Matta 15
15
Da tukebe
1Bi̱kam ni̱bu Farisa n ti ni̱bu yungku yili̱n Musantu a be a Wurchalima a bi̱u Yesu ko, 2“Wureni a yo miyari̱m mumu a bunti̱bu da seli̱be? A nurabu fa̱li chiyu yo n chi yaka chau chabti̱tu we da chi̱re.”
3N Yesu a yi chi ko, “Yinu a mayire n ti̱n tiko yili̱n Kwamatu di̱ne da tukebu chime? 4Di̱ne n Kwama a yi ko, ‘Bunti̱ ya̱m temun n ti ne muni̱mu. Wu ka tu Teki̱n ka n neki̱ne, a lwe ka bwadu.’ 5Aya ti̱fwa ni̱bu mi̱nu ko, nii wu ki̱ni chii ka maka te ki̱n ka ne ki̱ne, ki̱yidu ko, ‘Chi no ta yadu we di̱ mi̱ne n yo Kwama mi̱n.’ A yung a nibu tebu ki̱mu dwiyentu ti̱fwa ni̱bu mi̱nu. 6A dabu yiko n ki̱n ka ni teki̱n n ti neki̱n dwiyentu. Kanang chikiye, ya̱m Kwamamu a kau bi̱kusum di̱ne dati chiyu. 7Ni̱bu di̱bebelin! N Yichaya a ma fa̱kuitu a yi ko,
8‘Ni̱bu bi̱bu ki̱delayu ka yii,
ni̱tu chitu kutan n ti mi̱n.
9N chi ki̱sii mi̱nu kwako,
di̱ne ki̱miya yili̱n ni̱bii
n ke ti̱tu a Kwamai.’ ”
Chi mun chaditu n ke chi ka kaiyinu we kakku Kwamange
(Mar 7:14-23)
10N Yesu a yale ki̱tuu ni̱be a yi ko, “Ti̱nwe, ti̱swaan ti̱n. 11Chi ki̱leda yiye n ke chi ka kai niye, aya chi ki̱chiredu a yiitu, nang chi ka kaiyinu we kakku Kwamange.”
12Miyari̱m ki̱mu a be a yi ki̱n ko, “Mwang yim mwi ni̱bu Farisamu a kai ni̱r ki̱ni ya̱m muma?”
13N Yesu a yi chi ko, “Kanang ki̱ki̱le tiyang ki̱ku n Temi a fibange, ka kukki̱nu a ti̱yini̱n. 14Ti̱du ki̱dubi̱bu ki̱twa̱ki̱ ki̱dubi̱mu. Ka ki̱du ka twa̱ku keko ki̱duwe, n chi kwang ka fi̱tadu a kee.”
15M Biti̱r a yi ko, “Fwa chi baltaku ki̱yungde.”
16N Yesu a bi̱u chi ko, “N ti̱n we di̱ti̱ti chika? 17Ka chitu a le yiiye, a bunti̱ fur, a chirti̱bu a bwa?” 18Aya chi ki̱chiredu a yiiye, ki̱chiredu a ni̱r, nang chi ki̱kai nii we kakku Kwamange. 19Chitu ki̱chiredu a ni̱ritu nang ti̱tu; ti̱kuran ti̱bwilai, chikku, ti̱kuli, kuutu, ti̱kwani n ti swa̱ba ku nii. 20Ti̱tu nang chi ki̱kai ni̱ritu we kakku Kwamangu, aya chaku chitangu ki̱ni kaniyu a nurabunurane yinangiyu a kaibu ni̱ru we kakku Kwamangu.
Keku bi̱yili̱mang wuka naye Kananiya
(Mar 7:24-30)
21Yo n Yesu a du fiko, a yikan Taya n ti Sidon. 22Wuka naye Kananiya a be a fwa ya̱m ki̱ni dukan ko, “Nwe ki̱bune mi Tewuduwe, Bwe Dauda! Wuka ki̱fi̱bti ki̱ni fwa̱n mi̱nu riye.”
23N Yesu a fwabu ya̱m. Yinu miyari̱m ki̱mu a be a fuma ki̱n ko, “Tewuduwe, naye wu ki̱fun ni̱mi̱n ki̱teli.”
24A yi chi ko, “A tum mi̱ne a kwanti yilairi Yisrela.”
25Naye wu a be, a sung we kaki̱kku ko, “Makai, Tewuduwe.”
26A ke ko, “A ne ka ledu ni da̱u chabtu bwesi̱mitu niing ni kadati.”
27Naye a ke ko “Yiko Tewuduwe, aya kasi no nang kadatiyu, ki̱ chiba ti̱buken ti̱tu ki̱twakadu a fi ni̱bu ki̱chan chabte we naba lo chi.”
28N Yesu a ke naye mi̱n ko, “Nelo, keku bi̱yili̱mang mwangu nabwen. Chi mwang bi̱be n ya. Fwa̱n ki̱nu a be ti̱n we ki̱dang kangu.”
Yesu a bera ni̱bu nabwen
29N Yesu a du bwako, ki̱bunti̱ bale a la Ka̱liliye. A ya, a fi̱l bale kunne a swe we. 30Ki̱tuu ni̱be nabwen a be we di̱ki̱ne. Bi̱ba ngi̱rmani̱mu n ti ki̱dubi̱bu n ti ki̱kubtiyu n ti ti̱funitu n ti bi̱kamu nabwen, a yo chi we kakku kangu, a be ki̱ni chi. 31Ni̱bu nabwen a ya̱r yii kangu a ku ti̱funitu ki̱fwa ya̱m, ki̱kubtiyu a swa̱r, bi̱bu a ngi̱rmani̱mu ki̱ya yayu, ki̱dubi̱bu ki̱ku diyangu. N chi a dela Kwama Yisrela.
N Yesu a chau ki̱ni ni̱bu kuniriti taana
(Mar 8:1-10)
32N Yesu a yale miyari̱m ki̱mu a yi chi ko, mi̱n nwe ki̱bune ni̱bu bi̱be, n chi we ware n ti mi̱n we diti yiyu a ne chi ka chaditu we. Mang kebu ka ki̱ladu ki̱ni chunu ke ki̱la wuka nii a ki̱taduwe wa̱re.
33Miyari̱m ki̱mu a yi ki̱n ko, “Fi a ne nii we, nang ya ki̱danniyu a fi̱re, wu ka lwe ki̱tuu ni̱be?”
34N Yesu a bi̱u chi ko, n Ti̱ni ki̱ni ki̱danniyi yile? N chi a yi ko, “Yi̱di̱bi̱n, n ti beti̱ chi̱ngi bayim.”
35N Yesu a yo ni̱bu a sweran a ti̱m. 36A da̱u ki̱danniyu n ti chingiyu, a twa̱ba̱ buni a di̱Kwama, yinu a wulan a ni miyari̱mu, bi̱ki̱mu a kera ni̱bumi̱n. 37N chi kwang a chau a dutuwe. A kuteng ki̱ku, miyari̱mu a ke ti̱bukentu a dubitu ti̱ti̱ngriti ti̱dibin. 38Ni̱bu a chabi̱mu kuniriti taana, a bwin nati̱bu n ti bwesi̱mu. 39A kuteng ki̱ku n Yesu a yo ni̱bangu, a le kwa̱mbi̱re mwe a yika ti̱m Maka̱da̱m.
Избрани в момента:
Matta 15: Tula
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2015, The Nigeria Bible Translation Trust and Wycliffe Bible Translators, Inc. All rights reserved.