Популярни библейски стихове от Kejadian 17

Споделяне

Sun yuma dakuramipane, amenda taru Abramda, keteng tamun weik, 99 tahun nukra wisi konum deipu taruda, Allah er si Yahwehdi Abram er damai yana belepudi, er tep aupu pepu. “Neda Allah Yahweh, akeca-keca yuma talepra, pio deiki tara kunedi, pio Ila Puto Deiyo Ngebo kunune. Kanda, tamna pio gum dipapu, ne upu moupra talememdi, domyakanememyane, mali kuna pio gum, telep-teleppu kunkamrume.

Tonda, nedi kan si tep, yuknge pepra deipkenedi, si punupkukene. Pumun taru di Abram peramkei dinin, ukutaru di dipra, oryankamre taru yumada, kan si tep ‘Abraham,’ penkamkenge. Deiyoda, kandi deipmempa, dadeipdanen kunkameng nesalada, yala pio weik kunkamenga tep, ukupu si Abraham pepkene. (Ibrani upu deikida, Abraham deiyoda, ‘Erdi deiamu nyapsilipdi deiami yala-yalada pio weik kununge’ tenen, penunge).

Aupu pepra deipmaken upuda, ada kan kunkamrem tarupu tep, men pepra deipkene. Ada orketeng tamun, orketeng tamun weike, pio doryankamre keteng tamun neitamai yumada men tapkamne. Nedi pedina upu pepmaken ngeda, pio upu tep pepkene. Nedi kan tep talekenepa, ne si pio eremneremtopu, kandi deipmempa, dadeipdanen kunkameng nesala yala-yala yuma, pio talenepa, sundi ne sipu eremkamnenge. Sun yumadi ne tep, “Nun nai bo Allahda kan pua,” penenengpa, anesala pio talenkamne.

Nedi, ‘Ukupkamkene,’ pepra, pedina upu pepkukenada ake. Ada, nedi melimkenepa, kandi deipmempa, dadeipdanen kunkameng nesalada, tenpu weik yalapu gume. Nesala yala-yala pio weik kunkamenge.

Upepupa, Allahdi tamupra pepu. “Gume, ami Ismael tep men pepkene. Kandi dopmum ner Sarahdi, sal mi tek sisi deipkamkere. Deipkerepa, ami er si tep, Isak penkamrume. Nedi kan tep, ‘Ukupkamkene, ukupkamkene,’ pepmaken upu, pio pedina upuda, kan mi sisa Isak cap, Isakdi deiprepa, dadeipdanen kupkameng nesala tep kupkamne.

Atep, pio tek sisi pepkene. Kanaan mutu yumada, ne karepnepa, kandi deipmempa, dadeipdanen kunkameng nesalada, amutu pio talenkamenge. Nedi kan tep karepkenetopu, karepnepa, sun amenda taru kunkameng nesala peda talenkamenge,” Allahdi Abram tep pepu.

Allahdi Abram tep upepupa, Abrahamdi, ‘Ne nai bo tep gispal dopkun’ tenen, giso genepu dinin, utenepu. ‘Gume, neda keteng tamun denge weik, 100 tahun nukrap wisi konum deipsa tep, ware kuprap di mi deiptene do? Angeda men kuptene,’ tenepudi, teka men tenepka deiki di, er dipru neitamai autupu. Tonda, utenepu. ‘Gume, ne dopsi ner Saraida, keteng tamun denge weik, 90 tahun wisi konum deipka cadi, ware kuprap anerdi mi deiptu do? Mi men deiptue’ tenen, teka men tenepu.

Allahdi upepu dingeda, aupu ton dukdongopra pepu. “Abrahamo, kan ner Sarai tep nengeda, er si Sarai tupa men penkamrume. Ukutaru di dipra oryankamre taru yumada, er si tep Sarah penkamrume. (Ibrani upu deikida, Sarah deiyoda, ila nimi deiyo ngebo, er ner tep perami).

Ada, yuk nesala yumadi, “Gume, Abraham cap, er nyapsilip yuma cap, er tara nesala yuma capda, sun yumadi Allah tep, ‘Ukunkamepe, kandi teneserumtopu kunkamepe,’ pepra, pedina upu konum pepra deipye,” tenepra kael kemkamsenge.

Ukupkameng dinino, nedi pedina upu pepra deipmaken ngeda, aupuda kan mi sisa Isak tep peipmakene. Ada atumi, aware akupmanemtopu, aketeng tamun konum kuprepa, orketeng tamun tenpu ton neitamaida, kan cap, kan ner Sarah cap, kikiman kuprerumpa, sal mi tenpu deipkamrerume.” Allahdi Abraham tep pepu.

Ukupkamrum ngeda ake. Kan yala nengdi derinkameng sal nyapu yumada, dadeipmengepa, tumi ban bari konum kupyopda, sun den bam bol deiki tarange sektapkamenge. Tonda, kan pe nyapsilippu gume. Kan pel melimna nesaladi derinkameng sal nyapu cap, utopu kunkamenge. Tonda, ‘Nun pel donkamseng’ tenen, yuk mutu neng dinin, co bo di kunupra dekarumdi, sun ati derirum neng cap, sundi derinkameng sal nyapu cap, sun den bam bol deiki tarange sektapkamenge. Ukupmumnyopda, sun nong bol deikida, peten kemdina utopu keca kupkamre. Ada, sun pe, yuk mutu nesala peda, den bam bol deiki tarange sekmumnge epmengedi, ‘E, anesala cap, Allah cap pedina upu pedaramidi, pio taledanunge’ tenen, kael kepkamsenge.