Matiyu, echî 10
10
Jisos a chə́me ágbán abhê ófó na ábháe
(Mak 3.13-19; Luk 6.12-16)
1Jisos a bhâ chə́me ágbán abhê ófó na ábháe a káre ikom se á yighá ojê mbâ ane, se á yimá emaŋé kpe njə́n é maná.
2Ńgyê obhiŋ ágbán í Jisos ófó na ábháe. Ndaŋa-mbá a ri Simun nnyo á bhíŋa sê Pita na mmon-i-nnyen owe Andru. Abhon í Sebedi ábháe, Jems na Jon. 3Firip na Batromiyu na Tomas na Matiyu nnyo mbə́bha-ntí-echî. Jems nnyo mmon-i-nnyen Afiyus. Dadiyus fə́ne a ri ka ekam. 4Simun nnyo kpe ekʉ̂ a kâm ka okot eték ejê na Juda Iskariyot nnyo a gurî Jisos.
Jisos a tûm ágbán abhê ejen
(Mak 6.7-13; Luk 9.1-6)
5Jisos a bhâ bhîŋ ágbán mbá ófó na ábháe, a sə́re ábho se, “N kí tum ên ejen, kən ka jî ên mbâ ane mba Jus asík, na kpe mbâ ane Samariya. 6Choŋ ên a ri mbâ ane Isrel mba á rî noŋ obhúi mbi ó tan. 7Choŋ osə́ré ên ábho sê otúi Obhasi ó bha. 8Yim ên ane emaŋé á sôn, sʉk ên mba á kpóe okpó, yim ên amaŋá-ofunum á sôn, o yíghi ên ojê mbâ ane. Ń kare ên ikom mfí ń ka kó ntí, ka kó ên mân ntí mbâ nne kpe yót. 9O kí ji ên, ń ka wóm bəre ó kə̂n ên ntí kpe ń dî nan. 10Ka kə́n ên kpe ebham sê ó gyéŋé ên kpe ejûm ó kâk. Kpe eyóŋé éfô, kpe iyîm-akát, kpe ítí-ejen, nne a kâ fî. Deê ane mba o kí yim ên nná etûm ka ekam ábho, á gyê ên.#1 Korin 9.14; 1 Tim 5.18.
11“Ó si ên eték, wôm ên mfoné esə́n í nne ka eték. Ó yen ên ntʉ́ghi nne nnyó, kumî ên na yê ta o mághe ên eték áji. 12Ó gye ên ka njû, kûp ên ane mba á rî áfo se, ‘Deê enare Obhasi é jóe na ên.’ 13Ájoé ane ekone á rî ka njû ányi, maghê ên ekûp ejə́né é kə́t áfo. Kən se cháŋ, ekûp ejə́né tîk é chə́bhe njəm mbâ eyəné.#Luk 10.4-12. 14Kən ájoé ka eték, kpe njû nnyi á fî ên cháŋ, á ká wom kpe ewómóm sê á yúk okpígha-ejûm obhə́né, ebhú o kí maghé ên eték áji, kpe njû ányi, bhûk ên ebhəm nji é yághe ên ka akát, maghê ên mbá-njəm.#Etûm 13.51. 15Deê ń sə́ré ên bəre ofú Obhasi a kí taŋ ngun, a kí fon nsôn na ane eték í Sodom na Gomora, a chíŋí ane nték ányi.”#Mat 11.24; Eróghá 19.24-28.
Oseŋe mbi atóbhá Jisos á kí yen
(Mak 13.9-13; Luk 21.12-17)
16“Yûk ên, n kí tum ên noŋ obhúi ka ekam onyam obhí. Fi ên biji ibhə́né noŋ efomnté, joê ên ḿbə́ŋé eyəné jáé noŋ ibhʉ́í.#Luk 10.3. 17Kô ên ebhú, ka ane tîk á fî ên á jak ka ochî echəme Atáŋá-eték. Á kí fi ên á tə̂m ka óchâm Obhasi. 18Tîk á kô ên á jak ka ochî ane mba á fíi ikom eték na atúi-ofâm, ka ó tobha ên ə̂m. Nâ eji o kí gyimi ên mân noŋ atî-isê, ó sə́ré ên ábho na ngun ndə́m otîp Obhasi. 19Ebhú á fi ên á jak, deê nne a kâ fôn efup se yê á kí chot jen, yê a kí chot nan. Ebhú njí é si, Obhasi tîk a yîm ên o mə́ŋe ên nji choróm. 20Nan? Kpe nnyə́n nchot nnyi a kí fap ên ka nnyo, á bhó dʉ ka aron amə́né. A ri Ebhare Ntʉgantʉ Ńsé owəné Obhasi nâ á chorá áno.#Mak 13.9-11; Luk 12.11-12; 21.12-15.
21“Mmon-i-nnyen tîk a ríghi se á yúí ntem-mmon-i-nnyen. Ásé á kí yim ekpak njí jə́t na abhon ábho. Abhon á kí gyimi ngyím okpóŋe na ásé na anyen sê á yúí ábho oyúí.#Mak 13.12; Luk 21.16. 22Ane chénchén tîk á bhân ên ka obhô obhámé. Kən kpe énê nnyo á kəp ḿbə́ŋé ta ntə̂m a sî, tîk a sêm.#Mat 24.9,13; Mak 13.13; Luk 21.17. 23Ájoé á karé ên oseŋe ka eték jə́t, bê ên choŋ nji tat. Deê ń sə́ré ên bəre kən ó yîm ên etûm ejə́né ka nték i Isrel chénchén, Mmon-i-ntem-nne a bhâ.
24“Mmon-i-nwet nnyo a faŋê a chíŋi nne nnyo á kpik yê cháŋ. Ḿgbán fə́ne kpe yót nnyo a chíŋi ńsé owe cháŋ.#Luk 6.40; Jon 13.16; 15.20. 25A ri ejûm ogyebhá-ḿbə́ŋé nji mmon-i-nwet á si noŋ nne nnyo a kpíi yê. Ḿgbán fə́ne eróŋ nnyo á si noŋ ńsé owe, a ri ka efonóm ogyebhá-ḿbə́ŋé. Ájoé ane á kí faŋ ḿbə́ŋé á bhiŋá ə̂m ka ńsé owəné sê Satan, obhiŋ mân mbi á kí bhiŋ ên, ó kí bhip ó chíŋi ochíŋ.”#Mat 9.34; 12.24; Mak 3.22; Luk 11.15.
Deê nne a fon efup a ri na Obhasi, na ntem-nne asík
(Luk 12.4-9)
26“Ka fûp ên mân nne kpe yót, ka kpe ejûm jə́t cháŋ nji é kí kət ka ebhə̂t, ngun á bhó yen.#Mak 4.22; Luk 8.17. 27Nchot nnyi ń səra ên áno ka ebhə̂t, chot ên ńnyə́ne jáé. Nnyi o yúghi ên ka ebhə̂t, gyími ên ka éré kən o sə́rá ên ane. 28Ka fôn ên efup na ane mba á kí yui wâ kən ejûm etat á yíma na ńtʉgântʉ eya cháŋ. Fup ên a ri Obhasi nnyo a fonê ikom mfi a kí yui wâ a kpê na ńtʉgântʉ eya, a bhûm ka erəmta-ngûn. 29Kə́n nne a nâm nnón ḿbáe ka mô ntí nnyo á ka fáp kpe ejûm, kən kpe inón fə́t mfi í kí gbo ka nsi cháŋ nji Ńsé owa ka ósô á ka məŋé. 30Ka ên mba o ri ên áno, kpe nnyʉ̂ echî eyəné Ńsé owəré ka ósô a mə́ŋe mfan. 31Ka obhô mbí, deê nne a kâ fon efup kpe jə́t ka ó faŋ ên ó chiŋi nnón, kpe ń tíi nan.
32“Nâ mân nne kpe nnyón nnyo á kam ka ochî atem-ane se yê a mə́ŋe ə̂m, mme fə́ne tîk n kâm ka ochî Ńsé omé ka ósô bəre ḿ məŋe ntʉ́ghi nne ányo. 33Kən nne nnyo á taŋé ə̂m ka ochî atem-ane, mme fə́ne tîk n táŋe yê ka ochî Ńsé omé ka ósô.”#2 Tim 2.12.
Otîp í Jisos ó kə́ bha na achât
(Luk 12.51-53; 14.26-27)
34“Nne a kâ kére se mme m báe ka ngun nnyí na ekone. Ń ka bhá na ekone, m báe na achât. 35M báe ḿ bá yîm abhon-arûm á kpóŋé na ásé ábho, abhon-akáé á kpóŋé na anyen, akáé á kpóŋé na anyen-arûm. 36M báe ḿ bá yîm mfoné-mfoné nne ebhan í nne a fáp a ri ka ndə́p-i-njû nne.#May 7.6.
37“Kpe énê nnyo a korê ńsé owe kpe nnyen a chíŋi ə̂m, á ka bhik ə̂m etóbhóm. Nne nnyo a korê abhon abhê kpe mba ane-arûm kpe ane-akáé a chíŋi ə̂m, á ka bhik ə̂m etóbhóm.
38“Kpe énê nnyo á ka kam a kə́n achî-achot ka obhô obhámé, kpe é rî nji ekʉ̂, á ka bhik ejoóm nne omé.#Mat 16.24; Mak 8.34; Luk 9.23. 39Kpe énê nnyo íkíkéré ifê í rî a ri se yê a fon ekpin kpe nan kpe nan, tîk á bhó fon ńjə́ne. Kən nne nnyo á taŋé ekpin ejê ka obhô obhámé, tîk a fôn ekpin í nchane.”#Mat 16.25; Mak 8.35; Luk 9.24; 17.33; Jon 12.25.
Tîk Obhasi a káre ekəp
(Mak 9.41)
40“Kpe énê nnyo á tabhé ên abhô ábháe, a tábhe ə̂m áno. Nne á tabhé ə̂m, deê a məŋé se a tábhe fə́ne yê nnyo a túmi ə̂m.#Mak 9.37; Luk 9.48; 10.16; Jon 13.20. 41Kpe énê nnyo á tabhé akará-otîp Obhasi abhô ábháe ka a ri akará-otîp Obhasi, tîk Obhasi a káre yê ekəp noŋ nkara-otîp Obhasi. Kpe énê nnyo á tabhe nne nnyo a fonê ekpin ka nnyen-i-mbá ka nne ányo a fonê ekpin ka nnyen-i-mbá, tîk Obhasi a káre yê ekəp noŋ kpe yê eróŋ a fonê ekpin ka nnyen-i-mbá. 42Deê ń sə́ré ên bəre ka ane mba á tóbha ə̂m, kpe á rô fáp ejûm, nne nnyo á karé nne ábho kpe ayép-áyêp a gwô ka á tobha ə̂m, ekəp ejê é rî ka Obhasi.”
Цяпер абрана:
Matiyu, echî 10: ETUNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ejagham New Testament © Bible Society of Nigeria and Bible Society of Cameroon, 1996.