Markus 10
10
Guma Yesuw i təv mimìyàkà aba gà zal nda məkəs a
Mata 19:1-12; Luka 16:18
1I dəba ŋa ya, Yesuw a hitse i Kafarnahum a, a da aka ahəɗ Yuda. Aləka a hitse ika ahəɗ ata ya asa, a da aka lìdè dulwa Yurdan. A ndzeha a fata ka, gà mburma ana i fataya, ti yaha ba gər a təv ŋgar hinne asa. Dite a tsik a tar guma ŋgar, kamala ana a tsikewa kəla pat a. 2Gà *Farisa duwa, tə daha a təv ŋgar, a sàs a tar maslàlà à ŋgat i yam a. Ta gwaɗar: «Məpala ahəm kwa dze ana, aka vəl vatwa a mburma aà madalawa məkəs ŋgar a, tsəna, aka vəl tsiye?» 3Yesuw a gwaɗa a tar aaka: «Dze ana, məpala ahəm awara na Musa a gwaɗa a kurum, zazamum a?» 4Ta gwaɗar: «Məpala ahəm Musa ka, aka vəl a mər vatwa aà madalawa məkəs, na mburma ŋa aka vəlar wakita madalawa ŋgat a ahər a.»*fa* 5Yesuw a gwaɗa a tar: «Musa a tsik a kurum kataya ka, aɗaba ana gəzləŋ kurum makula ŋa ya, matsəɓatsəɓ iɗəm hinne ya. 6Ama akahər ana Mbulum a ge gà dukw tserdze ya ka, kataya tsa. A riŋ mewetse ŋa i wakita Mbulum ka: <A ge ka, gà asləka nda məkəs.*fb* 7Aɗaba taŋa na kinehe asləka a miyek a à gà tsir ŋgar nda mama ŋgar, dite ti ndze a nda məkəs ŋgar a. 8Tar ata sula ya ka, ti ne a ba ilik.> Kərga taŋa ya kaɗəŋ, ba tar ka, sula asa tsa. Ama ba tar ka, aka ne ba ilik kuɗa.*fc* 9Aɗaba taŋa, dukw ana Mbulum a gaw akaba kamala taŋa ya ka, wura ma ta kurə̀zl dər iba ya asa tsa.»
10I dəba ŋa ya, gà Yesuw nda gà ɓəzla mazazama ŋgat tə dza ba a ga duwa. I təv ana tar riŋ i fataya ka, gà mburma ŋgar ata tə tsam aà ŋgat bazlam ata a tsik a tar a asa. 11Yesuw a gwaɗa a tar: «Ku weke na aka miyak à məkəs ŋgar, dite aka zla aɗəm biy ŋgiɗ ka, a ge muva, a ge bakal aà məkəs ŋgar a miviye ŋa aaha ya. 12Gà məkəs ibam ka, na aka miyak à zal ŋgar, aka da a zal ŋgiɗ ka, aka ge muva mbaŋa asa.»
Yesuw a pise ahəm a gà ɓəza ndirkiz
Mata 19:13-15; Luka 18:15-17
13Aləka i dəba ŋa ya, gà mburma tə daha à ɓəza ndirkiz a təv Yesuw, aɗaba ma tikeye aka tar ahər te, mi pise a tar ahəm. Ama gà ɓəzla mazazama Yesuw ta ŋgat a gà mburma ata ti dehe a à gà ɓəza a təv ŋgar a ka, ta pala a tar ahəm. A sàs a tar na ti dehe a à gà ɓəza ata ya tsa. 14Yesuw a tsaraka məpala ahəm gà mburma ŋgar ata ta pele a ahəm a gà tsir gà ɓəza ata ya ka, a tsəɓar. A gwaɗa a tar: «Mandza, ka palum a tar ahəm tsa, tə dara à gà ɓəza a təv ga ya. Aɗaba *mekwere Mbulum a waya ka, medzibe gà mburma ana kamala gà ɓəza aaha ya, na ti de aɗəm a ya. 15Iye ihər i tsik a kurum a nda ndzer: Wur ana aka gəs mekwere Əbay Mbulum kamala kəla ndirkiz a tsəka, a sle aà mede aɗəm a tsidze.» 16I dəba ŋa ya, Yesuw a daha, a gəs aaba gà ɓəza aaha ilik ilik tserdze. A tikeye aka tar ahər ŋgar, a pise a tar ahəm.
Mege metsehe a mazazama Mbulum agəra
limana ana hinne ya
Mata 19:16-30; Luka 18:18-30
17I dəba ŋa ya, Yesuw à meh a ba. I təv ana a riŋ a de a ya ka, wele duwa a riŋ a valaha a təv ŋgar. A làhar a bəɗ, a dzar gurmits a biye aka miɗ ŋgar. A gwaɗar: «Əbay gà, kər na ŋgwal ŋa ya. I ge a dze ana, là, na dite i ŋget a mesife ana à ndìv a tsa aà biybiy a?» 18Yesuw a gwaɗar: «Aàla na kà zeliŋ ŋgwal ŋa ya? Wura a riŋ ŋgwal ŋa tsa, say na Mbulum ilik tsiye. 19Aɗaba kà sər məpala ahəm Mbulum ana a gwa ka: <Kə̀ kəɗ mburma tsa, ki ge muva tsa, ki ge akəl tsa, kà sàs pàrsa aà mburma tsa, ka bana duwa aà mburma ya mibene tsa, dite zàmbaɗa à gà dede yak, nda mama yak> a tsiye?»*fd* 20Wele ata a gwaɗar aaka: «Əbay ga, Yàa gəs gà dukw ata tserdze ya, daga aà gər kəla ndirkiz a, Yàa ge tsa.» 21Yesuw a fə̀r ahər ka, nda gà maŋgayaba lele. A gwaɗar: «Ama dukw ilik aka mətsa aà kər a i gà dukw ata ka ɗama dze ya.» A gwaɗar: «Daha, ka dzawa à gà dukw yak fit, dite kà dzaya siŋgwe ŋa a gà ɓəzla matawak. Na kàa ge dər kataya ka, ki ŋget a limana ana batsah ŋa, à ndìv a tsa i təv Mbulum a. I dəba ŋa ya, ka dara, ka zazam iye kuɗa.» 22Ama wele ata a tsaraka bazlam ŋgar ata tsara ka, a mət i are ya sə̀rràt. A daba i fataya tsara nda gà matsəɓatsəɓ, aɗaba ana ŋgat ka, Əbay ŋa hinne ya.
23Aləka Yesuw a mbəɗ aba a təv gà ɓəzla mazazama ŋgat ana ti ler a. A gwaɗa a tar: «Mawùràba aà mada a mekwere Əbay Mbulum gà ɓəzla limana ka, hinne.» 24Bazlam Yesuw ata a tsik kataya ya ka, a zla arəv aà gà ɓəzla mazazama ŋgat ata ya. Ama Yesuw a gwaɗa a tar asa: «Gà dəm gà, i gwaɗa a kurum ka, mawùràba aà mada a mekwere Əbay Mbulum gà ɓəzla limana ka, hinne. 25Ndəna gà ɓəzla limana ti de a a mekwere Əbay Mbulum a ka, ŋgulum zlìgwèmè ma da nda biye lepìrè.» 26Bazlam ŋgar ata a tsik a ka, a zla arəv aà gà mburma ata ya hinne asa. Ta gwaɗaba ika magər tar: «Na kataya ana, weke na a sle aà mimbile a i təv Mbulum a?» 27I dəba ŋa ya, Yesuw a fàfəl a tar aaka, a gwaɗa a tar: «I təv mburma ka, mawùràba ŋa. Ama i təv Mbulum ka, mawùràba ŋa tsa. Aɗaba i təv Mbulum ka, duwa a riŋ na a ye ahər a ka, a riŋ tsa.»
28I dəba ŋa ya, Piyer a gwaɗar aaka tsara: «Araha, mər ka, maa miyak aba à gà dukw mər a tserdze, maa dara, maa zazam kər.» 29Yesuw a gwaɗar aaka tsara: «Haya kwaŋ, taŋa ka, lele. Ama i tsik a kurum a ka, nda ndzer kəla: Na wura aka miyak aba à ga ŋgar a, kige tsa à gà damər ŋgar, nda gà mama ŋgar, nda gà tsir ŋgar, nda gà ɓəza ŋgar, nda gà gùvàh ŋgar a, 30agəra iye, dite agəra bazlam ŋgwal ŋa aaha i tsik a ya ka, a ŋget aɗəm a, à zè a taŋa a miyak dər aba kinehe ya: mege ga, nda gà damər, nda gà məmər, nda gà ɓəza, dite nda gà gùvàh ka, medzige dərməka, mege i təv ana aka sèwèr are agəra bazlam gà ya tekeɗe. Dite a ta ŋget a mesife ana à ndìv a tsa aà biybiy a, aka miɗ mbaŋa. 31Ama gà mburma ana kinehe ta gwa, gà mər ŋa ya ka, gà asiŋ ŋa hinne ti ti ne gà ɓəzla dəba mba ika miɗ Mbulum. Dite gà na kinehe ti tike tar aà ahər tsiye ka, gà asiŋ ŋa ibam hinne, ti ti ne a gà ɓəzla aka miɗ mbaŋa asa.»
Yesuw a ɗif à məməta ŋgar ana a ta hitsere a i biye ya,
məmakər ŋa
Mata 20:17-19; Luka 18:31-34
32Aləka gà Yesuw nda gà ɓəzla mazazama ŋgat ata tar riŋ aà vatwa, ti de a a Yeruzalem. Yesuw ika miɗ tar, gà ɓəzla mazazama ŋgat ata ta ge magəɗa hinne. Ta dza ba aà medzedzere. Gà asiŋ gà mburma ana ti zezem a tar a tekeɗe, tar riŋ ta ge a magəɗa mbaŋa. Yesuw a ndzək gà ɓəzla mazazama ŋgat aaha kurwa gəra sula ya, i liwiŋ tar a, kətsah tə da ndàra a zlawak. Tə daha, a dza ba aà metsìkè a tar kamala dukw ana a tsikewa a tar, a ta ge a ba mba nda gà ŋgat aka miɗ bise ya asa. 33A gwaɗa a tar: «Tsarakum, araha kwa ihər ki tèkwe a a Yeruzalem. Aləka, aka təv ana kàa ndzekwaha a fataya ka, iye, *wur ana a dara i təv Mbulum a, tì ta gis a iye, dite ta vile a iye a ahər a gà bàba gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum. Ta giŋ a seriye mekìɗe. Ama ta vile a iye a ahər a gà slele ana i fata tə sər Mbulum tsiye. 34Gà mburma ata ti sewle aà ìyeŋa, ti tif a aà iye tìzle, ta gìzl a iye nda megwiymbiɗ hinne mbaŋa asa. Dite ta kiɗ a iye kuɗa. Ama i huɗ mehinne makər a ka, i mbilere a i biye ya.»
Gà Zakup nda Yuhana ta wiz təv mendze aà Yesuw zləmana
Mata 20:20-28; Luka 22:24-27
35I dəba ŋa ya, gà Zakup nda Yuhana, tar gà ɓəza Zebede, tə daha a təv Yesuw. Ta gwaɗar: «Əbay, a sàs a mər ka, mìi wiz aà kər a duwa zaakwa.» 36Yesuw a gwaɗa a tar: «Ki wizwim a dze ana, là na i vile a kurum a ya?» 37Ta gwaɗar: «Mìi wiz a ka, aka təv ana kàa da a Əbay a ka, ka vəl a mər vatwa aà mimbekeha, ilik aka tsèke ahər mezime yak, dite ilik ŋa aaha aka tsèke ahər gùla yak, mìi ne a gà ɓəzla sik yak te, na mì gwa ya.» 38Ama Yesuw a gwaɗa a tar aaka: «Kurum ka, kà sərum dukw ana ki wizwim a ya tsa. Wànà ki slwim a aà masà mesewere gà ana i ti sèwèr a mba ya ya? Ki slwim a aà məbàrà ba a mesewere are gà ana i ti sèwèr a are ya mbaŋa ya?» 39Ta gwaɗar aaka: «Haya, mìi sliŋa.» Yesuw a gwaɗa a tar: «Kaɗəŋ, pàrsa iɗəm tsa, kurum tekeɗe, ki ti sèwèrwim a are kamala ana i ti sèwèr a are ya mbaŋa. 40Ama kəla ka, mandza aka tsèke ahər mezime gà, kige tsa aka tsèke ahər gùla gà ka, iye tsa na i tsik a taŋa ya. Aɗaba təv mendze ata ka, biy gà mburma ana Mbulum a pala tar a dukw tar.»
41Aləka gà asiŋ gà ɓəzla mazazama Yesuw a kurwa ŋa aaha, tə tsaraka bazlam ata ka, ta ge arəv a təv gà Zakup nda Yuhana. 42Aɗaba taŋa Yesuw a tsaraka bazlam tar ata ka, a zal a tar a təv ilik ŋa tserdze. A gwaɗa a tar: «Kurum kà sərum ka, gà bàba gà Əbay gər ahəɗ ana tar riŋ ta kwere a mburma nda ndzəɗa, ta ge a ter a magəɗa ya. Gà wele ana mburma a ge a ter a magəɗa, ti slir a mburma ka, ti niw a tsiye. 43Ama taŋa ka, a de a tsa na ika magər kurum a. Na aka sàs a wura aà mene batsah Əbay i təv Mbulum ka, say ma ne mala meslire i liwiŋ kurum ivaɗ. 44Na aka sàs a wura i liwiŋ kurum aà mene mala aka miɗ ka, say ma ne ɓele ika miɗ mburma tserdze i təv magəsa ahəm a. 45Aɗaba iye, *wur ana a dara i təv Mbulum a tekeɗe, i dara ka, aà mazlàkà mburma ya, tsəka, mburma tsa na mà zlak iye ya. Iye i dzeye a à mesife gà ka, aà mumbùrùɗà dərra mburma i bakal a.»
Yesuw a mbəl à wele duwa guluf ŋa, zləm ŋgar Bartimawus
Mata 20:29-34; Luka 18:35-43
46I dəba ŋa ya, gà Yesuw nda gà ɓəzla mazazama ŋgat ti ndze a Yeriko. Ti ndzeha a fata ka, gà mburma hinne tə dəɗ aka tar. Aləka aka təv ana ti dere a iɗəm a ka, tàa le aà wele duwa a riŋ guluf ŋa, mandza ŋa aà gùva vatwa, à ŋgelebe a dukw mezime. Zləm ŋgar Bartimawus. Ŋgat ka, kəla Timawus. 47A tsaraka meɗè zləm Yesuw gà Nazaret ana a dere a ndaka vatwa ata ya ka, a dza ba aà mezelereha ŋgəlakəkka hinne. A gwaɗaraha: «Yesuw, gwala Dawda, i ndzek are tsehe te tsiye? Zlak iye te.» 48Gà mburma hinne tə daha, ta palar ahəm. Ta gwaɗar: «Ndza ɗikɗik.» Ama wele ata a gəs bazlam tar ata tsa. A səkah à Mewideye hinne nda magala ŋgəlakəkka ivaɗ asa. A gwa: «Gwala Dawda, i ndzek are tsehe te tsiye?» 49Yesuw a tsaraka ka, a hitse dzeŋ. A gwaɗa a gà ɓəzla mazazama ŋgat ata: «Zelwimiŋaraha, ma dara a təv ga ya.» Gà mburma ata tə zalaha a mala guluf ata. Ta gwaɗar: «Hitse, ŋgayaba, arəv ma da aà kər a tsa, a riŋ a zelekiŋa.» 50I dəba ŋa ya, wele ata a hitse aà mbulum tsara. Kètsèkètsè ŋgar duwa ihər zùbəl ŋa, a mba dər aà mede tsa. A yà aba ya. A mbàha aba a təv ŋgar. 51A daha ka, Yesuw a gwaɗar: «I gek dze ana, dukùla na a sàsak a?» Mala guluf ata a gwaɗar aaka: «Əbay, a sèsiŋ ka, lèmbeɗiŋ are gà te.» 52Yesuw a gwaɗar: «Daba, are yak aka lə̀mbaɗa ba. Megìse yak ana kì gis iye ya ka, aka mbəl à kər.» I dəba bazlam Yesuw ata a tsikar kataya ya tsara ka, wurat are ŋgar a hə̀ndə̀k ba. Dite a dəɗ aka Yesuw, tə da akaba tserdze.
Цяпер абрана:
Markus 10: gnd
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Wycliffe Bible Translators, Inc. All rights reserved.