If you have would like a copy of this version please contact info@davaraudiobibles.org

Inner Seraji New Testament, CC-BY-SA-4.0, The Love Fellowship (Text). Inner Seraji New Testament Audio Bible, CC-BY-SA-4.0, Davar Partners International, The Love Fellowship, 2022 (Audio).

Inner Seraji New Testament

Inner Seraji 2017 BI (NT) NonDrama

Inner Seraji 2017 BI (NT) Drama

Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.

पर यीशु जैतूना रे पहाडा पैंदा बे नाठअ। बयाल्के सह भी देहुरे बे आउअ; सभे लोका तेऊ सेटा आऊए होर बेशी करे तयाबे उपदेशा दींदअ लागअ। तेबा शास्त्री होर फरीसी एक बेटड़ी आणी जोह ब्यभिचारा में ढाकी दी थी, होर सह मंझे खड़ी करी करे यीशु का बोलू, हे गुरु, यह बेटड़ी ब्यभिचारा मे ढाकी दी साहा। व्यवस्था में मूसा हामा बे आज्ञा दिंनी कि एह्डी बेटड़ी पैंदे पथराब करे। पर तूह ऐसा बेटड़ी रे बारे में कैह बोला? त्याहे तेऊ परेखणे बे यह गल बोली कि तेऊ पेंदे दोषा लाऊणे बे कोई गल बणे। पर यीशु झुकी करे गुठी संघे धरती री जमीना पेंदे लिखतअ लागअ। जेबा त्या तेऊका पूछते ही रही, तेबा तेऊ सीधे होई करे तयाबे बोलू, तमामें जोह निष्पाप साहा, सहे पहिले तेसाबे पाथरे बाहे। होर तेहुकी झुकी करे धरती जमीना पैंदे गुठी करे लिखतअ लागअ। पर त्या यह शूणी करे बजुर्गा का होछे तक, एक-एक करी करे बागे निकतए, होर यीशु केलह रहू, होर बेटड़ी तखी मेंझे खड़ी रही। यीशु सीधे होई करे तेसाबे बोलू, हे बेटड़ी, त्या कई नाठे? कैह कोही भी ताहबे दण्डा री आज्ञा नांई दिंनी? तेसा बे बोलू, हे प्रभु, कोही नांई। यीशु बोलू, हाऊं भी ताहबे दण्डा री आज्ञा नांई दींदअ; नाह, होर भीआक पाप नांई करे।

यीशु भी लोका बे बोलू, संसारा री ज्योति हाऊं साहा; जोह माँह पीछे होलअ सह नयारे में जिंदगी नांई हाडणा, पर जीबना री ज्योति पाऊणी। फरीसी तेऊबै बोलू, तूह आपणी गुआही आपे दिंदा, तेरी गुआही ठीक नांई आँधी। यीशु तयाबे उतर दिना, भले ही आपणी गुआही आपे दींदाआ होलअ, पर तेबा भी मेरी गुआही ठीक साहा, किबेकि हाऊं जाणा कि हाऊं कंधा का आउअ दअ साहा होर कंधा बे नाहंदा? पर तमे ज़ाणदा कि हाऊं कंधा का ईहंदा या कंधा बे नाहंदा। तमे शरीरा रे साबे न्याय करा; हाऊं कासी रा न्याय नाँई करदअ। होर अगर हाऊं न्याय करे भी, मेरा न्याय सच्चा साहा; किबेकी हाऊं केलह, पर हाऊं साहा, होर बापू साहा जूणी हाऊं भेजु। थारी व्यवस्था में भी लिखुदा साहा कि दुई री गुआही मिली करे ठीक हुँदा; एक तअ हाऊं आपणी गुआही आपे दिंदाआ, होर दूजी गुआही बापू मेरी दिंदाआ जूणी हाऊं भेजु। त्याहे तेऊबै बोलू, तेरअ बापू कई साहा। यीशु उतर दिंना, नाह तमे माँह ज़ाणदे, नाह मेर बापू, अगर माँह ज़ाणदे तेबा मेरे बापू भी ज़ाणदा। या गला तेऊ देहुरे में उपदेशा दींदे भण्डारा रे घरे बोली, होर सह कोही नांई ढाकु किबेकी तेऊरा वक्त ऐबरे तणी नांई आउआ थी।

तेऊ भी तयाबे बोलू, हाऊं नाहूँ, होर तमा हाऊं लोढ़नअं होर आपणे पापा में मरने; ज़खे हाऊं नाहंदा, तखे तमे नांई इच्छी सकते। ऐता पेंदे यहूदी बोलू, कैह तेऊ मरना, जोह बोला, ज़खे हाऊं नाहंदा तखे तमे इच्छी नांई सकते? तेऊ तयाबे बोलू, तमे उंधले साहा, हाऊं उझलअ सरगा रअ साहा; तमे संसारा रे साहा, हाऊं संसारा रअ नांई। एतकि तणी मांई तमाबे बोलू कि तमे आपणे पापा में मरने, किबेकि तमा बुशाह करना कि हाऊं सह साहा तेबा आपणे पापा में मरने। त्याहे तेऊबै बोलू, तूह कुणह साहा? यीशु त्याहबे बोलू, सहे साहा जोह तमाबे पहिले का बोलदअ आउअद। थारे बारे में महा बहू कुछ बोलना होर न्याय करणा; पर मेरअ भेज़ण आलअ सचअ साहा, होर जोह मांई तेऊका शूणु तेहू संसारा में बोला। त्या यह समझी कि हामा बे बापू रे बारे में बोला। तेबा यीशु बोलू, जेबा तमे मणशा रे शोहरू उछटे पेंदे चढ़ाउले, तेबा ज़ाणले कि हाऊं सह साहा; हाऊं आपणे आपा का किछे नांई करदअ पर जेड़ा मेरे बापू माँह बे सिखाऊ तेडी ही याह गला करा। मेरे भेजणअ आलअ मांई संघे साहा; तेऊ हाऊं केलह नांई छाडण किबेकि हाऊं सदा सह काम करा जासू संघे सह खुश हुंदा। सह याह गला करदअ ही लागअ थी, कि बहू कै तेऊ पेंदे बुशाह करू।

तेबा यीशु त्या यहूदी बे जूणी तेऊ पेंदे बुशाह करू, बोलू, अगर तमे मेरे बचना में बणी रहले, तेबा सची मेरे चेले रहंणे। तमा सच ज़ाणना, होर सचाई ही तमे आज़ाद करने। त्याहे तेऊबै उतर दिना, हामें तअ अब्राहमा रे बंशा का साहा, होर कधी भी कासी रे सेबक नांई होई। तेबा तूह केह बोला कि तमे आज़ाद हूँणे? यीशु तयाबे उतर दिना, हाऊं तमाबे सच-सच बोला कि जोह कोई पाप करा सह पापा रअ नोकर साहा। नोकर सदा घरे नांई रहंदअ; शोहरू सदा रहंदा। ऐतकी तणी अगर शोहरू तमा आज़ाद करलअ, तेबा सची तमे आज़ाद हूँणे। हाऊं जाणा कि तमें अब्राहमा रे बंशा का साहा; तेबा भी मेरअ बचन थारे मना में जागा नांई पाऊंदअ, ऐतकी तणी तमे महा मारना चाहंदा। हाऊं सह बोला, जोह आपणे बापू रे अखे हेरा; होर तमे सहे करदे रहंदा जोह तमे आपणे बापू का शूणुदा साहा। त्याहे तेऊबै उतर दिना, माह रअ बापू अब्राहम साहा। यीशु तयाबे बोलू, अगर तमे अब्राहमा रे शोहरू हूँदे, तेबा अब्राहमा रे बराबर कामा करदे । पर ऐबा तमे महा साही मणशा मारना चाहंदा, जूणी तमाबे सह सचअ बचन खोजू जोह परमेश्वरा का शूणु; ऐढ़ा तअ अब्राहमे करू। तमे आपणे बापू रे बराबर काम करा। त्याहे तेऊबै बोलू, हामें ब्यभिचारा का नांई ज़न्मी, माह रअ एक बापू साहा मतलब परमेश्वर। यीशु तयाबे बोलू, अगर परमेश्वर थारअ बापू हूँदअ, तेबा तमे मांई संघे प्रेम ढाहंदे ; किबेकि हाऊं परमेश्वर री तरफा का आउअद साहा। हाऊं आपे नांई आउअ, पर तेऊ हाऊं भेजुदअ साहा। तमे मेरी गला किबे नांई समझदे ? ऐतकी तणी कि तमे मेरा बचन शूणी सकते। तमे आपणे बापू शैताना का साहा होर आपणे बापू री लालसा पूरी करणा चाहंदा। सह तअ पहिले का हत्या करन आलअ साहा होर सत्य पेंदे स्थिर नांई रहू, किबेकि सत्य तेऊमें साहा ही नांई। जेबा सह झुठ बोला; तेबा सह आपणे स्बभावा का ही बोला; किबेकि सह झुठअ साहा पर झुठा रअ बापू साहा। पर हाऊं जोह सच बोला, याह री तणी तमें मेरा बुशाह नांई करदे। तमा में का महा कूण महा पापी समझा? अगर हाऊं सच बोला, तेबा तमे मेरा बुशाह किबे नांई करदे? जोह परमेश्वरा का हुँदा, सह परमेश्वरा री गला शूणा; होर तमे ऐतकी तणी शूणदे कि परमेश्वरा री तरफा का नांई हो।

यह शूणी करे यहूदी तेऊबै बोलू, कैह हामें ठीक बोलदे कि तूह सामरी साहा, होर ताह में दुष्टात्मा साहा? यीशु उतर दिना, महा में दुष्टात्मा नांई; पर हाऊं आपणे बापू रा आदर करा, होर तमे मेरा अनादर करा। पर हाऊं आपणी आदर नांई चाँहंदअ; उओह, एक साहा जोह चाहंदा होर न्याय करा। हाऊं तमाबे सच-सच बोला कि अगर कोई मणश मेरे बचना पेंदे चले, तेबा अनन्त काला तणी मऊत नांई हेरणी। यहूदिये तेऊबै बोलू, ऐबा हामें ज़ाणु कि ताह में दुष्टात्मा साहा। अब्राहम मुंअ, होर भविष्यद्वक्ता भी मुएं; होर तूह बोला, अगर कोई मेरे बचना पेंदे चले तेबा अनन्त काला तणी मऊती रा सुआद नांई चाखणा। माह रअ बापू अब्राहम तअ मुअं। कैह तूह तेऊका बढ़अ साहा? होर भविष्यद्वक्ता भी मुअं। तूह आपणे आपा बे कैह समझा? यीशु तेता मे बोलू, अगर हाऊं आपणी महिमा आपे करे, तेबा मेरी महिमा किछे नांई, पर मेरी महिमा करने आलअ मेरअ बापू साहा जासूबे तमे बोला कि सह थारअ परमेश्वर साहा। तमे तअ सह नांई ज़ाणु पर हाऊं तेऊ जाणा। अगर हाऊं बोले कि हाऊं तेऊ ज़ाणदअ, तेबा हाऊं तमा साही झूठअ हूंणअ; पर हाऊं तेऊ जाणा होर तेऊरे बचना में चला। थारअ बापू अब्राहम मेरी धियाड़ी भालणे री आशा में मगन थी, होर तेऊ हेरू होर खुश होऊ। यहूदी तेऊबै बोलू, ऐबरे तणी तूह पज़ाह साला रअ नांई होऊ, तेबा भी ताँईं अब्राहम हेरू दअ? यीशु तयाबे बोलू, हाऊं तमाबे सच-सच बोला, कि ऐतका का पहिले अब्राहम होऊ, सह हाऊं साहा। तेबा त्याह तेऊ बाहणे बे पाथर चुआकी, पर यीशु तखा का गोझी करे देहुरे का निकदअ।

Слушайте यूहन्ना 8