AKAM 10
10
Pitor Lapen Kornelias Alam
1Sijeria arongsopi along Kornelias pu inut amonit dolo. Alangli ke, “Itali a-Ron-aso” pu kepu Roman aron-aso bang pharo ahemphulo. 2Alangli inut dhoromi amonit-lo, lapen alangli lapen alangli hem ehum amonitta Arnam aphan kephere atumlo. Alangli keduk-keboi atum aphan dan pi olo, lapen kaiketa Arnam ardomverlo. 3Arnisi arni kangsam baji kethom apor ahut alangli ning arjan thek-long-lo: Arnam apherangke inut vangsi alangphan pulo, “Kornelias!”
4Alangli kephere pen pherangke aphan langdingsi pulo “Kopima, Hemphu?”
Arnam apherangke alangliphan thakdunsi pulo, “Nangli kardom an lapen nangli kepi adan an Arnam aningdok-lo, lapen alangli lahei hei alam mathalo. 5Nonke nang Joppa arongsopi along monit toira Pitor pu a-Simon aphan pavannon. 6Alangli ha talo akung kedo, Simon pu inut ok-reng akam keklem abang ahemsi alohi dodamlo.” 7Halabangso aphi pherangke damjuilo, lapen Kornelias amethang aban banghini, lapen alangli-tor kedo atum angbong pen inut dhoromi aron-aso aphan hang-lo. 8Alangli halatum aphan la keplangtang alam an thanpetsi Joppa arongsopi toilo.
9Puthot arni, halatum dambom dambomsi Joppa arongsopi leji dok dok ahut, nerlo chitim anbak apor ahut Pitorke kardomdamjisi hem asarnung athak arludamlo. 10Alangli an ingchirsi an kechoji aning hang-lo; lapen an ketun un ahut alangli mek rengjengsi ning arjan thek-long-lo: 11Alangli sining kangpudang lapen pe akethepi ano phli pen longle athak nangkepahir, lason kopine ahormu nangkesun thek-long-lo. 12Labangso arlo akeng hongphli api an, longle athak keklim api ajat do-an, lapen angsong kangjar avo ajat do-an ta dolo. 13Ansi isi ase vangsi alangliphan pulo, “Thurnon, Pitor! pathira chonon!”
14Bonta Pitor thakdunsi pulo, “Jonghe setta lapu kali, Hemphu! Pima chokertang ahormu, kalite kangthirthe ahormu ke ne chochepinlang.”
15Ako batai hini aphong halabangso ase alangliphan pulo, “Arnam kepangthirtang amar aphan ingthirthe puri.” 16Lason batai kethom plang-lo, lapen hala mamat halabangso ahormu sining athak chirungpon-thudet-lo.
17Labangso aning arjan alam athe kopima pusi Pitor kematha un ahut Kornelias nangketoi amonit atum, arju arjusi Simon kedo ahem anghap angno an nanglelo. 18Halatum monit hangsi arjulo, “Simon Pitor pu inut alohi ladaksi do maho?” 19Pitor hala ning arjan alam athe kechiniji aphan kebor-i un ahut Karjong alangliphan pulo, “Langnon! Bang kethom amonit atum nangphan risi vang-lo.#Ajehak a-Baibel barim along ke bangkethom, lapen akaprek along ke penang atum pusi ketok do 20Nang thurra, hirnon, lapen nang halatum along dunmori. Pima nesi halatum aphan nangtoilo.” 21Lasi Pitor nanghirlo, lapen halabangso amonit atum aphan pulo, “Nanglitum keri amonit neli helo. Nanglitum ladak kevang athe kopima?”
22Halatum thakdunsi pulo, “Kornelias pu inut chedanbang bang pharo ahemphusi netum aphan ladak netoilo. Alangli inut dhoromipet lapen Arnam aphan kephere amonit-lo. Jihudi amonit atum an alangliphan aman pi olo. Nangli kepu nangji alam an alangli karjulongjisi, nangliphan amethang ahem along kephaji aphan pherangke kangthir hukum pilo.” 23Pitor halatum aphan hem arlo hangponlo, lapen halabangso aningve halatum aphan hadaksi padokok-lo.
Puthot arni Pitor halatum along dunlo, lapen Joppa arongsopi along kedo kekroitang manene atumta alangli long dunlo. 24Puthot arnithu alangli Sijeria arongsopi lelo. Hadak Kornelias amethang adon arap amonit atum, lapen alangli kepha tang, kechinghon ajirpo atum pen pen chingrumsi alangliphan inghong-phrong-lo. 25Pitor hem arlo kelut ahut Kornelias alangli pen chetongsi alangli Pitor akeng-ri dombaksi alangliphan ardomkhrup-lo. 26Bonta Pitor alangliphan parjapsi pulo, “Arjapnon, nelita monitchot-lo.” 27Ansi alangli pen lam chethanponbomsi Pitor hem arlo lutdamlo. Hadak alangli monit kechingrum dopik thek-long-lo. 28Alangli halatum aphan pulo, “Jihudi amonit atum ke Jihudi kalidet atum pen dorap rap longle, lapen halatum ahem lut dun kertang pu alam nanglitum chinipamelo. Bonta badu amonit aphan setta kopine akertang do pu, kalite, ingthirthe pu punangne pusi Arnam neliphan paklang-lo. 29Lasi neliphan nepahang ahut neli thangta kroimomedetsi ladak vang-lo. Tangte neli nanglitum aphan arjulang, nanglitum kopi athesi neliphan nephaloma?”
30Kornelias pulo, “Nithom#Ajehak a-Baibel hastro along ke niphli pusi ketok do aphrang, non labangso-asonthot apor ahut, atheke arni kangsam baji kethom apor ahut, neli neli hem arlo Arnam kardom un ahut inut klarbong ape kechepingdeng amonit, men men neli ingno arjapthersi, 31neliphan pulo, ‘Kornelias! Arnam nang kardom alam arjutang-lo, lapen nang keduk-keboi atum aphan dan kepi alam an Arnam chinilo. 32Joppa arongsopi along monit toira Pitor pu Simon aphan pahangdamnon. Talo akung kedo Simon pu inut ok-reng akam keklem amonit ahemsi alangli alohi dodamlo.’ 33Hala mamat neli nangli long monit nangtoilo. Lapen nangli ingjinso si vangtang-lo. Arnam nangliphan kepaputoi alam an nelitum karjulongjisi ladak Arnam angno chingrumsi nelitum inghongphrong-lo.”
Pitor Lam Kethan
34Ansi Pitor kepuji pangcheng-lo. “Non neli chinilo, Arnam ke abangphutin aphanta kelang pachingbarpet-lo.#Keth 10.17 35Ajat akhei setta me, Arnam aphan kangduk, lapen dhoromi akam keklem atum an aphan ke Arnam deng-lo. 36Arnam Israel amonit atum aphan kepi alam, kadokave a-Hemphu, Jisu Khristo pen ajok ningkangsam Abirta Keme kepachethang alam nanglitum chinilo. 37Jon baptisom alamjir than-pachethang-det aphi Galili adet pen pangchengsi Judia adet bithe bitha adim keplangtang alam nanglitum chinihurlo. 38Najareth a-Jisu alamjir, lapen Arnam alangli phuthak Karjong Kangthir lapen jakong kepi alam nanglitum chinilo. Jisu kadokave adim damsi keme akam klem lo, lapen soitan kechenek atum aphan pamebom lo, pima Arnam alangli long dolo. 39Neli ke Judia adet lapen Jerusalem arongsopi along Jisu keklem akam an ahakilo. Halatum alangliphan thengparpan athak saksi pathilot-lo. 40Bonta nithom aphi Arnam alangliphan kethi pen pathurlo, lapen monit atum angno pacheklang-lo. 41Alangli kadokave atum aphan cheklang-lo, lapu kali, bonta Arnam aphrang pen kangvaitang ahaki atum, atheke alangli kethi pen thurdet aphi, alangli pen kecho rap rap, kejun rap rap, la nelitum aphansi cheklangchot-lo. 42Monit atum aphan birta keme kepachethangji aphan, lapen kerenglang lapen kethitang amonit atum aphan kangsaiji aphan Arnam Jisu aphansi kangsai abang bat-lo pu alam haki kepiji aphansi Arnam nelitum aphan hukum pilo. 43Arnam amontri atum an alangli lamjirsi pulo, atheke alangliphan kekroi atum an alangli men ajakong pen ajok apap hei hei diya longji pusi halatum pulo.”
Jihudi Kalidet Atum Karjong Kangthir Kelong
44Pitor lam keningje un ahut karjudun atum an aphuthak Karjong Kangthir hirlo. 45Arnam Jihudi kalidet atum aphuthakta Karjong Kangthir adan dung-lo, la thek-longsi Joppa pen Pitor along nangkedun kekroitang Jihudi atum manghuhurlo. 46Pima halatum ajat kaprek kaprek alam pen kepu lapen Arnam anong kepathe halatum arjulong-lo. 47Ansi Pitor pulo, “Netum asonthak thaksi labangso amonit atumta Karjong Kangthir longtang-lo. Tangte latum baptisom ke-en longledetji athe kopima?” 48Lasi halatum Jisu Khristo amen pen baptisom ke-enji aphan alangli hukum pilo. Ansi latum halatum along penang arni kedoji aphan halatum latum aphan choningrilo.
Цяпер абрана:
AKAM 10: KARBIBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Karbi Holy Bible © Bible Society of India, 2010.
Used by permission. All rights reserved worldwide.