МАРКА 4:26-34
МАРКА 4:26-34 Біблія (пераклад В. Сёмухі) (ББЛ)
І сказаў: Царства Божае падобнае на тое, як калі чалавек кіне насеньне ў зямлю, і сьпіць, і ўстае ноччу і днём, і як насеньне ўзыходзіць і расьце, ня ведае ён; бо зямля сама сабою родзіць спачатку зеляніну, потым колас, потым поўнае зерне ў коласе; калі ж высьпее плод, адразу пасылае серп, таму што настала жніво. І сказаў: да чаго прыпадобнім Царства Божае? альбо празь якую прытчу выявім яго? Яно - як зерне гарчычнае, якое, калі сеецца ў зямлю, ёсьць найменшае з усіх зярнят на зямлі: а як пасеяна, узыходзіць і робіцца большае за ўсякую траву, і пускае вялікае гольле, так што пад ценем ягоным могуць хавацца птушкі нябесныя. І такімі многімі прытчамі прапаведаваў ім слова, колькі яны маглі чуць; і бяз прытчы не казаў ім, а вучням сам-насам тлумачыў усё.
МАРКА 4:26-34 Біблія (пераклад А.Бокуна) (БББ)
І сказаў: «Гэтак ёсьць Валадарства Божае, як быццам чалавек кідае насеньне ў зямлю. І ці ён сьпіць, ці ўстае ноччу і днём, а насеньне ўзыходзіць і расьце, і ён ня ведае, як. Бо зямля сама сабою родзіць спачатку рунь, потым колас, потым поўнае зерне ў коласе. Калі ж плод сасьпее, адразу пасылае серп, бо надыйшло жніво». І сказаў: «Да чаго падобнае Валадарства Божае? Або ў якой прыповесьці выявім яго? Як гарчычнае зерне, якое, калі сеецца ў зямлю, ёсьць меншым за ўсе насеньні на зямлі; а калі пасеянае, узыходзіць і робіцца большым за ўсе расьліны, і пускае галіны вялікія, так што птушкі нябесныя могуць хавацца ў ценю яго». І многімі падобнымі прыповесьцямі гаварыў ім слова, колькі маглі яны слухаць, і без прыповесьці не гаварыў ім, а вучням асобна тлумачыў усё.