ПошукіУзор

Гаворачы пра блізкасьць з Богам, варта заўважыць, што велічэзнае як акіян пытаньне “Хто Ты, Госпадзе?” піша на мокрым ад прыліву пяску яшчэ адно: “Хто я, Госпадзе?” Разважаць, што другое пытаньне зусім ня мае права на існаваньне, можа падацца высакародным у сваім пакорлівым намеры, але гэта не біблійна. Бог выдаткаваў калодзежы чарніла на пэргамэнты Сьвятога Пісьма, каб адказаць на пытаньне, якое зьяўляецца другасным, але ўсё ж такі пытаньнем. Той факт, што Ён часта карыстаецца другім пытаньнем - хто такі я? - дзеля таго, каб прывесьці людзей да першага - хто такі Бог? - сьведчыць пра Ягоную абсалютную ласку й цярплівасьць. Нашыя ўяўленьні пра Бога ані крыху Яго не зьмяняюць, але нашая таясамасьць і лёс цалкам залежаць ад іх.

Уважліва прачытай Другі Закон 33.

Нашая спадчына веры, захаваная ў Старым Запавеце, — гэта банкаўскі рахунак багацьцяў, якія немагчыма зрасходаваць за цэлае жыцьцё вучобы. Мы маем прывілей жыць па завершаным боку вызваляльнае працы Ісуса, Божага Ягняці, бачнага ў кожнай ахвяры Старога Запавету. Калі мы пачынаем верыць у Ісуса, то мы ўваходзім у новы запавет замест старога запавету старажытнага Ізраіля.

У той час, як дванаццаць плямёнаў Ізраілевых у Другім Законе 33 атрымалі кожнае па асобнаму кавалку прароцкага цеста, праз Хрыстову ласку мы атрымліваем у спадчыну “ўсякае духоўнае дабраславеньне ў нябёсах” (Эфэсцаў 1:3).

Няма нікога, як наш Бог, таму няма нікога, як Ягоны народ. Ізраільцяне Старога Запавету натуральна нараджаліся ў Божую сям’ю, а мы нараджаемся ў яе праз Духа (Яна 1:11-13; 3:3). Ні першае, ні другое права першародзтва не датычылася вышэйшасьці. Абодва датычыліся збаўленьня. Абодва залежалі ад ласкі.

Заўваж паймо ў Другім Законе 33:29. “Дабрашчасны ты, Ізраіле! Хто падобны да цябе, народзе _________________________?”

Будучы вернікамі, мы маем крыніцу сілы, якая вельмі ўражвае: мы ведаем, хто такі Бог. Адылі, калі мы ніколі не спалучаем Ягоную таясамасьць з нашаю, то трубацяг, пабудаваны крыжом, які падлучае нас да боскае сілы, застаецца заткнутым няверствам.

Паглядзем зараз на пытаньне “хто?” зь іншага боку.

Прачытай Быцьцё 3:1-13. Прасачы за адказам на пытаньне “Хто сказаў табе?” дзеля таго, каб знайсьці першапачатковую крыніцу пытаньня. Хто сказаў ім нейкую ману, якая прывяла да грэху? Заўтра абмяркуем тэму падману больш дэталёва.