Marcos 5
5
Ginpamayad ni Jesus ro Tawo nga Ginsudlan it Kaabo-abo nga Demonyo
(Mat 8:28-34; Luc 8:26-39)
1Nagpadayon sanday Jesus sa pagbiyahe ag nagdungka sanda sa tabok ku Dagat it Galilea, sa lugar it mga tagaGerasa. 2Pagkapanaog ni Jesus sa baroto hay may nagsueang-sueang kana nga isaeang ka eaki nga nagguwa sa sangka eungib nga ginaeubngan it mga patay. Ro eaki ngato hay ginsudlan it maeain nga espirito 3ag idto imaw nagaistar sa mga eungib nga ginaeubngan it mga patay. Indi eon imaw magapos bisan it kadena pa. 4Permi anay imaw kato nga ginakadenahan ag ginapandugan pero ana man nga ginabugto ro kadena ag ginawasak ro anang pandog. Owa gid it makasarang nga magpugong kana. 5Adlaw-gabii hay nagalinibot imaw sa mga eueubngan ag sa mga kabukiran ag perming nagasiyagit. Permi man nanang ginanina ro anang eawas it mataeom nga bato.
6Maeayo pa si Jesus hay hakita eon imaw ku eaki. Nagdaeagan ra paeapit kay Jesus ag naghapa sa anang atubang. 7Nagsiyagit ro eaki, “Ayaw ako pag-intrahi, Jesus, unga it Dyos nga Eabing Mataas! Magsumpa ka sa ngaean it Dyos nga indi mo ako pagpasakitan.” 8Ginhambae ra nana dahil ginsugo ni Jesus nga magguwa ro maeain nga espirito nga nagsueod kana.
9Ginpangutana imaw ni Jesus, “Ano ro imong ngaean?” Nagsabat imaw, “Ako si Panong#5:9 Sa Griniyego, ro bisaea nga gin-gamit dikara hay “Legion” nga ro kahueugan hay an-om nga libo nga soldado. ay kaabo-abo kami.” 10Nagpinakitluoy gid imaw kay Jesus nga indi sanda pagsubueon sa ratong lugar.
11Idto sa bukid hay may sang panong it kaabo-abo nga baboy nga nagainukib. 12Nagpinakitluoy ro mga maeain nga espirito kay Jesus. Sinanda “Idto lang kami paadtuna sa mga baboy ngato agod makasueod kami kanda.” 13Ginsugtan sanda ni Jesus, “Sige, adto kamo idto.” Nagguwa dayon sanda sa tawo ag nagsueod sa mga daywang libo ngato nga ka baboy. Nagdaeaeagan dayon ratong mga baboy papanaog sa bukid hasta nagkaeahueog sa banglid ag tumugpa sa dagat ag nagkaeaeumos.
14Pagkakita ku mga nagabantay it baboy ngato sa natabo hay nagdaeaeagan sanda sa banwa ag sa mga kabaryuhan ag ginsinugid nanda sa mga tawo idto ro natabo. Pagkabati kato ku mga tawo hay nag-adto sanda kay Jesus agod hisayran nanda kon ano gid ro natabo. 15Haabutan nanda idto si Jesus ag ro tawo nga ginsudlan anay it mga demonyo. Nagapungko imaw nga nakaeambong eon ag mayad eon ro anang paino-ino. Pagkakita kato ku mga tawo hay hinadlukan sanda. 16Ginsinugid ku mga nakasaksi ro natabo sa tawo nga ginsudlan anay it mga demonyo, ag pati man ro parti sa mga baboy. 17Ginhinyo dayon si Jesus ku mga tagaidto nga maghalin sa andang lugar.
18Tag manogsakay eon si Jesus sa baroto, ro tawo nga ginsudlan anay it mga demonyo hay naghininyo nga pamunton imaw. 19Pero owa si Jesus magsugot ag ginsugo nana tag tawo, “Uli sa inyo ag sugiran mo ro imong pamilya parti sa tanan nga ginhimo kimo it Ginuo ag kon mauno kabahoe ro anang kaeuoy kimo.” 20Nagpanaw dayon rondato nga tawo ag nag-adto imaw sa mga lugar nga sakop it Napueong ka Syudad,#5:20 Sa Griniyego, ro ngaean ku lugar hay Decapolis nga ro kahueugan hay Napueong ka Syudad. Isaea ra nga ka maeapad nga lugar kon siin may napueong ka syudad nga nagatilibyog. ag ginsinugid nana sa mga tawo ro tanan nga ginhimo kana ni Jesus. Hangawa gid kara ro mga tawo nga nakabati.
Ginpamayad ni Jesus Ro Unga ni Jairus ag Ro Bayi nga Ginadugo
(Mat 9:18-26; Luc 8:40-56)
21Pagtabok eon man nanday Jesus sa Dagat it Galilea, kaabo-abo ro mga tawo nga nagtilipon sa anang palibot sa baybayon. 22May nag-abot dayon nga sangka manogdumaea it sinagoga sa ratong lugar nga si Jairus ro ngaean. Pagkakita nana kay Jesus hay naghapa imaw sa anang atubang ag 23nagpakitluoy gid. Hambae nana, “Nagatagumatayon ro akong unga nga bayi. Ngani kon mahimo hay sumunod ka sa amon ag imo nga itungtung ro imong alima kana agod magmayad imaw ag indi mamatay.” 24Ngani nagsunod si Jesus kana pauli ag kaabo man nga mga tawo ro nagsueunod kanda nga nagadueutdutan.
25Kaibahan sa mga tawo ngato nga nagsunod kay Jesus hay sangka bayi nga dose anyos eon nga ginadugo. 26Abo eon nga mga manogbueong ro anang haadtunan ag sari-sari eon nga mga pagbueong ro anang haagyan nga indi eon nana matakuran. Naubos eon ro anang kwarta sa pagpinabueong pero imbis nga magmayad hay mas naggrabi pa ngani imaw. 27Nakabati imaw parti sa mga pagpangmayad ni Jesus ngani pagkasayod nana nga gaagi si Jesus hay nagdutdut gid imaw sa mga tawo ag nagpaeapit sa may likod nana. Ana dayon nga gintabing ro ay Jesus nga eambong 28ay sa anang isip, “Kon hitabing ko bisan ro ana eang nga eambong hay magamayad gid ako.” 29Pagkatabing nana ku eambong ni Jesus hay nagpundo eagi ro pagdugo nana. Habatyagan nana nga nagmayad eon imaw sa anang baeatian.
30Nakabatyag eagi si Jesus nga may nagguwa nga gahom kana ngani umatubang imaw ag nagpangutana sa mga tawo, “Sin-o ro nagtabing ku akon nga eambong ay?” 31Nagsabat ro anang mga sumueunod, “Hay kaabo abi ngara nga mga tawo ro nagadinutdut kimo, ham-an it mangutana ka kon sin-o ro nagtabing kimo?” 32Pero gintinueok ni Jesus ro mga tawo nga nagapalibot kana ag gin-inusoy kon sin-o ro nagtabing kana. 33Sayod ku bayi ro ana ngatong ginhimo ag kon ano ro natabo kana ngani nagkinurog imaw sa kahadlok. Nagpaeapit imaw kay Jesus, naghapa sa anang atubang ag ginsugid ro matuod. 34Naghambae kana si Jesus, “Nang, nagmayad ka tungod nagsalig ka kakon. Panaw eon ag patawhaya ring paino-ino ay mayad ka eon gid sa imo ngatong masakit.”
35Samtang gahambae kara si Jesus, may mga nag-abot halin sa baeay ni Jairus nga nagsugid kana, “Owa eo't-a ring unga. Mayad lang siguro nga indi mo eon pag-awaton ro manogturo.” 36Habatian ni Jesus ro ginhambae ku tawo ngato kay Jairus pero ginhambae nana si Jairus, “Ayaw mahadlok. Magtuo ag magsalig ka eang kakon.” 37Nagpadayon sanda it adto sa ay Jairus nga baeay, pero owa pagsugti ni Jesus ro mga tawo nga magsunod kanda. Ro ana eang nga ginpamunot hay si Pedro ag ro magmanghod nga si Santiago ag si Juan. 38Pagkaabot nanday Jesus sa anday Jairus hay hakita nanda nga nagakinagubot ro mga tawo idto, ag kabati man sanda it maemae nga pag-inueahab ag pagnginuyngoy. 39Nagsueod sanda sa baeay ag naghambae si Jesus sa mga tawo idto, “Ham-an it gakinagubot ag gatinangis kamo? Bukon it patay ro unga. Gakatueog man lang imaw.” 40Anda't-a nga ginhinibaygan si Jesus nga may daea nga pag-intrimis. Ngani ginpaguwa nana sanda ag tapos hay gindaea nana ro mga ginikanan it unga ag ro anang tatlong ka sumueunod sa kwarto nga nahamtangan it unga. 41Ginpaeapitan ni Jesus ro unga ag ginbuytan sa alima ag ginhambae, “Talita kum!” nga ro buot hambaeon hay “Nene, ginahambae ko kimo nga magbangon ka!” 42Nagbangon eagi ro unga ag nagtikang-tikang. Dose anyos eon rato imaw. Hangawa gid it duro ro anang mga ginikanan ag ro mga sumueunod ni Jesus pagkakita nanda ku natabo ngara. 43Ginbilinan gid sanda ni Jesus nga owa dapat it ibang makasayod ku natabo ngato. Ginhambae man ni Jesus ro mga ginikanan, “Pakan-a ninyo imaw.”
Цяпер абрана:
Marcos 5: akl
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
2024 (Active) Wycliffe Bible Translators, Inc.