John 5
5
Nil Jesus.ang Pam Anan Miyalathan Nathpalman Way Wun-Wun
1Anpalaniy-a, than Jews al-alangan may piꞌan yumpin, aak Jerusalem angana, aꞌ nil Jesus.an aak-aakanakan iiy. 2Aak angman, Jerusalem.angan-a, thaaꞌ gate wun, minh sheep anangan yipam ngoonchayn. Thaaꞌ gate thinthan-a, ngak many keꞌ pool yimanangan, angman wun tham, aꞌ verandahs five weentanam yumpin. Ngak inan-a, Jews al-alangan namp Bethzatha waaꞌin wik thanttamangan. 3Pam wanch yot thaaꞌ-wantanam wun-wunin, verandahs angman, pam wanch way anangan weech-weechan thanang. Wiy anangan-a, meeꞌ koꞌanch wunin; wiy anangan-a, kunp wunin; wiy anangan-a, makar yal-yalamin thant. 4(Ngak kookam anmaniy-a, popam anman wun-wun; wiyiy-a, ep bul-bul-bul anman weentan. Ngeenama? Puth wiyaniy-a, ngaantiyongk God.antam ngakang ukan, aꞌ ngak weentathan. Ngakan bul-bulan weent-weentan-a, weeꞌ-nathan kaꞌathaman ngakangan ukow-a, an erkam miyal weenowa, keꞌ-ngul weechow nunang. Than pam wanch angman wun-wunin, than ngakakan kuup-kuupin, ngakan weent-weentowan-a, than yipam erkam ukayn aꞌ miyal ngul weemayn.)
5Pam thonam angmana, nathpalman weech-weech nunang, kaap thirty-eightang want nunang. 6Aꞌ nil Jesus.angan thath nunang, angman wun-wun. Nil kan ngaantam-ngeey nunang pam alpanan nathpalman wun-wun, aꞌ nil thawant, “Ayyang! Nint kaangk kemp miyal ngul iiyān ey?” 7Aꞌ nil pam alpanan thawant, Jesus alantan, “Ayyang, ngak bul-bulan weent-weentan-a, an weeꞌangam ukathiy ngayang a? Ngay puth aak inan-a, pam wanch kampan keꞌanangweya. Ngay puth keꞌ ukanakan-a, ngakangan-a, ana yaꞌangam, than puth wiy ananganiy kaꞌatham ukantan.” 8Nil puth Jesus.an thaw nungant, “Ek a! Swag kan-ngul maayān a! Iiyān ngula!” 9An erkam paththam ek, pamaniy, swag nungantaman maay, aꞌ kan-ngul iiy.
Aak ananiy-a, Saturday.angan minam yump nunang, Jesus.anganiy, 10Aꞌ anpalana than moom Jews.antam al-alangan wakin nunang, pam nil Jesus.angan miyalath, aꞌ thawin nungant, “Ayyang, aak inan-a, aak ngench thayan Saturday.an. Aak ngampar yimanangan keꞌ wun, swag keꞌam kal-kalanamp Saturday.angan.” 11Nil puth paman thaw thant, “Pam anan nilan miyalath ngayang-a, nil yimanangan thawar, ‘Nint ek a! Swagan kan-ngul maayāna! Iiyān ngula!’ ” 12Aꞌ than pam piꞌan anangan engkin nungant, “Pam nil weeꞌa, yimanangan thaw nungkar a?” 13Puth nil pam alangan nampan keꞌam thiich nunang, Jesus.an, nilan puth minaman yumpan-a, than pam wanch yot thaaꞌ-wantanaman angman than-thanin, nil puth Jesus.an-a, erkam appench thanttam aak amanamana.
14Anpalan-a, nil Jesus.angan aawuch ngench thayanangan uw nunang, pam nilan minam yumpan, aꞌ thawant, “Ayyang, in ngeey a! Nint kan-ngul miyal ngula! Way nintan keenkan yump-yumpan-a, too ngul wantān a! Way keꞌ-ngul yumpān a! Nint keꞌwey wayan wantin-a, an puy-puyam ngul weechow nintang, way-wayam ngul wunan.” 15Aꞌ nil pam anman-a, aawuch ngench thayanan want ngul, aꞌ Jews al-alantan waaꞌ, “An nilama, Jesus.ang ngayang miyalatha.” 16Anpalan-a, than Jews al-alangan ngangk kul piꞌ-piꞌin nungant, Jesus.ant, puth nil aak ngench thayanangan paman miyalath nunang.
17Nil Jesus.an puth thaw thant, “Piip ngatharaman nil puth work anman iiy-iiyan, murkanim, aꞌ ngay yimanangan work anman iiy-iiyāng.” 18Than pam al-alangan wik inan ngeeyin-a, thanan ngangk kul puy-puyam wampin nungant Jesus.ant, keꞌ mulathiythan nunang. Ngeenama? Than puth thawin nil wik thayanan keꞌam piꞌ-piꞌ aak Saturday anpalmana. Thon inana, nil Jesus.angan puth God.an piip nungantaman waaꞌ nunang, nanpalan than ngaantam-ngeeyin nil waaꞌan nungamang keꞌ God.ang pul karp anman.
Nil Jesus.an Nhengk God.antamana, Pam Piꞌana
19Nil Jesus puth thaw thant, “Ngay kan-kanam thawang niiyant: ngay piip ngatharaman thathangan nunang work nilan yump-yumpan, keꞌ-paal ngay yimanangan work yump-yumpang keꞌ nil anman yump-yumpan. Work ngayan yump-yumpangan-a, nil angman ngatharang, ngay-ngayaman keꞌ yumping, ngay moom ngatharakam yaꞌa. Nil piip ngatharamangan yump-yumpan-a, ngay nhengk nungantamangan-a, yimanang thamp yump-yumpang. 20Nil piip ngatharaman-a, kaangk wun ngathara, nilan meenathan ngathar work yot anangan nilan yump-yumpan. Ngul-ngulan-a, nil work wuut piꞌ-piꞌanam anangan ngul meenathow ngathar, ngay ngulan yipam yumpāng. Niiy puth ngul meeꞌ ikān a! work piꞌ-piꞌanam anangan thathāna.
21“Wiyiy-a, nil Piip ngatharamangan pam wanch koyam mulaman ekathan, ngangkan koyam theeꞌan thant, yipam man-yethaman iiyayn. Ngayan yim-yimanangan pam wanch anangan man-yetham yumpāng thanang, wiy anangan ngayan kaangk man-yethaman yumpāng thanang. 22Piip ngatharamangan work inangan theeꞌar: ngay pam wanch umang thanathāng thanang, nil piip God.angan yaꞌa, nil work inangan ngathar waaꞌ ngay yipam work iiyāng. 23Nil piip God.angan puth ngeenak work inangan waaꞌara? Nil puth kaangk pam wanchangan pam piꞌanan ngaantam-ngeeyayn ngayang, keꞌ than nunang God yimanangan ngaantam-ngeeyantan pam piꞌanan. Than weeꞌ-weeꞌanangan keꞌan ngaantam-ngeeyantan ngayang ngay pam piꞌanan-a, yaa, than puth piip ngatharam thampan pam piꞌan keꞌam ngaantam-ngeeyantan nunang, nilan kuch ngayang.
24“Ngay wik inangan kan-kanam thawang niiyant: than weeꞌ-weeꞌanangan wik ngatharaman ngeey-ngeeyantan-a, aꞌ ngangkangan piꞌ-piꞌantan nunang nilan kuch ngayang-a, ngayiya thanttang iiy-iiyānga, thanan puth-a, ngulakam wun-wunayn ngatharang, ngay keꞌ kuching thanang aak wayak. Puth than woyan anman wak-wakantan ngangk aak umpuyam wunanakan God.antang, woyan thon anan-a, mul wunanakan-a, an too ngul wantin. 25Ngay in kan-kanam puth thawang niiyant: aak inan kan-kanang ngul wampan thant, pam wanch al-alantan woyan God.antaman keꞌaman wak-wakantan, than man awal ngatharaman nhengk God.antaman ngul ngeeyayn. Than wiyangan-a, min-minam ngul ngeeyayn, aꞌ piip ngatharamantangan God.antangan ngul wunayn ngulakaman. 26Nil piip ngatharam God.ana, aꞌ puth ngaya nhengk nungantamana ngan man-yetham iiy-iiyan aak nathpalman aꞌ ngan man-yetham ngulakam wun-wunān, pamang keꞌam yumpin nganang, yaꞌa. Aꞌ ngan ngangk theeꞌanan pam wanchak thanan yipam aak umpuyam wunayn ang kenyan. 27Piip ngatharamangan work inangan thamp theeꞌar iiyāng: ngay pam wanch umang ngul thanathāng thanang, aꞌ mep-mepāng thananga, ngay puth pam inman nil God.angan kuch ngayang. 28Niiy keꞌ meeꞌ ikāna, wik inpalan ngay nyiingkan thawangan niiyant, puth aakan ngul wampowa, than pam wanch mul anangan aak awarangan wuntan-a, than ngul man awal ngatharaman ngeeyayna. 29Aꞌ than ngul ekayn, aꞌ pentayn ngul, awar anpalan. Than wiy anangana than minaman iiy-iiyin-a, than ep ngangk aak umpuyangam wun-wunayn, God.antangan. Than wiy anangan wayan iiy-iiyin-a, pam wanch ananganiy-a, nil God.angan ngul kuchow thanang aak wayakan, kech yipam wunayn nungantaman.
Ngay Wik Piip Ngatharamantam Ngeey-Ngeeyang
30“Ngay-ngayaman keꞌ work iiy-iiying aak ingana, yaꞌa, piip ngatharaman God.ana angman ngatharang. Ngay puth wik piip ngatharamantaman ngeey-ngeeyang aꞌ ngay anman yump-yumpang keꞌ nilaman wik thaw-thawan. Ngay pam wanch umangan thanathāng thanangan-a, an ngay minam thaw-thawang thant ngay puth ngay-ngayam keꞌam wik thaw-thawang, yaꞌa, ngay wik piip ngatharamantam ngeey-ngeeyanga. 31-32Ngay meeꞌmiy ngay wanttinpalan wampang niiyant, puth ngay ngatharakaman waaꞌ-waaꞌingwey-a, an puth niiy keꞌ ngeeyin ngayang, yaꞌa; wik wiyangan waaꞌiythan ngayangan-a, niiy wik thanttaman-a, ep ngeeyin. Yaa, nil piip God.angan kan waaꞌan ngayang, ngay wanttinpalan wampangana, aꞌ ngay kan ngaantam-ngeeyangan nilan wik kan-kanaman waaꞌan ngayangan. 33-34Niiy puth John.antan pam kan kuchan ngatharaman mepayn nunanga! Aꞌ nil John.angan-a, wik kan-kanaman waaꞌ-waaꞌ ngayangan niiyantana. Pam wiy al-alangan keꞌ waaꞌiythan ngayanga! Ngay puth meeꞌmiy ep ngay wanttinpalan wampangana. Ngay puth wik John.antaman mak kon-aathāng niiyang niiyan yipam wampān piip God.antan, nil yipam kaaꞌ-piichanathow niiyang, way niiyantam anpalan.
35“Nil John.an-a, keꞌ nganth pench-penchana, park-parkan thampang. Niiyan-a, kaꞌathaman ngangk minangam monkan-wakan nunang wik ngeeyanakan, puth yaan manyama. 36Puth work nil John.an iiy-iiy-a, wik thakan waaꞌ-waaꞌ niiyant-a, an manyama, work ngayan iiy-iiyang-a, an thaꞌiy paththam. Puth ngayan work iiy-iiyang piip ngatharamantan nilan waaꞌar. Niiy work ngatharaman thath-thathaniy-a, an niiy ngul ngaantam-ngeeyān nil piip God.angan kuch ngayang aak iikanakan. 37Nil ngayang thampan waaꞌ-waaꞌan niiyant. Niiy man awal keꞌam ngeeyan nunanga, aꞌ kaaꞌwal keꞌaman thathan nunanga, 38puth niiy wik nungantaman-a, ngangkangan keꞌam piꞌ-piꞌaniy yaꞌa! niiy nanpalan keꞌam ngaantam-ngeeyaniy pam ngay inman nilan kuch niiyantan. 39Niiy lat ngench thayanangan maꞌ-yotam thath-thathaniy a! Niiy ngaantam-ngeey-ngeeyaniy keꞌ lat ngench thayanangan thath-thathaniy-a, niiyan keꞌ man-yetham ngulakam iiyān ey? God.antangan ey? Puth yaꞌa! Niiyan keꞌ ngaantam-ngeeyaniy ey? Than ngayangan keenkanaman waaꞌ-waaꞌin lat ngench thayanangan a! 40Puth niiyan kaangk keꞌ wampān ngathara, niiy yipam ngulakaman wunān piip God.antangan.
41“Ngay keꞌam ngaantam-ngeey-ngeeyangan work inangan iiy-iiyanga pam wanchangan yipam thaaꞌ-kuump-kuumpayn ngayang, yaꞌa. 42Ngay kaniy ngaantam-ngeeyang niiyang, niiy puth keꞌan kaangk wunaniy nungant God.antan, yaꞌa. 43Nil piip ngatharamangan kuch ngayang aak iikanakan, nilam thawar ngay iikanakan ukāng, niiy puth ngayang keꞌam ngangk minangaman uwaniy yaꞌa. Nil pam weeꞌ-nathan nil-nilaman wampiy-a, an niiy ep ey? erkam paththam umang wakin nunang ey? keꞌ kampan niiyantam yimanangana. Niiy puth nganyangan ep umang wakina, nil God.angan ngayang ep kuch. 44Niiy puth niiyantakaman ep thaaꞌ-kuumpwuniya. Niiy puth kaangk keꞌ nil God.angan thaaꞌ-kuumpow niiyang ey? nilan God thonam anman thonakama! Niiy wanttak thayanathwuniya niiy kaangk keꞌ God.an ngangkangan piꞌ-piꞌāna?
45“Niiy keꞌ ngaantam-ngeeyāna yimanangan keꞌ ngay ngulan waaꞌāng niiyang piip ngatharamantana, an yaꞌa! Nil ep Moses.anganiy-a, ngul way waaꞌow niiyangan piip ngatharamantan. Nil Moses.an-a, pam anman niiyan ngaantam-ngeeyaniy nunang keꞌ nil ngulan kaaꞌ-piichanathow niiyang, puth yaꞌa. 46Niiy puth wik nungantam Moses.antaman kan-kanaman ngaantam-ngeeyinwey-a, niiyan puth ngayangan yimanangan min-minam ngaantam-ngeeyin a! puth yaꞌa! Nil puth Moses.angan-a, keenkan-a, nganyangan ump, lat ngench thayanangan waaꞌ-waaꞌ ngayangana. 47Puth niiyaniy-a, wik nungantaman-a, keꞌam wik minam ngaantam-ngeeyaniy, yaꞌa, keꞌ-paal niiy wik ngatharam yimanaman keꞌam min-minam ngaantam-ngeeyaniya, yaꞌ paththam.”
Избрани в момента:
John 5: wimNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 1984, Wycliffe Bible Translators, Inc. All rights reserved.