ଯୀଶୁ ଜକିୟ ଇଞ୍ଜ ହାଚାନ୍

1ଯୀଶୁ ଆରେ ତା ଚେଲାହିର୍ ଯିରିହୋ ସହର୍ ନିପଣ୍ ଆଜି ହାଲ୍‌ଜି ମାଚାନ୍। 2ଯିରିହୋ ସହର୍‌ତାକେ ଜକିୟ ତର୍‍ଦାକାନ୍ ରକାନ୍ ମାନାୟ୍ ମାଚାନ୍। ହେୱାନ୍ ରକାନ୍ ସିସ୍ତୁଏନ୍‌ନି ମୁଡ଼୍‌ଦାକାନ୍ ମାଚାନ୍। ଆରେ ହେୱାନ୍ ବେସି ସାଉକାର୍ ମାଚାନ୍।

3ହେୱାନ୍ ଯୀଶୁଙ୍ଗ୍ ହୁଡ଼୍‌ଦେଙ୍ଗ୍ ଇଚାକିଜି ମାଚାନ୍। ଜକିୟ ଏଚେକ୍ ବୁଟ୍‌କା ମାଚିଲେ ମାନାୟାର୍ ଗଉଲି କାଜିଙ୍ଗ୍ ଯୀଶୁଙ୍ଗ୍ ହୁଡ଼୍‌ଦେଙ୍ଗ୍ ଆଡ୍‌ୱାଦାଙ୍ଗ୍ ମାଚାନ୍। 4ଲାଗିଙ୍ଗ୍ ଇମ୍‌ଣି ହାଜ୍‌ଦିଙ୍ଗ୍ ଯୀଶୁ ୱାନାନା ଇଞ୍ଜି ପୁନ୍‌ଞ୍ଜି ଆଗେ ହାଚାନ୍। ଆରେ ଯୀଶୁଙ୍ଗ୍ ହୁଡ଼୍‌ଦେଙ୍ଗ୍ ହେୱାନ୍ ର ତଗାମାର୍‌ତ ଦୁମ୍‌ତାନ୍।

5ଯୀଶୁ ହେ ତଗାମାର୍‌ ତାରେନ୍ ୱାତାନ୍। ଆରେ ଜପି ହୁଡ଼୍‌ଜି ଜକିୟଙ୍ଗ୍ ୱେଚ୍‌ଚାନ୍, “ଜକିୟ! ବେଗି ତାରେନ୍ ୱା, ଆନେଙ୍ଗ୍ ନେଞ୍ଜେଙ୍ଗ୍ ମିଞ୍ଜ ମାନାଙ୍ଗ୍।” 6ହେବେତାଙ୍ଗ୍ ଜକିୟ ବେଗି ତାରେନ୍ ଜୁତାନ୍। ବେସି ୱାରିତାଙ୍ଗ୍ ଯୀଶୁଙ୍ଗ୍ ତାଞ୍ଜ କୁକ୍‌ତାନ୍। 7ଇଦାଙ୍ଗ୍ ହୁଡ଼୍‌ଜି ୱିଜାକାର୍ ୱେଚ୍‌ପା ୱେଚ୍‌ପି ଆଜି ୱେଚ୍‌ଚାର୍, “ହୁଡ଼ାଟ୍, ଯୀଶୁ ଇନେସ୍ ରକାନ୍ ପାପି ଇଞ୍ଜ ମାଞ୍ଜେଙ୍ଗ୍ ହାଚାନ୍।”

8ଜକିୟ ନିଲ୍‌ଚି ଯୀଶୁଙ୍ଗ୍ ୱେଚ୍‌ଚାନ୍, “ଏ ମାପୃ ଦୟାକିଜି ନା କାତା ୱେନା! ଆନେଙ୍ଗ୍ ପାର୍ମାଣ୍ କିନାଙ୍ଗା ନା ଦନ୍ ସମ୍ଫିତିତାଙ୍ଗ୍ ଅଦା ବାଗ୍ ଗରିବ୍ ମାନାୟାରିଙ୍ଗ୍ ବାଟାକିଜି ହିନାଙ୍ଗ୍। ଆନେଙ୍ଗ୍ ଯଦି ଇନେରିଙ୍ଗ୍ ଟକାଇ କିଜିମାନ୍‌ଗାନାଙ୍ଗ୍, ହେୱାନିଙ୍ଗ୍ ଚାରିଗୁଣ୍ ଦନ୍ ହିନାଙ୍ଗ୍।” 9ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “ନେଞ୍ଜେଙ୍ଗ୍ ଈଶ୍ୱର ନିଙ୍ଗେଙ୍ଗ୍ ଆରେ ନି କୁଟୁମ୍‌ତିଙ୍ଗ୍ ଉଦାର୍ କିତ୍‌ତାନ୍‌ନା। ଇନେସ୍‌କି ଏନେଙ୍ଗ୍ ପା ରକାଇ ଅବ୍ରାହାମ୍‌ ଲାତ୍ରା ନିକାଇ। 10ଆନେଙ୍ଗ୍ ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‌ଣା, ଜାଙ୍ଗ୍‌ତି ମାନାୟାରିଙ୍ଗ୍ ଡେକ୍‌ଚି ହେୱାରିଙ୍ଗ୍ ଉଦାର୍ କିଦେଙ୍ଗ୍ ୱାତାନ୍‌ନା।”

ରାଜା ତା ହଲିଆହିଙ୍ଗ୍ ଡାବୁଙ୍ଗ୍ ହିନି କାତା

(ମାଥି. ୨୫:୧୪-୩୦)

11ଯୀଶୁ ୱେଚ୍‌ଚି ବେଣ୍ ମାନାୟାର୍ ୱେନିହିଙ୍ଗ୍ ଯୀଶୁ ଆରେରଗ କାତା ୱେଚ୍‌ନିଲେକେ କିଜି ୱେଚ୍‌ଚାନ୍, ହେପାଦ୍ନା ଯୀଶୁ ଯିରୁଶାଲାମ ସହର୍ ଲାଗେ-ଲାଗେ ଆଜି ମାଚାନ୍। ହେ ମାନାୟାର୍ ମାନ୍ତ ବାବିକିତାର୍ କି ଈଶ୍ୱର ସାସନ୍ କିନି ରାଜି ବେଗି ୱାନାତ୍। 12ହେଦାଙ୍ଗ୍ କାଜିଙ୍ଗ୍ ମାନାୟାର୍ ଇ କାତାତିଙ୍ଗ୍ ବାବି କିନାକା ଯୀଶୁ ପୁନ୍‌ଞ୍ଜି ହେ ମାନାୟାରିଙ୍ଗ୍ ଇ କାତା ୱେଚ୍‌ଚାନ୍, “ର ମାନାୟ୍ ତା ମାନି ମର୍ଜାଦା ମାନି ମାନାୟ୍ ରାଜା ଆଦେଙ୍ଗ୍ ର ଦେହା ଦେସ୍‌ତ ହାଞ୍ଜେଙ୍ଗ୍ ରନ୍‌ଞ୍ଜି ମାଚାନ୍। ଆରେ ହେବେ ହାଲ୍‌ଜି ରାଜା ପାଦ୍ ପାୟାଆଜି, ତାପାଚେ ହେୱାନ୍ ଲେଉଟା ଆଜି ତା ଦେସ୍‌ତିଙ୍ଗ୍ ସାସନ୍ କିଦେଙ୍ଗ୍ ଉପାୟ୍ କିତାନ୍।

13ହେୱାନ୍ ହାନି ଆଗେ ତା ଦଶ୍‌ଜାଣ୍ ହଲିଆରିଙ୍ଗ୍ କୁକ୍‌ଚି ହେୱାରିଙ୍ଗ୍ ରଞ୍ଜାଙ୍ଗ୍ ଲାକା ହନା ଡାବୁଙ୍ଗ୍ ହିତାନ୍। ଆରେ ହେୱାନ୍ ୱେଚ୍‌ଚାନ୍, ‘ଆନେଙ୍ଗ୍ ୱାନି ପାତେକ୍ ଇ ଡାବୁଙ୍ଗ୍ ଲାହାଙ୍ଗ୍ ବେପାର୍‌ବାଟ୍‌ କିୟାଟ୍।’ 14ମାତର୍ ତା ଦେସ୍ତି ମାନାୟାର୍ ହେୱାନିଙ୍ଗ୍ ଗିଣ୍‌କିଜି ମାଚାର୍। ଆରେ ହେୱାର୍ କେତେକ୍ ଡାଣ୍ଡାସିରିଙ୍ଗ୍ ମହା ରାଜାତାକେ ଇ କାତା ୱେଚ୍‌ଚି ପକ୍ତାର୍। ‘ଇୱାନ୍ ରାଜାଆଜି ମାଙ୍ଗେଙ୍ଗ୍ ସାସନ୍ କିଦେନ୍ ଇଞ୍ଜି ମା ଇଚା ଆକାୟ୍।’ 15ମାତର୍ ହେୱାନ୍ ରାଜା ପାଦ୍ ପାୟାଆଜି ତା ଦେସ୍‌ତ ୱାତାନ୍। ତାପାଚେ ହେୱାନ୍ ୱେଚ୍‌ଚାନ୍, ‘ଆନେଙ୍ଗ୍ ଇମ୍‌ଣି ହଲିଆରିଙ୍ଗ୍ ଡାବୁଙ୍ଗ୍ ହିତାଙ୍ଗ୍‌ନା ହେୱାରିଙ୍ଗ୍ କୁକାଟ୍। ଆନେଙ୍ଗ୍ ପୁଞ୍ଜେଙ୍ଗ୍ ଇଚା କିନାଙ୍ଗା ଆନେଙ୍ଗ୍ ହିତି ଡାବୁଙ୍ଗ୍‌ତାଙ୍ଗ୍ ହେୱାର୍ ଆରେ ଏଚେକ୍ ଲାବ୍ କିତାର୍‌ନା।’

16ହେବେତାଙ୍ଗ୍ ପାର୍ତୁମ୍ ହଲିଆ ରକାନ୍ ୱାଜି ୱେଚ୍‌ଚାନ୍, ‘ଆଜ୍ଞା, ଏନେଙ୍ଗ୍ ରଞ୍ଜାଙ୍ଗ୍ ହିଜି ମାନ୍‌ଞ୍ଚି ହନା ଡାବୁତାଙ୍ଗ୍ ଆନେଙ୍ଗ୍ ଦଶ୍‌ଗଟା ହନା ଡାବୁଙ୍ଗ୍ ଆର୍ଜା ଆତାଙ୍ଗ୍‌ନା।’ 17ରାଜା ହେ ହଲିଆହିଙ୍ଗ୍ ୱେଚ୍‌ଚାନ୍, ‘ବଡ଼ିଆ ଏନେଙ୍ଗ୍ ବେସି ହାର୍ଦି ହଲିଆ, ନିଙ୍ଗେଙ୍ଗ୍ ହିରୁ-ହିରୁ ବିଷୟତାଙ୍ଗ୍ ପାର୍ତି କିୟାଆନାତ୍ ଇଞ୍ଜି ଆନେଙ୍ଗ୍ ପୁନାଙ୍ଗ୍। ଲାଗିଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ନା ଦଶ୍‌ଗଟା ସହର୍ ସାସନ୍ କିଦେଙ୍ଗ୍ ଦାୟିତ୍‌ପ ହିଦ୍‌ନାଙ୍ଗ୍।’

18ଆରେ ରକାନ୍ ହଲିଆ ୱାଜି ୱେଚ୍‌ଚାନ୍, ‘ଆଜ୍ଞା, ଏନେଙ୍ଗ୍ ହିତ୍‌ତି ର ହନା ଡାବୁତାଙ୍ଗ୍ ଆନେଙ୍ଗ୍ ପାଞ୍ଚ୍‌ଗଟା ହନା ଡାବୁଙ୍ଗ୍ ଆର୍ଜା ଆତାଙ୍ଗ୍‌ନା।’ 19ରାଜା ହେ ହଲିଆଙ୍ଗ୍ ୱେଚ୍‌ଚାନ୍, ‘ଏନେଙ୍ଗ୍ ପାଞ୍ଚ୍‌ଗଟା ସହର୍‌ତିଙ୍ଗ୍ ସାସନ୍ କିନାୟ୍।’

20ଆରେ ରକାନ୍ ହଲିଆ ରାଜା ଲାଗାୟ୍ ୱାଜି ୱେଚ୍‌ଚାନ୍, ‘ଆଜ୍ଞା, ଏହେଁ ଏନେଙ୍ଗ୍ ହିତ୍‌ତି ହନା ଡାବୁ ରଞ୍ଜାଙ୍ଗ୍ ଆନେଙ୍ଗ୍ ଇଦାଙ୍ଗ୍‌ତିଙ୍ଗ୍ ଗାର୍‌ଣ୍ଡାତାକେ ହୁର୍‌ପିସ୍ ଡ଼ୁକ୍‌ଚି ମାଚାଙ୍ଗ୍। 21ଏନେଙ୍ଗ୍ ରକାୟ୍ ମଡ଼ିତି ଲାଗିଙ୍ଗ୍ ଆନେଙ୍ଗ୍ ପାଣ୍ଡ୍ରାଆଜି ଇଡ଼୍‌ଜି ମାଚାଙ୍ଗ୍। ଏନେଙ୍ଗ୍ ଡାବୁଙ୍ଗ୍ ହିଜି ମାନୁୟ୍ ମାତର୍ ଲାବ୍ ଏନ୍‌ଚି ମାନାୟ୍। ଏନେଙ୍ଗ୍ ତାସ୍ ୱିତ୍‌ୱାଦାଙ୍ଗ୍ ମାନ୍‌ଗାନାଇ ମାତର୍ ତେଜ୍‌ଦେଙ୍ଗ୍ ହାଲ୍‌ଜି ମାନାୟ୍।’

22ତାପାଚେ ରାଜା ହେ ହଲିଆଙ୍ଗ୍ ୱେଚ୍‌ଚାନ୍, ‘ଏନେଙ୍ଗ୍ ରକାୟ୍ ବାନ୍ୟା ହଲିଆ, ଏନେଙ୍ଗ୍ ୱେଚ୍‌ଚିତି କାତାତାଙ୍ଗ୍ ନେ ନିଙ୍ଗେଙ୍ଗ୍ ବିଚାର୍ କିଦ୍‌ନାଙ୍ଗ୍। ଏନେଙ୍ଗ୍ ୱେଚ୍‌ଚାତାଇ ନାଙ୍ଗେଙ୍ଗ୍ ଇଞ୍ଜି। ଆରେ ଏନେଙ୍ଗ୍ ନାଙ୍ଗେଙ୍ଗ୍ ୱେଚ୍‌ଚାତାଇ ଏନେଙ୍ଗ୍ ଡାବୁଙ୍ଗ୍ ହିଜି ମାନୁୟ୍ ମାତର୍ ଲାବ୍ ଏନ୍‌ଚି ମାନାୟ୍। ଏନେଙ୍ଗ୍ ତାସ୍ ୱିତ୍‌ୱାଦାଙ୍ଗ୍ ମାନ୍‌ଗାନାଇ ମାତର୍ ତେଜ୍‌ଦେଙ୍ଗ୍ ହାଲ୍‌ଜି ମାନାୟ୍। 23ଲାଗିଙ୍ଗ୍ ଏନେଙ୍ଗ୍ ନା ଡାବୁଙ୍ଗ୍ ଇନା କିଦେଙ୍ଗ୍ ବେଙ୍କ୍‌ତାକେ ଇଟ୍‌ୱାତାଇ? ଏଲେଙ୍ଗ୍ କିତିସ୍ ଆନେଙ୍ଗ୍ ଇଞ୍ଜ ୱାତି ପାଚେ ନା କାନ୍ତାର୍ ହୁଦାଙ୍ଗ୍ ଡାବୁଙ୍ଗ୍ ନାଙ୍ଗେଙ୍ଗ୍ ଗାଟାଆତିକ୍‌ମା।’

24ତାପାଚେ ହେବେ ମାନି ମାନାୟାରିଙ୍ଗ୍ ରାଜା ୱେଚ୍‌ଚାନ୍, ‘ଇ ହଲିଆତାଙ୍ଗ୍ ଡାବୁଙ୍ଗ୍ ଅଜି ଦଶ୍‌ଗଟା ହନା ଡାବୁଙ୍ଗ୍ ଆର୍ଜା ଆତି ହଲିଆଙ୍ଗ୍ ହିୟାଟ୍।’ 25ମାନାୟାର୍ ରାଜାଙ୍ଗ୍ ୱେଚ୍‌ଚାର୍, ‘ମାତର୍ ଆଜ୍ଞା, ହେ ହଲିଆତାକେ ଆଗେତାଙ୍ଗ୍ ପା ଦଶ୍‌ଗଟା ହନା ଡାବୁଙ୍ଗ୍ ମାନିକ୍।’

26ରାଜା ହେୱାରିଙ୍ଗ୍ ୱେଚ୍‌ଚାନ୍, ‘ଯଦି ଇମ୍‌ଣାକାର୍ ନା ହିକ୍ଷାତିଙ୍ଗ୍ ବୁଜା ଆଦେଙ୍ଗ୍ ଇଚାକିନାର୍, ଈଶ୍ୱର ହେୱାନିଙ୍ଗ୍ ଆଦିକ୍ ବୁଜା ଆଦେଙ୍ଗ୍ ହିନାନ୍। ମାତର୍ ଇମ୍‌ଣାକାର୍ ନା ହିକ୍ଷାତିଙ୍ଗ୍ ପୁଞ୍ଜେଙ୍ଗ୍ ମାନ୍‍କିଉର୍। ହେୱାନ୍‌ତାଙ୍ଗ୍ ହେ ପୁଚାକା ପା ଈଶ୍ୱର କିସ୍ତି ଅନାନ୍। 27ଆରେ ଇମ୍‌ଣାକାର୍ ନାଙ୍ଗେଙ୍ଗ୍ ରାଜା ଆଦେଙ୍ଗ୍ ମୁନା କିଜି ମାନ୍‌ଞ୍ଚି ଶାତ୍ରୁରିଙ୍ଗ୍ ନା ଲାଗାୟ୍ ତାସିୱାଡ। ଆରେ ନା ମୁମ୍‌ଦ ହେୱାରିଙ୍ଗ୍ ମାର୍ନେ ଅହାଟ୍।’ ”

ଯୀଶୁ ରାଜା ଲେକେ ଆଜି ଯିରୁଶାଲାମ ସହର୍‌ତାକେ ହାଚାନ୍

(ମାଥି. ୨୧:୧-୧୧; ମାର୍କ. ୧୧:୧-୧୧; ଯୋହନ. ୧୨:୧୨-୧୯)

28ଯୀଶୁ ଇୱିଜୁ ୱେଚ୍‌ଚି ୱିସ୍ତି ପାଚେ ଯିରୁଶାଲାମ ସହର୍‌ତାକେ ତା ଚେଲାହିର୍ ହୁଦାଙ୍ଗ୍ ହାଚାର୍।

29ଆରେ ଏଚେକାଡ଼୍‌ଦ ଯୀଶୁ ଆରେ ତା ଚେଲାହିର୍ ଜିତ୍‌ମାର୍‌ ମାନି ମାଡ଼ି ଲାଗେନି ବେଥ୍‍ଫାଗି ଆରେ ବେଥନିଆ ନାସ୍ ଏକାତାର୍। ଆରେ ହେପାଦ୍ନା ଯିରୁଶାଲାମ ସହର୍ ଏକିନିହିଙ୍ଗ୍, ଯୀଶୁ ଜାର୍ ଚେଲାହିର୍ ବିତ୍ରେତାଙ୍ଗ୍ ରିୟାରିଙ୍ଗ୍ କୁକ୍‌ଚି ଇବେଣ୍ ୱେଚ୍‌ଚି ପକ୍ତାନ୍। 30“ମି ଆଗେ ମାନି ନାସ୍‌କୁକାଙ୍ଗ୍ ହାଲାଟ୍। ଆରେ ହେନାସ୍ ଏକିନିହିଙ୍ଗ୍, ର ଗଦହିମ୍‌ଣା ଗାଚ୍‌ଚାକା ହୁଡ଼୍‌ନାଦେର୍ ହେ ଗଦହିମ୍‌ଣା ରିକ୍‍ଚି ତାଡ, ହେ ଗଦଜପି ଇନେର୍ ପା ଦୁମ୍‌ୱାଦାଙ୍ଗ୍ ମାନାର୍। 31ଆରେ ଇନା କିଦେଙ୍ଗ୍ ରିକ୍‌ନାଦେରା ଇଞ୍ଜି ଇନେର୍ ପା ୱେନ୍‌ବା ଆଦ୍‌ନାର୍, ଲାଗିଙ୍ଗ୍ ତାଙ୍ଗେଙ୍ଗ୍ ୱେଚ୍‌ନାଦେର୍, ‘ଇୱାଙ୍ଗ୍‌ ମା ଯୀଶୁ ମାପୃଙ୍ଗ୍ ଦରକାର୍ ମାନାତ୍।’ ”

32ହେବେତାଙ୍ଗ୍ ପକ୍‌ଚିମାଚି ଚେଲାହିର୍ ରବେ ଆତାର୍, ଯୀଶୁ ହେୱାରିଙ୍ଗ୍ ଇନେସ୍ ଲେକେ ୱେଚ୍‌ଚି ମାଚାନ୍, ହେଲେକେ ହୁଡ଼୍‌ତାର୍। 33ଆରେ ହେୱାର୍ ଗଦହିମ୍‌ଣାତିଙ୍ଗ୍ ରିକ୍‌ନିହିଙ୍ଗ୍ ଗଦ ମାଲିକ୍ ହେୱାରିଙ୍ଗ୍ ୱେନ୍‌ବାତାନ୍, “ଏପେଙ୍ଗ୍ ଇନା କିଦେଙ୍ଗ୍ ଗଦହିମ୍‌ଣାତିଙ୍ଗ୍ ରିକ୍‌କାନାଦେରା?” 34ଯୀଶୁ ଇନେସ୍ ଲେକେ ୱେଚ୍‌ଚି ମାଚାନ୍, ହେୱାର୍ ପା ହେ ଲେକେ ୱେଚ୍‌ଚାର୍, “ଇଦାଙ୍ଗ୍ ମା ଯୀଶୁ ମାପୃଙ୍ଗ୍ ଦର୍‌କାର୍ ମାନାତ୍।” 35ତାପାଚେ ଚେଲାହିର୍ ଗଦତିଙ୍ଗ୍ ଯୀଶୁ ଲାଗାୟ୍ ତାସିୱାତାର୍। ହେୱାର୍ ହେ ଗଦଜପି ଜାର୍-ଜାର୍ ହେନ୍ଦ୍ରାଙ୍ଗ୍ ପାସ୍ତାର୍। ତାପାଚେ ହେୱାର୍ ଗଦଜପି ଯୀଶୁଙ୍ଗ୍ କୁଚିକିତାର୍। 36ଆରେ ଯୀଶୁ ଗଦଜପି ଦୁମ୍‌ଜି ଯିରୁଶାଲାମ ସହର୍ ନିପଣ୍ ହାନିହିଙ୍ଗ୍ ମାନାୟାର୍ ହାଜ୍‌ଦ ଜାର୍-ଜାର୍ ହେନ୍ଦ୍ରାଙ୍ଗ୍ ପାସ୍ତି ହିତାର୍।

37ଯୀଶୁ ଯିରୁଶାଲାମ ସହର୍ ପାକାପାକି ଆତିହିଙ୍ଗ୍, ହେୱାନ୍ ଜିତ୍‌ମାର୍‌ ମାନି ମାଡ଼ିନି ଗାଡ଼୍‌ଗାଡ଼ା ଲାଗାୟ୍ ଏକାତାର୍। ଯୀଶୁ କିତି ଚାନିଆ କାମାୟ୍ ହୁଡ଼୍‌ଜି ତା ଚେଲାହିର୍ ବେସି ୱାରି ଆତାର୍। ଆରେ ଗାଜାକାଟ୍ କିନି ଈଶ୍ୱରତିଙ୍ଗ୍ ଜୟ୍-ଜୟ୍ କିଦେଙ୍ଗ୍ ଲାଗାତାର୍। 38“ଇମ୍‌ଣି ରାଜା ମାପୃ ତର୍‍ଦାଙ୍ଗ୍ ୱାନାନା, ହେୱାନିଙ୍ଗ୍ ଈଶ୍ୱର ଆଶ୍ରିବାଦ୍ କିୟେନ୍, ସରଗ୍‌ତାକେ ଶାନ୍ତି ଆରେ ୱିଜୁ ଈଶ୍ୱରତାଙ୍ଗ୍ ଗାଜା ଈଶ୍ୱରତିଙ୍ଗ୍ ଜୟ୍-ଜୟ୍ ଆୟେତ୍।”

39ହେବେତାଙ୍ଗ୍ ମାନାୟ୍ ଗଉଲି ବିତ୍ରେ ମାନି ପାରୁସିଦଳ୍‍ ଯୀଶୁଙ୍ଗ୍ ୱେଚ୍‌ଚାର୍, “ଗୁରୁ, ମି ଚେଲାରିଙ୍ଗ୍ ଚିମ୍ରା ଆଦେଙ୍ଗ୍ ଆଦେସ୍ ହିୟା।” 40ମାତର୍ ଯୀଶୁ ୱେଚ୍‌ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍‌ଚାନାଙ୍ଗା, ଯଦି ନା ଚେଲାର୍ ଇ ୱିଜୁବେଣ୍ ୱେଚ୍‌ଚିୱିତିସ୍। କାଲ୍‌କୁ ନାଙ୍ଗେଙ୍ଗ୍ ଜୟ୍-ଜୟ୍ କିଦେଙ୍ଗ୍ ଲାଗ୍‌ଦିନିକ୍‌।”

ଯିରୁଶାଲାମ ସହର୍‌ନି ମାନାୟାର୍ କାଜିଙ୍ଗ୍ ଯୀଶୁ ଆଡ଼୍‌ବାତାନ୍

41ଯୀଶୁ ଯିରୁଶାଲାମ ସହର୍ ଲାଗାୟ୍ ଏକାତାନ୍। ହେପାଦ୍ନା ଯୀଶୁ ଯିରୁଶାଲାମ ସହର୍‌ନି ମାନାୟାର୍ କାଜିଙ୍ଗ୍ ଆଡ଼୍‌ବାତାନ୍। 42ଆରେ ମାନାୟାରିଙ୍ଗ୍ ୱେଚ୍‌ଚାନ୍, “ଯଦି ଏପେଙ୍ଗ୍ ନେଞ୍ଜେଙ୍ଗ୍ ଈଶ୍ୱର ହୁଦାଙ୍ଗ୍ ମେହାଆନି ଶାନ୍ତିନି ବିଷୟ ପୁଚାଦେର୍‌ମା କି! ମାତର୍ ଏପେଙ୍ଗ୍ ଈଶ୍ୱରନି ଶାନ୍ତି ବିଷୟରେ ପୁଞ୍ଜେଙ୍ଗ୍ ଆଡୁଦେରା।

43ହେଦାଙ୍ଗ୍ କାଜିଙ୍ଗ୍ ମି ଲାଗାୟ୍ ଦୁକ୍‌ନି ଦିନ୍ ୱାନାତ୍। ମି ଶାତ୍ରୁର୍ ମି ଚାରିବେଣ୍‌ତାଙ୍ଗ୍ ର କାତି ରହ୍‌ନାର୍। ଆରେ ମି ସହର୍‌ତିଙ୍ଗ୍ ଯୁଦ୍ କିଦେଙ୍ଗ୍ ଚାରିବେଣ୍‌ତାଙ୍ଗ୍ ରୁଣ୍ଡା ଆନାର୍। 44ମି ଶତ୍ରୁର୍‌ ମିଙ୍ଗେଙ୍ଗ୍ ପୁରା ନଷ୍ଟ କିଦ୍‌ନାର୍। ମି ସହର୍‌ତାକେ ମାନି ୱିଜାକାରିଙ୍ଗ୍ ମାର୍ନେ ଅହ୍‌ନାର୍। ଆରେ ମି ଇଲ୍‌ଗାଣ୍‌ତିଙ୍ଗ୍ ବାଡ଼୍‌ହାଇ କିଜି ନଷ୍ଟ କିନାର୍। ଇନେସ୍‌କି ଈଶ୍ୱର ମିଙ୍ଗେଙ୍ଗ୍ ରକ୍ଷା କିଦ୍‌ଦେଙ୍ଗ୍ ୱାଜିମାଚି ସମୟତିଙ୍ଗ୍ ପୁନ୍‌ୱାତାଦେର୍‌।”

ଯୀଶୁ ଯିରୁଶାଲାମ ମନ୍ଦିର୍‌ ପିଣ୍ଡାତାକେ ବେପାର୍‌ବାଟ୍‌ କିନାକାରିଙ୍ଗ୍ ହପ୍ତାନ୍‌

(ମାଥି. ୨୧:୧୨-୧୭; ମାର୍କ. ୧୧:୧୫-୧୯; ଯୋହନ. ୨:୧୩-୨୨)

45ତାପାଚେ ଯୀଶୁ ଯିରୁଶାଲାମନି ଈଶ୍ୱର ମାନି ମନ୍ଦିର୍‌ତାକେ ହାଚାନ୍। କେତେକ୍ ଜିନିଷ୍ ବେପାର୍‌ବାଟ୍‌ କିନାକାରିଙ୍ଗ୍ ଯୀଶୁ ହପ୍ତେଙ୍ଗ୍ ଲାଗାତାନ୍। 46ଆରେ ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଇଦାଙ୍ଗ୍ ସାସ୍ତର୍‌ତାକେ ଲେକା ମାନାତ୍, ‘ଈଶ୍ୱର ମାନି ମନ୍ଦିର୍‌ତିଙ୍ଗ୍ ୱିଜୁଜାତିର୍ ମାନାୟ୍ କାଜିଙ୍ଗ୍ ର ପାର୍ତାନା ଇଲ୍ ଆନାତ୍‌।’ ମାତର୍ ଏପେଙ୍ଗ୍ ହେଦାଙ୍ଗ୍ ଡାକୁର୍ ମାନି ବାହାଲେକେ କିତାଦେର୍‌ନା।”

47ଯୀଶୁ ୱିଜୁଦିନ୍ ଈଶ୍ୱର ମାନି ମନ୍ଦିର୍‌ନି ପିଣ୍ଡାତାକେ ହିକ୍ଷାହିଜି ମାଚାନ୍। ହେପାଦ୍ନା ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍, ଆରେ ପଣ୍ଡିତାର୍ ଆରେ ନାୟକାର୍ ମାନାୟାର୍ ହୁଦାଙ୍ଗ୍ ମାହାଆଜି ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିଜି ମାଚାର୍। 48ମାତର୍ ହେୱାର୍ ହେୱାନିଙ୍ଗ୍ ଆସ୍ତେଙ୍ଗ୍ ସୁଯଗ୍ ଗାଟାଆୱାଦାଙ୍ଗ୍ ମାଚାର୍। ଇନେସ୍‌କି ୱିଜାକାର୍ ଯୀଶୁ ହିକ୍ଷାତିଙ୍ଗ୍ ହେବେ ମାନି ମାନାୟାର୍ ମାନ୍‌ଦ୍ଯାନ୍ କିଜି ୱେନ୍‌ଞ୍ଜି ମାଚାର୍।

Слушайте ଲୁକ 19