Mark 14
14
Kɨbog lo Juipg sahn ɗɔb tɔl Jeju
(Oo Mat 26:1-5; Luk 22:1-2)
1Kam ndɔt kɨjoo a ne, a i ɗanah Pakɨ, kɨ ɗanah bɨna kɨkanj berrkasɨ. Kɨbog lo ngéjanyamosɨkadkari, kɨbog lo ngéndang maktub sahn ɗob mad kad kɨ'n hɔn Jeju kɨkanj kad koosɨdeg gerɨn kad n'tɔlɨna. 2Kɨtɔ elɨn na anan: Maj kad kɨ hɔa kaglo Pakɨt al, na ɓeta kɨse ɓai.
Dekɨdẽ mad urr yib kɨ kootmbĩ dɔ Jejut
(Oo Mat 26:6-13; Jã 12:1-8; Luk 7:36-50)
3Jeju i kam ɓet kɨ Betanit, kam kujt lo Simõ kɨ ngebanj, lon ndɨ san nya ɓaitɔ ye, dekɨdẽ mad ɗe kɨ kú albatɨr, kɨ yib nard kɨ kootmbĩ kɨ gata i ngãi kamt, dekɨdẽ'n non tɔ kú ye, urr yib kɨ kootmbĩ kɨ kamt dɔ Jejut. 4Deg madg ku ĩgɨtɨn ndin lo nyasat ye, ɗan wong, ad elɨn anan: Kɨtɔɗi dekɨdẽ ɗa tujɨn yib kɨ kootmbĩ titbe a? Kara i ɗi a? 5Kɨtɔ yib'n non, ĩla de ɗaw a ne asɨ kad ngah nar kɨ a tee ɓu mɨta kari, kɨta ɗan kɨ ngéndog. Wong ɗad ad kɔlɨn kɨ dekɨdẽ'n non ngãi. 6Na Jeju eld an: I nyan dekɨdẽ nõ jen. Kɨtɔɗi i ɗan sia wong a? Nya kɨmaj la ɗa sem ye. 7Kɨtɔ ngéndog ndɨn nat sesɨ kɨ ndɔgbe, ĩla i ndigɨn a ne, a asɨn ɗa sed maj kɨ kaglo tube; na mĩ taa ne, m'a mĩ nat sesɨ kɨ ndɔgbe al. 8Dekɨdẽ'n non ɗa nya'n asɨ ɗa; kɨta wur dãrom kɨ yib kɨ kootmbĩ kɨta ɗan lo dubɨm. 9I rota la m'ndɨ m'elsɨ ye. Lokɨɗen a lan mber Hoita kɨmaj kam dɔningt kɨtaagbe a ne, a ɔrrɨn hoi nya'n dekɨdẽ'n ɗan ɗa, kad kam deg woi dɔ al.
Judas ndig la Jeju ji madngétaagt
(Oo Mat 26:14-16; Luk 22:3-6)
10Judas Iskariot, kɨkɨɗa ku ngéndoogt kɨkɨlah gidaijoo aw ro kɨbogt lo ngéjanyamosɨkadkari kɨtakad'n la Jeju jidt. 11Kɨbog lo ngéjanyamosɨkadkari lon oon dɔ ta 'nten ye, ɗan ronel ngãi ad unɨn kɔd kad n'adɨna nar. Ad Judas sah kaglo kɨmaj kad n'la Jeju ji madngétaagt.
Jeju sanya nat kɨ ngéndoog lon kɨ ndɔ Pakɨ
(Oo Mat 26:17-36; Luk 22:7-14,21-23; Jã 13:21-30; 1 Kor 11:23-25)
12I ndɔ kɨ dasabang lo ɗa nah bɨna kɨkanj berrkasɨ, ad i ndɔ'n a tɔlɨn ngan batg kɨta Pakɨ. Ngéndoog lo Jeju elɨna anan: Lokɨɗen i ndig kad kɨ j'awt kɨ ɗago nya kɨta sa Pakɨt jadi a? 13Jeju la kɨ ngéndoog lon joo, eld an: Awɨn kam ɓet, a i ngahn de mad kɨ to ɓir man. I ndulon go de'n non. 14Lon and kam kujt mad a ne, a elɨn kɨɓe ngekuj anan: Bɨraɓe ndɨje an: Ke kuj ɗa mbah'n n'an sanya Pakɨt kɨ ngéndoog lon ye i ɗa? 15De'n non a dasɨ kuj mad kɨbobe kɨ dõ, kɨ nyag kɨ kamt i kɨɗa go tube woi; i nõbe la a i ɗan go nyagt kɨta Pakɨ kɨtatɔj. 16Ngéndoog tee awɨn kam ɓet, nyag tube'n eld taa ye, ɗan nya tit'n eldɨn ye be, ad ɗan go lo kɨta sanya Pakɨt nõbe.
17Lo ndɨ dub, Jeju aw kɨ ngéndoog lon kɨkɨlah gidaijoo. 18Lon ndɨn ber ta nyasat, na mbã girr sanya nat ye, Jeju eld an: Rota la m'ndɨ m'elsɨ ye, kɨkɨɗa kusɨt a lam ji degt, ad i de'n ndɨ sanya nat sem. 19Ngéndoog loa mbã girr ɗa kamkil, na ndɨjen Jeju kɨɗa kɨɗa anan: I mĩ a? 20Jeju eld an: I kɨkɨɗa ku kɨkɨlah gidaijoot, i de'n ndɨ la jin go lomt kam ngo nyasat kɨɗabe. 21Rota, Ngon de ɗe dɔningt kɨta koi tit'n Maktub kɨndang elta dan dɔa kete, na de'n a la Ngon De ji madngétaagt ye, taa tɔ rum. Maj tɔi kad oojɨn de'n non al.
Nyasa lo Bɨraɓe
(Oo Mat 26:26-30; Luk 22:14-20; 1 Kor 11:23-25)
22Lon ndɨ san nya ɓaitɔ ye, Jeju un bɨna, njang dɔ, hɔ tet, ad ngéndoog lon, na eld an: I taan. In ten i dãrom. 23Kamla, un kop man nduu, got'n ɗa mersi Luwah ye, ad ngéndoog lon ad ãin. 24Jeju eld an: Ĩn ten i mosɨm, ad i mosɨ kunkɔ'n ũ kɔ kɨta koosɨdeg. 25Rota la m'ndɨ m'elsɨ ye, m'a m'ãi man kand nduu gog al ta, mbã ndɔt'n m'a m'ãi man kand nduu kɨ kij a ne, a i kam kõɓet lo Luwah.
26Jeju kɨ ngéndoog lon ɔsɨn pa Paag, kamla awɨn dɔ mbalbo ɓirgt.
Jeju el Pierr kete kad a maj ta gerɨn
(Oo Mat 26:31-35; Luk 22:31-34; Jã 13:36-38)
27Jeju eld an: Ĩn tube a i nyàmɨn kɔ, kɨta ndangɨn kam maktubt kɨkunjɗang anan: M'am nda ngéngombatg m'tɔla, na batg tɔ, a tĩn na kɨɗa kɨɗa. 28Na got'n m'a m'ɓai ku ngékoit ye, m'a m'aw kete nõsɨt kad'm ngoosɨ dɔning Galilet. 29Na Pierr el an: Ke deg tube mbetɨn kaa ne, mĩ m'am mbet al. 30Jeju tura an: Rota la m'ndɨ m'eli ye, ndɔla 'nten kete kad kɨnja ko nja joo a ne, a i maj ta gerɨm nja mɨta. 31Na Pierr tel elta kɨ tɔgɨn ɓaitɔ an: Ke i kɨ lo koit kaa ne, m'a m'oi sei, na m'am maj ta geri al bat. Titbe tɔ la ngéndoog tube elɨn ne ho ye.
Jeju elta kɨ Luwah lot kɨ tɔa i Jesemani
(Oo Mat 26:36-46; Luk 22:40-46)
32Goot gog awɨn lot mad kɨ tɔa i Jesemani, Jeju el ngéndoog lon an: I ndɨn ber nẽbe, na m'a m'aw m'elta kɨ Luwah kamtã. 33Jeju un Pierr, kɨ Jak, kɨ Jã nat sen, mba girr tõ ɗusɨɗusɨ, ad kama ud mut kɨ rotagt. 34El ngéndoog an: Ndilɨm hɔndo tɔi dɔ mbã tee koi; i ndɨn nẽbe, i ndɨn dɔgt. 35Ndɔt kɨ kete ngonsĩ, aw so ber, elta kɨ Luwah an: Ĩla i goɗobat a ne, kɨ kaglo daiyo'n non kɨ tɔi kɔ. 36El an: Aba, Bɔw i asɨ ɗa nyag tube, ĩla i root a ne, un kɔp daiyo 'nten kɔ; na kad i ndig lom al, na kɨ i ndig loi tã. 37Jeju tel ɗe ro ngéndoogt lon, na ngahd to ɓin. El Pierr an: Simõ, i to i ɓi e? Asɨ ndɨ dɔgt dɔkàd kɨɗa ale? 38I ndɨn dɔgt. Elɨn ta kɨ Luwah i kɔn ne kad i ɗan bijir lon násɨn ne. Rota, ndil ndig ɗa maj, na dãro i tõ.
39Tel aw gog, elta kɨ Luwah, ro ta kɨ kɨɗa'n el Luwah kete nõ la tel el tɔ ye. 40Tel ɗe gog ro ngéndoogt lon, ngahd to ɓin kɨta kumd ɔi dɨrɨr, oon ta kɨ kad turɨna al. 41Jeju aw, na tel ɗe gog kɨkõmɨta eld an: I to i ɓin ɓaitɔ ɔ? Ye, i ɓin ɓaita. Dɔkàd asɨ woi, oon. A lan Ngon de ji degt kɨ ngéɗamajalg. 42I ɓain dõ ad kɨ j'awɨn. Oon de kɨ ngelam ji madngétaagt i nderbe.
Judas la Jeju ji madngétaagt ad hɔna
(Oo Mat 26:47-56; Luk 22:47-53; Jã 18:2-12)
43Lon Jeju ɗa elta ɓaitɔ ye, Judas, kɨkɨɗa ku kɨkɨlah gidaijoot ɗe. Koosɨdeg'n nat sia. Kɨbog lo ngéjanyamosɨkadkari, kɨ ngéndang maktubg, kɨ kɨbog lo Juipg ton nyaɗɔɔg kɨ gɔlg jidt. 44Judas kɨ ngelaa ji madngétaagt ad'd nyakɔj mad kete woi, el an: De'n m'am ɗaa lapia njuta a ne, de'n non la i ĩ ye. I hɔna, ɔrrɨna, awɨn sia, na i ngomɨna maj.
45Lon ɗe teen rodt ye, tentenbe Judas ndɔt kɨ ro Jejut ela an: Ngendooj. Kamla ɗaa lapia njuta. 46Taa ne, deg'n non ndan jid dɔ Jejut, hɔna ne. 47Na kɨkɨɗa ku ngéndoogt loa'n ɗa lot'n non ye, tui kiyaɗɔɔ lon kam hawat, gan mbi ɓer lo bɨra ngéjanyamosɨkadkari gang ɓat. 48Jeju eld an: I ɗen kɨ kiyaɗɔɔg kɨ gɔlg kad i hɔmɨn ne, tit deg kɨ ngéhɔ de kɨ ngekumɗob be. 49Kɨ ndɔg tube mĩ nat sesɨ kam kuj ndub Luwaht ho, m'ndoo deg ho, na i hɔmɨn al, na nya 'nten ɗa nya kɨtakad takɨndang kam maktubt tɔlɨn konɨn. 50Kamla ngéndoog lo Jeju tube tĩnyana, na ãin na kɨɗa kɨɗa. 51Basa mad ndulo go Jeju ga kub drap koon la dɔnt ye, ad hɔna, 52na basan'n non tĩ nya kub drap kɔ, na su lui kɨ ron kɨ kil yolel.
Awɨn kɨ Jeju lo gangtat lo Juipg
(Oo Mat 26:57-68; Luk 22:54-55,63-71; Jã 18:13-24)
53Ɔrrɨn Jeju awɨn sia ro bɨra ngejanyamosɨkadkarit. Kɨbog lo ngejanyamosɨkadkari, kɨ kɨbog lo Juipg ngéndang maktub kawɨn na tube kɨ nat. 54Pierr ndulo go Jeju ko sãi, mbã tee natɓet lo bɨra ngejanyamosɨkadkari. Aw ndɨ nat sed ngékɨlaɓerg ndɨ tiw horr.
55Kɨbog lo ngéjanyamosɨkari, kɨ kɨbog lo Juipg tube sahn ta mad kɨ ngang kɨ'n lan dɔ Jejut kad ngangɨn ne ta koi dɔat, na ngahn ta mad al bat. 56Kɨtɔ 'nten deg ngãibe man naj kɨ ngom dɔat, na manaj lod so go nat al. 57Kɨmadg ɓain dõ, man naj kɨ ngom dɔat anan: 58J'oo dɔ el an: M'a m'tuj kuj ndub Luwah'n ɗan, ĩn deg ɗan kɨjid kɔ, na kam ndɔt kɨmita a ne, m'a m'ɗa kɨɗang kɨkanj ji deg.
59Na titbe kaa ne, najkɨmag lod son go nat al. 60Taa ne, bɨra dɔ ngéjanyamosɨkadkari ɓai ɗa dõ dan degt, na ndɨje ta Jeju an: A kɨ ta mad kad i tur dɔ tagt lo deg'n ɗa elɨn kɨ dɔit ale? 61Na Jeju ɗa gon mbo, turta mad al. Bɨra ngéjanyamosɨkadkari tel ndɨjea ta gog an: Ĩla i Krist Ngon Luwah kɨ asɨ ta ndub yo? 62Jeju tur an: Ã, i mĩ, a oon Ngon de a ndɨ dɔ jikõ Luwaht kɨ Ngetɔg tube, a ɗe kam kilndiit kɨ dõ dɔrãt. 63Taa ne, bɨra ngéjanyamosɨkadkari hɔ kub lon til, na el kɨbo an: Kɨ ge ngémanajg mad dɔt tɔ ɔ? 64Oon dɔ takɨmal'n el dɔ Luwaht ye, ta ɗi i gaan dɔt a? Deg tube gangɨn ta dɔ Jejut anan: Ta hɔa, asɨ koi. 65Kɨmadg mbã girr tiw horrtad dɔat. Utɨn takuma kɨ jid, urɨn jid tɨgan ne dɔa kamla elɨna anan: I ndɔ ndil ɔj'j de'n tɨgai nõ. Goot a ne, ngéɗakɨlag lo ngéjanyamosɨkadkari, ɗe hɔn Jeju, tɨndana kɨ dajid.
Pierr maj ta ger Jeju
(Oo Mat 26:59-75; Luk 22:55-62; Jã 18:15-18,25-27)
66Lon Pierr i ber nat ɓet ɓaitɔ ye, ɓer kɨdẽ mad lo bɨra ngejanyamosɨkadkari ɗe. 67Oo Pierr ndɨ tiw horta, nɔla ngãi kamla ela an: Ĩ kaa ne, i nat kɨ Jeju kɨ Najaret ho al a? 68Na Pierr tura an: M'ger ta'n i ndɨ el nõ al. Kamla tee ɗa tabit ndogt tɨga. Taa ne, kɨnja kɔ. 69Ɓer kɨdẽ'n non oo Pierr ɓaitɔ, na tel el deg'n ɗan lot'n non gog an: De'n ɗan, i kɨkɨɗa ku ngéndoogt lo Jeju ho. 70Na Pierr maj gog tɔ. Goot ngonsĩ a ne, deg'n ɗan lot'n non ye, elɨn Pierr gog tɔ anan: I je, ĩ kɨkɨɗa kudt ho kɨta ĩ de kɨ Galilet ho. 71Kamla Pierr mba girr nda yo an: Kɨ Luwah ndɔlɨm, ĩla m'ndɨ m'eltakɨbal; m'ger de'n i ɗa elɨn ta loa nõ al bat. 72Na kɨnja ko, kɨkõjoo. Taa ne, kam Pierr gah dɔ tat'n Jeju ela nõ: Kete kad kɨnja ko nja joo a ne, a i maj ta gerɨm nja mɨta. Lon kam Pierr gah dɔ tat'n non ye, nõ ngãi.
Цяпер абрана:
Mark 14: MlL
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Mbai Bible Revision © Bible Society of Chad, 2015.