Kutachika 13
13
Abarama naLoti hiyakwambuka
1Abarama wanyamukili wafumini muEjipitu, niŋodindi, niantu indi ejima, niyuma yindi yejima, niLoti hamu, hakuya mumpata yakukabeta kakuchidiilu.
2Abarama wadiŋi wasweja kuheta, niŋombi, nisiliva, niwuru.
3Hakwenda njila yakufuma kukabeta kakuchidiilu nakuya nikuBeteli, kwadiŋi itenti dindi hatachi, mukachi kaBeteli naAyi;
4hakuya kuna kwadiŋi kameŋa kakulambwila katuŋiliyi hakusambila; kwenoku Abarama #4:26hakutambika niijina daYehova.
5Loti niyena, owu wayili naAbarama, wadiŋi nawanyikoku jindi niampembi jindi, niaŋombi jindi, nimatenti indi.
6Ituŋa dayikeheleli, kutwesha kushakama hamu nehi; mahetawu aswejeli kuvula, hiyatwesheli nawa kushakama hamuku.
7 #
26:20-21
Kwanyamukili ndombu mukachi kawatubiŋa abiŋilaŋa ŋombi jaAbarama nawatubiŋa abiŋilaŋa ŋombi jaLoti; henahana niaKenani niaPerizi ashakamini mwituŋa.
8Abarama hakumwila Loti, nindi, #Yish 15:18; 20:3; Fwi 2:4-5Bayi hekala ndombu, mwani, nanami hela nawatubiŋa twami natubiŋa tweyuku; muloŋa etu mwivumu detu.
9Ituŋa dejima odu, hiwunadimonuku? Ambukakuku, mwani, kudami; neyi wukuya kuchikasa chachimunswa ami nukuya kuchikasa chachidiilu, neyi eyi wukuya kuchikasa chachidiilu ami nukuya kuchikasa chachimunswa.
10Loti wafumbwili mesu indi, hakumona chana chaYodana chejima, komana chikweti tuloŋa kwejima, henohu Yehova kanda ajilumuni Sodoma naGomoraku, chadiŋi neyi itempa daYehova, chadiŋi neyi ituŋa daEjipitu mutamba wakutwala kuZowari.
11Loti hakutonda chana chaYodana chejima; Loti wayili kwindi kumusela; hiyakwambuka wumu namukwawu.
12Abarama washakamini mwituŋa daKenani, Loti niyena washakamini munyikala yakuchana, walemeni itenti dindi kwokuSodoma kachi.
13Ilaŋa dinu amayala akuSodoma adiŋi atama, adiŋi akwakuputola kudi Yehova nankashi.
14Cheliliyi Loti naambuki dehi kudi yena, Yehova hakumwila Abarama, nindi, Fumbulaku mesu eyi, kufuma hanu hiwekala, wutali nikukabeta, nikukabeta, nikumusela, nikumujika;
15ituŋa dejima diwukumonodu, nakakwinkadu, deyi nidawanyaneyi hayanyaka.
16Nianyaneyi nakayivulisha neyi #Kuch 23:10lunkuŋu lwahamaseki; neyi lunkuŋu lwahamaseki anatweshi kuluchinda, nianyaneyi akayichinda nawa.
17Nyamukaku, wuyi nakwendesha mwituŋa nimudalehela nimudatohela; muloŋa nakakwinkadu.
18Abarama hakulemuna niitenti dindi, hakuya nakushakama kunyitondu yawulelu yaMamiri, yekala muHeberoni, yomutuŋilaku niYehova #8:20kameŋa kakumulambwila.
Цяпер абрана:
Kutachika 13: MWW04
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
The Holy Bible in Lunda Ndembu © United Bible Societies, 2003.