Mateo 24
24
Ro Pagsamad it Templo
(Mar 13:1-2; Luc 21:5-6)
1Naghalin eon si Jesus sa Templo ag tag nakaguwa eon imaw, ginhingabutan imaw ku anang mga sumueunod ag ginturo nanda kana ro kanamion ku Templo ag ku mga bilding nga hasakpan ku pader nga nagapalibot sa Templo. 2Pero ginsabat sanda ni Jesus, “Nanamian gid kamo sa inyong ginapamantaw ngaron tanan pero matuod rang ginahambae kinyo nga maabot ro oras nga mawasak gid ron tanan, ag owa gid it hibinlan nga nagataeangkas ku mga bato ngaron nga gin-gamit sa pagpatindog ku Templo.”
Ro mga Paeatandaan ku Pagkawasak it Jerusalem ag ku Katapusan it Kalibutan
(Mar 13:3-23; Luc 21:7-24)
3Ku ulihi, tag nagapungko si Jesus sa Bukid it Olibo, ginpaeapitan imaw ku anang mga sumueunod nga sanda-sanda eang. Anda dayon imaw nga ginpangutana, “Sugiri abi kami kon hin-uno matabo ro imo ngatong ginhambae, ag kon ano ro paeatandaan ku imong pagbalik ag ku katapusan it kalibutan.”
4Nagsabat si Jesus, “Mag-andam gid kamo agod indi kamo hipataeang 5ay abo ro magaabot sa ulihi nga magagamit ku akon nga ngaean. Akuon nanda nga sanda gid ro Maneueuwas nga ginpromisa it Dyos ag abo gid ro andang pataeangon. 6Makabati man kamo it linupok it gira nga maeapit kinyo ag ku mga balita nga may gira sa ibang mga lugar, pero ayaw gid kamo it pakueba. Dapat gid-a nga matabo ron pero bukon pa it duyon ro katapusan it kalibutan. 7Magagira ro mga nasyon ag imaw man ro mga ginharian. Magalinog sa iba-ibang mga lugar ag may grabi man nga tiggueutom. 8Pero bukon pa it ruyon ro katapusan it kalibutan. Kon ikompara ra tanan sa pag-unga hay umpisa pa eang ra it pagpasaeapo.
9“Sa ulihi, pagakaugtan kamo ku tanan nga mga tawo bangod mga sumueunod nakon kamo. Pagadakpon kamo ag itugyan sa mga magapasakit ag magapatay kinyo. 10Sa oras ngato, abo ro magatalikod sa andang pagtuo kakon dahil sa mga paghingabot. Pagatraiduron man nanda ro andang isigkapareho nga mga tumueuo ag ro iba hay andang pagakaugtan. 11Abo man ro magaabot nga mga magapakuno-kuno nga mga propeta it Dyos ag abo ro andang hipataeang. 12Dahil sa nagainabo nga nagabaliwala sa Kasuguan it Dyos, magatahaw ro paghigugma ku abo nga mga tawo.#24:12 Puydi nga ro kahueugan kara hay ro andang paghigugma sa Dyos o sa andang isigkatawo. 13Pero ro nagapadayon nga nagatuo kakon hasta sa kamatayon hay maeuwas. 14Ag ro Mayad nga Balita ngara parti sa paghari it Dyos hay igawali sa bilog nga kalibutan agod ipasayod sa tanan nga mga rasa it tawo kon paalin sanda matapoe sa anang mga sinakpan. Pagkatapos hay maabot eon dayon ro katapusan it kalibutan.”
15Naghambae pa gid si Jesus, “Sa ulihi hay matuman ro ginsueat kato ni Propeta Daniel nga may ‘bagay nga makangingil-ad’#24:15 Sa Griniyego, daya hay “makangingil-ad nga bagay nga dahilan nga pabay-an it mga tawo ro sangka lugar” (Dan 9:27, 11:31, 12:11). nga nagatindog sa sagrado nga Templo, (sa manogbasa, eubta ro kahueugan kara). 16Kon hikita eon ninyo ron, ro mga nagaistar sa Judea hay dapat nga magpaeagiw eagi sa kabukiran. 17Kon may tawo nga idto sa atop #24:17 Sa lugar it Israel ku rato nga tyempo it pagsueat ku Bibliya, ro atop it baeay hay matapan ag human sa pinatig-a nga eapok. Rato hay puyding bueun-agan ag taeaguan it trigo ag iba pa nga eamigas ag puydi man nga paeahuway-huwayan. ku anang baeay, dapat nga magpaeagiw eagi imaw ag indi eon magsaylo sa baeay agod bue-on ro anang pagkabutang. 18Ag ro nagaobra sa eanas hay indi eon dapat mag-uli pa agod magbuoe it ilislan. 19Malisdan gid it duro ro mga nabdos ag ro mga may ginapasuso kon mag-abot eon ruyong tyempo. 20Pangamuyua ninyo nga kon magpaeagiw kamo hay bukon it tigeaeamig o Adlaw it Inogpahuway,#24:20 Malisod nga mayad nga sa liwan it baeay kon tigeaeamig. Ag ro mga manogdumaea it mga Judio hay may ginasunod gid nga sueundanan kon mauno it eayo ro puyding panawon it sangka tawo kon Adlaw it Inogpahuway. 21bangod ro kaeaeat-an nga maabot sa tyempo ngaron hay owa it kapareho sa mga kalisdanan nga haagyan it tawo halin pa ku pagtuga it kalibutan, hasta makaron o bisan pa sa paeaabuton.#24:21 Matsa nagapatungod ra sa mas grabi pa nga mga matabo sa ulihi kon madali eon lang waskon it Dyos ro kalibutan. Basaha man ro bersikulo 31. 22Kon indi pagtag-uran it Dyos ro mga inadlaw ngaron hay owa it hibilin nga buhi sa ibabaw it kalibutan. Pero tag-uran gid man nana ro mga inadlaw ngaron por dahil sa mga ginpili nana nga anang mga katawhan. 23Sa ruyon man nga tyempo, kon may magahambae kinyo, ‘Hara eon ro Maneueuwas nga ginpromisa it Dyos!’ o ‘Idto imaw sa rikato nga lugar,’ ayaw gid kamo it pati. 24Ginapauna ko eagi ra kinyo dahil may mga magapakuno-kuno nga sanda ro Maneueuwas nga ginpromisa it Dyos. Ro iba ma't-a kanda hay magapakuno-kuno nga mga propeta it Dyos. Magahimo sanda it mga grabi nga milagro ag mga makangawa-ngawa nga mga bagay, bilang pamatuod kon sin-o kuno sanda agod hipataeang ro mga tawo ag kon mahimo, bisan pa ro mga pinili it Dyos nga anang mga katawhan. 25Ngani tandai gid ninyo ra! Ginapaunahan ko eagi kamo parti sa rayang mga butang bago ra matabo. 26Ngani kon may maghambae kinyo, ‘Ro Maneueuwas hay idto sa *disyerto,’ ayaw kamo rito it adto. Ag kon may maghambae, ‘Idto imaw sa sangka sekreto nga kwarto,’ ayaw kamo it pati 27tungod ro pagbalik nakon nga Unga it Tawo hay pareho it kilat nga gaguhit ro hayag sa bilog nga kaeangitan ag makita it tanan nga tawo. 28Matabo gid ra pareho it haeambaeunon nga madali hikita kon siin kampi ro may patay nga eawas tungod idto ro mga pispis nga buwitri nagadaeapo agod magtuka.”
Ro mga Gakaeatabo Kon Magbalik Eon si Jesus, ro Unga it Tawo
(Mar 13:24-31; Luc 21:24-31)
29Nagpadayon si Jesus it paghambae, “Pagkatapos eagi ku mga inadlaw ngato nga malisod hay magadueom ro adlaw ag indi eon maghayag ro buean. Ro tanan nga una sa kaeangitan hay pagauyugon ag magakaeahueog ro mga bituon.#24:29 Isa 13:10; Isa 34:4; Joel 2:10 ag Pahayag 6:12,13. 30Ag may makita dayon sa kaeangitan nga tanda nga magabalik eon ako nga Unga it Tawo. Magaueahab dayon ro tanan nga mga tawo#24:30 Raya hay tanan nga owa nagatuo kay Jesus. Kon hikita eon nanda nga nagabalik imaw hay makatagumpaaw sanda nga nag-abot eon ro oras nga pagapinahan sanda sa andang mga saea. sa kalibutan kon hikita nanda ako sa daeaura sa pagbalik nakon iya, ag kon hikita man nanda ro akong gahom ag pwerting pagkadaeayawon.#24:30 Dan 7:13. 31Matunog dayon ro trumpeta ag pagkatapos hay suguon nakon ro akong mga anghel nga tipunon ro akong mga pinili nga katawhan halin sa tanang parti it kalibutan.”
32“Tan-awa tuo ninyo ro kahoy nga higera ay may matun-an gid kamo. Kon maghumok eon ngani ro sanga it higera ag magpangeumbay eon hay sayod gid rayon ninyo nga madali lang ro tigsililak. 33Pareho man karon nga may paeatandaan ro akong pag-abot. Kon hikita eon ngani ninyo nga nagakatabo eon ro akong ginahambae kinyo hay masayran ninyo nga madali lang gid ako mag-abot. 34Matuod rang ginahambae kinyo nga ro mga tawo sa makarong tyempo hay indi maubos it kaeamatay bago matabo raya tanang mga butang.#24:34 Ro ginapatungdan ni Jesus dikara hay bersikulo 2 kon siin naghambae imaw nga mawasak ro Templo ag owa gid it hibinlan nga nagataeangkas ku mga bato nga gin-gamit sa pagpatindog kara. Natabo ra ku 70 A.D. tag ginsalakay it mga soldado it Roma ro Jerusalem ag pagkatapos it limang buean hay hasamad gid nanda ro bilog nga syudad pati ro Templo. Ginpamatay man nanda ro mga linibo nga mga Judio. 35Maduea eang ro eangit ag kalibutan pero ro akon tanan nga ginpangturo hay owa gid it pagkaduea.”
Dapat nga Haom Kita Permi sa Pagbalik ni Jesus
(Mar 13:32-37; Luc 21:34-36)
36Naghambae pa gid si Jesus, “Owa it nakasayod kon anong adlawa o anong orasa ako mabalik iya sa kalibutan. Bisan ro mga anghel sa eangit o ako nga Unga hay owa karon kasayod. Ro Dyos Ama gid lang. 37Ro ginaobra ku mga tawo sa tyempo nga magbalik ako nga Unga it Tawo hay pareho man sa ginaobra ku mga tawo sa tyempo anay ni Noe. 38Bangod kato, bago nagbaha hay owa sanda mag-inato ku maabot nga kaeaeat-an kundi sa adlaw-adlaw hay normal ma't-a gihapon ro andang pagpangabuhi nga nagakaon, nagainom, ag nagaaeasawa hasta sa oras nga nagsueod sanday Noe sa arka. 39Ag owa gihapon sanda nakaeubot ku magakaeanabo hasta nagbaha eon ro kalibutan ag nagkaeaeumos sanda tanan.#24:39 Gen 7:6-24. Ro pagbalik nakon nga Unga it Tawo hay pareho man sa pag-abot ku baha ngato. 40Kon may daywang ka tawo nga gaobra sa eanas pero sambilog eang kanda ro akong sumueunod, bue-on ro sambilog kanda ag hiaywanan ro anang kaibahan. 41Kon may daywang ka bayi nga nagabayo pero sambilog eang kanda ro akong sumueunod, bue-on kanda ro sambilog ag hiaywanan ro anang kaibahan. 42Ngani dapat gid nga haom kamo permi bangod owa kamo kasayod kon hin-uno mabalik ro inyong Ginuo. 43Paino-inoha tuo ninyo ra. Halimbawa abi nga sayod ku tagbaeay kon anong oras maabot ro manakaw, bukon abi it mapueaw gid imaw ag bantayan nana ro anang baeay agod indi ra hisueod ku manakaw? 44Ngani dapat man kamo nga mangin haom permi bangod ako nga Unga it Tawo hay maabot sa oras nga owa ninyo ginapaabuta.”
Ro mga Sueuguon it Dyos hay Dapat nga Matutom sa Paghimo ku Ginsalig Kanda
(Luc 12:41-48)
45Naghambae pa gid si Jesus, “Isipa ninyo kon pareho kamo it isaeang ka matutom ag maaeam nga sueuguon nga ginbutang ku anang amo nga magdumaea ku iba pa nga mga sueuguon ag magpakaon kanda sa tamang oras. 46Bulahan gid-a ro sueuguon ngaron kon hiabutan imaw ku anang amo nga ginaobra ro ginbilin ngaron kana. 47Matuod rang ginahambae kinyo nga bangod masaligan ro sueuguon ngaron, kana isalig ku anang amo ro pagpatikang ku tanan nanang pagkabutang. 48Pero kon halimbawa abi nga ro isaeang ka sueuguon hay maeain 't-a, ag maghambae imaw sa anang kaugalingon nga mabuhay pa't-a mana mag-uli ro akong amo, 49ag ana't-ang pagbinakueon ro mga sueuguon ngato nga anang ginadumaeahan ag magkinaon 't-a imaw ag makig-inuman sa mga paeahilong. 50Maabot 't-a rayon ro anang amo sa adlaw nga owa nana ginapaabuta ag sa oras nga owa man nana masayri. 51Grabi gid-a nga pina#24:51 Sa Griniyego, raya hay “pihakon.” ro anang hisamitan sa anang amo ag itagbong dayon imaw, kaibahan it ibang mga ipokrito, sa lugar nga bagay gid kanda kon siin sige ro pagtinangis ag pagpinagot it mga tawo.”
Цяпер абрана:
Mateo 24: akl
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
2024 (Active) Wycliffe Bible Translators, Inc.