Популярни библейски стихове от JOHN 16

Споделяне

Keimah ah hnangam tein nan i dinh khawh nâkhnga hi bia hi nan sinah ka chimmi a si. Vawlei ah hin harnâk nan ton tawn, asinain hnangam tein um u, vawlei cu ka tei cang.”

Asinain Amah, biatak Thlarau, a rak phâk tikah, biatak vialte chungah an kalpi hna lai; Amah nawl in zeihmanh a chim lai lo, a theihmi vialte a chim deuh lai, ara laimi thil tiangin an hngalhter hna lai.

Atu tiangin ka min in zeihmanh nanhal rih lo. Hal u, nan hmuh lai, nan i lomhnâk a tlin nâkhnga.

Asinain biatak kan chim hna. Ka kal nan caah a ṭha; zeitintiah ka kal lo ahcun, Bawmtu nan sinah a ra lai lo, ka kal ahcun nan sinah ka rak thlah lai. Amah a phâk tik, sual kongah siseh, dinnâk kongah siseh, biaceihnâk kongah siseh vawlei hi thiamlo co a si zia a hngalhter lai.

Cucaah atu ah nan ngaih a chia, asinain kan hmuh ṭhân hna lai i nan lungthin â lawm lai, cun nan i lawmhnâk cu ahohmanh nih an in lâkpiak hna lai lo. Cuniah cun nannih nih zeihmanh nanka hal lai lo. Biataktein, biataktein, kan chimh hna, Pa sinah zei pauh nan hal ahcun keimah min in an pêk hna lai.

Biataktein, biataktein, kan chimh hna, nannih ngaihchia in nan ṭap lai, vawlei tu cu â nuam lai, nannih nan ngaih a chia lai, asinain nan ngaihchiatnâk cu lunglomhnâk ah a cang lai.