Matiu 15
15
Iesu Parisi apanawa ita anaana waeuwalala dewau waeuwaleide
(Mak 7.1-13)
1Ema aupe Parisi ita anaana waeuwalala isiwa Ierusalemwae Iesu mampe wimone waitarasane waienase, 2“Dima baiwa e waawo alala no apanamba eiau waeuwau ampuiasaie witapu mai mitamoipe nana naipona, tane di nana nai?” 3Iesu mo wawu gagalowa waieno etene sipoamone wanase, “E epe wailana, tane ne e diaidaledina e God anaanawaida ampuiasaile eueuwa onape os dewamoile apana banlakadisamoilana. E dima baiwa epe dewaitilana?
4God anaanawa bedewe wadi wadiase, ‘E mamaa ita inaa do oniadewasamona,’ ita do wadiase, ‘Mida me mamba ba inawa dabuamodie wakadisamodia, me epapubolepi.’ 5-6God anaanawa epe wade, tane e God anaanawa waeuwakadisaitile apana banlakadisamoilana. Apana da mamba ba inawa oniadewasamopia baiwa nitu da mampe winedia wadedie mamba ba inawa wanepia menasade, tane e waeuwala asiasi meba wadi wadiase, ‘Ne nitu ema mai gombana enalepaa rua, dia, ne God baiwa pulonteapa.’ E apana epe insaisaleidio adiweitile wailanase dima me dewasapia mampe mai God anaanawa aneipapundeipona, dia. E epe dewaitile mampe apana banlakadisamoilano God aiawa eie e waeuwala wawentoi. E dewala sa mampe God aiawa ipasiasailana.
7E lagawaauida! God peroweta Aisaia bukawa bedewe e umanala wandewalene wanase,
8‘Apana ema aiau os mampe ne eunei, tane mo nuau ipa nambeido, mai ne mainawo. 9Mo ne di wadaposinei, mo apanaida anaanau waeuwantoia abo God anaanawa rua.’”
Nitu dainea apana miramirasade?
(Mak 7.14-23)
10Tauma Iesu apana uara sape eneia apamono mampe wimono diamone wanase, “Parisi ita anaana waeuwalala wita mitamita dewawa baiwa nuau pola wade. Tane ema etane ateitana: 11Mai nitu da apana moawe iepe apana miramirasaipona, dia. Tane dima apana nuawa bedewe winedie moawe nosedia, sa ipa apana miramirasade.”
12Mape wawe alala Iesu mampe wimone wane waienase, “E ateiten ba dia, epe waie Parisi apanawa nuau kadisaiana.” 13Me sipoamone wanase, “Nitu anala uduudu dima ne Mamana uboo wandia mai ampona me bowiamopi. 14Parisi apanawa emona, mo muba emau potau tane sosou banlamoi. Apana emawa potawa me sowa emawa potawa banlepia mo nata ampusue don bedewe antopu.”
15Ita Pita wane wanase, “Gagalo babawa ema ipawaida wadewasanea!” 16Iesu mo waitaramone wanase, “E do mai dima ateitipe wanleipona, ba? 17E eweilana, ba dia, dima apana nadio bupa bedewe iedia etepa edie nosedie nambe aleide. 18Tane dima apana nuawe winedie moawe nosedia, sa ipa apana miramirasade. 19Apana nuau bedewe insaisa kadiwa nosedia baiwa mo sosou bomoi, nina dewawa rebareba dewasai, pointoi, lagantoi ita kutuntoi. 20Dewa ema uduudu apana miramirasade, tane mo waia rua apana witapa mitasiawaia nana wadepie napia, sa mai apana miramirasapia rua, dia.”
I dea sumanaiwa debama gagalowa
(Mak 7.24-30)
21Tane Iesu Israel tawowa ene Taire ita Saidon bolau kerakera bedeuwointa alen. 22Sape i dea wisene mukama Iesu apasane wane wanase, “Tatana, Dawid Otopa, nuaparenaitaa! Aleu kadiwa ne anona bedewe wandie dewasadio pokaida etede, mai rua!” Tane i sa mai Israel iwa, me bola Kanaan bedewe wanwanlala.
23Tane Iesu mai i aiawa da sipoasapona, dia. Tauma wawe alala Iesu mampe wimone diane waienase, “I sa waaubewo alepi, me no wambo odedie aia uara wamode.” 24Iesu sipoamone wanase, “Ne Israel apanawa os baibu waaubaneno winen, mo ipa sipsip rebalala ruau waimoi.”
25Tauma i sa Iesu mampelene imimpa emmisilene wanase, “Tatana, saunea!” 26Iesu leusane wanase, “Mai eulepona no seda nanau wadate mo elou wanamoto napu.” 27I leusane wanase, “Tatana, sa ipa ulaipa, tane elo do mambu nana nadia karamba du atowe nosedia nai.” 28Mape Iesu i diene wanase, “Anona, e sumanaia ipa debama! Dima e iririwaitena ideita segalepi.” Iesu epe diedioma me anoopa tauwadea os inalen.
Iesu kerolala uara inamode
29Ema aupe Iesu bola sa ene doa Galili tampeinta aleidie ita wadiwa odene aisidene wain. 30Sape apana uaraia mo sosou kero daitada wadawadalala, mo isiwa tampu bobopa, da emau potau, da etepu kiokiou ita do moau potau banlamone wimone Iesu wawa bumpe teamoieno me inamon. 31Tane apana moau potau inantone gagalontoiena, etepu kiokiou euntoiena, tampu bobopa antoiena ita emau potau sala eweio apana sape eneia ewamone memesantone Israel Godiwa wadaposisaiena.
Iesu apana 4,000 nana wanamode
(Mak 8.1-10)
32Iesu me wawe alala apamono me mampe wimono diamone wanase, “Ne nuana pareleide apana ema baibu, ipawa walama natadea mo ne do lakasanten ita tauma mai nana da wineipona napu. Ne mai menaneipona mo omanaomanaua waaubamopo bolauwobolauwo antompe into emau dubalepi.”
33Wawe alala Iesu diane waienase, “Bola sawanawaida, ambi dauwa ema bedewe bured donsate apana uaraia wanamoto napu?” 34Iesu waitaramone wanase, “E manlawo bured uduudu ambi winei?” Mo sipoasane waienase, “No mainimbo bured 7 ita bouri kerakera nata os winei.”
35Ema aupe Iesu apana diamono dogo osowe aisintone waimoiena. 36Tauma me bured 7 ita bouri do otene God auwasano dialeno ampuialene me wawe alala wanamon, mo apana mampo amonantopuo napua baiwa. 37Mo uduudu nana sa nane pokamon. Tane wawe alala nana moawa eiena posawa 7 aimoieno nope wimon. 38Apana mona wisiawa uduudu 4,000, tane ioto obampu do sape nana naiena mai wisiamopona, dia.
39Apana nana naieno dialeno tauma Iesu mo waaubamono anton ita me waa bedewe odene doa nawene bola Magadaniwa alen.
Избрани в момента:
Matiu 15: soq
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 1996, Wycliffe Bible Translators, Inc. All rights reserved.