Nau Ntơm 49
49
Nau Yakôp ăn geh jêng ma kon păng 12 nuyh
1Yakôp i bu kuăl Israel đŏng, păng kuăl dâng lĕ kon păng văch ta ri dadê, jêh ri lah: “Dăn khân may hăn râng dadê, gay ma gâp mbơh nkoch ăn khân may gĭt moh nau geh ta nar jât năp dja tay.
2Ơ phung kon sau Yakôp, văch râng hŏm gay ma iăt
Iăt hŏm nau Israel bơ̆ khân may nơm.
3Ơ Rupên, may jêng kon bôk dak gâp
Gâp bă may lor bu dôl gâp geh suan dŭt dăng
May bu lư rlao bu, ndrel ma geh nau dơi rlao bu đŏng.
4May dăng tâm ban ma dak rbuh, mâu ôh dơi ăt dơi rdâng, tih ma may mâu ôh jan bôk
Yorlah may hao kalơ gre gâp
May bêch ndrel ma ur gâp, jan ăn gre gâp ar.#35:22
5Simôn, ndrel ma Lêvi jêng oh nô du ndŭl deh
Nuih n'hâm khân păng hăt janh ngăn, khân păng nkhât bu ma đao.#34:24-26
6Gâp mâu ôh ŭch gŭ ndrel khân păng
Nôk khân păng tâm nchră nau jan djơh.
Yorlah nôk khân păng ji nuih, khân păng nkhât bu nơh
Jêh ri khân păng koh lơi jŏng jon ndrôk nkuŏng dah khân păng nơm ŭch dơm.
7Gâp rak rtăp lơi nau ji nuih khân păng, yor ma khân păng hăt janh hô ir
Jêh ri ta nau ji nuih khân păng jan ndơ dŭt djơh hô ngăn, dah khân păng nơm ŭch
Gâp mra nchah lơi khân păng bar hê i nây ta rnoi deh gâp
Mâu ôh ăn gŭ ndrel du ntŭk ta bri Israel.#NVa 18:1; Yôs 19:1-9; 21:1-42
8Ơ Yuđa, oh nô may mra rnê may dadê ngăn
May tay dơi lơh đah phung rlăng ma may
Oh nô may tay păn yơk ma may dadê.#Phu 1:1-2
9Ơ Yuđa kon gâp, may jêng tâm ban ma kon yao mŭr
Sât hơm bơh kăp sa mpômpa (siŭm)
May tâm ban ma yao mŭr i păn nsan
May tâm ban ma yao mŭr i bêch, mâu geh ôh bunuyh bănh rkhuak.#NKơ 24:9; NTM 5:5
10Mŏng tăk jra kađăch geh ta may nâng
Rnoi deh may tay mra jêng kađăch mro mrăng
N'ho ma tât truyh păng i geh nau dơi kuŏng nây#49:10: «Păng i geh nau dơi kuŏng nây», mâu lah: «Nơm rnha Silô nây».
Nđâp ma dâng lĕ phung bunuyh lam ntŭk iăt nau păng dadê.#1NR 5:2; 2Sa 7:16; Hêb 7:14; NTM 5:5
11Păng ndrŏng ngăn, ndri dâng păng kât seh lia păng nơm ta tơm play yŭng yar ƀon, bol lah tơm play nây dŭt khlay
Păng mâu ôh rvê seh lia sa i play i n'ha nây
Păng pih ao păng nơm ma dak ndrănh play yŭng yar ƀon
Pih bok păng nơm ma dak play yŭng yar ƀon i chăng tâm ban ma mham.
12Trôm măt păng chăng ngăn rlao ma dak ndrănh play yŭng yar ƀon
Nglang sêk păng rlao ma dak toh ndrôk jât.#49:12: Mâu lah: «Trôm măt păng chăng ngăn, yorlah nhêt ŏk ndrănh play yŭng yar ƀon, nglang sêk păng, yorlah nhêt ŏk dak toh ndrôk».
13Săpyulôn tay gŭ rŏ meng dak văch dak văr
Ntŭk păng jêng ntŭk nsrŭng duk kuŏng
N'hăr neh păng n'ho ma tât ta ƀon Siđôn ri ngăn.
14Isakhar jêng tâm ban ma seh lia dŭt dăng
Păng bêch ta vah vang n'gar be biăp.
15Păng mân lah ntŭk păng gŭ rlu nây jêng ntŭk ueh
Ndrel ma dơh đŏng
Jêh ri păng kŭnh săk păng nơm ăn bu dŏng rdeng drăp ndơ
Tâm ban ma dâk bu ngăn.
16Dan jêng kôranh mât uănh mpôl ƀon lan păng nơm
Kơt mpôl êng êng ta phung Israel dâng lĕ đŏng
17Păng jêng tâm ban ma bêh hung rŏ trong
Tâm ban ma bêh ku gŭ ta meng trong
Kŏp chôk ta jŏng jon seh
Jêh ri bunuyh i gŭ ncho ta kalơ ri tŭp a neh”.
18Jêh ri Yakôp mbơh sơm lah: “Ơ Brah Yêhôva, gâp hôm kŏp nar may rklaih gâp”. Jêh ri păng n'ho ma lah ma oh kon păng jât:
19“Kat geh phung tahen hăn lơh păng
Yơn ma păng hăn lơh phung tahen i nây tă bơh kơi.
20Asơr geh ndơ sông sa kah ngăn
Păng tay ăn ndơ sông sa kah ngăn ma ăn kađăch sa.
21Năptali jêng tâm ban ma nkrŏng me lĕ klaih
Păng bă kon ueh ueh ngăn.
22Yôsep jêng tâm ban ma n'ging geh play ŏk
N'ging geh play ŏk hon kêng meng n'hong dak
N'ging păng prêh rlao mpêr ƀon ngăn.
23Phung rlăng tâm lơh đah păng
Bu pănh păng ma na
24Yơn ma Yôsep hôm dăng rlao
Păng hôm dăng ngăn, yor ma geh nau dơi Kôranh Brah i gâp yơk mbah.
Kôranh Brah dŭt geh nau dơi ngăn, mâu geh ôh bunuyh dơi đŏng.
Kôranh Brah mât uănh phung Israel, tâm ban ma nơm chiăp mpômpa (siŭm) phung.
Kôranh Brah dŭt nâp ma kơl njrăng, tâm ban ma lŭ klêr mâu ôh dơi n'gơ.
25Kôranh Brah i brah gâp yơk mbah mra kơl may
Kôranh Brah nơm i dŭt geh nau dơi mra ăn nau geh jêng ma may
Păng mra ăn geh dak mih ma may
Păng mra ăn geh dak lôh tă bơh dŏng su ma may
Ndrel ma ăn may geh kon ŏk, nđâp ma geh mpômpa (siŭm) ŏk đŏng.
26Nau geh jêng gâp dăn Kôranh Brah ăn ma may dja
Jêng kuŏng rlao ma nau geh jêng phung che gâp dăn bơh Kôranh Brah ăn ma gâp
Jêng prêh rlao ma yôk dŭt nâp n'ho ro jât
Dăn dâng lĕ nau geh jêng dja ăn geh ta may
Dăn ăn geh ta bôk may i lĕ Kôranh Brah tâm nkhah jêh đah phung oh nô may.
27Ƀenjamin jêng tâm ban ma so bri dŭt janh
A ôi păng hăn kăp sa hêk mpômpa (siŭm)
Tât kêng măng păng tâm pă mpa păng gleng i nây”.
28Dâng lĕ phung khân păng i nây jêng mpôl rnoi deh phung Israel, i nây jêng nau bơ̆ khân păng ntĭnh ma khân păng, păng dăn Kôranh Brah ăn nau geh jêng ma khân păng 12 nuyh nây, du huê du huê păng ăn êng êng, tâm di ma ăp nơm khân păng.
Yakôp khât
29Jêh ri Yakôp ntĭnh ma phung oh kon păng: “Hôm du ƀlât gâp tay khât, gâp hăn tâm mâp ma phung che gâp nơm. Ăn khân may leo tŏp gâp kêng môch phung che gâp ta trôm yôk ta mir Êprŭn phung Hêt,#23:17-20 30jêng ta mir Măkpêla, tâm dăch ma ƀon Mămrê ta bri Kanan, mir nây lĕ che Abrahăm de rvăt tă bơh Êprŭn phung Hêt, gay ma ntŭk môch.#NNt 23:3-20 31Ta ntŭk nây bu tŏp che Abrahăm, ndrel ma u Sara ur păng, bu tŏp Isăk, ndrel ma Rêbêka ur păng, Lêa gâp tŏp păng ta ntŭk i nây đŏng.#25:9-10; 35:29 32Mir ndrel ma ntu yôk i nây lĕ che Abrahăm de rvăt bơh phung Hêt”. 33Jêh Yakôp ntĭnh ma phung oh kon păng lĕ phiao, jêh ri păng yơk jŏng lŏng săk ta gre păng nơm ri, n'ho ma roh n'hâm hăn tâm mâp ma phung che păng nơm ri.#Kar 7:15
Избрани в момента:
Nau Ntơm 49: cmoL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© (Active) Wycliffe Bible Translators, Inc. All rights reserved.