Genesis 22
22
Nan Nangpadasan Apo Dios Ken Abraham
22:1-19; 23:1-2, 19-20; 25:7-10
1Idi menbagot et si Isaac dat padasen Apo Dios si Abraham ta ilaena no tet-ewa ay patiyena siya. Kinwanina, “Abraham!” “Ayta Apo, naayak ya,” kinwanina. 2Dat kanan Apo Dios, “Ayagam nan kedkedeng ay anakmo ay si Isaac ay laylaydem ta omey kayo id Moria et awnit itdok isdi nan bilig ay omayanyo dakat pateyen siya ta poowam ay mang-idaton ken sak-en.”
3Issan nawakgatana dat masapasapa si Abraham ay menbalsig is kaiw is esada idnet danat ipaawit isnan dangkina. Danat ayagan si Isaac ya nan dowa ay baana et omeyda issan bilig ay inbagan Apo Dios.
4Issan maikatlo ay agew ay nindad-aananda danat ilaen nan bilig ay dedemangenda. 5Danat kanan issan baana, “Ibaodyo nan dangki ta mangseseed kayo isna ta omey kami ken Isaac ay mangdayaw ken Apo Dios isdi esakami pay somagong isna.” 6Danat ipabolig nan kaiw ken Isaac danapay alaen nan gipan ya nan agowan et omeyda.
Idi mendad-aanda 7dat kanan Isaac, “Ama.” “Sino di?” kinwanin Abraham. Danat kanan, “Dan wada nan kaiw ya nan tagowan ngem into pay nan kalnilo ay mapalti?” 8Tinban Abraham, “Anakko, awnit kigad si Apo Dios ay omyali.”
9Idi inomdanda issan bilig ay inbagan Apo Dios en omayanda dat mensapo si Abraham is mangpoowana isnan paltiyena. Danat ogden si Isaac et iyosona isnan kaiw. 10Danat alaen nan gipan ta pateyena koma nan anakna 11ngem dat menbogaw nan anghel nan apo id ngato ay mangwani, “Abraham! Abraham!” “Ayta apo” kinwanin Abraham. 12Dat kanan san anghel, “Ibadengmo nan gipan. Adim og-ogadan nan anakmo tay getkek ay tongtongpalem si Apo Dios tay adim iyimot nan laylaydem ay anakmo ken siya.” 13Idi menmoli si Abraham danat ilaen nan kalnilo ay nasaotan nan sakgodna isnan logam. Danat alaen et paltiyena. Dadat poowan et siya nan igasingda ken Apo Dios ay imbes san anakna. 14Nginadnan Abraham san bilig ay deey is “It-ited nan apo nan masapol tako” gapo tay intedna san kalnilo et enggana id wani et siya kayet nan pangwanin nan ipogaw.
15Ninkali kasin ken Abraham san anghel ay wada id daya et kanana, 16“Kanan nan Apo en gapo tay sak-en nan tet-ewa ay Dios et awnitak pagasingen sik-a et tomet-ewa nan naay tay egaymo inyimot ken sak-en nan kedkedeng ay anakmo. 17Isapatak ay agtak sik-a is adoado ay apo ay kaneg nan kaad-adon nan talaw id daya wenno nan lagan isnan benget di baybay. Nan ap-om et awnitda abaken nan mangbosboso ken daida. 18Gapo ken sik-a et awnitak badangan nan adoado ay ipogaw isnan am-in ay kailiili. Owen, awnit tomet-ewana tay tinongpalmo nan inbilinko.” 19Dat somagong da Abraham issan kad-an san baana dadat somaa id Beerseba ay ilida.
Избрани в момента:
Genesis 22: xnn
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.