Genesis 15
15
Nan Nakitolagan Apo Dios Ken Abram
15:1-18
1Nakwas pay di dat menpaila nan apo ken Abram danat kanan, “Adika omegyat Abram tay salaknibak sik-a isnan kaeegyat dakpay agtan sik-a is gawis.” 2-3Ngem dat kanan Abram, “apo ay kangatowan, damen aped iyali dasa dapay maid anakko is awnit mangtawid? Kedkedeng si Eliezer ay iDamasco ay baak ay tinalakenko is awnit mangtawid isnan kokwak tay maid inyalim is anakko.” 4Ngem dat kanan nan apo, “Baken san baam is awnit mangtawid isnan kokwam nodi nan anakmo.” 5Danat ibaga en bomala si Abram danat kanan, “Tangadem pod id daya dakat padasen ay mangbilang isnan talaw tay awnit kaneg todi nan kaad-adon nan ap-om.”
6Adi mendowadowa si Abram isnan kankanan nan apo isonga gawis nan pangiilaan nan apo ken siya. 7Danat kanan ken Abram, “Sak-en nan apo ay nang-ibala ken sik-a id Ur id Babilonia ta idyak ken sik-a nan naay daga ay menkowam.” 8Ngem dat kanan Abram, “apo ay kangatowan, ngan di esak mangtekan ay awnitak menkowa sa?” 9Dat kanan nan apo, “Omyalika is baka, kalding ya kalnilo ay sagtotlo nan tew-enda ya is dowa ay koyat ay kalapati ya pagaw.” 10Danat iyey am-in dana isnan apo et amam-asena danat ippey nan am-asda isnan sagang nan amasda ngem egayna inamam-as nan koyat. 11Dat om-omey nan gayang ay mangtopkay ngem dat abowen Abram daida.
12Idi lomlomnek et nan agew dat maseyeseyep si Abram danat liknaen nan pilmi ay egyat tay adina getken nan awnit ommat. 13Dat kanan nan apo, “Nan ap-om et awnitda omey isnan addaaddawi ay ili et mabab-aada ya mapalpaligatda is epat gasot ay tew-en. 14Ngem awnitko dosaen nan mangpaligat isnan ap-om et gapo isnan madosaanda et awnitda ipalobos nan ap-om ay komaan isdi ya awnit adoado nan kinabaknang ay ikaanda. 15Ngem sik-a et gawis nan biyagmo ya maam-aam-amaka esakapay matey. 16Sokod isnan maikap-at ay bonatmo esapay somagong nan aap-om id isna tay adi pay laeng mapakaan nan Amorreo isna engganay maanay on-ona nan basbasolda ay madosaanda.”
17Ostoy linomnek et nan agew ay bomolinget daet mawada nan men-as-asok ay pag-otowan ya nan menbidbidang ay silew ay lomaos isnan gawan san naamam-as ay talaken. 18Et siya na nan nakitolagan nan apo ken Abram ay nangwaniyana en, “Isapatak ay idyak isnan ap-om nan am-in ay daga ay menlogi isnan beddeng di Egipto enggana isnan ginawang ay Eufrates.”
Kinwanin Apo Dios en agtana si Abram is adoado is ap-ona ngem si Sarai ay asawana et adi kayet omanak isonga dat ibagan Sarai ken Abram en iseyepna si Agar ay baan Sarai tasiyay omanakda. Dat omanak tet-ewa si Agar is lalaki dat ngadnan Abram is Ismael.
Избрани в момента:
Genesis 15: xnn
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.