Mat 3
3
Gyɔn Lɔŋɔ Ɔkpa Sa Yesu Kɩba
(Maki 1:1-8; Luka 3:1-18; Gyɔn 1:19-28)
1Kanɩn saŋa maa mʋ, Gyɔn mʋ nɩɩ ee gyee asa Ɩbwaarɛ kekyugyee mʋ, ba Gyudeya ofuli sʋ ɛɛ tɔwɛ abwaarɛsɩn ɛɛ sa asa 2yɛ, “Fan yɛgɛ alibi kɩwaa, lɩɩ fɛɛ Ɩbwaarɛ kuwura‐gyii mʋ ki tiri tɔ.” 3Gyɔn nɩmʋ asɩn nɩɩ Ɩbwaarɛ ɔtɔwɛpʋ Isaya wʋla kyʋrɔɔ waa Asɩnkyan yɩlasa mʋ tɔ mʋ yɛ,
“Ɔsa kʋ bʋ ofuli sʋ ee kuusi ɛɛ tɔwɛ yɛ,
‘Fan lɔŋɔ Ɔnyɩrɩpɛ ɔkpa mʋ,
kɛ fan waa ɔkpa mʋ ntintin sa mʋ.’ ”
4Nyɔɔma ifuu nɩɩ ba taa waa Gyɔn atɔ bunsa, nɩɩ kʋtɔbwaaya ɔwʋlɛ kɩrɩsʋ i ŋmina mʋ kasɩyɛ tɔ. Mʋ agyitɔ‐gyisa mɔɔ ɩ gyɛ ntuntunbi yɛ ŋmasan. 5Asa ba lɩɩ Gyerusalem kadɛ tɔ yɛ Gyudeya ɩsʋwʋlɛ sʋ yɛ Gyɔdan kabaafʋn kpini ba mʋ asɛ.
6Ba lɛɛ bamʋ alibi tɔwɛ, nɩɩ o gyee bamʋ Ɩbwaarɛ kekyugyee Gyɔdan ɔbʋn mʋ tɔ. 7Gyɔn maa wu Farasii yɛ Sadusi abi gaalaagaa ba maa ba mʋ asɛ, kɛ o gyee bamʋ kekyugyee mʋ, ɔ taasɛ bamʋ yɛ, “Fanɛ anansɛ banɩmʋ, anɩmʋ ɩ tɔwɛ waa fanɛ yɛ fan sɩlɛ lɩɩ Ɩbwaarɛ agbʋ mʋ nɩɩ ɩɩ ba asa sʋ mʋ tɔ? 8Fan waa atɔ mʋ nɩɩ ɩ dagaa kɛ ɩɩ kaapʋ fɛɛ fan yɛgɛ alibi kɩwaa. 9Fan man da fanɛ nkɔlɔ sʋ tɔwɛ yɛ, ‘Anɛ naana ɩ gyɛ Abraham ɩmʋ sʋ an sʋ kamɔlɩgɛ.’ N tɔwɛ fanɛ kesintin fɛɛ Ɩbwaarɛ ɩ taalɛ taa abuu nɩmʋ biliŋi anaana‐bii sa Abraham. 10Nbɩɩnbɩɩ bɩrɛ, Ɩbwaarɛ wʋla taa kpanfa yɩla iyu mʋ ilin tɔ o gyoo. Nɩɩ oyu kʋmaa mʋ nɩɩ kɩ mɛɛ sɔyɩ abi mʋ, bee biti ba ŋɛ kɩmʋ tʋʋ kɛ ba taa waa fʋlɔn tɔ.
11“Nkyu nɩɩ mɛɛ mɛ n sʋ n gyee fanɛ Ɩbwaarɛ kekyugyee kɛ ɩɩ kaapʋ fɛɛ fan yɛgɛ alibi kɩwaa. Amaa ɔmʋ nɩɩ ɔ bʋ mɛ kamaa ɛɛ ba mʋ kyɔ mɛ gaa, nɩɩ n man dagaa gbaa fɛɛ n sʋla mʋ asɩbɩta. Mɛɛ mʋ bɩrɛ Kayaayu Kyɩrɛkyɩrɛ yɛ fʋlɔn nɩɩ ee biti ɔ taa gyee fanɛ Ɩbwaarɛ kekyugyee. 12Ɔ sʋ mʋ kʋtɔ kyaalɛsa mʋ kɩbaa tɔ, kɛ ɔ kyaalɛ ayubi mʋ lɛɛ afʋnfʋntɛɛ mʋ tɔ waa kikyunkun tɔ. Ee biti ɔ taa afʋnfʋntɛɛ mʋ waa fʋlɔn mʋ nɩɩ i mee dun mʋ tɔ.”
Yesu Kekyugyee
(Maki 1:9-11; Luka 1:21-22; Gyɔn 1:31-34)
13Tʋtɔ nɩɩ Yesu lɩɩ Galile ɔsʋwʋlɛ sʋ ba Gyɔdan ɔbʋn mʋ tɔ Gyɔn asɛ, kɛ o gyee mʋ Ɩbwaarɛ kekyugyee. 14Amaa Gyɔn kpan mʋ n‐yɩɩ kɛ ɔ kyɛɛgɛ Yesu nfɛɛrɛ, nɩɩ ɔ tɔwɛ mʋ yɛ, “Fɛɛ fʋ ɩ dagaa fɛɛ fu gyee mɛ kekyugyee, nɩɩ fʋ ɩ ba mɛ asɛ yɛ n gyee fʋ?”
15Nɩɩ Yesu lɛɛ kɔnɔ yɛ, “Yɛgɛ ɩ waa kanɩn nbɩɩnbɩɩ nɩmʋ, lɩɩ fɛɛ ɔkpa nɩmʋ sʋ nɩɩ ɩ dagaa a maa waa ɩmʋ nɩɩ Ɩbwaarɛ biti mʋ kpini.” Nɩɩ Gyɔn kyula gyee Yesu Ɩbwaarɛ kekyugyee.
16Gyɔn maa dan gyee Yesu Ɩbwaarɛ kekyugyee lʋwɛ mʋ, Yesu lɩɩ ɔbʋn mʋ tɔ. Opula maŋa tɔ nɩɩ sʋsʋ bugi tɔ, nɩɩ o wu Ɩbwaarɛ Kayaayu Kyɩrɛkyɩrɛ maa kpɩlɩgɛ fɛɛ kuwura‐lɔpɔ ba gyɔŋɔ mʋ sʋ. 17Nɩɩ ɔbʋlɛ kʋ lɩɩ sʋsʋ tɔwɛ yɛ, “Ɔnɩmʋ ɩ gyɛ mɛ kɔkɔlɔ tɔ obii‐bitisa, nɩɩ mʋ ɩ bɔla mi ansi.”
Избрани в момента:
Mat 3: naw
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2013, Wycliffe Bible Translators, Inc. All rights reserved.