If you have would like a copy of this version please contact info@davaraudiobibles.org

Inner Seraji New Testament, CC-BY-SA-4.0, The Love Fellowship (Text). Inner Seraji New Testament Audio Bible, CC-BY-SA-4.0, Davar Partners International, The Love Fellowship, 2022 (Audio).

Inner Seraji New Testament

Inner Seraji 2017 BI (NT) NonDrama

Inner Seraji 2017 BI (NT) Drama

Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.

आदि में बचन थी, होर बचन परमेश्वरे संघे थी, होर बचन परमेश्वर थी। यहे आदि में परमेश्वरे संघे थी। सभे सा तेऊरे साबे ज़न्मु, होर जोह कुछ भी ज़न्मु तेता में कोहे भी चीझ तेऊरे बिना नांई ज़न्मी। तेता में जीबन थी, होर सह जीबन मणशा री ज्योति थी। ज्योति निहारे में चमकता थी, होर निहारे सह ग्रहण नांई करी एक मणश परमेश्वरा री तरफा का हाजर होऊ जासका ना यूहन्ना थी, सह गुआही दींदअ आउअ की ज्योति री गुआही दे, कि सभे तेऊरे दूआरा बुशाह करे। पर आपु सह ज्योति नांई, पर तेसा ज्योति री गुआही दींदअ आउअद थी। सच्ची ज्योति जोह हर एकु मणशा वे प्रकाशित करा, संसारा में ईहंण आली थी। सह संसारा में, होर जगत तेऊरे साबे पैदा होऊ होर जगते सह नांई पछेणू। सह आपणे घरे आउअ होर सह तेऊरे आपणे नांई मनु। पर जेतरे सह ग्रहण करू, तेऊए तयाबे परमेश्वरा रे शोहरू हूंणे रा अधिकार दिंना किबेकि त्याहे जोह तेऊरे ना पेंदे बुशाह डाहंदा। सह नांई तअ लोहू का, नांई तअ शरीरा री इच्छा का, नांई मणशा री इच्छा का, पर परमेश्वरा का पैदा होई दे साहा। होर बचन शरीरा मे देहधारी होऊ; होर अनुग्रह होर सच्चाई का परिपूर्ण होई करे हामा मेंझे डेरा करू हामे तेऊरी एडी महिमा हेरी, जेडे बापू रे एकी शोहरू री महिमा। यूहन्ना तेऊरे बारे में गुआही दिंनी, होर पुकारी करे बोलू, यह साहा, जासू की मांई गला करी जोह महा बाद ईहंण आल़अ साहा, सह महा का बढ़ी करे साहा किबेकि सह महा का पहिलअ थी। किबेकि तेऊरी परिपूर्णता मेज़ा का हामे सभी प्राप्त करू अनुग्रहा पेंदे अनुग्रह भेटा। एतकि तणी की व्यवस्था मूसा रे साबे दिंनी, पर अनुग्रह होर सच्चाई यीशु मसीहा रे साबे पूजी। परमेश्वर कोही भी नांई कधी भी नांई हेरु, एक शोहरू जोह बापू री कुंभड़ी साहा तेहुए सह प्रकट करू।


यूहन्ना री गुआही यह साहा, कि जेबा यहूदियों यरूशलेम का याजक होर लेबी तेऊका यह पूछणे बे भेज़ी, तूह कुंण साहा? तेबा तेऊ यह मनु होर नांई करू, पर मनु, हाऊं मसीह नांई आंधअ। तेबा त्याह तेऊका पुछु, तेबा तूह कुंण साहा? कि हामे आपणे भेज़णे आले बे उतर दे। तूह आपणे बारे में कैह बोला? ूतेबा तयाहे सह पूछु, तेबा तूह कुण आसा? की हामे आपणे भेजण आले बे उतर दे तूह आपणे बारे मे केह बोला? हाऊं बूणे एकी पुकारण आले रअ शब्द साहा दअ कि तमे परमेश्वरा री सडका सीधी करा।
त्या फरीसी री तरफा का भेजी दे थी। त्याहे तेऊका यह प्रश्न पुछु, अगर तूह मसीह नांई आधअ, नांई एलिय्याह होर नांई भविष्यद्वक्ता साहा, तेबा बपतिस्मा किबे दींदा। यूहन्ना तयाबे उतर दिना, हाऊं ता पाणी संघे बपतिस्मा दींदा पर तमा मेंझ एक मणश खड़अ साहा ज़ासू तमे नांई ज़ाणदे। पर माँह बाद इहण आलअ साहा, जासके बूटा रे तसमे खोलण लायक हाऊ नांई आन्ध। या गला यरदना नइ पार बैतनिय्याह में होई, ज़खे यूहन्ना बपतिस्मा दींदा थी।

दूजे धयाडे तेऊए यीशु आपू फेरा बे ईधअ भाल़ी हेरी करे बोलू, भालाआ, यह परमेश्वरा रअ गाभू साहअ जोह संसारा रा पाप चुआकी निदा। यह सह साहा जासू रे बारे में माँईए बोलू, एक मणश माँह पीछे ईंन्धा जोह माँह का बडअ साहदअ, किबेकी सह माँह का पहिले थी। हाँऊ तेऊ पछंेणदअ नांई, पर एतकि तणी हाँऊ पाणी संघे बपतिस्मा दींदअ आउअ कि सह इस्राएला पेंदे प्रकट होए। होर यूहन्ना यह गुआही दिंनी मांई पवित्र आत्मा कबूतरा साही सरगा का उतरदी हेरी होर सह तेऊ पेंदे रहू। हाऊं तेऊ पछंेणदअ नांई, पर जूणीए हाऊं पाणी संघे बपतिस्मा दींदअ भेजु, तेहुए माँह बे बोलू, जासू पेंदे तूह पवित्र आत्मा उतरदे होर ठरदी हेरे, सह पवित्र आत्मा संघे बपतिस्मा दिहण आउअ साहा। होर मांई हेरू, होर गुआही दिंनी कि यह परमेश्वरा रअ शोहरू साहा।

दूजे धयाडे भी यूहन्ना होर तेऊरे चेले मेज़ा का दुई कै खड़े होई, होर तेऊए यीशु पेंदे जोह नाह्दअ लागअ थी, भाल़ी करे बोलू हेरा, यह परमेश्वरा रअ गाभू साहा। तेबा दुहे चेले तेऊरी शुणी करे यीशु पीछे चली। यीशुये मुडी करी त्या पीछे ईहधे भाल़ी होर तयाबे बोलू, तमे कासकी खोजा में साहा? त्याहे तेऊबै बोलू, रबी मतलब गुरु तमे कई रहंदा? तेऊए तयाबे बोलू, चाला, तेबा हेरले। तेबा त्याहे नाहीं करे तेऊरे रहणे री जाघा भाल़ी, होर तेसा धयाडी तेऊ संघे रही। यह दस घंटे रे लगभग थी। त्या दूही मेंज़ा का, जोह यूहन्ना री गला शुणी करे यीशु रे पीछे होई थी, एक सिमोन पतरस रअ भाई अन्द्रियास थी। तेऊ पहिले आपणे सके भाई सिमोने संघे मिली करे तेऊबै बोलू, हामा खिस्त, या मसीह, भेटअ। तेऊ सह यीशु सेटा बे आणु। यीशु तेऊ भाल़ी करे बोलू, तूह यूहन्ना रअ शोहरू सिमोन साहा तूह कैफा मतलब पतरस कहलाऊणअ।

दूजे धयाडे यीशु गलीला बे नाहणा चाहू। होर फिलिप्पुस संघे मिलू होर बोलू, महा पीछ हो ले। फिलिप्पुस, अन्द्रियास होर पतरसा रे नगर बैतसैदा रअ निबासी थी। फिलिप्पुस नतनएल संधे मिलू होर तेऊबै बोलू, ज़ासका बर्णन मूसा व्यवस्था में होर भविष्यद्वक्ता भी लिखू दा साहा त्या हामा भेटे सह नासरत निवासी, यूसुफा रअ शोरु यीशु साहा। नतनएले तेऊ का बोलू, कोई भी शोभली चीजा नासरता का निखली सका? फिलिप्पुस तेऊबै बोलू, हाँडी करे हेरी लअ। यीशु नतनएल आपु फेरा बे ईंहंदअ हेरी करे तेऊर बारे में बोलू, हेरा, यह सच्ची इस्राएली साहा एऊ में कपट नांई आंधा। नतनएले तेऊबै बोलू, तूह माँह केडे जाणा? यीशु तेऊबै उतर दिंना, ऐताका पहिले कि फिलिप्पुस हाऊं शादुदअ, जेबरे तूह अंजीरा रे बूटे थहीं थी, तेबरे मांई तूह हेरू। नतनएले तेऊबै उतर दिना, हे गुरु, तूह परमेश्वरा रअ शोहरू साहा; तूह इस्राएला रअ महा राजा साहा। यीशु तेऊबै उतर दिना, मांई जोह ताहबे बोलुदा कि मांई तूह अंजीरा रे बूटे थंहीं हेरू दअ, कैह तूह ऐथी री तणी बुशाह करा। ताह ऐता में भी बडे-बडे काम भाल़णे। तहुकि तेऊ बोलू, हाऊं तमाब सच-सच बोला कि तमे सरगा का खोलूदा, होर परमेश्वरा रअ स्वर्गदूता बे मणशा रे शोहरू पेंदे उतरते ऊझे नाहंदे हरने।

Слушайте यूहन्ना 1