မ︀တ︀်တ︀ႄး 10
10
လ︀ွင︀်ႈꩡ︀ဝ်ႛယ︀ေꩬ︀ုလ︀ိူက︀်ႉတ︀မ︀ၢꩫ︀်ꩡ︀ဝ်ႛꩬ︀ိပ︀်ꩬ︀ွင︀်ပ︀ႃး
(မ︀ႃက︀ု 3.13-19; လ︀ုက︀ႃ 6.12-16)
1ꩡ︀ဝ်ႛယ︀ေꩬ︀ု တ︀ပ︀ေးꩡ︀ဝ်ႛꩬ︀ိပ︀်ꩬ︀ွင︀်က︀ူဝ်ႇမ︀ႆ︀ႛꩭွင︀်ႇတ︀ုမ︀်ႈꩬ︀ီ ၵ︀ဝ်မ︀ႆ︀ႛ ဢ︀ႃꩫ︀ႃꩭၢင︀်းꩭူဝ်ႛၸ︀ီꩭၢႆ︀ႇ၊ ꩭၢင︀်းဢ︀ဝ်ႈꩫ︀ီႈ ဢ︀ꩫ︀်ႈၵ︀ႆ︀ႛဢ︀ꩫ︀်ႈꩡ︀ီပ︀်က︀ူႈၸ︀ꩫ︀်းပ︀ူင︀်ႈꩭႂ်ႛဢ︀ူ။ 2ꩡ︀ိုဝ်ႈတ︀မ︀ၢꩫ︀်ꩡ︀ဝ်ႛꩬ︀ိပ︀်ꩬ︀ွင︀်ပ︀ႃးꩫ︀ႆ︀ႇၵ︀ဝ်ယ︀ႃႇ ꩬ︀ႅင︀်မ︀ုꩫ︀်ဢ︀ꩫ︀်ႈꩭွင︀်ႇဝႃႈပ︀ေတ︀ရ︀ု၊ ꩫ︀ွင︀်ႇꩡ︀ႆ︀ၢးမ︀ꩫ︀်း ဢ︀ꩫ︀်တ︀ြေ၊ ၸ︀ူႛလ︀ုက︀်ႉꩡ︀ေပ︀ေတ︀ႄ၊ ယ︀ႃက︀ုꩫ︀ၵ︀ႃယ︀ေႃးꩭၢꩫ︀်၊ 3ၸ︀ိလ︀ိပ︀်၊ ပ︀ႃတ︀ေႃလ︀မ︀ႄ၊ တ︀ေႃမ︀၊ မ︀တ︀်တ︀ႄး ၸ︀ူႛက︀ီပ︀်ၵ︀ွꩫ︀်၊ ယ︀ႃက︀ုၸ︀ူႛလ︀ုက︀်ႉဢ︀ႃလ︀ၸ︀ႄ၊ တ︀တ︀်တ︀ႄ၊ 4ꩬ︀ႅင︀်မ︀ုꩫ︀်ၸ︀ူႛꩭၢက︀်ႉၸ︀ꩫ︀်းင︀ႆ︀း ယ︀ုတ︀ꩬ︀က︀ႃရ︀ုတ︀် ဢ︀ꩫ︀်ႈꩡ︀ဝ်ႛယ︀ေꩬ︀ုမ︀ႆ︀ႛတ︀ီၸ︀ုꩫ︀်ႇꩬ︀ႅတ︀်ႉꩡ︀ႃꩫ︀ႆ︀ႇၵ︀ဝ်ꩫ︀မ︀်။
လ︀ွင︀်ႈꩡ︀ဝ်ႛယ︀ေꩬ︀ု တ︀မ︀ၢꩫ︀်ꩡ︀ဝ်ႛꩬ︀ိပ︀်ꩬ︀ွင︀်ပ︀ႃးမ︀ႆ︀ႛ ပ︀ွႆ︀ꩡ︀ႂ်ႇ
(မ︀ႃက︀ု 6.7-13; လ︀ုက︀ႃ 9.1-6)
5ꩡ︀ဝ်ႛယ︀ေꩬ︀ု တ︀မ︀ၢꩫ︀်ꩡ︀ဝ်ႛꩬ︀ိပ︀်ꩬ︀ွင︀်ပ︀ႃးမ︀ႆ︀ႛပ︀ွႆ︀ꩡ︀ႂ်ႇꩬ︀ီ ꩬ︀င︀်ꩬ︀ွꩫ︀်ꩫ︀ႆ︀ႇယ︀ႃႇ “ꩬ︀ူ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်၊ ၸ︀ꩫ︀်းꩬ︀မ︀ႃရ︀ိꩫ︀ႆ︀ႇၵ︀ဝ်မ︀ႆ︀ႛပ︀ီက︀ႃ။ 6ဢ︀ီတ︀်ꩬ︀ြေးꩭဝ်း ၸ︀ူႛဢ︀ꩫ︀်ႈတ︀ူꩫ︀င︀် ပ︀ူႇဢ︀ꩫ︀်ႈꩭႆ︀ၢꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈꩬ︀င︀် က︀ႃꩬ︀ီ 7“ၸ︀ြႃးပ︀ီꩫ︀်ႈꩡ︀ဝ်ႛ ꩫ︀င︀်ꩡ︀ဝ်ႛꩭူဝ်ၵ︀မ︀်းꩫ︀က︀ꩫ︀်ႈ တ︀ီဢ︀ုပ︀်ႉပ︀ိုင︀်ယ︀ဝ်ႇ” ꩫ︀ꩬ︀ီꩭူဝ်းတ︀ႃႉ။ 8ၸ︀ူႛၵ︀ႆ︀ႛꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩫ︀ီႈꩭႂ်ႛတ︀ႃႉ။ ၸ︀ူႛတ︀ႆ︀ၢႈꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩫ︀ိပ︀်ꩭႂ်ႛတ︀ႃႉ။ ၸ︀ူႛပ︀ီꩫ︀်ႈတ︀ုတ︀်ႉꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩫ︀ီႈဢ︀ဝ်ႈမ︀ူတ︀်ꩡ︀ၢင︀်ꩭႂ်ႛတ︀ႃႉ။ ၸ︀ီꩭၢႆ︀ႇꩫ︀ႆ︀ႇၵ︀ဝ်မ︀ႆ︀ႛ ꩭူဝ်ႛဢ︀ွက︀်တ︀ႃႉ။ ဢ︀ႃꩫ︀ႃꩫ︀ႆ︀ႇၵ︀ဝ် ꩬ︀ူမ︀ႆ︀ႛက︀ဝ်ႈပ︀ူင︀်ႈꩭႂ်ႛꩫ︀ႆ︀ၢႈꩫ︀က︀ꩫ︀်ႈ ꩬ︀ူက︀ေႃႇပ︀ိူꩫ︀်ႈမ︀ႆ︀ႛ ꩡ︀ွႆ︀ႈꩭႂ်ႛꩫ︀ႆ︀ၢႈတ︀ႃႉ။ 9င︀ိူꩫ︀်း၊ ၵ︀မ︀်း၊ င︀ိူꩫ︀်းတ︀ွင︀်းꩫ︀ႆ︀ႇၵ︀ဝ် ပ︀ီဢ︀ဝ်ႈက︀ႃပ︀ိူင︀်ႈလ︀ူင︀်။ 10ထူင︀်ၵ︀ိူင︀်ႈ၊ ꩬ︀ိူဝ်ႛꩬ︀ွꩫ︀်ႇ၊ ၵ︀ႅပ︀်တ︀ိꩫ︀်ႈꩬ︀ွꩫ︀်ႇ၊ ၵ︀ွꩫ︀်ႇတ︀ဝ်ႇꩫ︀ႆ︀ႇၵ︀ဝ်က︀ေႃႇ ပ︀ီဢ︀ဝ်ႈက︀ႃ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူꩫ︀်းဢ︀ꩫ︀်ႈꩬ︀ူꩭီတ︀်ဢ︀မ︀ူးꩭႂ်ႛꩫ︀ႆ︀ႇၵ︀ဝ်ယ︀ႃႇ ꩬ︀ူမ︀ႆ︀ႛဝႃႈလ︀ီင︀်ႇ၊ ဝႃႈထွက︀်ႉꩭႂ်ႛꩫ︀မ︀်။ 11မ︀ၢꩫ︀်ႛလ︀ိူင︀်ႈဝီင︀်းလ︀ိူင︀်ႈမ︀ႆ︀ႛ ꩬ︀ူထိုင︀်က︀ႃက︀ီး ꩭိူꩫ︀်းဢ︀ꩫ︀်ႈꩬ︀ူမ︀ႆ︀ႛ ၵ︀ႂ်ႈꩭၢပ︀်ႉမ︀ႆ︀ႛၵ︀ႃꩬ︀ီꩬ︀ဝ်းတ︀ႃႉ။ က︀ႃႈလ︀ုက︀်ႉမ︀ၢꩫ︀်ႛ၊ လ︀ုက︀်ႉဝီင︀်းဢ︀မ︀ႂ်းမ︀ႆ︀ႛ မ︀ဝ်ဢ︀ွက︀်က︀ႃယ︀ႃႇ ꩭိူꩫ︀်းဢ︀မ︀ႂ်းမ︀ႆ︀ႛꩫ︀ႆ︀ၢႈꩬ︀င︀်ꩬ︀ဝ်းဢ︀ူတ︀ႃႉ။ 12ꩭိူꩫ︀်းမ︀ႆ︀ႛၵ︀ဝ်ႛက︀ႃက︀ီး “ၸ︀ြႃးပ︀ီꩫ︀်ႈꩡ︀ဝ်ႛ ဢ︀က︀ိဝ်းꩭႂ်ႛပ︀ူင︀်ႈက︀တ︀ႃႉ” ꩫ︀ꩬ︀ီယ︀ွꩫ︀်းꩬ︀ူးꩭႂ်ႛတ︀ႃႉ။ 13ꩭိူꩫ︀်းဢ︀မ︀ႂ်း ꩬ︀ူမ︀ႆ︀ႛꩭၢပ︀်ႉက︀ီး ဢ︀ꩫ︀်ႈꩬ︀ူယ︀ွꩫ︀်းꩬ︀ူးꩭႂ်ႛꩫ︀ႆ︀ႇ ꩭိူꩫ︀်းဢ︀မ︀ႂ်းမ︀ႆ︀ႛ ꩭႂ်ႛထိုင︀်က︀ႃတ︀ႃႉ။ ꩬ︀င︀်ဝႃႈꩬ︀ူမ︀ႆ︀ႛ မ︀ဝ်ꩭၢပ︀်ႉက︀ီး ၵ︀ၢမ︀်းဢ︀ꩫ︀်ႈꩬ︀ူယ︀ွꩫ︀်းꩬ︀ူးꩭႂ်ႛဝႆ︀ႇꩫ︀ႆ︀ႇ ꩬ︀ူမ︀ႆ︀ႛꩭႂ်ႛပ︀ွက︀်ႉမ︀ႃးက︀ႃတ︀ႃႉ။ 14ꩭိူꩫ︀်းꩫ︀က︀ေႃႇယ︀ႃ မ︀ၢꩫ︀်ႛဝီင︀်းꩫ︀က︀ေႃႇယ︀ႃ ꩬ︀ူမ︀ႆ︀ႛမ︀ဝ်ꩭၢပ︀်ႉ၊ ဢ︀ꩫ︀်ႈꩬ︀ူꩭူဝ်းမ︀ႆ︀ႛမ︀ဝ်ထွမ︀်က︀ီး လ︀ုက︀်ႉဢ︀မ︀ႂ်းမ︀ႆ︀ႛဢ︀ွက︀်ꩬ︀ီ ၵ︀ဝ်မ︀ႆ︀ႛꩬ︀ူပ︀ႆ︀ၵ︀ွတ︀်ယ︀ဝ်ႇꩫ︀ꩫ︀ႆ︀ႇ ꩭႂ်ႛပ︀ူဝ်းၵ︀ဝ်တ︀ွင︀်းꩫ︀ႆ︀ႇ ၸ︀ွင︀်တ︀ိꩫ︀်ႈတ︀ွႆ︀ဝႆ︀ႇတ︀ႃႉ။ 15က︀ဝ်ႈဝႃႈက︀ွတ︀်။ မ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛပ︀ႅတ︀်ႉတ︀ြႃးꩫ︀ႆ︀ႇ ဝီင︀်းꩬ︀ေႃတ︀ုင︀်ꩫ︀ၵ︀ႃက︀ေႃမ︀ေႃရ︀မ︀ႆ︀ႛ လ︀ိူမ︀်ꩬ︀ႃꩬ︀ီ ဝီင︀်းဢ︀မ︀ႂ်းမ︀ႆ︀ႛတ︀ီပ︀ူင︀်ႈတ︀ၢမ︀်ꩫ︀မ︀်။
လ︀ွင︀်ႈၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ပ︀ိူꩫ︀်ႈတ︀ီꩫ︀ိက︀်ႉꩬ︀ၢက︀်ႉ
(မ︀ႃက︀ု 13.9-13; လ︀ုက︀ႃ 21.12-17)
16ꩫ︀င︀်ပ︀ူႇဢ︀ꩫ︀်ႈဢ︀ူꩫ︀်ႛဢ︀ွꩫ︀်ꩫ︀ႆ︀ႇၵ︀ဝ်မ︀ႆ︀ႛ ပ︀ွႆ︀ꩫ︀ႂ်းၸ︀ုင︀်မ︀ႃလ︀ႆ︀းဢ︀ꩫ︀်ႈꩭႆ︀ၢႇလ︀ူင︀်ꩫ︀ႆ︀ႇၵ︀ဝ်ꩫ︀က︀ꩫ︀်ႈ ꩬ︀ူမ︀ႆ︀ႛက︀ဝ်ႈတ︀ီပ︀ွႆ︀ꩡ︀ႂ်ႇꩫ︀မ︀်။ င︀ႆ︀းꩫ︀ႆ︀ႇꩬ︀ီ ꩫ︀င︀်င︀ူးꩫ︀ႆ︀ႇၵ︀ဝ်လ︀ꩫ︀်ꩬ︀ူမ︀ႆ︀ႛ ꩬ︀တ︀ိꩫ︀က︀ꩫ︀်ႈꩬ︀တ︀ိက︀ꩫ︀်ႈတ︀ႃႉ။ ꩫ︀င︀်ꩫ︀ူက︀်ႉတ︀ူႛꩫ︀ႆ︀ႇၵ︀ဝ်ꩫ︀က︀ꩫ︀်ႈ ဢ︀ူꩫ︀်ႛꩥ︀ေႈက︀ꩫ︀်ႈတ︀ႃႉ။ 17ꩬ︀တ︀ိက︀ꩫ︀်ႈတ︀ႃႉ။ ꩬ︀ူမ︀ႆ︀ႛ ပ︀ိူꩫ︀်ႈꩬ︀ႅဝ်ႛꩬ︀ီ တ︀ီဢ︀ဝ်ႈက︀ႃယ︀ုင︀်းတ︀ြႃးꩫ︀မ︀်။ ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်မ︀ႆ︀ႛ ꩬ︀ူမ︀ႆ︀ႛပ︀ိူꩫ︀်ႈတ︀ီတ︀ုက︀်ႉꩫ︀မ︀်။ 18လ︀ႆ︀ၢးပ︀ိူဝ်ႈꩬ︀ူပ︀ီꩫ︀်ႈတ︀ပ︀ေးက︀ဝ်ႈꩫ︀ႆ︀ႇꩬ︀ီ ꩬ︀ူမ︀ႆ︀ႛ ပ︀ိူꩫ︀်ႈတ︀ီꩡ︀ꩫ︀်ႈက︀ႃပ︀ၢင︀်ႈꩫ︀ႃႛꩡ︀ဝ်ႛၵ︀ုꩫ︀်၊ ꩡ︀ဝ်ႛꩭူဝ်ၵ︀မ︀်းꩫ︀ႆ︀ႇၵ︀ဝ်ꩫ︀မ︀်။ င︀ႆ︀းꩬ︀ီ ၵ︀ဝ်မ︀ႆ︀ႛတ︀မ︀ိူင︀်း၊ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛတ︀မ︀ိူင︀်း ꩬ︀ူꩭီတ︀်ꩬ︀ၢက︀်ႉꩬ︀ေက︀ဝ်ႈꩬ︀ီ တ︀ီꩫ︀ႆ︀ႛꩭူဝ်းၵ︀ၢဝ်ႈၵ︀ၢမ︀်းꩫ︀ီႈꩫ︀မ︀်။ 19ꩫ︀ႆ︀ႇꩫ︀က︀ေႃႇ ꩬ︀ူမ︀ႆ︀ႛ ပ︀ိူꩫ︀်ႈꩡ︀ꩫ︀်ႈက︀ႃꩭူဝ်ယ︀ုင︀်းတ︀ြႃးက︀ီး ꩬ︀ူꩭိုဝ်လ︀ိုဝ်တ︀ီဝႃႈꩫ︀ꩫ︀ႆ︀ႇ ပ︀ီက︀ပ︀်ႉꩡ︀ႂ်ႈ။ မ︀ိူဝ်ႈဢ︀မ︀ႂ်း ၵ︀ၢမ︀်းဢ︀ꩫ︀်ႈꩬ︀ူဝႃႈဝႃႈꩫ︀ႆ︀ႇ ꩫ︀ႂ်းꩡ︀ႂ်ႈꩬ︀ူမ︀ႆ︀ႛ တ︀ီဢ︀ွက︀်မ︀ႃးꩫ︀မ︀်။ 20ၵ︀ၢမ︀်းဢ︀မ︀ႂ်းယ︀ႃႇ ၵ︀ၢမ︀်းꩬ︀ူၸ︀ူႛꩡ︀ဝ်ႛꩵ︀ႈꩡ︀ႂ်ႈ။ ဢ︀ꩫ︀်ႈꩫ︀ႂ်းꩡ︀ႂ်ႈꩬ︀ူမ︀ႆ︀ႛ ၵ︀ွꩫ︀်ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူꩬ︀ႂ်ꩭႂ်ႛꩬ︀ီ ꩬ︀ူဝႃႈꩫ︀မ︀်။ 21ꩡ︀ႃႇလ︀ိူင︀်ႈ က︀ူꩫ︀်းꩫ︀ႆ︀ႇၵ︀ဝ် ပ︀ီႈꩫ︀ွင︀်ႇၸ︀ူႛꩡ︀ဝ်ႛမ︀ႆ︀ႛ ꩫ︀ႂ်းမ︀ိုဝ်းပ︀ိူꩫ︀်ႈမ︀ႆ︀ႛဢ︀ၢပ︀်ႉꩬ︀ီ တ︀ီꩭႂ်ႛဢ︀ဝ်ႈတ︀ႆ︀ၢႈက︀ꩫ︀်ႈꩫ︀မ︀်။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ပ︀ူဝ်ꩫ︀ႆ︀ႇၵ︀ဝ်က︀ေႃႇ လ︀ုက︀်ႉၸ︀ူႛꩡ︀ဝ်ႛမ︀ႆ︀ႛ၊ လ︀ုက︀်ႉꩫ︀ႆ︀ႇၵ︀ဝ်က︀ေႃႇ ပ︀ူဝ်မ︀ေၸ︀ူႛꩡ︀ဝ်ႛမ︀ႆ︀ႛ ꩫ︀ႂ်းမ︀ိုဝ်းပ︀ိူꩫ︀်ႈမ︀ႆ︀ႛဢ︀ၢပ︀်ႉꩬ︀ီ တ︀ီꩭႂ်ႛဢ︀ဝ်ႈတ︀ႆ︀ၢႈꩫ︀မ︀်။ 22လ︀ႆ︀ၢးပ︀ိူဝ်ႈꩬ︀ူပ︀ီꩫ︀်ႈတ︀ပ︀ေးက︀ဝ်ႈꩫ︀ႆ︀ႇꩬ︀ီ ပ︀ိူꩫ︀်ႈတ︀င︀်းမ︀ိူင︀်း ꩬ︀ူမ︀ႆ︀ႛတ︀ီꩡ︀င︀်းက︀ꩫ︀်ႈꩫ︀မ︀်။ ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈက︀ဝ်ႈမ︀ႆ︀ႛ တ︀ူဝ်ပ︀ူဝ်းတ︀ႆ︀ၢႈယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈမ︀ႆ︀ႛယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛ တ︀ီၵ︀ေꩬ︀ေꩭႂ်ႛꩫ︀မ︀်။ 23ꩬ︀ူမ︀ႆ︀ႛပ︀ိူꩫ︀်ႈတ︀ီႈလ︀ိူင︀်ႈမ︀ႆ︀ႛ ꩫ︀ိက︀်ႉꩬ︀ၢက︀်ႉက︀ီး တ︀ီႈလ︀ိူင︀်ႈမ︀ႆ︀ႛပ︀ႆ︀ၢႈက︀ႃတ︀ႃႉ။ က︀ဝ်ႈဝႃႈက︀ွတ︀်။ ꩡ︀ူဝ်ႈက︀ႃႈꩬ︀ူꩫ︀ႂ်းဢ︀ီတ︀်ꩬ︀ြေးမ︀ႆ︀ႛ ꩭူဝ်းၵ︀ၢဝ်ႈၵ︀ၢမ︀်းꩫ︀ီႈမ︀ဝ်ꩡ︀ွတ︀်ꩫ︀ႆ︀ႇ လ︀ုက︀်ႉက︀ူꩫ︀်း တ︀ီပ︀ွက︀်ႉမ︀ႃးꩫ︀မ︀်။
24တ︀ပ︀ေးဢ︀ꩫ︀်ႈလ︀ႂ်ႈက︀ေႃႇ ꩬ︀ြႃမ︀ႆ︀ႛꩵ︀ႈယ︀ႂ်ꩬ︀ႃ၊ ၵ︀ႃႛဢ︀ꩫ︀်ႈလ︀ႂ်ႈက︀ေႃႇ ꩡ︀ဝ်ႛမ︀ႆ︀ႛꩵ︀ႈယ︀ႂ်ꩬ︀ႃ။ 25င︀ႆ︀းꩫ︀ႆ︀ႇꩬ︀ီ တ︀ပ︀ေးꩫ︀ꩫ︀ႆ︀ႇ ꩫ︀င︀်ꩬ︀ြႃမ︀ꩫ︀်းꩫ︀က︀ꩫ︀်ႈ ပ︀ီꩫ︀်ႈမ︀ႃးက︀ီး ထုက︀်ꩫ︀ီႈꩡ︀ူမ︀်းꩫ︀မ︀်။ ၵ︀ႃႛꩫ︀ꩫ︀ႆ︀ႇက︀ေႃႇ ꩫ︀င︀်ꩡ︀ဝ်ႛမ︀ꩫ︀်းꩫ︀က︀ꩫ︀်ႈပ︀ီꩫ︀်ႈမ︀ႃးက︀ီး ထုက︀်ꩫ︀ီႈꩡ︀ူမ︀်းꩫ︀မ︀်။ က︀ဝ်ႈၸ︀ူႛပ︀ီꩫ︀်ႈꩡ︀ဝ်ႛꩭူဝ်ꩭိူꩫ︀်းမ︀ႆ︀ႛ ပ︀ေလ︀ꩡ︀ေပ︀ုလ︀ꩫ︀ꩬ︀ီꩭွင︀်ႇက︀ီး ꩬ︀ူၸ︀ူႛပ︀ီꩫ︀်ႈက︀ူꩫ︀်းꩭိူꩫ︀်းꩫ︀ႆ︀ႇၵ︀ဝ်မ︀ႆ︀ႛယ︀ႃႇ ꩡ︀ိုဝ်ႈဢ︀ꩫ︀်ႈၵ︀ႆ︀ႇမ︀ဝ်က︀ႃးꩭႆ︀ၢႇꩬ︀ႃꩫ︀ႆ︀ႇ တ︀ီꩭွင︀်ႇꩫ︀မ︀်” ꩫ︀ဝꩫ︀်ႇ။
က︀ူဝ်ႇဢ︀ꩫ︀်ႈꩭဝ်းဝႃႈက︀ူဝ်ႈ
(လ︀ုက︀ႃ 12.2-7)
26င︀ႆ︀းꩫ︀ႆ︀ႇꩬ︀ီ က︀ူꩫ︀်းဢ︀မ︀ႂ်းၵ︀ဝ်မ︀ႆ︀ႛပ︀ီက︀ူဝ်ႈ။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀ꩫ︀်ႈင︀ႆ︀ႚꩭူမ︀်ႛဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ပ︀ုတ︀်ဝႃꩰၵ︀ွတ︀်ꩬ︀ီ ဢ︀ꩫ︀်ႈင︀ႆ︀ႚ ဢ︀ဝ်ႈမ︀ႅပ︀်ဝႆ︀ႇꩫ︀ႆ︀ႇၵ︀ဝ်မ︀ႆ︀ႛက︀ေႃႇ တ︀ီဢ︀ဝ်ႈပ︀ျႃးလ︀ႃႇꩰၵ︀ွတ︀်ꩫ︀မ︀်။ 27ဢ︀ꩫ︀်ႈက︀ဝ်ႈꩬ︀ူမ︀ႆ︀ႛ ပ︀ၢင︀်ႛၵ︀မ︀်ႈမ︀ႆ︀ႛဝႃႈꩫ︀ႆ︀ႇၵ︀ဝ် ꩬ︀ူက︀ၢင︀်ႈဝꩫ︀်းမ︀ႆ︀ႛ ၵ︀ႆ︀ႈပ︀ွက︀်ႉတ︀ႃႉ။ ဢ︀ꩫ︀်ႈက︀ဝ်ႈꩬ︀ူမ︀ႆ︀ႛꩫ︀ႆ︀ၢႈ တ︀ီတ︀်ꩡ︀ိပ︀်ႉꩰꩬ︀ီဝႃႈꩫ︀ႆ︀ႇၵ︀ဝ် ꩬ︀ူလ︀ုက︀်ႉꩡ︀ၢꩫ︀်းမ︀ႆ︀ႛ တ︀ႅဝ်တ︀ႃႉ။ 28က︀ူꩫ︀်းဢ︀ꩫ︀်ႈတ︀ူဝ်ႈမ︀ႆ︀ႛꩫ︀ႆ︀ၢႈꩬ︀ိုင︀် ဢ︀ဝ်ႈတ︀ႆ︀ၢႈꩬ︀ီ ၵ︀ွꩫ︀်မ︀ႆ︀ႛဢ︀ဝ်ႈတ︀ႆ︀ၢႈမ︀ဝ်ꩫ︀ႆ︀ႛမ︀ႆ︀ႛ ပ︀ီက︀ူဝ်ႈ။ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈတ︀ူဝ်ႈမ︀ႆ︀ႛတ︀မ︀ိူင︀်း ၵ︀ွꩫ︀်မ︀ႆ︀ႛတ︀မ︀ိူင︀်း ပ︀ွႆ︀တ︀ူက︀်င︀ႃးလ︀ႆ︀ၢးပ︀ီꩫ︀်ႈမ︀ႆ︀ႛꩬ︀ိုင︀် က︀ူဝ်ႈယ︀မ︀်ႈက︀ꩫ︀်ႈတ︀ႃႉ။ 29င︀ိူꩫ︀်းတ︀ွင︀်းၵ︀ႅပ︀်လ︀ိူင︀်ႈက︀ီး ꩫ︀ူက︀်ႉꩡ︀ွက︀်ꩬ︀ွင︀်တ︀ူဝ်ႈꩬ︀ိုဝ်ႇꩫ︀ႆ︀ႛမ︀ဝ်ꩡ︀ႂ်ႈ။ ꩫ︀ႆ︀ႇꩫ︀က︀ေႃႇ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူ ဢ︀ၵ︀ၢင︀်းမ︀ဝ်ယ︀င︀်းက︀ီး ꩫ︀ူက︀်ႉꩡ︀ွက︀်တ︀ူဝ်ႈလ︀ိူင︀်ႈꩫ︀ႆ︀ၢႈက︀ေႃႇ ꩵ︀ႈꩫ︀ႆ︀ႛတ︀ႆ︀ၢႈ။ 30ꩬ︀ူမ︀ႆ︀ႛꩫ︀က︀ီး ၵ︀ူꩫ︀်ꩭူဝ်ꩬ︀ူတ︀င︀်းမ︀ိူင︀်းမ︀ႆ︀ႛတ︀မ︀ိူင︀်းက︀ေႃႇ မ︀ꩫ︀်းꩡ︀ဝ်ႛၵ︀ၢꩫ︀်းဝႆ︀ႇဢ︀ူ။ 31င︀ႆ︀းꩫ︀ႆ︀ႇꩬ︀ီ ꩬ︀ူပ︀ီက︀ူဝ်ႈ။ ꩬ︀ူမ︀ႆ︀ႛယ︀ႃႇ ꩫ︀ူက︀်ႉꩡ︀ွက︀်ဢ︀ၢꩫ︀်တ︀ၢꩫ︀်မ︀ႆ︀ႛမ︀ဝ်က︀ႃး ၸ︀ြႃးပ︀ီꩫ︀်ႈꩡ︀ဝ်ႛလ︀ႅင︀်ႇꩬ︀ႃဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛꩭၢပ︀်ႉ မ︀ဝ်ꩭၢပ︀်ႉ
(လ︀ုက︀ႃ 12.8,9)
32ꩬ︀ူက︀ဝ်ႈမ︀ႆ︀ႛ ပ︀ၢင︀်ႈꩫ︀ႃႛက︀ူꩫ︀်းမ︀ိူင︀်းမ︀ႆ︀ႛ မ︀တ︀်ႉꩡ︀ဝ်ႛက︀ီး က︀ဝ်ႈက︀ေႃႇ ꩬ︀ူမ︀ႆ︀ႛ ပ︀ၢင︀်ႈꩫ︀ႃႛပ︀ူဝ်က︀ၢင︀်ႈꩭၢဝ်က︀ဝ်ႈမ︀ႆ︀ႛ တ︀ီမ︀တ︀်ႉတ︀ပ︀ေးက︀ဝ်ႈꩫ︀မ︀်။ 33ꩬ︀ူက︀ဝ်ႈမ︀ႆ︀ႛ ပ︀ၢင︀်ႈꩫ︀ႃႛက︀ူꩫ︀်းမ︀ိူင︀်းမ︀ႆ︀ႛ မ︀ဝ်မ︀တ︀်ႉꩡ︀ဝ်ႛက︀ီးယ︀ႃႇ က︀ဝ်ႈက︀ေႃႇ ꩬ︀ူမ︀ႆ︀ႛပ︀ၢင︀်ႈꩫ︀ႃႛပ︀ူဝ်က︀ၢင︀်ႈꩭၢဝ်က︀ဝ်ႈမ︀ႆ︀ႛ တ︀ပ︀ေးက︀ဝ်ႈꩫ︀ꩬ︀ီꩵ︀ႈမ︀တ︀်ႉ။
က︀ႃႈꩡ︀ဝ်ႛယ︀ေꩬ︀ုမ︀ႆ︀ႛယ︀ုမ︀်ယ︀မ︀်ႈ
(လ︀ုက︀ႃ 12.51-53; 14.26,27)
34ယ︀ဝ်ႇက︀ီး မ︀ꩫ︀်းꩡ︀ဝ်ႛက︀ၢပ︀်ꩬ︀ီဝႃႈꩫ︀ႆ︀ႇ “က︀ဝ်ႈက︀ျွႃးမ︀ႃးမ︀ိူင︀်းက︀ၢင︀်ႈꩫ︀ႆ︀ႇ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ မ︀ႃးဢ︀ဝ်ႈထုက︀်က︀ꩫ︀်ႈꩫ︀မ︀်ꩫ︀ꩬ︀ီ ပ︀ီၵ︀ႂ်ႈꩡ︀ႂ်ႈ။ က︀ဝ်ႈမ︀ႃးꩫ︀ႆ︀ႇ မ︀ႃးဢ︀ဝ်ႈက︀ၢက︀်ႉꩡ︀ႂ်ႈက︀ꩫ︀်ႈꩫ︀မ︀်။ 35က︀ဝ်ႈမ︀ႃးꩫ︀ႆ︀ႇ ပ︀ူဝ်မ︀ႆ︀ႛလ︀ုက︀်ႉꩡ︀ႆ︀ၢးꩫ︀ႆ︀ႇၵ︀ဝ်၊ မ︀ေမ︀ႆ︀ႛလ︀ုက︀်ႉယ︀ိင︀်းꩫ︀ႆ︀ႇၵ︀ဝ်၊ မ︀ေႈꩡ︀ဝ်ႛမ︀ႆ︀ႛ လ︀ုက︀်ႉပ︀ႂ်ႇꩫ︀ႆ︀ႇၵ︀ဝ် မ︀ႃးဢ︀ဝ်ႈꩬ︀ၢꩫ︀်တ︀ၢꩫ︀်းက︀ꩫ︀်ႈꩫ︀မ︀်။ 36လ︀ꩫ︀်ꩬ︀ူဢ︀ꩫ︀်ႈၵ︀ႅꩫ︀်းယ︀ႂ်ယ︀ႃႇ လ︀ုက︀်ႉက︀ူꩫ︀်းꩭိူꩫ︀်းꩬ︀ူၸ︀ူႛꩡ︀ဝ်ႛမ︀ႆ︀ႛꩫ︀မ︀် တ︀ီဢ︀ွက︀်မ︀ႃးꩫ︀ႆ︀ႇ။ 37က︀ူဝ်ႇဢ︀ꩫ︀်ႈက︀ဝ်ႈမ︀ႆ︀ႛပ︀ူꩫ︀်ႇꩬ︀ီ ပ︀ူဝ်မ︀ႆ︀ႛꩫ︀က︀ေႃႇယ︀ႃ မ︀ေမ︀ႆ︀ႛꩫ︀က︀ေႃႇယ︀ႃ ၵ︀ႅꩫ︀်းꩭၢက︀်ႉꩫ︀ႆ︀ႇယ︀ႃႇ ပ︀ီꩫ︀်ႈတ︀ပ︀ေးက︀ဝ်ႈꩵ︀ႈထႅက︀်ႉ။ က︀ူဝ်ႇဢ︀ꩫ︀်ႈက︀ဝ်ႈမ︀ႆ︀ႛပ︀ူꩫ︀်ႇꩬ︀ီ လ︀ုက︀်ႉꩡ︀ႆ︀ၢးမ︀ႆ︀ႛꩫ︀က︀ေႃႇယ︀ႃ လ︀ုက︀်ႉယ︀ိင︀်းမ︀ႆ︀ႛꩫ︀က︀ေႃႇယ︀ႃ ၵ︀ႅꩫ︀်းꩭၢက︀်ႉꩫ︀ႆ︀ႇက︀ေႃႇ ပ︀ီꩫ︀်ႈတ︀ပ︀ေးက︀ဝ်ႈꩵ︀ႈထႅက︀်ႉ။ 38က︀ူဝ်ႇဢ︀ꩫ︀်ႈꩬ︀ဝ်ဝႃးမ︀ိုဝ်းၸ︀ူႛꩡ︀ဝ်ႛပ︀ၢက︀်ႉꩬ︀ီ ꩡ︀ွမ︀်းက︀ꩫ︀်ႛလ︀င︀်က︀ဝ်ႈမ︀ဝ်ပ︀ီꩫ︀်ႈꩫ︀ႆ︀ႇယ︀ႃႇ ပ︀ီꩫ︀်ႈတ︀ပ︀ေးက︀ဝ်ႈꩵ︀ႈထႅက︀်ႉ။ 39က︀ူဝ်ႇဢ︀ꩫ︀်ႈက︀ဝ်ႈမ︀ႆ︀ႛပ︀ူꩫ︀်ႇလ︀ိူဝ်ꩬ︀ီ ဢ︀ꩬ︀ၢက︀်ႉၸ︀ူႛꩡ︀ဝ်ႛမ︀ႆ︀ႛလ︀ႅင︀်ႇꩬ︀ႃꩫ︀ႆ︀ႇ ဢ︀ꩬ︀ၢက︀်ႉꩬ︀ုမ︀်းဢ︀ူ။ ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈလ︀ႆ︀ၢးပ︀ိူဝ်ႈꩡ︀ႃႇက︀ဝ်ႈꩬ︀ီ ဢ︀ꩬ︀ၢက︀်ႉၸ︀ူႛꩡ︀ဝ်ႛမ︀ႆ︀ႛမ︀ဝ်လ︀ႅင︀်ႇꩫ︀ႆ︀ႇယ︀ႃႇ ဢ︀ꩬ︀ၢက︀်ႉꩫ︀ႆ︀ႛဢ︀ူ။
လ︀ွင︀်ႈꩬ︀ူးဢ︀ꩫ︀်ႈတ︀ီꩫ︀ႆ︀ႛ
(မ︀ႃက︀ု 9.41)
40က︀ူဝ်ႇဢ︀ꩫ︀်ႈ ꩬ︀ူမ︀ႆ︀ႛꩭၢပ︀်ႉꩫ︀ႆ︀ႇ က︀ဝ်ႈမ︀ႆ︀ႛက︀ေႃႇꩭၢပ︀်ႉယ︀ဝ်ႇ။ က︀ူဝ်ႇဢ︀ꩫ︀်ႈက︀ဝ်ႈမ︀ႆ︀ႛ ꩭၢပ︀်ႉꩫ︀ႆ︀ႇ ꩡ︀ဝ်ႛ ဢ︀ꩫ︀်ႈက︀ဝ်ႈမ︀ႆ︀ႛပ︀ွႆ︀ꩡ︀ႂ်ႇမ︀ႆ︀ႛက︀ေႃႇ ꩭၢပ︀်ႉတ︀ွꩫ︀်ႛယ︀ဝ်ႇ။ 41က︀ူဝ်ႇဢ︀ꩫ︀်ႈပ︀ရ︀ေႃးၸ︀ႅတ︀်ႉမ︀ႆ︀ႛ မ︀တ︀်ႉပ︀ရ︀ေႃးၸ︀ႅတ︀်ႉꩬ︀ီꩭၢပ︀်ႉတ︀ွꩫ︀်ႛꩫ︀ႆ︀ႇ ꩬ︀ူးဢ︀ꩫ︀်ႈပ︀ရ︀ေႃးၸ︀ႅတ︀်ႉဢ︀မ︀ႂ်းတ︀ီꩫ︀ႆ︀ႛꩫ︀ႆ︀ႇ မ︀ꩫ︀်းက︀ေႃႇꩫ︀ႆ︀ႛဢ︀ူ။ က︀ူဝ်ႇဢ︀ꩫ︀်ႈ က︀ူꩫ︀်းဢ︀ꩫ︀်ႈပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩬ︀ိုဝ်ႈတ︀ူဝ်မ︀ႆ︀ႛ လ︀ႆ︀ၢးပ︀ိူဝ်ႈမ︀ꩫ︀်းꩬ︀ိုဝ်ႈတ︀ူဝ်ꩬ︀ီ ꩭၢပ︀်ႉတ︀ွꩫ︀်ႛꩫ︀ႆ︀ႇ ꩬ︀ူးဢ︀ꩫ︀်ႈက︀ူꩫ︀်းꩬ︀ိုဝ်ႈတ︀ူဝ်ဢ︀မ︀ႂ်းတ︀ီꩫ︀ႆ︀ႛꩫ︀ႆ︀ႇ မ︀ꩫ︀်းက︀ေႃႇꩫ︀ႆ︀ႛဢ︀ူ။ 42က︀ူဝ်ႇဢ︀ꩫ︀်ႈတ︀ပ︀ေးက︀ွႆ︀ႛက︀ဝ်ႈမ︀ႆ︀ႛ မ︀တ︀်ႉတ︀ပ︀ေးက︀ဝ်ႈꩬ︀ီ ꩫ︀မ︀်ႇက︀တ︀်က︀ွက︀်လ︀ိူင︀်ႈလ︀ီင︀်ႇꩫ︀ႆ︀ႇ ဢ︀က︀ိဝ်းတ︀ီꩫ︀ႆ︀ႛမ︀ဝ်ပ︀ိတ︀်ႉꩫ︀မ︀်။
Цяпер абрана:
မ︀တ︀်တ︀ႄး 10: kht
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023 (Active), Wycliffe Bible Translators, Inc. All rights reserved.