ಟ್‌ವಕ್ ಕಯ್ಯು? ಅಂವೊ ಎನ್ನನೆ ಅಂವೊಂಡ ಅವ್ವಂಡ ಕೆಲತ್‍ರ ಒಳ್‍ಕ್ ಪೋಯಿತ್ ದಂಡನೆ ಕುರಿ ಪುಟ್ಟ್‌ವಕ್ ಕಯ್ಯೂಂದ್ ಕ್‍ೕಟತ್.
5ಯೇಸು ಅಂವೊಂಗ್: ಒಬ್ಬ, ನೀರ್ಂಜಲು ಪವಿತ್ರಾತ್ಮತ್‌ಂಜಲು ಪುಟ್ಟತೆ ಪೋಚೇಂಗಿ ದೇವಡ ರಾಜ್ಯಕ್ ಪೋಪಕ್ ಕಯ್ಯುಲೇಂದ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ. 6ತಡೀರ ಮೂಲಕ ಪುಟ್ಟ್‌ವದ್ ತಡೀರ ಜೀವವಾಯಿತ್‌ಪ್ಪ, ಆಚೇಂಗಿ, ಪವಿತ್ರಾತ್ಮತ್‍ರ ಮೂಲಕ ಪುಟ್ಟ್‌ವದ್ ದೇವಡ ಆತ್ಮವಾಯಿತಿಪ್ಪ. 7ಆನಗುಂಡ್, ನೀನ್ ಪುನಃ ಪುಟ್ಟಂಡೂಂದ್ ನಾನ್ ನೀಕ್ ಎಣ್ಣ್‌ನ ವಿಷಯತ್‍ಲ್ ಆಶ್ಚರ್ಯ ಪಡತೆ. 8ಗಾಳಿ, ಅದ್ಂಡ ಇಷ್ಟ ಪ್ರಕಾರ ಎಲ್ಲಿ ಬೋಂಡ್‍ಚೇಂಗಿಯು ಬೀಜುವ; ಅದ್ಂಡ ಸದ್ದ್‌ನ ನಿಂಗ ಕ್‍ೕಪಿರ, ಆಚೇಂಗಿ ಅದ್ ಎಲ್ಲಿಂಜ ಬಾತ್‍ೕಂದು, ಎಲ್ಲಿಕ್ ಪೋಪಾಂದು ನಿಂಗಕ್ ಗೊತ್ತಿಪ್ಪುಲೆ; ಅನ್ನನೆ ಪವಿತ್ರಾತ್ಮತ್‍ರ ಮೂಲಕ ಪುಟ್ಟ್‌ನ ಒಬ್ಬೊಬ್ಬನು ಇಪ್ಪಾಂದ್ ಎಣ್ಣ್‌ಚಿ.
9ಅದ್ಂಗ್ ನಿಕೊದೇಮ: ಇದ್ ಎನ್ನನೆ ಆಪಾಂದ್ ಕ್‍ೕಟತ್. 10ನೀನ್ ಇಸ್ರಾಯೇಲ್‍ರ ಒರ್ ಉಪಾದ್ಯನಾಯಿತ್ಂಜತೇಂಗಿಯು ಈ ವಿಷಯವೆಲ್ಲ ನೀಕ್ ಗೊತ್ತ್‌ಲ್ಲೆಯಾಂದ್ ಯೇಸು ಅಂವೊಂಗ್ ಜವಾಬ್ ಕೊಡ್‍ತತ್. 11ನೇರಾಯಿತು ನೇರಾಯಿತು ನಾನ್ ನೀಕ್ ಎಣ್ಣ್‌ವಿ, ನಂಗಕ್ ಎಂತ ಗೊತ್ತುಂಡೋ ಅದ್‍ನ ಎಣ್ಣುವ, ನಂಗ ಕಂಡದ್‍ನ ಎಣ್ಣಿ ಕೊಡ್‍ಪ; ಆಚೇಂಗಿ ನಂಗಡ ಸಾಕ್ಷಿನ ನಿಂಗ ಅಂಗಿಕಾರ ಮಾಡಿತ್‌ಲ್ಲೆ. 12ಈ ಲೋಕತ್‍ರ ವಿಷಯತ್‍ನ ಎಣ್ಣುವಕ ನಿಂಗ ನನ್ನ ನಂಬತೆ ಪೋಚೇಂಗಿ, ಪರಲೋಕತ್‍ರ ವಿಷಯತ್‍ನ ಎಣ್ಣ್‌ಚೇಂಗಿ ಎನ್ನನೆ ನಂಬುವಿರ? 13ಮನುಷ್ಯಕುಮಾರನಲ್ಲತೆ ಬೋರೆ ದಾರೂ ಪರಲೋಕಕ್ ಪೋಯಿತ್‌ಲ್ಲೆ, ಅಂವೊನಲ್ಲತೆ ದಾರೂ ಪರಲೋಕತ್ಂಜ ಈ ಲೋಕಕ್ ಬಂದಿತೂ ಇಲ್ಲೆ. 14ಮೋಶೆ ಮಣಬೂಮಿಲ್ ಎನ್ನನೆ ಒರ್ ಕಚ್ಚಿ ಪಾಂಬ್‍ನ ನೇತ್‍ಚೋ ಅನ್ನನೆ ಮನುಷ್ಯಕುಮಾರನ ಸಹ ಕೊಡಿಕ್ ನೇತಂಡು. 15ಅನ್ನನೆ ದಾರೆಲ್ಲ ಅಂವೊನ ನಂಬುವ, ಅಯಿಂಗಕೆಲ್ಲ ನಿತ್ಯ ಜೀವ ಕ್‍ಟ್ಟುವ. 16ದೇವ ಈ ಲೋಕತ್‍ರ ಜನಳ ಎಚ್ಚಕೋ ಪ್ರೀತಿ ಮಾಡಿತ್, ಅಂವೊಂಡ ಒರೇ ಮೋಂವೊನ ಕೊಡ್‍ತತ್; ದಾರೆಲ್ಲ ಅಂವೊನ ನಂಬುವ ಅಯಿಂಗೆಲ್ಲಾ ಪಾಳಾಕತೆ ನಿತ್ಯ ಜೀವತ್‍ನ ಪಡೆಯುವ. 17ಈ ಲೋಕತ್‍ಲ್ ಉಳ್ಳ ಜನಳ ತೀರ್ಪ್ ಮಾಡ್‌ವಕಾಯಿತ್ ದೇವ ತಾಂಡ ಮೋಂವೊನ ಅಯಿಚಿತ್ತ್‌ಲ್ಲೆ, ಆಚೇಂಗಿ ಅಂವೊಂಡ ಮೂಲಕ ಲೋಕತ್‍ಲ್ ಉಳ್ಳ ಜನಳ ರಕ್ಷಣೆ ಮಾಡ್‌ವಕಾಯಿತೇ ಅಯಿಚತ್.
18ದೇವಡ ಮೋಂವೊನ ನಂಬುವಯಿಂಗಕ್ ದೇವಡ ಶಿಕ್ಷೇರ ತೀರ್ಪ್ ಇಲ್ಲೆ; ಆಚೇಂಗಿ ಅಂವೊನ ನಂಬತಯಿಂಗಕ್ ದೇವಡ ತೀರ್ಪ್ ಅಕ್ಕಲೆ ಕ್‌ಟ್ಟಿಪೋಚಿ. ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ದೇವಡ ಒರೇ ಮೋಂವೊಂಡ ಪೆದತ್‍ನ ನಂಬಿತ್‌ಲ್ಲೆ.
19ಅಯಿಂಗಕ್ ಶಿಕ್ಷೇರ ತೀರ್ಪ್ ಕ್‍ಟ್ಟುವಕ್ ಕಾರಣ ಎಂತ ಎಣ್ಣ್‌ಚೇಂಗಿ: ಅಂವೊ ಈ ಲೋಕಕ್ ಬೊಳಿಯಾಯಿತ್ ಬಾತ್, ಆಚೇಂಗಿ ಜನಡ ಕ್ರಿಯೆ ಕೆಟ್ಟದಾಯಿತ್ಂಜಗುಂಡ್, ಅಯಿಂಗ ಆ ಬೊಳಿಕಿಂಜ ಇರ್‌ಟ್‌ನ ಪ್ರೀತಿ ಮಾಡ್‍ಚಿ. 20ಕೆಟ್ಟ ಕೆಲಸ ಮಾಡ್‌ವ ಎಲ್ಲಾರು ಬೊಳಿನ ದ್ವೇಶ ಮಾಡ್‌ವ, ಅಯಿಂಗ ಮಾಡ್‌ವ ಕ್ರಿಯೇಯೆಲ್ಲಾ ಗೊತ್ತಾಪಾಂದ್ ಬೊಳಿರ ಪಕ್ಕ ಬಪ್ಪ್‌ಲೆ. 21ಆಚೇಂಗಿ, ಸತ್ಯತ್‍ರ ಪ್ರಕಾರ ಬದ್‍ಕ್‍ವಯಿಂಗ ಬೊಳಿರ ಪಕ್ಕ ಬಂದ್‍ರ್‍ವ. ಅಕ್ಕ, ಅಯಿಂಗ ಮಾಡ್‍ನದೆಲ್ಲಾ ದೇವಕ್ ಬಗ್ಗಿತ್ ಮಾಡ್‌ನದ್‍ೕಂದ್ ಎಲ್ಲಾರ್‌ಕು ಗೊತ್ತಾಪ.
ಯೇಸು ಪಿಂಞ ಯೋಹಾನ
22ಚೆನ್ನ ಸಮಯ ಕಯಿಂಜ ಪಿಂಞ, ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಯೆರೂಸಲೇಮ್ ಪಟ್ಟಣತ್‍ನ ಬುಟ್ಟಿತ್ ಯೂದಾಯ ನಾಡ್‍ರ ಪಕ್ಕ ಪೋಚಿ. ಅಲ್ಲಿ ಅಂವೊ ತಾಂಡ ಶಿಷ್ಯಂಗಡ ಕೂಡೆ ಚೆನ್ನ ಕಾಲ ಇಂಜಂಡ್ ಜನಕ್ ದೀಕ್ಷಾಸ್ನಾನ ಕೊಡ್‍ತಂಡಿಂಜತ್. 23ಅದೇ ಸಮಯತ್‍ಲ್, ಸಲೀಮ ಎಣ್ಣುವ ಪಟ್ಟಣತ್‍ರ ಪಕ್ಕ ಉಳ್ಳ ಐನೋನ್ ಎಣ್ಣುವ ಊರ್‌ಲ್ ದುಂಬ ನೀರ್ ಇಂಜಗುಂಡ್ ಯೋಹಾನ ಸಹ ಜನಕ್ ದೀಕ್ಷಾಸ್ನಾನ ಕೊಡ್‍ತಂಡಿಂಜತ್. ಜನ ಅಂವೊಂಡ ಪಕ್ಕ ಬಂದಿತ್ ದೀಕ್ಷಾಸ್ನಾನ ಎಡ್‍ತಂಡತ್. 24ಈ ಘಟನೆಯೆಲ್ಲ ಯೋಹಾನನ ಜೈಲ್‌ಕ್ ಇಡ್‌ವಕ್ ಮಿಂಞ ಆನದ್. 25ಅಕ್ಕ ಯೋಹಾನಂಡ ಶಿಷ್ಯಂಗಕು ಯೆಹೂದ್ಯ ಒಬ್ಬಂಗು ಅಯಿಂಗಡ ಪದ್ದತಿರ ಪ್ರಕಾರ ಶುದ್ದವಾಯಿತ್ ಇಪ್ಪ ವಿಷಯತ್‍ಲ್ ವಾದ ಸುರು ಆಚಿ.
26ಅಯಿಂಗ ಯೋಹಾನಂಡ ಪಕ್ಕ ಪೋಪಂಜಿ: ಉಪಾದ್ಯನೇ, ಯೊರ್ದನ್ ಕೆರೆರ ಆಬರಿಲ್ ನೀಡ ಕೂಡೆ ಒಬ್ಬ ಇಂಜತಲ್ಲ, ನೀನ್ ಸಹ ಅಂವೊಂಡ ವಿಷಯತ್ ಸಾಕ್ಷಿ ಕೊಡ್‍ತಿಯಲ್ಲ? ಇಕ್ಕ ನೋಟಿ, ಅಂವೊ ದೀಕ್ಷಾಸ್ನಾನ ಕೊಡ್‍ತಂಡುಂಡ್, ಜನ ಎಲ್ಲಾರು ಅಂವೊಂಡ ಪಕ್ಕ ಪೋಯಂಡುಂಡ್‍ೕಂದ್ ಎಣ್ಣ್‌ಚಿ.
27ಅದ್ಂಗ್ ಯೋಹಾನ: ದೇವ, ಒಬ್ಬಂಗ್ ಪರಲೋಕತ್ಂಜ ಏದ್‍ನ ಅನುಗ್ರಹ ಮಾಡಿತುಂಡೋ ಅದ್‍ನ ಮಾತ್ರ ಪಡೆಯುವಕ್ ಕಯ್ಯು. 28ನಾನ್ ಕ್ರಿಸ್ತ ಅಲ್ಲ, ಅಂವೊಂಗ್ ಮಿಂಞ ಪೋಪಕ್, ದೇವ ಅಯಿಚಂವೋಂದ್ ನಾನ್ ಎಣ್ಣ್‌ನಾಂಗ್ ನಿಂಗಳೇ ಸಾಕ್ಷಿ. 29ಮಂಗಲಕರ್ತಿ ಉಳ್ಳಂವೊನೇ ಮಂಗಲಕಾರ ಆಪ. ಆಚೇಂಗಿ ಮಂಗಲಕಾರಂಡ ಕೂಟ್‍ಕಾರ ಮಂಗಲಕಾರಂಡ ಪಕ್ಕತ್‍ಲ್ ನಿಂದಿತ್ ಅಂವೊಂಡ ತಕ್ಕ್‌ನ ಕ್‍ೕಪ, ಮಂಗಲಕಾರಂಡ ದ್ವನಿ ಕ್‍ೕಟಿತ್ ದುಂಬ ಕುಶಿ ಪಡುವ. ಅನ್ನನೆ ನಾಕ್ ಆ ಕುಶಿ ಕ್‍ಟ್ಟಿತ್, ನಾಡ ಕುಶಿ ಪೂರ್ತಿ ಆಚಿ. 30ಅಂವೊ ಬಲ್ಯದಾಂಡು, ನಾನ್ ಇಂಞು ಕಮ್ಮಿ ಆಂಡೂಂದ್ ಅಯಿಂಗಕ್ ಎಣ್ಣ್‌ಚಿ.
31 ಕ್ರಿಸ್ತ ಪರಲೋಕತ್ಂಜ ಬಂದಂವೊ, ಅಂವೊ ಎಲ್ಲಾರ್ಕಿಂಜ ಬಲ್ಯಂವೊ. ಬೂಲೋಕತ್ಂಜ ಬಂದಯಿಂಗ, ಈ ಲೋಕತ್‍ರ ತಕ್ಕ್ ಪರಿಯುವ. ಆಚೇಂಗಿ, ಅಂವೊ ಪರಲೋಕತ್ಂಜ ಬಂದಂವೊ, ಆನಗುಂಡ್ ಅಂವೊ ಎಲ್ಲಾರ್ಕಿಂಜ ಬಲ್ಯಂವೊನಾಯಿತುಂಡ್. 32ಅಂವೊ ಎಂತದ್‍ನ ಕಂಡತೋ, ಎಂತದ್‍ನ ಕ್‍ೕಟತೋ ಅದ್ಂಡ ವಿಷಯತ್ ಸಾಕ್ಷಿ ಕೊಡ್‍ಪ. ಆಚೇಂಗಿಯು, ಅಂವೊಂಡ ಸಾಕ್ಷಿನ ದಾರೂ ಸ್ವೀಕಾರ ಮಾಡುಲೆ. 33ಅಂವೊಂಡ ಸಾಕ್ಷಿನ ತಕ್ಕಾರ ಮಾಡ್‌ವಂವೊ, ದೇವ ಎಣ್ಣ್‌ನದ್ ಸತ್ಯಾಂದ್ ಉಳ್ಳ ವಿಷಯತ್‍ನ ಮುದ್ರೆ ಇಟ್ಟಿತ್ ದೃಡಪಡ್‌ತಿಯಂಡುಂಡ್. 34ಅಂವೊನ ದೇವ ಅಯಿಚತ್, ಆನಗುಂಡ್ ದೇಡಡ ತಕ್ಕ್ ಪರಂದಂಡುಂಡ್. ದೇವ ಅಂವೊಂಗ್ ತಾಂಡ ಆತ್ಮತ್‌ನ ಅಳ್‌ಪಕ್ ಕಯ್ಯತಚ್ಚಕ್ ಕೊಡ್‌ತಿತುಂಡ್. 35ಅಪ್ಪನಾನ ದೇವ ತಾಂಡ ಮೋಂವೊನ ಪ್ರೀತಿ ಮಾಡಿತ್, ತಾಂಡ ಮೋಂವೊಂಡ ಕೈಕ್ ಎಲ್ಲಾನ ಒಪ್ಪ್‌ಚಿಟ್ಟತ್. 36ದೇವಡ ಮೋಂವೊನ ನಂಬುವಯಿಂಗಕ್ ನಿತ್ಯ ಜೀವ ಉಂಡ್; ಅಂವೊನ ನಂಬತಯಿಂಗಕ್ ನಿತ್ಯ ಜೀವ ಕ್‍ಟ್ಟುಲೆ. ಅದ್ಂಡ ಬದ್‍ಲ್, ದೇವಡ ನ್ಯಾಯತೀರ್ಪ್ ಪಿಂಞ ಬಲ್ಯ ಚೆಡಿ ಅಯಿಂಗಡ ಮೇಲೆ ಎಕ್ಕಾಲು ಇಪ್ಪಾಂದ್ ಎಣ್ಣ್‌ಚಿ.
Избрани в момента:
ಯೋಹಾನ 3: ಕೊಡವ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2017, New Life Literature (NLL)