Matyò 7
7
Ezaʼlê kûmə̀ ə̀ghɨ ghɛ ə saʼa ghə mɔ̀ʼɔ
(Lûk 6.37-38; 6.41-42)
1Kə ghàyn ə saʼa ghɨ mɔ̀ʼɔ, kə Zhə̀fè tə tàʼa saʼa ghàyn. 2Kûmə̀ nə Zhə̀fè tə saʼa ghàyn kè endom vɛ ə ghàyn saʼa ghɨ mɔ̀ʼɔ ghe ətəyn. Kûmə̀ nə fɨ̀aʼ zɛ ə ghàyn saʼa ghɨghe ətəyn, ə̀ nyì kepî fɨ̀aʼ ətəyn ə Zhə̀fè tə saʼa ghàyn ətəyn 3kûmə̀ ghè ə ò naynə saʼlə̀ fə fe kâʼfè ànɛ̂ eshi, pîza fe va kôm ə fekàʼ kɛ ə ke nyi ə gho eshi ə? 4Ò kàʼa ò pi zayn sê ànɛ̂ nə, “tyəʼ m fɨse saʼlə̀ fə fe kâʼfè ə ghò eshi,” mə ò kyi akôm ə gho e shi ə? 5Ghɨ ekaŋkaŋə nə ghɨ̂yn! Fɨse chì kôm ə fekàʼ kɛ ə ghò eshi, ə o nyi kàʼa ò fɛte fe se njiə fɨsê esaʼ ə fe kàʼ zə ànɛ̂ eshi.
6Kə ghàyn nji fɨa ə Fezhə̀vè ə fo sê puse; se nə̀ kə̂mnə̀ ə se kɛse ndômnè ke ghàyn. Kə ghàyn tə mâʼà tèfɨa taynte tɨməte sê kwùnduŋve; ve nə̀ tsə̂lə̀ kə ndò təynte ègholə.
Ezaʼlê nə ghɨ ghə pfɨfə èfɨa vɛ ə ghənə kyiŋə sê Zhə̀fè
(Lûk 11.9-13)
7Pfɨf sê Zhə̀fè, ə È nə̂ fo sê gho, kyɨŋ ə Zhə̀fè nə̂ nəyn ə ò fe, ngɔʼte, ə Zhə̀fè nə̂ chwie chondɛo sê ghò. 8Kûmə̀ nə ə̀ pfɨfə pîndè sê Zhə̀fè ə è nə̂ kyi, ə kyiŋə pîndè ə è nə̂ fe. Nâʼà pîndè vɛ ə è ngɔʼte chondɛve, ə Zhə̀fè nə̂ chwie sè vəyn. 9Ə̀ nyi nde ə̂ ghàyn əfètəyn ə vâ vəyn pfɨf payn ə kwaŋke, ə è fo vəyn è chize ə? 10Mə ə̀ nyi nde ə ghâ fètəyn ə vayn kàʼa è pfɨf mbwɔ̀kè, ə è fo mbam sê vəyn ə? 11Mə ghàyn pofə nyî, ke se fo efɨa echûŋvè sê ghɔyn ghanə, ə zə nyi tayn zàyn sê pɨ̀a vâyn vè ekwùtwəyn se fo efɨa echûŋvè sê ghɨ ghɛ ghe pfɨf sê Vəyn ə!
12Nə̀yn sê wùə mɔ̀ʼɔ kè eghɨ kə ò kyiŋə nə è nəyn sê ghò, ə̀ zɨnə nyi eghɛ zɛ làŋ ə Mosîskè tyə̀nə è zaʼlê ə fɨ̀aʼtè èghaʼâzè. E nyi nə ghàyn ə nə̂ naʼapi ghè sê ghɨ kè kə ghàyn kɔ̀ŋə̀ nə ə nə nə̂ sê ghàyn. Ə̀ zɨnə nyi eghɛ zɛ lâŋ ə Fezhə̀kè è kə Fɨaʼtèkè lotə zaʼlə.
Ndom endam zɛ ə ze tə mîə va tɛ kə nyi.
(Lûk 13.24)
13Njisə̀s ə pìə kwəynsə̂ nə, Nji elùʼ efɔ̀yn ə Fezhə̀e echo ndɛ etətə̂ kûmə̀ nə ndom ewùsve ghaʼa kə nyî mə ndom vɛ ə ve ndûə ətəyn ghaʼa kə nyî, ghɨ ghe tsɨ̂ə kə nyi kə ndûə ətəyn. 14Pîza, cho ə mbàyn zɛ ə ze njiə endam zɛ ə ze tə mìə va tətə̂ kə nyi. Ndom vɛ ə ve ndùə fumə, e tɛ kə nyi se tsɛ̀ ətəyn. Ə̀ nyi ke m̀fɨatə̀ mə ghɨ̀m kə m̀ tsɛ fu.
Ezaʼlê kûmə̀ fèkâʼ è twɔm vɛ ə fe muə
(Lûk 6.43-44)
15Ghàyn e tɔ̂ʼnə̀ kûmə̀ sèfɨ̀aʼtè sə akaŋse. Ghənə chwîtə̀ kə piə ghənə nyi è ngɨmnêzè kə se ndzè pîza mə ə ghənə ətəm, ghənə pofə kə se nyam sə epɨase. 16Ghàyn nə kê ghənə tɔynə̂ endom vɛ ə ghənə nə̂ ghɛ ghe ətəyn. Ə paʼà tyə̂m pə kɔ̂nə̀ m̀namâs ə tə m̀sòlèndzɔŋ, pî sèfîks vayn kàʼa se mu m̀maŋngòlə̀. 17Kè pi endom nə vɨnə mə, kâʼ fɛ ə fe ndəmə achûŋ nə muə kəpî ètwɔm echûŋvè. Pîza kâʼ fɛ ə fe ndəmə va achûŋ vayn kàʼa fe mu twɔm echûŋvè. 18Kâʼ fe chûŋfè vayn kàʼa fe mu twɔm e pive, mə fepife vâyn kàʼa fe mu twɔm echûŋvè. 19Ə tə kwə̂ maʼà nâʼà pì fèkâʼ fè kè fɛ ə fe muə va twɔm echûŋvè ə maʼa ewùs. 20Zɨnə tyə̀nə̀ nə ə tə fe kê sè fɨ̀aʼtè sə akaŋse əghɛ ghɛ ə ghənə nə̂.
Ezaʼlê kûmə̀ ə̀ghɨ ghɛ ə ghe chûmtə̀ Njisə̀s è təm ghə pɛ̀
(Lûk 13.25-27)
21Ə̀ va chi nâʼà pîndè vɛ ə è tə tɔŋtə mi nə, “Pɛ̂pɛ, Pɛ̂pɛ” ə è tə njiə elùʼ efɔ̀yn ekwùtwəyn. Ə tsɛ̂ kə va ghɨ ghɛ ghɛ ə nə̂ kə pɨ̀a vɨ̂m ekwùtwəyn kyiŋə. 22Shɨ̂ŋə̀ kɛ ə tuʼ ə saʼe tə pə̂, ghɨ etsɨghe tə pîə sê mi nə, “Pɛ̂pɛ, Pɛ̂pɛ! ə gho ezə ghàs ə tè wàmnè tom ə̀ Fèzhə̀, ə gho ezə ghàs ə tè chùm fɨsê pamə̂ tə satàyntè te tsɨ̀ə kə nyî ə nə̀ ə̀ghɛ ekayntəghe ghe tsɨ̂ə kə nyi.” 23Ashìŋə̀ nə kɛ ə m pi sê ghənə nə, “M paʼà tyə̂m kê ghàyn. Ghàyn ndo ə mì etipì, ə ghɨ epi ghɨnə̀!”
Ə wùə èpɛ ètɔfə è wùə èpɛ àngo
(Lûk 6.47-49)
24E za nyi nə naʼapî ndè vɛ è zɨ wâmnè zɨme ə ndə̀mə̀ zəynze, ə nə̀ èghɛ zɛ ə ze pîə, è nyi kə wùə etɔfə vɛ ə è pɛ ndɛ ə̀ vəyn etùə ànayn kə sas ə ndɛ ətəynze ə fɛtə̂ tɛ. 25Ghol atyaʼze ə tso, tsose ə tɛ ə fɨ kɔʼɔ, fofke e nə̂ʼsə̀ ndɛ ə̀təyn nâʼà sə atyaʼ. Pîza è zə tàʼa pfɨ̀ kûmə̀ nə ə tè pɛ zɨ̂ynzè etûə ànayn.
26Pîza, mə ə̀ zɨ pîndè ghɛ zɨme ə tàʼa kɔʼsê ə zəyn, nyi ke kə angô kɛ ə ke pɛ ndɛ ə̀ vəyn etùə àshishi. 27Epàm ətəyn, gholze ə tso, tsose ghaʼâsè ə tɛ ə fɨ kɔʼɔ, fof atyaʼke ə tsɛ̀ ə nə̀ʼsə̀ ndɛ ə̀təyn, è zə pfɨ̀ə ə sàʼtə̀ m̀fɨatə̀ m̀fɨatə̀.
Atyaʼ kɛ ə Njisə̀s kyi sə̂ zaʼlə̂
28Kə Njisə̀s tè zaʼle mɨ̂sè ə̀ghɛ nə ghɨ̂nə̀, choze ə zomə anɔ̂yn ə ghɨ̀ kɛ endom vɛ È zaʼle ətəyn. 29È tè zaʼlə va kə setyə̀ynsè sə alàŋsè, pîza, zaʼlê ə Vəynze e pɨl kyi àtyaʼ.
Цяпер абрана:
Matyò 7: bfm
Пазнака
Падзяліцца
Капіяваць
Want to have your highlights saved across all your devices? Sign up or sign in