Matta 11
11
N Yowana naba Batisma a tume ni̱bu
(Luk 7:18-35)
1Yo n Yesu a ngau Miyari̱m ki̱mu mi̱n ki̱kure a riye, a du fiko, a yika miyaku n ti di̱mwar a bi̱ntu Ka̱lili.
2Yo n Yowana we di̱bi̱nti̱lu a nwe chi m Masiya ki̱madite, a tum Miyari̱m ki̱mu we bwa di̱ki̱ne. 3Yo n chi a lam bwako a bi̱u ki̱n ko, “Fwa ni̱mi̱n, m mun nang wu ki̱beda, Ka wuka we ka beda?”
4N Yesu a yi chi ko, “Ti̱ki̱lan ti̱fwa Yowana mi̱n chi ta kuutu n ti chi ta nweetu, 5Bi̱bu a dwiyeni̱mu ki̱ku di, ki̱kubti̱mu ki̱ya yayyu, ni̱bu mwa̱limu ki̱bedu. Ti̱funitu ki̱nwedi, bi̱bu a no bwamu a kuntuwe, ti̱lusanitu a nwe ya̱m bi̱li̱mu. 6N Kwama ka dela nii wu a katabu chi we keku bi̱yili̱m kangu a dur mi̱ne.”
7Yo Miyari̱m Yowanamu a kun ki̱ki̱lade, n Yesu a fwa ki̱tuu ni̱be mi̱n ya̱m we dur Yowananu ko, “Yati̱ da̱nge wure we di̱chilachangi̱nu, yati̱ da̱nge ki̱fi̱be yinangu ki̱wile kwalunga? 8Ka a newe yiko, yati̱ da̱nge wure? Nii wu a do kuli̱n di̱yili̱na? Kwako, bi̱bu ki̱do kuli̱n di̱yili̱ni̱mu a lo maiye. 9Yinu fal yati̱ da̱nge wule? Fa̱kuwa? We yiko, n fwa chimi̱n, a lati̱ kasi fa̱ku.” 10N Yowana nang wu tatti̱ki̱dai yika̱ri a mwal a dur ki̱n ko,
“N tume naba di̱tumbi̱re
mi a ti mi̱n kakku,
wu ka do mi̱n wa̱re ke m be mi̱ne.”
11Bi̱yili̱m mi̱n fwa chimi̱nu, we bi̱bu a ya bi̱be nayemu, we ti̱ti̱nitu a bi̱nbi̱ wuka we yinang Yowana naba Batisma ki̱ni dwiyentu. Aya ki̱ni yiko, wuti̱re we Yaa Kwama, a la ki̱n ki̱ni dwiyentu. 12A mwetewe ki̱dangu n Yowana a ya ki̱ma Batisma a lanta ki̱ka̱ng, Yaa Kwama ki̱fi̱rsi̱du ki̱chakakku, aya ni̱bu muli̱ni̱mu ki̱fi̱rsi̱du ki̱ni dukan. 13A lami̱nti̱ ki̱dang Yowanangu fa̱kubu n ti yili̱n Musatu a fwa ya̱m we Yaa Kwama; 14Ka ta ke bi̱yili̱m we ya̱m bi̱be, n Yowana nang Yiliya wu a no ka bede. 15Wu ki̱ni ki̱teliye, a nwe.
16Ki̱ka̱ngu mang swe ki̱dang ki̱ku ki̱ni wureni? N chi yinang bwesi̱mu a kwa̱mari̱m, bi̱bu ki̱yita ya̱m a bwiti chi ko,
17“Ni̱n ngau chimi̱n ki̱kunti,
ta yibbu were;
Ni̱n yi̱ngla chimi̱n wi bwa,
ta kiti̱bu wi.”
18Nangki̱n, n Yowana a be, a chabu, a nobu, n chi a yi ko ki̱ni ki̱fi̱bti. 19Bwe Nii a be ki̱chadu, ki̱nodu. N chi a yi ko, kwa̱ri̱m a lala ki̱chadu ki̱no ti̱du. Ki̱ bwa̱lu n ti ni̱bu ki̱yiu sangkali̱m n ti ni̱bu ki̱leti̱m. Ni̱bu ki̱swaanu ko n Kwama ki̱ma chi a da yo ni̱bu ki̱ku wa̱ri yingku ni̱bu ki̱miye.
Bi̱ntu ti̱tu a wobu ki̱ti̱mi
(Luk 10:13-15)
20Yinu n Yesu a mwe ki̱ wela bi̱nti̱tu n ki̱n a mwe mi̱ne chi ka̱ta̱kitu, di̱ne n chi a wobu ki̱ti̱m. 21Yinu a yiko, “A no chi̱n Korasinu n ti Betsaida kano nangi̱n ti̱dui ti̱tu a chi ka̱ta̱kitu man ma a di̱chi̱nengu, a Taya n ti Sidome a no yadu a wo ki̱ti̱m feredi ki̱ni buken ka do tiyaksani kuli̱ni. 22Aya mi̱n fwa chimi̱nu, we dimwatake ka nwe ki̱bune Taya n ti Sidon ka la ti̱chintu. 23Aya m mun Kafanawu, mwang ma wureni wu delaki̱ mwangu ka lan diye? Ko bayim, mwang ngau duru a far ki̱rang. Ka no chi ka̱ta̱kitu mang ma a di̱chi̱netu m ma a Sodome, a no lanta di a ne kaiyadu. 24A dakan ta yindu ko dimwatake ka nwe ki̱bune Sodome ka la di̱chi̱nu.”
Ti̱be a di̱Yesuwe, keti̱ ya fi̱kaku
(Luk 10:21-22)
25We ki̱swi wu n Yesu a yi ko, “Mi̱n delanu Tete, Tewuduwe wu a dii n ti ti̱me, mwang mabe di̱ne mwang lai ni̱bu ko chi kasani̱mu n ti bi̱bu ko chi yim chimu ti̱te, mwang mabe ti̱n di̱ne mwang yung bi̱ti̱ri̱mu mi̱ne. 26Nangki̱n Tete, ti̱tu nang chi mwang da̱ng a le mi̱n a ni̱re.
27“N Temi a ni chiti kwang. A ne wu a yim Bwe we ka n ke Te. Ti̱nti̱ne a ne wu a yim Te we ka n ke Bwe n ti bi̱bu Bwe a ke ka yung chi̱di̱mu.
28“Ti̱be bwa a di̱mi̱ne, n ti̱ni ki̱ni kwang, n ti̱n bi̱bu ta twibwi we da̱ku kuli̱n turengmu, ma ni chi̱n fi̱kaku. 29Ti̱yiu nangangu mang ni chi̱nangu yinangu tangka ka da̱u ki̱tiyang Ka̱rmangu, ti̱miyan a di̱mi̱ne, m mi̱n ki̱ni bwanu mang kukki̱bu dur mi̱nu, yinu ta ya fi̱kaku we dutu chi̱ntu. 30Ki̱tiyang Ka̱rma mangu a ne bwar we, chi mang yi mi ti̱ma a swe bunge.”
Избрани в момента:
Matta 11: Tula
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2015, The Nigeria Bible Translation Trust and Wycliffe Bible Translators, Inc. All rights reserved.