AKAM 12
12
Sangho Atum Aphan Herod Kechenek
1Halabangso ahut Herod recho mondoli amonit manene atum aphan kechenekji pangcheng-lo. 2Alangli Jon akorte, Jems aphan nokjir pen pathilot-lo. 3Jihudi atum labangso akam aning dok-lo, la thek-longsi alangli Pitor aphanta nep-lo. (Halabangso ahut ke thap kave ahim Achojun a-Meipi ahut-lo) 4Pitor aphan nepsi phatek beng-lo. Hadak alang-liphan chedanbang bang krethrok atum arideng hodaisi alangliphan patonlo. Halatum bangphli bangphli chelarsi honverlo.#Keba 12.1-27 5Kejok achojun a-Meipi aphisi Pitor aphan rat atum angno kangsaiji aphan Herod mathalo. Lasi Pitor aphan phatek arlo bilo, bonta mondoli amonit atum alangliphan jasemet Arnam ardom pilo.
Pitor Phatek Pen Kejok
6Herod Pitor aphan rat angbong keponji aphan kepathik a-arni aphrang ajo Pitorke chedanbang banghini adaksi amek jang-lo. Alangliphan ingchin ari rini pen kok-het-lo, lapen phatek anghap along chedanbang atum tonding-lo. 7Ansi hadak men men Hemphu apherangke vangsi arjaptherlo, lapen phatek angdeng kethe-ang turdang-lo. Alangli Pitor aphangkor along otsi alangliphan hijuk-lo, lapen alangliphan ingthursi pulo, “Thurseraknon.” Halamamat ingchin ari alangli ri pen kloruilo. 8Ansi Hemphu apherangke alangliphan pulo, “Nang vam chekoknon, lapen nang keng-opta chethonnon!” Pitor lason si klemlo, lapen pherangke alangliphan pulo, “Nang choi chingchoira ne phi phi nangdunnon.” 9Pitor phatek pen nangbarsi pherangke aphi phi dunlo, bonta pherangke keklem akam ahok puke alangli chininedet-lo; pima alangli ning arjansi thek-long-lo pusi mathalo. 10Halatum vangsi aphrang keton aron-aso aphan lit-lo lapen adun keton aron-aso aphanta lit-lo, lapen aphisi ke rongsopi anat kedam ingchin anghap along nanglelo. Inghap amethangsi chingpudang-lo, lapen halatum ingtan nangbarlo. Halatum tovar penangbak kedam aphi pherangke alangliphan men men otekangbup-lo.
11Ansi Pitor amethang aphan keplangtang alam chemathasi pulo, “Lake ahok-lo pu nonke ne chinipame lo. Herod arideng pen lapen Jihudi atum keklemjisi kechesik an pen neli-phan kepajokjisi Hemphu amethang apherangke nangtoilo.”
12Halabangso alam chinipamesi alangli Mark pu a-Jon apei, Meri ahem damjuilo. Hadak penang amonit atum chingrumsi Arnam ardombomlo. 13Pitor ingtan anat kedo anghap pacheng-lo, lapen Rodha pu inut abanpi la kechinijisi vang-lo. 14Alangli Pitor ase chinisi aning arong parpik-lo. Lasi alangli inghap ingpupedetsi hem arlo katvirsi halatum along damthujuilo, lapen Pitor inghap angtan alongsi do pu halatum aphan thanlo. 15Halatum alangliphan pulo, “Nanglike kepangchamlo!” Bonta lake ahok-lo pusi labangpi pubomlo. Lasi halatum pulo, “Lake alangliphan kerai apherangkelo.”
16Halabangso ahut Pitorta inghap pachengbomlo. Aphisi halatum inghap ingpulo, lapen alangliphan thek-longsi halatum manghuphrong-lo. 17Ansi halatum kedoklipji aphan alangli ari pen asin paklang-lo, lapen Hemphu kopusonsi alangliphan phatek arlo pen ingtan vanloma, labangso alam alangli halatum aphan than parjirmilo. Alangli halatum aphan pulo, “Jems lapen kekroitang atum an aphan labangso alam thandamnon.” Ansi alangli ingtan barsi akaprek adim damjuilo.
18Adap kethe-ang pen mamat Pitor kopi cheplangdet-loma pusi chedanbang atum huriseilo. 19Herod Pitor aphan kepariji ahukum pilo, bonta halatum alangliphan longthekthedet-lo. Lasi alangli hala keton aron-aso atum aphan alam hutsi halatum aphan kepathiji ahukum pilo.
Labangso aphi Herod Judia adet otekangsi Sijeria arongsopi penang arni an dodamlo.
Herod Kethi
20Herod Tair lapen Sidon arongsopi amonit atum aphan jasemet aning thilo. Lasi halatum aning isipet pen alangli ingno damlo. Aphrangsi halatum Blastas pu inut recho asirkut ahemphu aphan abe cheponsi halatum aphan keparapji aphan choningrilo. Ansi halatum Herod adung damsi alangli halatum pen kejelangthuji aphan choningrilo, pima halatum adet kecho-kejun ahormu labangso arecho adet pensi longverlo.
21Kepathiktang arni, Herod recho achoi chingchoisi recho anghoi athak chingnilo, lapen monit atum aphan lam thanlo. 22Lapen rat atum alangliphan rosi pulo, “Lake arnam aselo, monit ase kali.” 23Hala mamat Hemphu apherangke Herod aphan theng-lo, pima alangli Arnam aphan aman pipedet-lo. Ansi ingthan atum alangliphan chobomsi alangli thilot-lo.
24Bonta Arnam alam chethangbomsi chanponbomlo.
25Barnabas lapen Sol kam keklem patangdetsi Jerusalem pen nang-chevoilo. Alanglitum Mark pu a-Jon aphanta chevanlo.
Цяпер абрана:
AKAM 12: KARBIBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Karbi Holy Bible © Bible Society of India, 2010.
Used by permission. All rights reserved worldwide.