℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

羅馬 皇帝 提庇留 在位第十五年， 龐修‧彼拉多 做 猶太 个總督， 希律 做 加利利 分封个王，佢个兄弟 腓力 做 以土利亞 㧯 特拉可尼 分封个王， 呂撒聶 做 亞比利尼 分封个王， 亞那 㧯 該亞法 做大祭司。該時， 撒迦利亞 个孻仔 約翰 在曠野，上帝个話臨到佢。 約翰 就行遍 約旦 河一帶地區，宣佈講：「你等愛棄絕罪惡，接受洗禮，上帝就會赦免你等个罪。」 像先知 以賽亞 个書所記載个：
在曠野有人喊講：
「愛準備好勢主个道路，
修直佢所愛行个細路！
一切山壢全部愛坉滿，
大細山岡全部愛削低！
彎彎个細路愛修給它直；
高低个道路愛整給它平！
全人類攏總會看到上帝个救恩！」
人群尖等出來，愛接受 約翰 个洗禮。 約翰 對佢等講：「你這兜毒蛇啊！上帝个審判會到了，你等恅到閃得開嗎？ 愛用行為來證明你等已經棄絕罪惡。毋好恅到 亞伯拉罕 係你等个祖先就做得免受審判。𠊎㧯你等講，上帝能對這兜石頭為 亞伯拉罕 造出子孫來！ 斧頭已經放在樹根頂囉，凡無結好果子个樹仔全部愛斬掉，㧒落火底背。」
眾人問佢講：「恁樣，𠊎等愛做麼介呢？」
約翰 應講：「有兩領內衫个，愛分一領給無个；有食物个，也愛恁樣。」
有兜稅務員也來愛接受洗禮；佢等問 約翰 講：「先生，𠊎等愛做麼介呢？」
佢㧯佢等講：「規定个稅金以外，毋好加收。」
有兜當兵个也來問佢講：「𠊎等呢？愛做麼介？」
佢對佢等講：「毋好用恐嚇拿人个錢，也毋好敲人个油；愛滿足所領个錢糧。」
人民緊來緊期待，大家心肝想，無一定 約翰 就係基督。 因為恁樣， 約翰 㧯佢等講：「𠊎係用水為你等行洗禮；總係，有一個能力比𠊎還較大个愛來，𠊎就係㧯佢脫鞋也無資格。佢愛用聖靈㧯火為你等行洗禮。 佢个手拿等簸箕，愛將打麥場拚淨，將麥仔收入倉庫，將冇仔用永遠不滅个火燒掉。」
約翰 對人民傳福音，用盡多無共樣个方法勸話佢等。 總係 約翰 責備分封个王 希律 ，因為 希律 討厥老弟心舅 希羅底 ，又做盡多壞事。 後來佢做一件還較嚴重个壞事，就係將 約翰 關在監獄肚。


一般人民攏總領洗禮，耶穌也來領洗禮。佢在祈禱个時，天就開， 聖靈有形狀像月鴿仔一樣，降在佢个身上。對天頂有聲音傳下來，講：「你係𠊎所惜个孻仔，𠊎所歡喜个。」


耶穌開始傳道个時，約三十歲。在人看來，佢係 約瑟 个孻仔， 約瑟 係 希里 个孻仔， 希里 係 瑪塔 个孻仔， 瑪塔 係 利未 个孻仔， 利未 係 麥基 个孻仔， 麥基 係 雅拿 个孻仔， 雅拿 係 約瑟 个孻仔， 約瑟 係 瑪他提亞 个孻仔， 瑪他提亞 係 亞摩斯 个孻仔， 亞摩斯 係 拿鴻 个孻仔， 拿鴻 係 以斯利 个孻仔， 以斯利 係 拿該 个孻仔， 拿該 係 瑪押 个孻仔， 瑪押 係 瑪他提亞 个孻仔， 瑪他提亞 係 西美 个孻仔， 西美 係 約色克 个孻仔， 約色克 係 約大 个孻仔， 約大 係 約亞拿 个孻仔， 約亞拿 係 利撒 个孻仔， 利撒 係 所羅巴伯 个孻仔， 所羅巴伯 係 撒拉鐵 个孻仔， 撒拉鐵 係 尼利 个孻仔， 尼利 係 麥基 个孻仔， 麥基 係 亞底 个孻仔， 亞底 係 哥桑 个孻仔， 哥桑 係 以摩當 个孻仔， 以摩當 係 珥 个孻仔， 珥 係 約細 个孻仔， 約細 係 以利以謝 个孻仔， 以利以謝 係 約令 个孻仔， 約令 係 瑪塔 个孻仔， 瑪塔 係 利未 个孻仔， 利未 係 西緬 个孻仔， 西緬 係 猶大 个孻仔， 猶大 係 約瑟 个孻仔， 約瑟 係 約南 个孻仔， 約南 係 以利亞敬 个孻仔， 以利亞敬 係 米利亞 个孻仔， 米利亞 係 買南 个孻仔， 買南 係 瑪達他 个孻仔， 瑪達他 係 拿單 个孻仔， 拿單 係 大衛 个孻仔， 大衛 係 耶西 个孻仔， 耶西 係 俄備得 个孻仔， 俄備得 係 波阿斯 个孻仔， 波阿斯 係 撒門 个孻仔， 撒門 係 拿順 个孻仔， 拿順 係 亞米拿達 个孻仔， 亞米拿達 係 亞民 个孻仔， 亞民 係 亞尼 个孻仔， 亞尼 係 希斯崙 个孻仔， 希斯崙 係 法勒斯 个孻仔， 法勒斯 係 猶大 个孻仔， 猶大 係 雅各 个孻仔， 雅各 係 以撒 个孻仔， 以撒 係 亞伯拉罕 个孻仔， 亞伯拉罕 係 他拉 个孻仔， 他拉 係 拿鶴 个孻仔， 拿鶴 係 西鹿 个孻仔， 西鹿 係 拉吳 个孻仔， 拉吳 係 法勒 个孻仔， 法勒 係 希伯 个孻仔， 希伯 係 沙拉 个孻仔， 沙拉 係 該南 个孻仔， 該南 係 亞法撒 个孻仔， 亞法撒 係 閃 个孻仔， 閃 係 挪亞 个孻仔， 挪亞 係 拉麥 个孻仔， 拉麥 係 瑪土撒拉 个孻仔， 瑪土撒拉 係 以諾 个孻仔， 以諾 係 雅列 个孻仔， 雅列 係 瑪勒列 个孻仔， 瑪勒列 係 該南 个孻仔， 該南 係 以挪士 个孻仔， 以挪士 係 塞特 个孻仔， 塞特 係 亞當 个孻仔， 亞當 係上帝个孻仔。

Слушайте 路加 3