Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወባሕቱ ዑቁ ምጽዋተክሙ ኢትግበሩ ለዐይነ ሰብእ ከመ ታስተርእዩ ሎሙ ወእመ አኮሰ ዐስብ አልብክሙ በኀበ አቡክሙ ዘበሰማያት። ወሶበሂ ትገብሩ ምጽዋተክሙ ኢትንፍሑ ቀርነ ቅድሜክሙ በከመ ይገብሩ መደልዋን በመኳርብት ወበአስኳት ወበፍናው ከመ ይትአኰቱ እምኀበ ሰብእ አማን እብለክሙ ኀጕሉ ዕሴቶሙ። ወአንተሰ ሶበ ትገብር ምጽዋተከ ኢታእምር ፀጋምከ ዘትገብር የማንከ። ከመ በኅቡእ ይኩን ምጽዋትከ ወአቡከ ዘይሬእየከ በኅቡእ የዐስየከ ክሡተ።

ወሶበሂ ትጼልዩ ኢትኩኑ ከመ መደልዋን እስመ እሙንቱ ያፈቅሩ ቀዊመ ወጸልዮ በመኳርብት ወውስተ መዓዝነ መራሕብት ከመ ያስተርእዩ ለሰብእ አማን እብለክሙ ኀጕሉ ዕሴቶሙ። ወአንተሰ ሶበ ትጼሊ ባእ ቤተከ ወዕፁ ኆኅተከ ወጸሊ ለአቡከ ሰማያዊ በኅቡእ ወአቡከ ዘይሬእየከ በኅቡእ የዐስየከ ክሡተ። ወእንዘ ትጼልዩ ኢትዘንግዑ ከመ አሕዛብ እስመ ይመስሎሙ በአብዝኆ ንባቦሙ ዘይሰምዖሙ። ኢትትመሰልዎሙኬ እስመ የአምር አቡክሙ ሰማያዊ ዘትፈቅዱ ዘእንበለ ትስአልዎ። አንትሙሰ ሶበ ትጼልዩ ከመዝ በሉ አቡነ ዘበሰማያት ይትቀደስ ስምከ። ትምጻእ መንግሥትከ ወይኩን ፈቃድከ በከመ በሰማይ ከማሁ በምድር። ሲሳየነ ዘለለ ዕለትነ ሀበነ ዮም። ኅድግ ለነ አበሳነ ወጌጋየነ ከመ ንሕነኒ ንኅድግ ለዘአበሰ ለነ። ኢታብአነ እግዚኦ ውስተ መንሱት አላ አድኅነነ ወባልሐነ እምኵሉ እኩይ እስመ ዚኣከ ይእቲ መንግሥት ኀይል ወስብሐት ለዓለመ ዓለም አሜን። እስመ ለእመ ኀደግሙ ለሰብእ አበሳሆሙ የኀድግ ለክሙኒ አቡክሙ ሰማያዊ አበሳክሙ። ወእመሰ ኢኀደግሙ ለሰብእ አበሳሆሙ አቡክሙኒ ሰማያዊ ኢየኀድግ አበሳክሙ።

ወሶበሂ ትጸውሙ ኢትኩኑ ከመ መደልዋን እስመ እሙንቱ ይትመጸለዉ ወይቈጽሩ ገጾሙ ወያማስኑ ከመ ያእምር ሰብእ ከመ ጾሙ አማን እብለክሙ ነሥኡ ዕሴቶሙ። ወአንትሙሰ ሶበ ትጸውሙ ቅብዑ ርእሰክሙ ወኀጽቡ ገጸክሙ። ከመ ኢያእምር ሰብእ ከመ ጾምክሙ ዘእንበለ አቡክሙ ዘበሰማያት ዘበኅቡእ ወአቡክሙ ዘይሬእየክሙ በኅቡእ የዐስየክሙ ክሡተ።

ኢትዝግቡ ለክሙ መዝገበ ዘበምድር ኀበ ይበሊ ወይማስን ወኀበ ፃፄ ወቍንቍኔ ያማስኖ ወኀበ ሰረቅት ይከርዩ ወይሰርቅዎ። ዝግቡ ለክሙ መዝገበ ዘበሰማያት ኀበ ኢይበሊ ወኢይማስን ወኀበ ኢያማስኖ ፃፄ ወቍንቍኔ ወኀበ ሰረቅት ኢይከርዩ ወኢይሰርቅዎ። እስመ ኀበ ሀሎ መዝገብክሙ ህየ ይሄሉ ልብክሙኒ። ማኅቶቱ ለሥጋከ ዐይንከ ውእቱ እምከመ ዐይንከ ብሩህ ወስፉሕ ውእቱ ኵሉ ሥጋከ ብሩሀ ይከውን። ወእመሰ ዐይንከ ሐማሚ ኵሉ ሥጋከ ጽልመተ ይከውን ወሶበ ብርሃን ዘላዕሌከ ጽልመት ውእቱ ጽልመትከ እፎ ብርሃነ ይከውነከ። ኢይክል አሐዱ ገብር ተቀንዮ ለክልኤ አጋዕዝት ወእመ አኮሰ አሐደ ይጸልእ ወካልኦ ያፈቅር ወእመአኮ ለአሐዱ ይትኤዘዝ ወለካልኡ ኢይትኤዘዝ ኢትክሉኬ ተቀንዮ ለእግዚአብሔር ወለንዋይ። ወበእንተዝ እብለክሙ ኢትተክዙ ለነፍስክሙ ዘትበልዑ ወዘትሰትዩ ወኢ ለሥጋክሙ ዘትለብሱ አኮሁ ነፍስ ተዐፅብ እምሲሲት ወሥጋ የዐፅብ እምዐራዝ። ነጽሩ አዕዋፈ ሰማይ እለ ኢይዘርዑ ወኢየአርሩ ወኢያስተጋብኡ ውስተ አብያት ወአቡክሙ ሰማያዊ ይሴስዮሙ አኮኑ አንትሙ ፈድፋደ ትኄይስዎሙ። መኑ እምኔክሙ በተክዞ ዘይክል ወስኮ አሐደ እመተ በዲበ ቆሙ ወበእንተ አራዝኒ ምንተኑ ትኄልዩ። ርእዩ ጽጌያተ ገዳም ዘከመ ይልህቁ እንዘ ኢይጻምዉ ወኢይፈትሉ። እብለክሙ ከመ ሰሎሞን ጥቀ በኵሉ ክብሩ ኢለብሰ ከመ አሐዱ እምእሉ። ወናሁ ሣዕረ ገዳም ዘዮም ሀሎ ወጌሠመ ውስተ እቶነ እሳት ይትወደይ ወእግዚአብሔር ዘከመዝ ያለብሶ እፎ እንከ ፈድፋደ ኪያክሙ ኦ ሕጹጻነ ሃይማኖት። ኢትተክዙኬ እንከ እንዘ ትብሉ ምንተ ንበልዕ ወምንተ ንሰቲ ወምንተ ንትከደን። እስመ ዘንተሰ ኵሎ አሕዛበ ዓለም ዘአፍኣ የኀሥሥዎ ወለክሙሰ የአምር አቡክሙ ሰማያዊ ዘከመ ትፈቅዱ ዘንተ ኵሎ። አንትሙሰ ኅሡ መቅድመ መንግሥቶ ወጽድቆ ወዝንቱሰ ኵሉ ይትዌሰከክሙ። ኢትተክዙኬ ወኢተበሉ ለጌሠም እስመ ጌሠምሰ ትኄሊ ለርእሳ የአክላ ለዕለት እከያ ወስራሓ።

Слушайте ወንጌል ዘማቴዎስ 6