Jon 3
3
Iesu Eburu Mi Ne Nikodimas
1Lara laradi laasen teren ne Nikodimas, neni lara atdi luvuttadi amgomgo at leme Judaia la neni lara atnedi libinam tadi at lubung Parisi. 2At lara laxanimin neni ga mu bung ti ne Iesu la ga lok tin, “Rabai. Maklen i do nenu laradi loklox ase, la ne Moroa ga riki u; kopmen tara na epovo xusu na lok nom lempanga sangsangu, mo do ne Moroa noxo lok tooro i.”
3Iesu ga vorang i rin keretna, “A tong tuturun i na ru; do tara noxo lok kaka livipisik amaxat, neni noxo vubeles at Linintoo at ne Moroa.”
4Nikodimas ga sue i, “Naba lok kereva la laradi mukun dina visik amu box i? Neni xopmen na epovo xusu na beles at lavatpaasa at nenen la nenen na visik amu manga i.”
5La ne Iesu ga vorang i rin, “A tong tuturun i na ru; do tara noxo lok kaka lesep susu la noxo lok kaka lorooro maxat boro at Loroonan Kaala, neni noxo beles at Linintoo at ne Moroa. 6La laradi, nenen i visix i at loklok at ne temen mi nenen, neni at na lorooro xopok; ket dola Loroonan Kaala i visik amaxar i, neni i ruuna lorooro maxat at Loroonan Kaala. 7Nemen uta rakdu atla nia a tong i ru do, ‘Una lok ka livipisik amaxat.’ 8Lamanman it mas mu lavavara ren. Ung tonga i, ketla uxoklen i do i laa meva la it mas ua. I lok ngan mun nedi limixin Loroonan Kaala i visik amaxat di.”
9Nikodimas ga sue i, “Naba lok kereva na?”
10Iesu ga vorang i rin, “Kereva, nenu laradi loklox ase silok at leme Israel la nenu xa uxoklen i na? 11A tong tuturun i ru, nema ma paase mi lempanga makleklen i, la ma tong lempanga maga ven i, ketla kopmen tinotno tara atnimi limixin amgomgo, na lok do na siam ka levelinga atnama. 12Nenia ara vaase vam tu mi lempanga at na lavatbung menemen la uxo nuunu at na levelinga rak; uba nuunu at levelinga rak kereva do nia ana paase ru mi lempanga boro vana at laxalibet? 13La kovisi tara goxo urut uto vana at laxalibet, ketla legesa radi mene ga si boro vana at laxalibet la neni nenia, Laradi Mevana.
14Moses ga lox aurut lovoovo sii ro at lamatbin kusu limixin dina ven i la diba roo; la kerepmo nenia, Laradi Mevana, limixin diba lox aurut box ia at laxaba, 15kusu nege do i nuunu rak, neni naba ruuna ka lorooro avolo. 16Moroa ga balamu rinotno limixin axap at na lavatbung menemen, kuren la ni gam taba mi legesa madak mun teren, kusu do nege i nuunu ren, neni noxo seeve, ketla neni naba ruuna ka lorooro avolo. 17Moroa ga riki ne Nitna ude at na lavatbung menemen kopmen do neni na lok li loxokoxo ri limixin. Ketla Moroa ga riki ne Nitna xusu neni Laradi Loklox Arooro ridi.
18Do nege i nuunu at ne Nitna, neni noxo lok kaka loxokoxo; do nege xopmen na nuunu, neni ira sok ka vam loxot tin, mila neni xopmen na nuunu at legesa madak mun at ne Moroa. 19Limixin dinaba lok kaka lumumuat atla, laxasep gara vot pam at lavatbung menemen, la diga lox abulubun i; diga balamu aleng loklok at lubuxumin, mila leveloklok atdi ga lok kapmek. 20Do nege i lok lempanga i lok kapmek, neni i xopara aleng tinotno laxasep la ni noxot pas uto at laxasep, mila neni ixo vara i do mo laxapmek teren na nemen at lasaxaven. 21Ket do nege luruptuvuk teren ik lok at luruturun, neni i nemen at laxasep la kerepmo limixin di ven kisip lorooro ren la diklen i do ne Moroa i nemen eburu min.”
Iesu La Ne Jon
22Melemu at nai Iesu eburu mi luvuttadi loklok ka anasa ren digat pas tangtagap maxeneng at lenep silok Judaia. Ni ga nemen eburu midi go at lentaba leven gaaling, la neni gap sep susu limixin. 23Jon bok gap sep susu limixin to Inon, goxo vaxalom solo boro Salim, mila levendan silok mo ga nemen go. Limixin digat pas parav i la ni gap sep susu nedi. 24Ap mo levenaleng Jon kovisi goxo nemen at loogu xokoxo.
25Lentaba luvuttadi loklok ka anasa at ne Jon eburu mi lara laradi boro Judaia diga etep mi levelinga mumu lususu rik lox adadat laradi at lemeren ne Moroa. 26Kuren la diga vot pasa ne Jon la diga tong mo levelinga rin la diga lok tin keretna, “Rabai. Nenu una doma bilong ti mo laradi ga nemen eburu minu ro auret ladan sen Joridan, laradi nenu ga paase mumu i. Neni mo ip sep susu limixin, la limixin axap mo di mumu asu i.”
27Jon ga vorang i ridi xeretna, “Kopmen teta naba ruuna ka tavanga do ne Moroa noxo raba i min. 28Nemi xa miga ronga mo levelinga nia aga tong i xeretna, ‘Nia xopmen Lanarong, ketla ne Moroa ga riki amgo ia rin.’ 29At loklox epot laradi i lok ka latkin tin, ketla lentangas teren i tu saparav i la ing tonga i; i lok momo xusu ri ronga levelinga ap mo laradi. La kerepmo nia a lok momo la lomomo rak i silok. 30Neni naba silok aleng tia la nia aba lixilik tin.”
Iesu Ga Si Boro Vana At Laxalibet
31La ne Jon ga lok bok, “Do tara na si boro vana at laxalibet, neni i silok aleng tinotno ri limixin axap. Laradi mede xopok, neni at na lavatkangka mun la neni i paase ngan laradi mede at na lavatkangka. Ketla do tara na si boro vana at laxalibet, neni i volo aleng ti limixin axap. 32Neni i paase mi levempanga neni ga ven i la gang tonga i, ketla kopmen teta i siam ka levelinga ren. 33Do tara na siam ka levelinga ren, neni i lox asuusu i do levelinga at ne Moroa i ruturun. 34Mo laradi ne Moroa ga riki i, i paase mi levelinga at ne Moroa mila ne Moroa ga raba axav i mi Loroonan Kaala. 35Moroa i balamu aleng ne Nitna la ira lok li vam levempanga axap maxopok at loklok tatao ren. 36Do nege i nuunu at ne Nitna ne Moroa, neni naba ruuna ka lorooro avolo; la nege do i ronga xepe ne Nitna ne Moroa, neni noxo ruuna ka lorooro avolo la lebelemamao at ne Moroa ik lok mu amisix i.”
Избрани в момента:
Jon 3: mmx
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2011, Wycliffe Bible Translators, Inc. All rights reserved.