Markus 8
8
Yesuw a vəl dukw mezime a gà mburma ana ti sle
dəbuw faɗ a
Mata 15:32-39
1I dəba ŋa ya, a pat ŋgiɗ duwa, gà mburma hinne ti yahaba gər a təv Yesuw asa. Aləka may a dza ba aà tar, a wir aà teriŋa, aɗaba dukw mezime ana a riŋ aà tar asa tsiye. Yesuw a zal a gà ɓəzla mazazama ŋgat, a gwaɗa a tar: 2«Gà mburma aaha ti ndziŋ are tsehe ka, hinne, aɗaba mehinne makər ka, tar ɗa i təv ga i faha, dukw mezime a riŋ aà tar tsa. 3Ama i sle aà megweɗe a tar ka, dum a gà ma kurum tsa, aɗaba may a bets a tar aà vatwa na ti de a a ma ya asa, aɗaba gà mburma hinne ika magər tar ka, ga tar diriŋ.» 4Gà ɓəzla mazazama ŋgat ata ta gwaɗar aaka: «Kinehe, ki ŋgetekewere a dukw mezime ŋa ana, i ŋga ya, na aà məvəla a gà mburma aaha i kusak aaha ya, na dite a sle a ter a dze ya?» 5I dəba ŋa ya, Yesuw a gwaɗa a tar: «Ɗaf a riŋ aà kurum dze ana, tapa ndaw?» Ta gwaɗar aaka: «Ɗaf ɗa aà mər ka, tapa təsəla.»
6I dəba ŋa ya, Yesuw a gwaɗa a gà mburma ata: «Ndzum a bəɗ kwaŋ.» A daha, a ndzək aà tar gà ɗaf ata tapa təsəla ya, a ge dərraha kəkaaha a Mbulum, dite a sasa ikaba ya. A zal dər a gà ɓəzla mazazama ŋgat aaha, a dzaya a tar. Gà mburma ŋgar ata ibam, tə daha, tə dzaya a gà mburma ata tserdze. 7Kilif duwa a riŋ aà tar i fata zaakwa asa. Yesuw a zla, a ge dərraha kəkaaha a Mbulum asa. A gwaɗa a gà ɓəzla mazazama ŋgat ata: «Dzàyum a tar aaka asa.» Gà ɓəzla mazazama Yesuw ata tə daha, tə dzaya a tar aaka kilif ata asa. 8-9Dite ku weke a zəm ɗaf ata nda kilif a ka, a sler. Ama gà mburma ana tə zəm ɗaf ata ya ka, ti sle dəbuw faɗ. Dite ɗaf ana a zeha aà tar a, nda kilif aaha ya ka, gà ɓəzla mazazama Yesuw ata tə daha, ti yahar gər. Ti yahar gər ka, a raha a gà tàkwasa təsəla. I dəba ŋa ya, Yesuw a gwaɗa a gà mburma ata: «Dayum a gà ma kurum kuɗa.» 10Ŋgat ŋa ibam, ta mah ba nda gà ɓəzla mazazama ŋgat aaha tsara. Tə daha, tə tsala a slə̀làh yam, tə daba aka ahəɗ Dalmanuta.
Gà *Farisa ta wiz dukw mene aà mburma aà Yesuw
Mata 16:1-4
11Aləka gà Yesuw nda gà ɓəzla mazazama ŋgat ti ndze aka ahəɗ ata ka, gà Farisa tə daha a təv ŋgar. Tə daha ka, tə dza akaba bazlam nda gà Yesuw, aɗaba a sàs a tar maslàlà ŋgat i yam a. Ta wiz aà ŋgat ndzer ŋana ya. Ta gwaɗar: «Ge dukw mene aà mburma yak ana Mbulum a slər dərra kər a, dite na mìi sir a dər ka, ndzer kaɗəŋ a.» 12Yesuw a sife ŋgìk, aɗaba bazlam tar ata ti tsiker a ka, a tsəɓar. A gwaɗa a tar: «Aàmala na kurum gà mburma ana kinehe, kurum riŋ nda are ya ka, ki wizwim a dukw mene aà mburma asa dze ya? Iye ihər i gweɗe a kurum a nda ndzer: Kurum nda gà na piŋŋe ta gəs bazlam gà tsiye ka, ki ŋgetwim a a dukw mene aà mburma asa tsa.» 13I dəba ŋa ya, Yesuw a miyak à tar a fata, tə tsalaba a slə̀làh yam nda gà ɓəzla mazazama ŋgat, tə da aka lìdè gìgìze ŋgiɗ pam.
Yesuw a ndzikiɗ ba à bazlam gà *Farisa nda biy *Hiridus
kamala giɗe ana a kwasawa à duwa ya
Mata 16:5-12
14Gà ɓəzla mazazama Yesuw ta fə̀r ikaba i slə̀làh yam a ka, ɗaf a riŋ aà tar tsa. A zeha riŋ aà tar ka, tapa ilik pəra, aɗaba masəkəma ŋa aka məts a tarra gər ika lìdè gìgìze ŋgiɗ a. 15Aləka i dəba ŋa ya, Yesuw a be a tar à ɗaf. A gwaɗa a tar: «Gwim metsehe agəra giɗe gà Farisa nda biy Hiridus ana a kwasawa à duwa ya, lele.» 16Gà ɓəzla mazazama ŋgat ata ta gwaɗaba ika magər tar: «A tsik kataya dze ana, aàla? Wànà aɗaba ana dukw mezime a riŋ aà kwa asa tsiye ya?» 17Ama Yesuw a sər a taraha aka dukw ana ti tsik ahər a. A gwaɗa a tar: «Kà dzalum taŋa dze ana, aàla? I tsik kamala taŋa ya ana, agəra mazəma dukw mezime ya? Wànà kàa tsarakum zukw tsiye? Kàa tikwim a gər tsidze ya? Wànà metsehe kurum mahəndəka ŋa tsidze ya? 18Kurum riŋ nda gà are kurum dze ana, kə̀ ŋgatumar tsiye? Kurum riŋ nda gà zləm kurum dze ana, kà tsarakum tsiye? Wànà kà dzalum aaka gà gər asa tsiye, 19meme na i ge nda ɗaf ata ya? Ɗaf tapa ə̀zləm pəra i sasa iba ya. Mburma dəbuw ə̀zləm tə zəm, a sle a tar dze ana, a zeha ana, tàkwasa ndaw, na kà ndzəkum a?» Ta gwaɗar: «Tàkwasa kurwa gəra sula.» 20Yesuw a gwaɗa a tar i dəba ŋa ya asa: «Dite ɗaf tapa təsəla ŋa aaha i sasa a gà mburma dəbuw faɗ ana, a zeha dze ana, tàkwasa ndaw, na kà ndzəkum asa ya?» Ta gwaɗar aaka: «Tàkwasa təsəla mbaŋa.» 21Yesuw a gwaɗa a tar: «Yawwa, dite aàla na kàa tikwim taŋa a gər tsiye?»
Yesuw a mbəl à mala guluf duwa i Betsayida
22Gà Yesuw nda gà ɓəzla mazazama ŋgat tə tsala aka gìgìze a kwite Betsayida. Ti ndzeha a fata ka, gà mburma ana i fataya, tə zləraha wele duwa a riŋ guluf ŋa. Tə daha, ta hamar dər hinne. Ta gwaɗar: «Zlak wele aaha, kà tiye aakahər yak te.» 23Yesuw a daha, a gəs wele ata i ahər a. A dara à ŋgat i liwiŋ mburma i huɗ kwite ya diriŋ. A daha, a tif tìzle aà kəla ahər, a ger aà are. A tiye aakahər. Dite a gwaɗar: «Kər riŋ ki ŋget a a gà duwa ya?» 24Mala guluf ata a fə̀r ikaba ya ka, a gwaɗar: «Haya, iye riŋ i ŋget a a gà mburma zìyye, kamala gà dizl ɗaf a, tar ihər ti diŋa.» 25I dəba ŋa ya, Yesuw a màr à ahər aka are asa. Aləka wele ata a fə̀r ikaba ya ka, a ŋgat a vatwa dzaydzay lele, are ŋgar aka làmbaɗaba, ndzih ndzih kuɗa. 26Yesuw a gwaɗar: «Yawwa, kinehe ka, daba a ma tsara. Ama kəla ka, ka ti tsik a gà mburma ana i huɗ kwite ya tsa.»
Piyer a ɗe à zləm Yesuw, a gwa, ŋgat ka, *Kiristi
Mata 16:13-20; Luka 9:18-21; Yuhana 6:67-71
27I dəba ŋa ya, gà Yesuw nda gà ɓəzla mazazama ŋgat, ta mah ba, ti de a a kwite ana ika ahəɗ Kaysariya Filip a. Ti ndze aà vatwa ka, Yesuw a gwaɗa a tar: «Gà mburma ta gwa aà iye dze ana, weke?» 28Gà ɓəzla mazazama ŋgat aaha, ta gwaɗar: «Gà mìsle ŋgiɗ ta gwa, kər ka, Yuhana metsìlwìɓè à mburma a yam. Gà mìsle ŋgiɗ asa ta gwa, kər ka, Iliya. Gà mìsle ŋgiɗ ibam asa ta gwa, kər ka, mìsle ŋgiɗ ilik i liwiŋ gà ɓəzla məma à guma Mbulum ana akahər ata ya.» 29Yesuw a gwaɗa a tar i dəba ŋa ya asa: «Dite kurum a ge, kù gwaɗum dze ana, iye ana, weke?» Piyer a gwaɗar aaka: «Kər ka, Kiristi, mala məmbàlà à mburma ana Mbulum a gwa, i slir a kurumehe a ya.» 30Yesuw a tsaraka taŋa ka, a gwaɗa a tar: «Kaɗəŋ, ama ka, ka ti tsikwim zləm gà a wura tsa kəla.»
Yesuw a ɗif à məməta ŋgar ana a ta mbilere a i biye ya,
malahalah ŋa
Mata 16:21-28; Luka 9:22-27
31I dəba ŋa ya, Yesuw a dza ba aà metsìkè dukw ana a ge a ba ika miɗ mba ya, a gà ɓəzla mazazama ŋgat. A gwaɗa a tar: «Iye, *wur ana a dara i təv Mbulum a, say i ti sèwèr a are aka miɗ mba hinne. Gà bàba gà mburma ana ta kwere a gà Yahuda ya, nda gà Əbay gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum tserdze, ti ti lìmiŋ a aba ya, dite ta kiɗ a iye. Ama i huɗ mehinne makər a ka, i hitsere a i məməta ya a mesife asa.» 32Yesuw a tsik a tar bazlam ata ka, nda ndzer, aka həmbər aà tar tsa. I dəba bazlam ata ya ka, Piyer a gəs Yesuw a zlawak. A daha, a palar ahəm. A gwaɗar: «Aàmala na kà tsik kataya dze ya?» 33Yesuw a tsaraka bazlam ŋgar ata kataya ka, a màra ihər a dəba ya tsara, a təv gà asiŋ gà mburma ŋgar aaha ya. A pala ahəm a Piyer hinne. A gwaɗar: «Kər Piyer, madzala gà gər yak ata ka, ma da i təv ga ya, aɗaba kər ka ne ika miɗ gà ka, kamala Əbay sitene ya. Aɗaba madzala gà gər yak ata kà dzala ya ka, biy mburma, tsəka, biy Mbulum tsa.»
34I dəba ŋa ya, Yesuw a zal a gà asiŋ gà mburma nda gà ɓəzla mazazama ŋgat tserdze. Dite a gwaɗa a tar: «Na aka sàs a wur aà medìɗè aka iye ka, ma dzala ba ŋgar asa tsa. Ma zla dizl ɗaf magə̀làwà ŋana kəla pat, kamala ana iye i ti zle a mba ya, dite ma dara, ma zazam iye kuɗa. 35Aɗaba wur ana aka sasar məmbə̀là à mesife ŋgar ɗa ika gər ahəɗ a ka, a dzeye a dər seyiŋ ivaɗ. Ama wur ana a dzeye a à mesife ŋgar aɗaba iye, aɗaba bazlam ŋgwal ŋa aaha i tsik a ya ka, taŋa ka, a mbil a dər ivaɗ asa. 36Na wur aka ŋgat dukw gər ahəɗ tserdze, a ŋgayar ba i gəzləŋ, dite a dzeye a dər à mesife ŋgar ana, duwa a riŋ a ger a ŋgulum a? Awaŋ. 37Aɗaba duwa a riŋ na mburma à mbìrwìɗ a dərra mesife ŋgar a təv Mbulum a ya? Awaŋ. 38Kurum gà mburma ana kinehe, kurum riŋ i magər gà na ti niw Mbulum a. Dite ka, wur ana a gweɗe a ter a ka, i sər Yesuw tsa, nda bazlam ana i tsik a tsəka, iye, wur ana a dara i təv Mbulum a tekeɗe, i ti tsik a kataya mbaŋa. I ti niw a ŋgat i təv ana i dere a nda ndzəɗa Tsir gà ana ti zlibe a dər a, dite nda gà gawla Tsir gà ana a ndzək tar a.»
Цяпер абрана:
Markus 8: gnd
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Wycliffe Bible Translators, Inc. All rights reserved.